كفاااااااية ..... من قلبنا

[بحلم ببكره]

بسم الله الرحمن الرحيم


كفاية بجد


كدا الموضوع تخطي حدوده

صبرنا كتير

وكل يوم بيعدي الناس اللي بتأيد الرأي دا بتقل

.
.
كدا الموضوع قلب لقلة أدب بقي

مينفعش الكلام دا

هي بقت هواية

البلد اتشلت

هم فاكرين نفسهم مين يعني .. شكلهم فعلا كانوا مبسوطين بطريقة تعامل الحكومة معاهم زمان

كفاية يا بتوع التحرير انتم واللي وراكم


ربنا يعلم إني كنت من أكتر الناس المؤيدة للي بتعملوه

ومفيش يوم اتأخرت فيه في النزول معاكم من المنصورة للقاهرة وما بينهما


وكانت قمة المتعة وإحنا بنتضرب ونتبهدل ويطلع عينينا في الشوارع

واللي مستغربه إن بعد ما شفنا الموت بعينينا نيجي النهارده ونسوق فيها

مبارك مشي

والمجالس اتحلت

والمعتقلين خرجوا .. والدستور بيتعدل

أمن الدولة رايح في 60 داهية

المرتبات بدأت تعلي (دا حتي الأطباء طلع لهم قرار برفع المرتبت لـ 1200 جنيه)

الخ الخ

يبقي لسه إيه

مسكنا إن لازم شفيق يتشال واهو راح حصل اللي قبله

فرحتم بشرف .. طب ما تلموا نفسكم بقي

لأ ومقفلين دماغكم في موضوع التعديلات الدستورية ..

وبصراحة وضح إنكم اتقسمتم تاني علي نفسيكم زي زمان وكل واحد بدأ يدور علي مصالحه الشخصية
.
.
وضحت قوي

كفااااية

البلد بقت الموضة فيها هي المظاهرات

كل شوية حد ينزل مظاهرة

ابتدائي .. ثانوي .. جامعة

كل حاجة بقت بالدراع ..

لو دفعة نتيجتها مش عاجباها هتنزل مظاهرة عشان تغيرها .. ماهي عارفة إنها هتتغير

في إيه؟؟؟؟؟؟؟؟؟؟









كفااااااااااااااااااااااية خراب في البلد ... مفيش موارد مفيش إنتاج مفيش عمل

ابقوا قابلوني لو عرفتم تشحتوا حتي
.
.

أظن ناس كتير توافقني في الرأي دا

صح؟؟؟؟

عشان كدا مش نازل مظاهرات الأسبوع دا وهروح الاستفتاء وهنزل كل جيرانني ومعارفي عشان الوضع دا يقف


.
.
.
.
ما بين المؤيد لكلامي والمعارض ليه .
.
.
.
انتظروا تعليقي بالليل لإكمال كلامي في المهزلة دي اللي بصراحة مش قادر أسكت عليها أكتر من كدا


.
.
أرجو التفاعل

(أظن موضوع ظريف جدا للكلام)

[متفائل]

اعتقد فعلا إن استمرار المظاهرات فى هذا الوقت ما هو إلا مضيعة للوقت و تشتيت للفكر و الجهود

كما كنا يد واحدة فى إسقاط النظام الفاسد و ها قد من الله علينا بإسقاط أركانه

فعلينا أن نكمل المسيرة بإعادة إعمار هذا البلد الذى يستحق منا الكثير و الكثير

علينا أن نكون أكثر وعيا لما تحيكه فلول النظام الساقط فى الظلام

علينا أن نفكر بعقولنا و لا نحكم العاطفة و هذا من أهم الدوروس المستفادة من ثورة 25 يناير

علينا أن نطالب بحقوقنا من خلال القنوات الشرعية أولا و هى جديرة بمحاربة الفاسدين لأنها استمدت شرعيتها من ثورة الشعب

عايزين نفظل على طول إيد واحدة

[eman mohammed]

