غنوة وفكرة

[DR.BIBO]

الحلقة الخامسه

الفكرة: هى هل ممكن تدفع فى الحريه حياتك وهنا انا مبتكلمش عن حريه الاوطان لا اناقصدى حريتك فى التصرف فى التفكير حتى فى الاحلام

حرية التصرف والتفكير لازم تكون بحدود ومرتبطة بالواقع بشكل ما...علشان ميبقاش التفكير ده من الأوهام...

تمام وفعلا لازم تبقى حرية الانسان دايما مسئوله عارف حدوده فين لان الحرية المطلقة ممكن تؤدى للفوضى
وياترى عمرك حسيت/ى انك ضيعت فترة من عمرك فى الاوهام ولو حصلك كده هتتصرف ازاى

بالنسبة للأوهام دي مليانة في الحياة.. حتي ولو الواحد واخد باله من إن هوا لايقع فيها..واللي بيحصل إننا نقع ونقوم ونقع ونقوم....وهكذا.. بس أهم حاجة الواحد يستفاد من كل وقعه علشان نقلل العملية دي شوية.. وميكونش أهبل ويروح يقع في الفخ ده كل مرة...كلنا بيحصلنا الوقعة دي..الصغار والكبار..الذكي والمغفل.. والكل.. بس بنسب متفاوتة بالتأكيد واللي بيكسب هوا اللي بيستفاد..


وهل البراءة فى الدنيا شىء معدش ينفع يكون موجود يعنى اللى الانسان اللى بيتعامل ببراءة وعلى فطرته مع الناس فعلا الناس بتعامله على انه اهبل ولا بيشوفو ان ده ميزة فيه

البراءة والفطرة بتخلي الواحد ضميره صاحي وقلبه نقي ومطمئن بالتأكيد....ولكن موش معني كده إن أنا أمشي بيها بس ..لأ.. لازم تكون إيد فيها الفطرة والبراءة والطيبة....وإيد تانية فيها الشدة والحسم ونبقي مصحصحين كويس.. لأن الناس فيهم إللي مينفعش معاهم الطيبة طول الوقت ودايماً موجود ناس متخصصين في اصطياد النوع البرئ جداً واللي نيته وفطرته طول الوقت...النوع المُستغل ده لازم نصحصح معاه ونتعامل معاه بحذر طبعاً وبيبقي لازم الموضوع يتحسم في الحالة دي..وكل ده علشان برده لانقع في الأوهام وتبقي تفكيرنا واقعي وفي نفس الواقت لانفقد إنسانيتنا ..

الإتزان والوسطية في كل حاجة بيبقي حاجة كويسة...وساعات نميل هنا شوية وهنا شوية بس الاهم نرجع نحقق الإتزان ده...اتزان النفس والعقل


تمام كلام جميل ومنطقى وفعلا خير الامور الوسط ولازم الانسان يبقى قادر يفرق بين الطيبه وبين انه يسيب اللى حواليه يستغلوه
بس كده مستنية اسمع رايكو ويارب الحلقة تعجبكو

شكراً د.هبة علي فتح باب للمناقشة

شكرا لحضرتك دكتور محمد لاضافة حضرتك للحلقة

[DR.BIBO]

أنا باعتذر من حضرتك يا دوك ،، بس الموضوع متوقف بقاله فترة كبيرة ،، و مضطر للأسف اخفض عدد المواضيع المثبتة عشان أدي الفرصة للمواضيع الجديدة ،، برغم معزة الموضوع ده بالذات عندي ،، إن شاء الله لو رجع ينشط تاني ،، هثبته تاني إن شاء الله ،، و اتمنى ده يحصل لأن الموضوع بجد متميز و يحمل طابعه الخاص ..

انا متشكرة لحضرتك جدا يادكتور محمد ومفيش داعى للاعتذار لان فعلا الموضوع واقف بقاله فترة كبيرة
ومبسوطة بجدان حضرتك شايف الموضوع ده كده

اقتباس
المشاركة الأصلية كتبت بواسطة DR.BIBO

الفكرة: هى هل ممكن تدفع فى الحريه حياتك وهنا انا مبتكلمش عن حريه الاوطان لا انا قصدى حريتك فى التصرف فى التفكير حتى فى الاحلام

أنا ممكن ادفع تمن حياتي للحرية لغيري ،، لأني لو مت هبقى عملت إيه كده بالحرية !!! ..

