بلدي وبحبها؟؟؟!!!!!!
صديقي العزيز عند قراءتك الموضوع
اذا داهمتك دمعة من عينك على حالنا وما صرنا عليه
فامسحها بيدك وابتسم
فأنت في بلدك الغالية مصر
موضوع النهارده موضوع مش ممكن السكوت عليه
موضوع ...بلدنا رايحة فين
وهنوصل لحد فين بمستواها ومستوانا وأسلوبنا ومجتمعنا؟؟؟
تراكمات كتير عمالة تدخل دماغي لحد ما دماغي بقت زحمة اوي
نبدأ واحدة واحدة وخليكو معايا كده:
1- من كام يوم كنت مسافرة وكنا قاعدين عادي فى البلكونة سمعنا ناس بتصوت لاقينا فيه حريقة فى عمارة قدامنا الحريق كان فى دور كله خشب فالنار كلته بسرعة
المنظر كان رهيب جدا ...اللهم احفظنا
كلمنا النجدة والاسعاف
لاقيناهم بيقولولنا حاضر جايين اهو...وانا متاكدة انهم مستحيل ييجوا برنة تليفون
بس المطافي جت بعد ربع ساعة من الحريق وده عشان فى عربية شرطة بالصدفة كانت معدية
نرجع لموضوعنا
المطافي جت قعدوا يظبطوا في نفسهم وخوذتهم ويربطوا رباط الجزمة بتاعتهم حوالي ربع ساعة والنار شغالة عادي خالص
ثم بعد كده بدأوا يتسلقوا المبنى مع بعض الحركات الاكروباتية لاثبات مواهبهم الفذة
وبعدين قعدوا يرشوا المياه فى السما مش على الحريق تقريبا كانوا عايزين يعملوا مشروع نافورة بس فشل
وبعد ما خلصوا المياه اللى كانت معاهم والنار برده شغالة عادي خالص
لاقيتهم افتكروا ان في حاجة معاهم فى العربية اسمها سلم..صحيح من ايام قوموا واقعدوا ومش هيحصل حاجة...بس مستخدموهوش
خلصت المياه وكتر خيركو يا مطافي بتتعبوا جامد والله
سيبنا من الحريقة
ندخل فى قانون المرور الجديد
البلد حاليا فى شلل تام
مفيش مواصلات ..مفيش عربيات..كله خايف ينزل الشارع لاحسن يتمسك فى كمين
طيب احنا دلوقتي فى اجازة لما الدراسة ورمضان ييجي ايه اللى هيحصل مش عارفة؟؟
سيبك من الشلل اهو تخفيف للازدحام السكاني
لكن ركز شوية على اي كمين
تلاقيهم واقفين بيتلككو ويجمعوا غرامات بقاااااااااد كده ولو ليك ضهر متقلقش كله هيبقى اشطة لو ملكش غير ربنا يبقى ربنا حسبك
قانون ايه وبتنجان ايه سيبك من الكلام الفاضي ده
ابتسم يا راجل انت فى بلدك مصر
لما كنت مسافرة برده دخل علينا واحد صيني بيبيع حاجات
قعد يزعق فينا واحنا في بيتنا
ده واحد من ملايين استولوا على بلدنا
أكلوا لقمتنا وشربوا دمنا
وشبابنا..قاعدين على قهاوينا يشربوا شاي..مش لاقيين شغل...بيموتوا من الجوع..بيموتوا من الملل...
ونقول ايه ونقول لمين؟
مين سمح للناس دي تاكل خيرنا وتتغطى بفلوسنا وتتطلع على قفانا؟؟
بس فى النهاية ...ابتسم برده مانت في بلدك مصر
دي بعض ملاحظات صغيرة جدا جدا ولو مشيت اكتر هتبتسم اكتر واكتر واكتر
لكي الله يا مصر
لنا الله يا بلد
رد مع اقتباس