مع حضرتك تماما دى كانت بقت مهزلة ف التحرير اللى كانوا بيطالبوا بحرية الراى مش بيسمعوا غير لرايهم
لا وغير كدة يعتدوا على اللى رايحين يتفاهموا معاهم
بقت مهزلة بعد كان ميدان التحرير رمز للوحدة بقى رمز لان المصريين يضربوا ويموتوا بعض
يبقى العالم دلوقتى يتعاطف مع مبارك ويقول دا كان عنده حق دا كان شعب مش بيمشى اللى بطريقة مبارك دا اللى احنا عايزين نوصله ولا ايه

كان لازمتها ايه الثورة ودم الشهدا اللى فى نظرى كدة راح هدر لو دى بقت النتيجة

[خادم أبى القاسم]

ياريت يسمعوا ويستجيبوا
الله المستعان
البلد على شفا جرف هار ولن ينقذها إلا أبنائها الأبرار

[عاشقة الجنان]

ربنا يستر فعلا كلنا كنا من الناس المبسوط بالثورة لكن اللى بيحصل ف الشوارع ده كتير
مش عارفين نعمل حاجة
اللى له حق هياخده بس نعطى الناس فرصة تشتغل وماننساش الادب فى التعامل
اعمل مظاهرات زى ما انت عايز بس بادب وماتوقفش حركة الناس
انا والله من الناس اللى رجعت بعد تقريبا نص الطريق سفر للمنصورة امبارح علشان اعمل الاستبيان واجيب الباسورد
رجعت طبعا بسبب مظاهرات قاطعة الطريق تماما لدرجة انهم فعلا كسرو عربيتين
وجت عربية تعدى غصب عنهم ماكان منهم الا انهم ناموا ادام العربية اضطر السلئق طبعا يرجع ورجعنا البيت وقعدنا فى قلق تانى
يعنى نلاقيها من الكلية ولا المتظاهرين ولا مين
ربنا يستر

[Dr_Cinderellaaaaa]

موافقةعلى كل كلمة..
الموضوع فعلا زاد عن حده

[A.Denewar]

لالالالالالالالالالا
مش معقول تخلطوا الامور يا دكاترة حرام عليكو
كلنا عارفين كويس مين الناس اللي بتنزل في التحرير هم الناس اللي حرروا بلدنا
انا نزلت مرة في المظاهرات بجد بجد شوفت ناس محترمة جدا والله مش ببالغ وطلع روحي وانا بقنع اهلي ان انا انزل وكنت نازلة لسببين الاول بعد خطاب مبارك التاني لان ناس كتير اتخدعت وهو اخر واحد يخدعني ونزلت عشان اقوله الشعب مش شوية عيال تضحك عليهم
والسبب التاني تأييدا لاخواتنا في الميدان اللي حرروا بلدنا وانا مصرة انهم هم السبب الاعظم لتحرير البلد
وكنا كتير جدا جدا في المظاهرة بالرغم من كده الشباب كانوا بيعملوا فاصل ما بينا وما بين العربيات عشان مش نقفل المرور وكانت العربيات بتمر عادي جدا وعمر ما واحد ذكي نام قدام عربية
وكان شباب الميدان واضح جدا بعد ما الثورة نجحت ومبارك سقط قالوا احنا هنمشي ونشتغل وننتج لكن هنعمل مظاهرة كل جمعة عشان الحكومة ما تنمشي
وفعلا كانوا رجالة دايما ومشوا وشوية قعدوا ينظفوا الميدان
وبعد تنحي مبارك وليس قبله طلعت مظاهرات_الفئوية الجبانة_وانا مصرة انهم جبناء كانوا فين قبل كده
وانا قولت لناس فيهم انتو كده هتخربوا البلد......قاللولي احنا لو مضغطناشي علي الحكومة دلوقتي عشان ناخد حقنا مش هناخده بعد كده!!!!!!!!!!!!
يعني فعلا جبناء بيستغلوا ضعف البلد ويضغطوا علي الحكومة
اما اللي طلعوا في الميدان امبارح والايام اللي قبلها بخلاف يوم الجمعة هم دول اللي هيخربوا البلد وبيتخذوا من ميدان التحرير رمزا .........فقط
والكنيسة اللي اتهدمت والكلام الفارغ ده والمسيحين ماصدقوا ...................ما يلموا الدور بقي
المفروض احنا نطالب باستخدام العنف والطواريء مع اللي بيطلعوا في مظاهرات فئوية او مظاهرات زي بتاعت امبارح دي واللي اتقتل فيها 13 شخص
دول اللي المفروض يستخدم معاهم طواريء في ظل احتضار البلد
المفروض كل اللي عايز مطلب يكتبوا ويطلعوا مظاهرات يوم الجمعة ......فقط لاعلاء صوتهم وليس للتخريب او قطع الطريق علي الناس
والمجلس الوزاري قال انه هيسمع ليهم يبقي خلاص اتحلت
المفروض اي واحد بيعمل مظاهرة في اي يوم تاني غير الجمعة يعتقل.......................
انا اسفة علي الاسلوب العنيف بس فعلا انا تعبت من الاحداث الصعبة اليومية
وانا استغربت ان د.بحلم ببكره هو اللي كاتب الموضوع ده
لو كنت غلطانة ممكن حضرتك توضحلي رأيك

