الثقة !! هو فى حد كدا !!

[a_elkamhawy]

ازاى ممكن تثق بحد أكتر من نفسك...أيوة أكتر من نفسك...وفجأة تكتشف انه مكنش أهل للثقة دى...وباعك وباع كل حاجه حلوة...إزاى تعيش بعدها؟ ازاى تأمن بعدها؟...إزاى؟؟؟
أتمنى ان كل الناس تشارك علشان أعرف رأيكم

[Sincerity]

ايه يا دكتور المواضيع دى ... حضرتك بتقلب علينا المواجع
مشكله فعلا النقطه دى ... ان أنا أثق ف حد أوى وانه مش يطلع أد الثقه دى بس ف الآخر برضه الواحد بيطلع غلطان لانه منح ثقته دى لحد مش يستاهل أو أختار الشخص اللى منحه الثقه دى غلط من الاول ... بس أكيد الانسان بيتعلم من أخطاؤه وأكيد هياخد باله بعد كده ف أختيار الناس اللى يقدر يعطيها ثقته
ميرسى يا دكتور على المواضيع الجامده دى ... منور المنتدى

[yojeena]

منور المنتدي يا دكتور بمواضيعك المتميزه
الثقه دي صفه لازم تكون موجوده بين الناس عشان نقدر نتعامل مع بعض
لان الانسان الشكاك واللي ما بيثقش في حد خالص حياته بتبقي جحيم يعني لازم يبقي في حسن النيا
لكن انا في رايي مش مع الثقه المطلقه او بالبلدي ثقه عميا
بصراحه ما فيش حد يستاهل النوع ده من الثقه الا الوالدين فقط
انما لو حصل فعلا..... ما حدش يقدر يوصل للدرجه دي من الثقه في انسان الا لو كان فعلا الانسان ده جدير بيها وده بيبان من العشره الطويله
ولو طلع الانسان ده خاين يبقي انا اللي غلطانه لاني ما احسنتش الاختيار في صداقاتي وما كنتش حذره او واعيه باللي بيحصل حواليا وانه انسان مش اهل للثقه
وبعد كده احاول اشفي الجروح اللي سببهالي الشخص ده....مع ان ده هيكون صعب
و اتعلم من الدرس ده اني ما تخدعش تاني بالمظاهر ومش اي كلمه تعدي علي قلبي قبل عقلي
وشكرا لحضرتك

[د///*مطحونة*\\\]

باشكر حضرتك لمواضيعك يا دكتور كلها جميلة اوى
مبدئيا كدة انا هرد فى كلمتين
اكيد اللى يحصله موقف زى دة ويلاقى ان ثقته مش فى محلهامن اقرب الناس اليه
اتجرح واتعلم وهى دى الدنيا اصلا
هنعيش ازاى من غير ما حد يخطىء فى حقنا ونتعلم
::::::::::::::::::::::
بعد الموقف دة
هنعيش ونكمل حياتنا عادى وفى ناس كتير اوى كدة عااااااادى
دة بيعتمد برضو على درجة الثقة والكلام اللى كنت بتحكيهولو برضو
بس لازم وقفة مع النفس
حضرتك بتسال بقا عن الحل ازاى هنثق فى حد تانى
بسيطة
بلاش نثق فى اى حد خالص الا بعد ما نجربه الاول
انا عن نفسى باثق فى حد واحد بس
وهو






























































































الحيطة اللى قدامى

[analgesia]

ماشاء الله يادكتور مواضيع حضرتك جامده
كل مره بتطرح سؤال يستاهل التفكير والرد
وأحب أقول ان انا من الشخصيات اللى مش بتثق فى حد بسرعه
انا بصراحه مش عارفه ده صح ولا غلط بس شايفه ان هو أفضل من انا اثق فى أى حد ويمكن يكون الحد ده ما يستاهلش بس كل حاجه بتبان مع الوقت والتعامل مع الشخصية اللى قدامى
ميرسى يادكتور

[Monaliza]

ببساطة شديدة ..
لا تثق في أحد ! مهما كان

اعرف طريقة معينة للحياة - قالتهالنا مدرستي وعمري ما هنساها - ان حياتك عبارة عن دوائر

والناس كلهم ليهم الدائرة الخارجية فقط : اسمك .. مظهرك .. معلومات عامة عنك ممكن اي حد يعرفها
الدايرة اللي بعدها دايرة الأصدقاء : يبقوا معاك كل يوم ويعرفوا اخبارك الشخصية اللي مش اي حد هيعرفها .. لكن مش أسرارك !
الدايرة اللي جوه بعدها دايرة الأهل- الأب والام والاخوات والزوج او الزوجة - اكيد يعرفوا عنك اكتر بكتير من الاصدقاء والناس -وجايز يعرفوا تفاصيل ميصحش الناس تعرفها لكن برده مش اسرار

والدايرة اللي بعدها - دايرتك الخــــاصة ..
فيها اسرارك .. وفيها نفسك .. وانت الوحيد اللي تعرف تدخلها

لو كل واحد فينا عاش بالطريقة دي .. عمر ما حد هيشتكي من الغدر والخداع .. وانه توهم في بعض لناس الأمانة والصدق والمسؤولية ! وطلعوا غير كده !

ببساطة ..
لا تثق في أحد

و شكرا لك دكتور

[a_elkamhawy]

شكرا على مشاركاتكم يا شباب...وأتمنى اننا نكون استفادنا من الحكاية دى.....واتعلمنا....ومحدش بيتعلم ببلاش...بس هو الواحد بس ساعات بتصعب عليه نفسه لما بيحس انه مكنش موفق فى اختيار الحد اللى وثق فيه واعتبر ان مفيش فرق بينه وبينه....
مرة تانيه شكرا ليكم...

[ELANDALEEB]

ازاى ممكن تثق بحد أكتر من نفسك...أيوة أكتر من نفسك...وفجأة تكتشف انه مكنش أهل للثقة دى...وباعك وباع كل حاجه حلوة...إزاى تعيش بعدها؟ ازاى تأمن بعدها؟...إزاى؟؟؟

والله بصراحة يادكتور انا مريت بموقف كدة اليومين دول ولغاية دلوقتى مش عارف افوق منه ومش عارف اتصرف ازاى .....بجد بجد انا دلوقتى فقدت الثقة تماما فى اى حد ...مهما كانت ثقتى فيه......لإنى بصراحة عمرى ماتخيلت انى همر بموقف زى اللى حصلى .....دكتور !!!!!!!
حياتى تغيرت تماما بعد الموقف ده
وربنا يستر

معلش على نبرة الحزن اللى جوايا بس المفروض تستحملنى شوية
سلااااااااااااااااام

[a_elkamhawy]

معلش على نبرة الحزن اللى جوايا بس المفروض تستحملنى شوية
سلااااااااااااااااام

ولا يهمك يا عندليب...كلنا لها...بس اللى ممكن يهون علينا ان الحد اللى افتكرناه يستاهل ثقتنا دا ممكن يكون لس صغير ومش ناضج...مش نزعل منه....ندعى له...وندعى ان ربنا يصبرنا...ويوفقنا فى الاختيار

[black]

ممكن اقول حاجة بس مش عاوزة اضرب
مش ممكن تكون المشكلة فينا وممكن تكون فى الغير الله اعلم
بس انا لسة بحاول التمس الاعذار للغير