طبعا حرية التصرف دي كلمة كبيرة جدا ،، لازم نحجمها شوية .. لأننا في مجتمع إسلامي شرقي ،، له ضوابطه و تقاليده و عاداته .. أنا طبعا مع الحرية ،، و لكن بضوابط الشرع و العرف ،، أيا كانت هذه الحرية ،،،

أحب أضيف حاجة .. جملة : " أنا حر ،، اعمل اللي أنا عايزه " .. جملة مستفزة و خاطئة جدا .. الصح بقى إيه ،، أنت حر ما لم تضر .. لأن أنا مش عايش لوحدي ،، لازم أراعي تعاليم ديني ،، أصول مجتمعي الشرقي العربي الأصيل ،،، أراعي الناس و شعورهم كمان .. فالحرية مطلوبة و لكن كما ذكرت بقيود و ضوابط .. حتى لا يختلط الحابل بالنابل ..

وياترى عمرك حسيت/ى انك ضيعت فترة من عمرك فى الاوهام ولو حصلك كده هتتصرف ازاى

ضيعت : كلمة صعبة قوي ،، أنها هتؤدي للحسرة ،، و بكده لما اقعد اتحسر على حاجة ضاعت فأنا بكده بضيع الوقت اللي بين إديا حاليا ،،، فنقول مثلا " ندمت " ممكن ،، بس يكون ندم إيجابي .. إزاي يعني ؟؟ الندم اللي يخليني اتعلم من غلطتي في عمري اللي فات ،، اللي يخليني ابقى أحسن و أطور من نفسي .. فالمفروض منحزنش على شيء راح .. المفروض نعتبر الماضي أو السنوات السابقة زي المدرسة كده .. عشان نتعلم و نبقى أحسن .. و بكده أبقى فرد إيجابي و منتج .. و مش عالة على نفسي و أسرتي و مجتمعي ..

و أدينا بنتعلم ..
تمام كلنا بنتعلم ولو الانسان مغلطش واتعلم من غلطه يبقى عمره ما هيبقى عنده خبره فى الحياه ولا هيقدر يحل اى مشكلة ادامه
وهل البراءة فى الدنيا شىء معدش ينفع يكون موجود يعنى اللى الانسان اللى بيتعامل ببراءة وعلى فطرته مع الناس فعلا الناس بتعامله على انه اهبل ولا بيشوفو ان ده ميزة فيه

للأسف .. فيه واقع مؤلم ،، و مشكلة مجتمعية رهيبة فينا .. إن التعبيرات و الأخلاقيات اتخلط و اتغيرت عندنا ،، بقى المفروض الواحد ميكونش بريء عشان البريء ده " أهبل " أو " عبيط " ،، المفروض ابقى " مدقدق " ، و " داير " و " مفتح " و يا ريت نبقى كده بس نبقى صح مش بالصورة الشريرة ،،، الخديعة بقت هيا الصح ،، المقاييس بقت متشقلبة ..

بس برغم كل ده .. أبقى " بريء " و " أهبل " عند الناس ،، أحسن مما ابقى " مدقدق " " و مفتح " بالمقاييس بتاعتهم ،،، أمام ربنا سبحانه و تعالى ..
تمام يادكتور بس بيتهيالى ان اجمل مافى البراءة الفطرة السليمة اللى بتخلى صاحبها يحس بالخطر او الناس اللى بتستغله فساعتها بيحاول يحافظ على البراءة من غير ما ياذى نفسه وفى اللحظه ديه هيبقى مفتح ومدقدق(واعى) بس بالمقاييس الصح
بس كده مستنية اسمع رايكو ويارب الحلقة تعجبكو

أكيد طبعا حلقة جميلة جدا .. تسلم إيدك بجد .. حضرتك محاورة ممتازة جدا .. و انصح حضرتك ،، تنمي الموهبة دي عندك من خلال الاشتراك في المجلات و الجرائد المحلية و الدولية كمان ،، و إن شاء الله نشوفك محاورة ممتازة في برنامج راقي على قناة راقية إن شاء الله ..

انا بجد مش عارفة اشكر حضرتك ازاى على الكلام الجميل ده وان شاء الله لو ده حصل ساعتها هيبقى من اول ضيوفى الكتاب والشعراء الكبار وقتها اللى معظمهم هيخرجو من المنتدى الادبى لفارما بورد وساعتها هبقى فخورة انى فى يوم من الايام كنت من اعضاء المنتدى الادبى زى ما انا فخورة بده دلوقتى
بالتوفيق للمنتدى ومن تقدم لتقدم ان شاء الله
وان شاء الله الحلقة الجاية تعجبكو

[DR.BIBO]

الحلقة السادسه
اذيكو يادكاترة عاملين ايه يارب تكونو بخير

غنوتنا النهارده

سألت نفسي كتير
مارستش يوم على بر
أنا اللي فيا الخير ولا اللي فيا الشر
مليان عيوب ولا
خالي من الذنوب ولا
مليان عيوب ولا
خالي من الذنوب ولا
ولا أيه !!!!!

