استفتاء بس بالله عليكم ياريت الي يدخل يقول رايه بصراحه

[Dr. Sahar]

معلش ياجماعه انا معرفتش اعمل الموضوع علي شكل الاستفتاءات الي انتو بتشوفوها عشان انا في حاجات كتير مش فاهماها هنا بس مسيري اتعلم بس بجد عايزه اخد رايكم وبصراحه في موضوع

اولا السؤال للاخوه الشباب
ايه رايكم وبصراحه في البنت الي بتكلم زمايل ليها اولاد في الجامعه بس بحترام بس يعني مكونه معاهم صداقات وايه رايكم في البنت الي عايشه حياتها بس مبتكلمش ولا ولد خالص انهي احسن من وجهت نظركم وهل البنت الاولي كونها بتتكلم مع اولاد حتي لو في حدود الادب تبقي مش محترمه او متحرره زياده


تانيا بالنسبه لصديقاتي البنات

ايه رايكم انتو كمان وانهي نوع بتنتقيدوه وايه الفرق في نظركم بالنسبه للبنت الي بتكلم ولاد باحترام وبين البنت الي بتكلم ولاد مش باحترام ايه الفرق في التصرفات وعلي اي اساس بيكون حكمكم عليها

[le pharmacien]

شكرا يا دكتوره على اثاره الموضوع
بالنسبه لسؤالكانا من وجهة نظرى ولو اختلف فى الراى غيرى
ان البنت بتقل من نظرى جدااااااااا وبتخدش حياء البنت
وفى الاسلام لاصدقات بين الرجل والمراه
انا لو كنت حاطط فى دماغى واحده اتجوزها وعرفت انها كلمت حد هصرف النظر
اعتقد ان ده من وجهة نظرى عايزين نعرف ارائكم يا داكاتره

[dry_tears]

انا من راىى ان الاسلام حدد اطار العلاقة بين الرجل والمراه فى جميع المجالات مش بس فى الجامعة
وانا شايفة ان لو الولد قبل البنت راعا ربنا وضميرو هيعرف ازاى يتصرف كويس باختصار مافيش مانع اننا نتعامل مع الاخريين بس فى حدود الادب و نراعى ان فى ناس نفوسهم مريضة وانا شايفة اننا نحسن استغلال الفرصة دى عشان دى هتفدنا بعدين فى حياتنا العملية لازم كل واحد يبتدى يتعلم ازاى يعرف يتعامل مع المجتمع الرجل والمراه على حد سواء وفعلا لو انت محترم هتجبر الناس على احترامك
ده راىى والله اعلم

[pharmacistina]

تانيا بالنسبه لصديقاتي البنات

ايه رايكم انتو كمان وانهي نوع بتنتقيدوه وايه الفرق في نظركم بالنسبه للبنت الي بتكلم ولاد باحترام وبين البنت الي بتكلم ولاد مش باحترام ايه الفرق في التصرفات وعلي اي اساس بيكون حكمكم عليها

هقولك حاجة ..
كلنا سألنا نفسنا السؤال دة طبعا ..

كلنا عارفين انه ليس هناك حاجة للكلام مع الزملاء لأن عندك زميلات تطلبي منهم محاضرات دي حاجة ..
الحاجة التانية صداقة وهزار صدقيني و الله مش صح لأنها هتقلب بحاجات تانية غالبا وسيبك من اللي يقول اخوات و الكلام دة كله مش صح ..
ربنا هو اللي خلقنا و هو أدرى بينا فقال ( ولا متخذات أخدان ) يعني مفيش صداقة بين البنت و الشاب ..
لازم لو اضطريتي للكلام مع زميل تتكلمي بكل جدية و باختصار على قد الحاجة وكذلك الزميل ..
لأن الشيطان عدو للانسان و الله لا هيسيب البنت ولا هيسيب الشاب ولازم يكبر الكلام في دماغهم ويفسر ال كلام لهم بطرق تخليهم كدة يعني ..
وبعدين على فكرة كل ما البنت تتكلم أكتر مع الزملاء كل ماياخدوا عليها أكتر المرة الأولى حضرتك يا دكتورة بعدها يا فلانة بدون دكتورة بعدها ازيك غايبة ليها عننا بعدها منقدرش ما نشوفيكش كل يوم بعدها ....
في حاجز من الاحترام و التكليف المفروض يظل قائم ..

أحد أساتذتنا كلفنا في الفرقة الثالثة بمشروع نعمله .. وقد يكون في داخل المجموعة الواحدة شباب و بنات ..
الدكتور وضح لنا حاجة هي ان التعامل بين البنات و الزملاء و العكس شيء قد نضطر اليه في عملنا وفي حياتنا لكن ..

ما يلفظ من قول الا لديه رقيب عتيد ..
بمعنى كل واحد يوزن كلامه كويس قبل ما ينطقه ..
ممكن زميل يقول لزميلة معاه في الفريق دة ( انتي ماجيتيش ليه امبارح الشغل كان وحش بدونك )
كلمة ممكن مش مقصودة بس هي هتفكر فيها على انها مهمة عنده و انه ...

وقيسي على كدة بقى كل المواقف ..

