وتم تعامل الصيدليات مع مصلحة الضرائب وفقاً لهذه الإتفاقية منذ عام 2005 وحتى الأن ..
والمعروف ان نشاط الصيدليات يكون محكوم بفواتير شركات الادوية المصرح لها فى وزارة الصحة والمكسب معروف للكل 20% فى الدواء المصرى غير شاملة لضرائب المبيعات و12 % فى الدواء المستورد بحد اقصى لان نسبة الخصم قد تصل فى بعض الادوية المستوردة الى 7%
وعليه _ بالبلدى _ تم الاتفاق على اعداد الاقرار الضريبى سنوياعن كل صيدلى بتقديم مبالغ سحبه بناء على فواتير الشراء من شركات الادوية
مع العلم ان الصيدلى بيتم محاسبته على المبالغ التى اشترى بها وليس التى باع بها باعتبار ان اللى اشتراه لازم يبيعه مع ان الادوية بتبقى على الرف والهالك مدفوع ضرائب مبيعاته ومش كل الهالك بينفع يرجع لشركات الادوية ...ماعلينا
يقوم يتغير بين يوم وليلة السيد المسئول مدير مصلحة الضرايب ولسد العجز الرهيب فى الميزانية ييجى على اصحاب المنشات الصغيرة _زى الصيدليات _ وبمنتهى الظلم والتعسف
قام بالتالى "بصدور التعليمات التنفيذية رقم 9 لسنة 2009 من رئيس مصلحة الضرائب بإلغاء الإتفاقية المبرمة بين المصلحة والنقابة على الرغم من مخالفة ذلك للقانون ولتصريحات وزير المالية أمام مجلس الشعب عند مناقشة قانون الضرائب وإقراره بأن الصيدليات منشأت صغيرة ويجب عمل إتفاقية بشأن أسس المحاسبة الضريبية الخاصة بها 0ولما كان ما قامت به مصلحة الضرائب بإلغائها للإتفاقية بأثر رجعى ومطالبتها للصيادلة بتقديم الدفاتر تجارية وبالمستندات الدالة على المصروفات ومنذ عام 2005وحتى الأن " !!!
وعليه ... سوف يعرض الصيادلة إلى إحالتهم للتهرب الضريبى نظراً لعدم تقديم ما يؤيد الأرقام المقدمة منهم فى الإقرارات الضريبيةومن ثم تعرضهم جميعا للحبس والغرامات المالية التى لا طاقة لهم بها ...
مهزلة بكل معنى الكلمة
بأى حق اتفاقية مبرمة من طرفين يتم الغاؤها من طرف واحد الا ان كان البعض تحول الى يهود
يعنى الصيدليات الخاصة ده مشروع انا عامله بفلوسى ازاى البيه المسئول يتكلم على الهوا فى برنامج حيوى ويقول على المرضى رهائن؟؟؟
الا ان كان شخص غير مسئول
يعنى الحكومة هتسجننا كدة كدة..طيب خليها بقى تكفى الناس من الدوا
يعنى يبقى موت وخراب ديار؟؟
الصيادلة كل اللى عملوه اتفاوضوا مرة واتنين وتلاتة علشان على الاقل يوصلوا لحل وسط او اتفاقية جديدة
انما احاسب واحد ملتزم بأثر رجعى 5 سنين يبقى ده كلام يستحق وقفة وكارثة بكل معنى الكلمة
فين المسئولين؟؟
فين الوزير؟؟
فين الحكومة؟؟
كل صيدلية فاتحة على الاقل 5 بيوت شسوف فى كام صيدلية فى الجمهورية وشايلة عن الدولة عبء عمالة وبطالة اد ايه ولولا الصيدليات شركات الادوية والتوزيع مش هتشتغل شوفوا كم البشر اللى شغالين فيها...
طيب لو قطاع الصيدليات الخاصة مهم..ازاى يعامل بالتعسف والقهر ده؟؟
البيه المسئول جاى يهيج الراى العام ويقول الصيادلة عاوزين يفرضوا قانون جديد.. سيدى ..اعرف شغلك واقرا القوانين اللى انت مكلف بتنفيذها قبل ماتتكلم
الحقيقة ان القانون موجود هم اللى عاوزين يسدوا العجز من الميزانية باى شكل
ماداموا جهة مؤثرة والناس خايفة
يبقى ابسط الحقوق تلتزموا بكلامكم واتفاقاتكم ونسيب بقى البلبة الاعلامية والكلام الفاضى وننظر للحقائق
وقبلها
نعين من يستحق فى المكان المناسب
بناء على ماسبق قررت نقابة صيادلة مصر غلق جميع الصيدليات على مستوى الجمهورية غلقا جبريا ابتداء من يوم الاثنين الموافق 16/2 طوال اليوم والى ان تحل الازمة
وسيتم عقد جمعية عمومية طارئة للوصول لحل للازمة
يعنى الناس بتعترض بمنتهى الاحترام ...
وايضا مقاطعة شراء ادوية جديدة من الشركات ابتداء من يوم الجمعة ..13/2/2009
دى الحكاية ... لقيت ان الامانة توجب عليا طرحها
برنامج الحياة اليوم حلقة يوم الجمعة 13/2/2009
برنامج 90 دقيقة حلقة يوم السبت 14/2/2009
ومن قلب الحدث: كاتب الموضوع
~~~ أزمة صيادلة مصر تحليل للازمة والتفاصيل ~~~
رد مع اقتباس
المشاركة الأصلية كتبت بواسطة مصطفى