ولا أنا
جوايا و مش داري الاثنين في بعض
وخمسمائة حاجه و مالهمش دعوة ببعض
أنا مين و فين أنا أيه
مفروش طريقي بورد
ولا الزمان ده أنا فيه
أضعف واحد على الأرض
ولا أنا جوايا و مش داري الاثنين في بعض
وخمسمائة حاجه و مالهمش دعوة ببعض
الفكرة: هو احنا مين وياترى جوانا الخير ولا الشر ولا الاتنين فى بعض ياترى احنا دايما ملايكة ومبنغلطش ولا دايما شياطين بنغلط ومبنعترفش بغلطنا
عمرك حسيت انك خذلت حد كان محتاجلك او غيرت من نجاح حد او انك مكنتش الملاك اللى انتى بتتمنى انك تشوفه جواك وساعات بتحس انه موجود ولما بتحس ان الملاك ده موجود بتشوفه فى ايه من تصرفاتك عمرك عملت خير ومستنتش نتيجته غير من ربنا
ياترى احنا مين وازاى ولا احنا خلطة من كل دول
مش عارفه قلت اسالكو يمكن تقدرو تجاوبو على السؤال ده
اتمنى الحلقة تعجبكو

[محمد فهمي]

احنا كوكتيل جميل ..
شوية يبقي خير وشوية يبقي شر وده حلاوته إحنا ولا ملايكة ولا في أرض الفضية.. وبرده مافيش شر مطلق.. نروح نشوف الشرير ده هنلاقي وهوا نايم عامل زي الملايكة.. نروح نشوف الجبروت ده هنلاقي لما يدخل في صباعه دبوس بيتنفض من الألم ازاي... الضعف الإنساني موجود في كل الناس..
وبالتالي كل التصرفات لازم نوزنها بالشكل ده..طبقاً للكوكتيل
منا من يريد وجه الله..
ومنا من يريد بعض الثناء..
ومنا من يريد ثناءً كاملاً..
ومنا من لايفعل الخير وكافي خيره شره..
ومنا من يفعل الشر مع بعض الخير..
احنا خلطة غريبة...
سبحان الله..

شكراً يادكتورة علي الموضوع الجميل
وفي النهاية هنفضل نسأل برده..

[DR.BIBO]

احنا كوكتيل جميل ..
شوية يبقي خير وشوية يبقي شر وده حلاوته إحنا ولا ملايكة ولا في أرض الفضية.. وبرده مافيش شر مطلق.. نروح نشوف الشرير ده هنلاقي وهوا نايم عامل زي الملايكة.. نروح نشوف الجبروت ده هنلاقي لما يدخل في صباعه دبوس بيتنفض من الألم ازاي... الضعف الإنساني موجود في كل الناس..
وبالتالي كل التصرفات لازم نوزنها بالشكل ده..طبقاً للكوكتيل
منا من يريد وجه الله..
ومنا من يريد بعض الثناء..
ومنا من يريد ثناءً كاملاً..
ومنا من لايفعل الخير وكافي خيره شره..
ومنا من يفعل الشر مع بعض الخير..
احنا خلطة غريبة...
سبحان الله..

شكراً يادكتورة علي الموضوع الجميل
وفي النهاية هنفضل نسأل برده..

وفعلا احنا غلطة غريبه بس حضرتك اديتلها طعم وفلسفه مختلفين تماما اضافت للموضوع كتير وادته شكل تانى
شكرا لحضرتك يادكتور محمد
وبرده هنفضل نسال

[M.Hegazy]

حلقة جميلة و سؤال مهم جدا يا دوك ..

و كلام د. فهمي كفى و وفى ..

أنا بس هتكلم على نقطة واحدة في الموضوع ده من نظرة مختلفة شوية ،، و هيا نظرة كل واحد فينا لنفسه هوا عامل إزاي ،، و هلخص رؤيتي دي في القصة الجاية :

في موقع البناء يقوم العمال بكل ما يطلب منهم من تكسير الأحجار الكبيرة بهدف إنشاء صرح ضخم. عندما وصل المشرف على العمل للورشة الأساسية للتكسير وجد ثلاث عمال ينفذون المطلوب منهم بكل نشاط وإخلاص.
سأل العامل الأول: ماذا تفعل؟
فأجابه: أكسر الحجارة كما طلب رئيسي
ثم سأل الثاني نفس السؤال فأجابه: أقص الحجارة بأشكال جميلة ومتناسقة. اما الثالث فكان جوابه مثيراَ للاهتمام لأنه قال: ألا ترى بنفسك، إنني أبني ناطحة سحاب
الثلاثة كانوا يؤدون نفس العمل في الحقيقة إلا أن الأول رأى نفسه عبداً، والثاني فناناً، والثالث صاحب طموح كبير.