فاذا مفيش ضرورة يستحسن بلاش التعامل للزملاء و الله لمصلحتك انتي ولمصلحته كمان ..
لو في ضرورة أو شغل مشترك نتعامل بجدية و بعقل و الكلام بميزان يبقى ماشي ..
صداقة و كلام هزار ونكت لا طبعا ..
شكرا ليكي ع الموضوع ..
و الله بقولك بصدق رأيي اللي أنا بمشي عليه حاليا وشايفاه صح

[Anas]

بعد د/pharmacistin‏ ... تقريبا مفيش كلام

بس رأي باختصار ان طالما مفيش ضرورة "ملحة" للكلام ... يبقى ملوش لازمة

و الواحد لو شاف اتنين واقفين مع بعض
من منظر الوقفة و منظر الواقفين الواحد بيحكم عليهم
بدون الدخول في نواياهم ... لإن الواحد له يحكم بالظاهر اللي شايفه
و بالتالي الواحد يجنب نفسه الشبهات على قد ما يقدر
و بقدر الامكان ميحطش نفسه في موقع شبهة

و ربنا يحفظنا جميعا ...

[Rainbow]

ان شاء الله انا هاعرض راي في بعض المواقف

1-فتاه جالسه مع ولد في الجنينه او واقفين بيكلموا في حرم الجامعه بشكل مستمر وان ما كنش في المحاضره مانع يكملوا في
2-انا في اسره مثلا في الكليه ووجدت شباب مجتمعين بنات واولاد مثلا بس بيكلمو عن ندوه ينظموها مثلا
3-بنت بتناقش زميلاها ممكن يكون رائد الاسره او مشترك معها في التنظيم في حاجه معينه عن التنظيم
4-بنات واولاد الاسره حتي لو انت واقف بره بعيد عن مكان الاسره ممكن تسمع صوت الضحك
5- بنات او اولاد في الا سره بيكلمو في حاجات لا هي عن الاسره ولا عن الكليه اساسا
6- احنا جالسين في ندوه واحتاجت احدي زملانا شي وسالت المنظم سالت حد وراها اي حاجه من دي يدوب موقف وعدي
7-برده زميله منظمه مثلا في ندوه بتسال زميلها سؤال هو برده منظم خلال الندوه

طبعا الموقف 2-3-6-7 طبعا ما فيش فيها مشكله طالما لم تخرج عن نطاق الادب في الحوار
اما غير ذلك فكله لا ينفع فهو مخالف للدين وكما قال انس احنا لنا الظاهر ونضيف للكلام راي pharmacistina وبرده راي dry_tears

[olia2010]

السلام عليكم ورحمة الله وبركاته
ماشاء الله انا مش عارفة اضيف حاجة بعد دكتورة pharmacistina
انا الحمد لله مقتنعة تماما ان مفيش حاجة اسمها صداقة بين بنت وولد وانا اما بشوف بنت واقفه مع ولد بصراحه ببقى مدايقة اوى ومن غير حاجه باخد عنهم فكرة وحشه لان انا ليه الظاهر
اما بالنسبة للبنات فالمفروض انهم هما اللى يتقوا ربنا الاول لان مفيش ولد يقدر يكلم بنت كده الا اما تكون هيه فتحت الطريق له سواء بالكلام او الهزار او حاجه تانيه ولسبب تانى اننا احنا اللى فتنة للشباب ومش اى فتنة ده اعظم فتنه والدليل قول الرسول ما تركت بعدى فتنه اضر على الرجال من النساء
وجزاكم الله خيرا على الموضوع

[Dr. Sahar]

بجد مش عارفه اشكركم ازاي علي مشاركتي كلامكم ماشاء الله عليه ميه ميه انا فرحانه اني سمعت اراء كانت تهمني ومعاكو حق فعلا في الكلام فعلا يادكتور انس الناس ملهاش غير الظاهر بس كان نفسي اسمع ردود اكتر علي الموضوع ياريت الناس تشاركنا فيهوالي عنده وجهة نر تانيه ممكن يتكلم عنها

[أمــ هـنـد ــة الله]

موضوع جمييييييييييل يا سهر بجد

انا امبارح كنت ف السيكشن مع صحباتى وقراو الموضوع معايا

وتقريبا كانو نفس وجهة نظرى

ان الناس بتاخد بالظاهر وان اكره ما عندى ان حد يشوفنى واقفه ف المنظر ده حتى لو كانت وقفتى لضرورة وانهم يشكو ف حاجه او دماغهم تروح بعيد

ف بفضل ان البنت تبعد عن الشبهات دى

وبعدين الكلية كلها بنات ليه تسيب البنات- اللى لو اتكلمت معاهم هيكون براحه اكتر عشان بنات زيها - وتروح تصاحب ولاد يعنى

انا عن نفسى مش بحب اشوف بنت واقفه مع ولد خااااااااالص

ف البنت تحاول انها تتقى شر الشبهات وغير ده وده ما تعملش حاجه تغضب ربنا ولا تقلل من حياؤها

[ahmed kewan]

سلام عليكم الاول
بصي يا دكتوره .انا نظرتي للبن مبتتجزأش
يعني هي محترمه ولا لأ
وانا اعتقد انه مينفعش نحكم على البنت اللي بتكلم شباب انها مش محترمه
يعني ده بيختلف حسب المجتمع اللي هي متربيه فيه
ممكن يكون ده ليها عادي
وممكن يكون لغيرها الطامه الكبرى

بس انا شايف ان البنت والولد مينفعوش يبقو اصحاب
اصحاب بمعنى اصحاب ..زي انا واحمد مثلا
ده مينفعش
بس ممكن طبعا الكلام في حدود الزماله
مش خرس احنا
عاوز اعدي ...........اخد اكتب حاجه وما شابه يعني
اما البنت اللي بتكلم ولاد عمال على بطال
فمقدرش احكم برضه عليها انها مش محترمه
وعلى فكره المراهقه بتلعب دور غير طبيعي ف الموضوع ده
واهى فتره وهتعدي
وبالنسبه ليا انا مبكلمش بنات ....لاني بعاملها زي اختي بالظبط