يوم في المنصورة
بسم الله
أنا واحد من عشاق المنصورة ونفسي اتكلم عن يوم قضيته فيها
اتكلم مع نخبة عقول جامعة المنصورة
اللي هما طلاب كليات القمة واللي بيمثلو المنصورة بكل أهلها وطبقاتها
واللي بتشرف اني أكون واحد منهم وموجود بينهم بشكل دائم
وعلي وجه الخصوص طلبة كلية صيدلة
الحمد لله مواصلاتي سهلة جدا جدا
مش أوي يعني بس نسبيا ممتازة مقارنة بزمايلي اللي من دكرنس وبلقاس وأجا والسنبلاوين
وأحيانا المنصورة ومن كل مكان في الدقهلية
أنا يدوب بوصل من بيتي للكلية في 20 دقيقة
ولكن يشاء القدر ان والدي يطلب مني أروح مشوار عند المرور
وبعد ما كويت واتشيكت وضربت الجل في شعري استعدادا للملحمة العظيمة
جربت لأول مرة المعاناة والبهدلة اللي بيعانيها 90% من شعب المنصورة ومصر عموما كل يوم
واه من كلمة كل يوم دي وقعها في نفسي مخيف جدا
بجد مأساة
كل واحد في البلد دي مش بيفكر غير في نفسه وبس
المواصلات مهينة والبلد مش نظيفة
انا صعبت عليا نفسي جدا لاني حاسس اني مليش قيمة في بلدي
بلدي اللي المفروض ان الحكومة فيها والقطاعات الخدمية معمولة عشان تحسسني بالراحة
بلدنا مش بلد
بتأدب وترفع عن الألفاظ السوقية بلدنا عبارة عن حظيرة بها آدميين وقصور بها بهائم
المشكلة مش في الحكومة والخدمات بس المشكلة كمان في الناس
ليه لما أخرج من بيتي في المطر أضطر امشي في وسط الشارع اللي طبيعي مش نظيف
لأن كل بيت عامل فتحة تخرج منها مية المطر في الشارع
ده غير مية الغسيل بكل خيراتها
واركب الميكروباص يقوللي السواق بكل تناكة مش هندخل من الدوران يا جماعة عشان الزحمة
انزلو هنا كلكم
ليه
لا وتسمع الناس وهم يتناقشون ويتحاورون في مشكلات بلدهم
بيقولك الكبري العلوي اللي ممتد من السريع بعد
الدوران كان المفروض ينزل بعيد عن الدوران بس الفلوس مكفتش عشان
السرقة وعشان لما المشكلة تحصل كمان يسرقو تاني وهما بيصلحوه
المهم يلا يا عم ننزل بدل منسمع كلمة مترضيناش
هممممممممممم
أركب تاكسي لعند المرور ب 4 جنيه ؟
ولا نجرب الميكروباص الأول
تعالي نشوف كده
يااااه علي المهانة والمذلة
مش ممكن أوصف ازاي السائقون بيعاملو البني آدميون !!!!
بعد أن منعني كبريائي من الزج بنفسي في هذه المعجنة
قلت أركب تاكسي بس خطر ببالي خاطر آلمني جدا
انا أقدر أدفع المواصلات دي وغيري ميقدرش
الناس اللي مش بتقدر دي مضطرة تقف ساعة واتنين عشان تركب مواصلة كيلو أو اتنين
وتخيلت زميلي اللي بيتعب جدا عشان يوصل بيته وعشان ييجي الجامعة
والأصعب أختي واللي زيها
وجدتي وجدي واللي زيهم
أمي وأبويا واللي زيهم
4 جنيه يوصلو 13 في الميكروباص
ولكن هيهات
حلم جميل
تشاور للتاكسي يقف
تفتح الباب وتركب
علي فين يا بيه
المرور يا سطي
تحت أمرك
ومكتوب كده بداية البنديرة 1 جنيه
وياه علي العداد كده وهو بيعدلي فوق الجنيه ربع جنيه أو خمسين قرش
شكرا يا اسطي
العفو يا بيه
ولكن أقع علي جدور رقبتي من ارتفاع يبلغ ملايين السنين الضوئية علي واقع مرير مؤلم
تاكس تاكس
المرور ؟
لا والله!
المرور يا اسطي
(حركة كده بوشه مش هعرف اكتبها معناها جتكو الأرف مليتو البلد)
المرور
4 جنيه
2جنيه ياسطي
3جنيه
ماشي أمري لله
يااااه
فين القانون
وتنزل تقضي مشوارك في 20 ثانية والله العظيم ضيعت عليهم 2
هركب تاكسي تاني ب 3 ملاطيش
خلينا نوفر المواصلات اللي الوالد مديهالنا
نجيب واحد هوت ميكس و فيروزاية ولا حاجة
يلا نركب ميكروباص الترعة
سيارة مو 1629 ماركة يا متوصلش يا متوصلش
بالإضافة إلي تباع يقوم بدور السائق والتباع في الوقت ذاته
آخرنا الجزار بصوت لن يتسني لي وصفه
ماشي
وسألت نفسي هو فين الجزار ده ياتري همشي أد ايه لحد ما اوصل محاضرة شرح التحليلية
واروح بعدها اطل علي الجماعة
همممممممممم الجماعة !!!!
الأجرة يا أستاذ بنفس الصوت
ان والله اتخضيت
خد يا اسطي 2
اديتله 5 جنيه واداني 4 جنيه
لسه ربع جنيه يا اسطي
وفي نفسي ابن اللئيمة عايز ياخد 40 قرش زيادة
وكمان هينزلني الجزار
ومشيت مشوار ولا في الأحلام حتي كلية صيدلة
وحضرت محاضرتي
وشفت الجماعة وروحت وتمام
في بلدنا المفاجأة
الكهرباء لسة قاطعة يا ويلتاه
من 12 حتي 7
طيب والناس تمشي ازاي في الطين ده وهم مش شايفين
قلت ياد يابوحميد فليذهب البرستيج إلي الجحيم
ومبصيتش في الأرض ومشيت وخلاص
والحمد لله وصلت بيتي بالسلامة
ونرجع لكلمة كل يوم
حرام لو في حد بيشوف اليوم ده كل يوم
كفاية هزار يالا بقي
ياه يا احمد
دالعيشة صعبة أوي يا أخي
داحنا بلدنا ورا أوي أوي يا جدعان
أحنا محتاجين نقف نفكر شوية يا ناس
عايزين نعيش بقي
معلش انا وجعتلكو دماغكو
بس ياريت اسمع صوتكم
مع السلامو عليكم
.gif "Fop (33)")
.gif "Fop (11)")
.gif "Fop (14)")
.gif "Fop (7)")
.gif "Fop (13)")
.gif "Fop (32)")
.gif "Fop (35)")
.gif "Fop (38)")
.gif "Fop (39)")
رد مع اقتباس
المشاركة الأصلية كتبت بواسطة dr/samr
.gif "Fop (28)")