[Nayroz]

الفكرة: هو احنا مين
احنا بشر ،
وياترى جوانا الخير ولا الشر ولا الاتنين فى بعض
بشر يعنى جوانا الاتنين بنسب تربيتنا و أخلاقنا و دينا و طباعنا و ظروفنا بيتحكموا يغلبوا أى صفة منهم علينا ....
ياترى احنا دايما ملايكة ومبنغلطش
لاء طبعا لاننا بشر برده مش ملايكة و كل بن آدم خطاء ...
ولا دايما شياطين بنغلط ومبنعترفش بغلطنا
لاء برده لاننا بشر مش شياطين ، بس ساعات بتصرفاتنا فى بعض الاوقات بنبقى افظع ، بس ساعات بنعترف بغلطنا و ساعات لاء ...
و ساعات بنبرر غلطنا و ساعات لاء
ساعات بنبقى عارفين ان ده غلط و بنعمله برده ...
بس فى كل الاحوال بيبقى جوانا حاجة بتقولنا جوانا ان ده غلط ...
يعنى مثلا الحرامى بيبقى عارف ان السرقة غلط و حرام طبعا و مع ذلك بغض النظر مبررة فى نظره او لاء بيسرق ....
عمرك حسيت انك خذلت حد كان محتاجلك
آه ... خذلت نفسى كتير فى أوقات كتير كنت محتاجة أقف فيها جنب نفسى ، بس خذلت حد غيرى ميتهيأليش ...
او غيرت من نجاح حد
من نجاح حد لاء ، بس فى حاجات تانية أكيد بتخلينى أغير غيرة لحظية و بتروح لحالها ..
او انك مكنتش الملاك اللى انتى بتتمنى انك تشوفه جواك
لاء ساعات بحس انى بخرجه بزيادة ، لدرجة بتخلى الموضوع يتقلب ضدى ...
بس ده ميمنعش ان وقت ما بغضب من شىء و اوصل قمة ثورتى بحس ببعض أشياء أو ببقى عاوزة أعمل حاجات كتير ، بتخلى حاجات حلوة جوايا تتنحى شوية ، بس للاسف أنا بروق بسرعة و كلمة ممكن تخلينى أصفى أوى ...
و بسامح زيادة عن اللزوم ، بس عمرى ما بأذى حد بجد فى جميع حالاتى و لو حصل بيبقى بجد بدون قصد نهائى ....
وساعات بتحس انه موجود ولما بتحس ان الملاك ده موجود بتشوفه فى ايه من تصرفاتك
لو شوفتيه عندى ، ابقى قوليلى شكله بيبقى ايه ..
عمرك عملت خير ومستنتش نتيجته غير من ربنا

ياترى احنا مين وازاى ولا احنا خلطة من كل دول
خلطة ... و خلطة غريبة أوى كمان ...
و أنا خلطتى بقى أغرب من الغرابة ذاتها ...
لدرجة انى ساعات ببقى مش فاهمة نفسى ...
مش عارفه قلت اسالكو يمكن تقدرو تجاوبو على السؤال ده
اتمنى الحلقة تعجبكو

عجبتنى ، جزاكى الله خيرا ...

[DR.BIBO]

حلقة جميلة و سؤال مهم جدا يا دوك ..

و كلام د. فهمي كفى و وفى ..

أنا بس هتكلم على نقطة واحدة في الموضوع ده من نظرة مختلفة شوية ،، و هيا نظرة كل واحد فينا لنفسه هوا عامل إزاي ،، و هلخص رؤيتي دي في القصة الجاية :

في موقع البناء يقوم العمال بكل ما يطلب منهم من تكسير الأحجار الكبيرة بهدف إنشاء صرح ضخم. عندما وصل المشرف على العمل للورشة الأساسية للتكسير وجد ثلاث عمال ينفذون المطلوب منهم بكل نشاط وإخلاص.
سأل العامل الأول: ماذا تفعل؟
فأجابه: أكسر الحجارة كما طلب رئيسي
ثم سأل الثاني نفس السؤال فأجابه: أقص الحجارة بأشكال جميلة ومتناسقة. اما الثالث فكان جوابه مثيراَ للاهتمام لأنه قال: ألا ترى بنفسك، إنني أبني ناطحة سحاب
الثلاثة كانوا يؤدون نفس العمل في الحقيقة إلا أن الأول رأى نفسه عبداً، والثاني فناناً، والثالث صاحب طموح كبير.

