صلو على حضرة الحبيب النبي عليه الصلاة و السلام ..
__________________________________________
كلمة حق و هتتقال و يا ريت الكل يسمعها و يعيها و يفهمها بالراحة ،، و للكل الاتفاق معها أو رفضها ,,
أولا : لما المظاهرات بدأت ،، كنت مستغرب جدا و بقول الناس دي نزلت تاني ليه ،، و بيعملو إيه أساسا و مكنتس شايف إن ليها أي لازمة خالص ( ده من وجهة نظري اللي على قدي ) ..
و بعدين في يوم من الأيام بافتح الفيس بوك لقيت صور و مناظر و فيديوهات يصعب لها قلب الكافر ..
و كأن المشهد منقول من فلسطين بل أذل و ألعن .. لقيت اللي بيتجر و بيتمري عند الزبالة زي ما يكون زبالة مش إنسان و لا ليه أي حقوق ،، لقيت ضرب النار اللي عيني عينك ،، و أعداد كبيرة فقدت عيونها ،، و إهانة للنساء بطريقة غير آدمية ،، و تعدي على حرمات الناس حتى بعد موتها ،،
و الله العظيم منظر مستفز ،، و منظر يحزن له القلب ،، و منظر حسبي الله و نعم الوكيل فيمن كان السبب فيه ..
دلوقتي طالب من حضراتكم تسيبو السياسة على جنب شوية ،، و تبصو للجانب الإنساني و تشوفو الناس اللي اسمها شرطة رجعت تهين آدميتنا و تأخذ حقوقنا و تنتقم منا بسبب ما حدث لهم في يناير ( و مش معني إني بقول كده إن كلهم وحشين ،، في كل مكان في الدنيا فيه الصالح و فيه الطالح ) ،،، دلوقتي و بالعقل و بالراحة مفيش واحد عنده مخ أو عقل هيروح يولع في مديرية أو يرمي أو يبلطج إلا إذا كان بلطجي ،،، الناس إنتو شوفتو صورهم عاملة إزاي في الميدان ،، في منهم العاجز و في منهم الطفل و في منهم الشيخ الكبير و في منهم المرأة و في منهم المسلم و فيه منهم المسيحي .. هل دول بلطجية ؟؟ و إيه مصلحتهم إنه يودو نفسهم في داهية و يروحو في شربة مية ،،، العمر مش بعزقة و إنتو عارفين كده كويس ..
طب دلوقتي إنتا عايز توصل لإيه ؟؟
عايز أقولكم إذا كانت المظاهرات من الأول ملهاش داعي ،،، فدلوقتي وقتها ..
إزاي يعني يا عم إنتا ؟؟
الوضع اتصعد و لو حد فيكم كان متابع إمبارح ،،، قنابل الدخان على المصلين و هما بيصلو نزلت عليهم إزاي ،، و منظر القنابل و هيا بتتضرب على الناس كأن السما بتمطر قنابل ..
دي حاجة ،، الحاجة التانية .. الناس لازم تراعي شعور بعض و تفهم إن اللي نازل دلوقتي و أنا واحد منهم .. مش رايح عشان اعتدي على الشرطة ،، و لا أولع و لا أكسر ،، و لا أثير الشغب و الفتنة ،،، أنا نازل أساعد المصاب و أحمل الجريح و أعالجه ،، و أتظاهر بسلميا ،، مطالبا بطلب واحد فقط أسأل عليه يوم القيامة ،، حق دم أخوي المسلم المصري ،،، اللي قتلو الناس دي لازم تتحاسب و مينفعش السكوت عن الحق ده ،، و مش عايز من الحكومة أيا كان شكلها غير حاجة واحدة : تتقي ربنا فينا و تعاملنا كبني آدمين و نبقى أحسن من أي دولة تانية ،،،
لأن دولة لا يحترم فيها حق الإنسانية و حرمة دم المسلم دولة لن تحترم أي حق آخر مهما كان ..
و أيا كان رد اي حد فينا لازم نحترم وجهات بعض ،،، و مننساش إن الثورة اللي فاتت قامت و مات فيها ناس عشان يخلونا نعيش في حرية ،، و الحرية إن أقول رأيي و إنتا تحترمه و تسمعني ،، و إنتا تقول رأيك و أنا احترمه و أسمعه ،، لأن الاختلاف في الرأي لا يفسد للود قضية ،، و لازم منسساش أبدا إن في الأول أو في الآخر : اللي شايف إن نزول الميدان غلط مينزلش لأنه شايف إنه كده بيخدم بلده ،، و اللي شايف إن نزول الميدان صح ينزل لأنه برضه زيك عايز مصلحة بلده ..
و اتمنى كلامي ميزعلش حد .. و يا ريت يا جماعة نفضل إيد واحدة مهما اختلفنا لأننا في الأول و في الآخر بنحب مصر و عايزين الخير ليها و لينا و للي جايين من بعدنا ..
يــــــا رب يعدي الغمة دي على خير ،، و يصلح حالنا و حال بلدنا ..
اللهم أرنا الحق حقا و ارزقنا اتباعه ، و أرنا الباطل باطلا و ارزقنا اجتنابه ..
هوا إيه الصح ؟؟
رد مع اقتباس
المشاركة الأصلية كتبت بواسطة M.Hegazy