[نورهان]

اللى ف ميدان التحرير دلوقتى اشك ولو للحظة انهم قلبهم ع البلد وعايزينها تقف من تانى ومش موضوع ان اعتصامهم مش هيضر البلد لكن دا بيضر من ناحية نفسية مش شكلية لما اى مواطن يشوف اللى بيحصل ف الميدان بيحتار وعشان يقطع حيرته ينزل مع مجموعة ويتظاهر ويطالب زيهم وخلاص لكن هما مفكرين ان المظاهرات الفئوية ملهمش يد فيها لكن هما اللى ادولهم الشرارة والجرأة لتخطى الحدود المفروض اول ماننزل الكلية لا نعمل احتجاجات ولا حاجه كفايه ان الطلبة اللى رفعوا مطالبنا المشروعة للجهات المختصة وعلينا المراقبة ف اخر التطورات اللى بتحصل مش نعتصم ولا اى حاجه لانى بعتقد انه هيبقى تقليد اعمى كل حاجه تمشى بالاصول وهنلاقيها ماشيه ف صالحنا باذن الله

[Dr.A7med]

آسف يا دكتور .. بس الكلام ده فيه خلط كتير .. والناس قالت هنعلق المظاهرات لحد ما ندي فرصة للحكومة .. وحضرتك جاي دلوقتي تحملهم مسؤولية المظاهرات الفئوية؟ غريبة جدا .. وغير كدة كمان الناس دي عندها حق تتمسك بحقها في دستور جديد وأنا معاهم ..وهرفض التعديلات .. بس الفكرة دلوقتي .. هل حضرتك شايف بجد ان اللي بيطالب بدستور جديد عايز مصلحة شخصية؟ أشك
أنا عايز أسأل حضرتك .. عرفت ايه اللي حصل في الميدان امبارح؟ مين اللي كان في الميدان؟
الميدان كان معسكر فيه بلطجية وعاملين خيم .. والجيش خرجهم بالقوة .. وشباب الثورة راح يهتف " الشعب يريد إخلاء الميدان " وساعد الجيش في إخلاء الميدان ..
حضرتك المفروض تتحري الأمور شوية .. أنا مش مصدق ان حضرتك اللي كتبت الكلام ده .. أنا مش بقدس شباب التحرير اللي بعتبر نفسي منهم ولا بقول انهم صح علي طول الخط .. لكن كمان مش معقولة نتهمهم بالطريقة دي بدون سند .. لأ وكمان نحملهم المظاهرات الفئوية اللي أنا متأكد ان حضرتك عارف مين اللي بيثيرها وبيثير الخلاف الطائفي

[eman mohammed]

كل واحد من رايه يرفض او يوافق والاغلبية هيا اللى هتقول اه او لا ودا من خلال الاستفتاء وحدش عاب هالص فى شباب التحرير المحترم اللى هما شباب 25 يناير
بس مين اللى كانوا معتصمين دول ومين سمح بدخول البلطجية بينهم اظن شبابا التحرير مش كانوا بيرضوا يدخلوا حد بطوبة لا دا دول دخلوا ناس باسلحة
واعتدوا على شباب 25 يناير اللى بيطالبوا باخلاء الميدان
السؤااااااااااااااااااال بقى مين اللى كانوا فى التحرير دول؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