اولا: نورت الموضوع يادكتور محمد
وفعلا نظرة الانسان لنفسه وطموحه فى الحياه هو اللى بيحدد وجهة نظره فى الحياه وبياثر كتير على مستقبله
شكرا لاضافة حضرتك للحلقة بجد ادالها بعد تانى

-----

نونه انتى بجد ابدعتى وقولتى كل حاجة و حاولتى توصلى فعلا ايه الخلطة الغريبه اللى جوه البشر وفعلا احنا بشر بنغلط وبنرجع فينا الخير وفينا الشر

عجبتنى ، جزاكى الله خيرا ...

وجزاكى مثله ياحبيبتى بجد انتى اضفتى للحلقة جو مختلف خالص

[DR.BIBO]

اذيكو يادكاترة يارب تكونو بخير حلقتنا النهارده هى
الحلقة السابعة

وغنوتنا النهارده

تجربه وعدت واتعدت من ضمن تجاربي
ورجوعها مابقاش بالساهل

تجربه وعدت وانا قولت وبتكلم عربي
بالعربي محدش يستاهل

مندمتش ابدا ولا هندم علي حد خدعني
مهو لازم علشان اتعلم كان هي تبعني

تجربه وعدت

تجربه وعدت واتعدت من ضمن تجاربي
ورجوعها مابقاش بالساهل

تجربه وعدت وانا قولت وبتكلم عربي
بالعربي محدش يستاهل

مش هفضل عايش بتالم علي جرحي هعدي
منا لازم اخطي واتقدم وماقفش لوحدي

تجربه وعدت

تجربه وعدت واتعدت من ضمن تجاربي
ورجوعها مابقاش بالساهل

تجربه وعدت وانا قولت وبتكلم عربي
بالعربي محدش يستاهل

الفكرة: ياترى لما بتعدو بتجربه فى حياتكو سواء كانت سايبة اثر حلو او سايبه اثر سىء
ولو سايبه اثر سىء فيكو ياترى بتاثر فيكو وممكن تخليكو واقفين فترة مش عارفين تفكرو وممكن توصلكو انكو تكتئبو او تتغيرو بسببها للاسوا
ولا بتعتبروها تجربة وعدت وبتتعاملو ان بكرة احلى من النهارده وان ممكن تكونو تتعلمو منها وتتعتبروها مجرد ذكرى كل ماتفتكروها تقويكو وتعلى منكو وتغير فيكو للاحسن
مش عارفة
اتمنى اسمع ارائكم
ويارب الحلقة تعجبكو

[محمد فهمي]

تمام يادوك... موضوع مهم..وصعب برده.. مش عارف بتختاري مواضيعك دي ازاي..علي كل حال..ماشي..
في رأيي أنها بتعتمد علي الشخص نفسه في الأساس:
- يعني فيه شخص هيعدي الموضوع وكأن شيء لم يحدث..
- وفيه شخص تاني هيكون الموضوع بالنسبة له النهاية والطامة الكبري..
- وفيه اللي هيتأثر شوية..علي حسب طبيعة الموضوع والشخص نفسه وتجاربه وخبراته ومدي ايمانه.. ومدي تحمله هتكون مدة التأثر ده قد ايه...وبعد كده الأمور تعدي..

أنا عن نفسي: هتأثروهيشغل الموضوع حيز من تفكيري بحكم إن الواحد المفروض بيحس وعنده مبالاة..في البداية ولكن أنا متأكد تماماً إن الموضوع هيعدي...بس هياخد وقت قد ايه: ده علي حسب إرادة الواحد في الوقت ده بقه وطبيعة الموضوع.. والكلام يكون في النقطة دي..الموضوع هياخد وقت قد ايه ده؟؟.. هوا مربط الفرس!!...

وفي نهاية المواضيع وبعد فترة من الزمن هننظرر للحاجات دي بمنظور مختلف تماماً وده أنا مقتنع بيه برده
بس في النهاية كل شيء هيعدي وده المنطقي مافيش حاجة بتقف علي حاجة أو علي حد...ولو حتي علي الموت نفسه.. وهو الحدث الأعظم...

Life Go on


شكراً علي المناقشة الجميلة يادكتورة هبة
منتظرين آراء أخري
ومتغبيش عننا كتير