سقط الطاغية .. ونظامه يتهاوي

[بحلم ببكره]

خواطر

سقط الطاغية ونظامه يتهاوي الآن

مش عارف إزاي في ناس لسه ممكن تدافع عنه وتقول مزايا

لو كان كل البلاوي اللي بتظهر دي ومقتنع تماما إن لسه في بلاوي أكتر أضعاف الأضعاف مستخبية ..

لو كانت الحاجات دي كلها حصلت وهو عارف فدي مصيبة ولو مش عارف تبقي المصيبة أكبر

ومستحيل يكون ميعرفش

.
.
.

عرفتم يا جماعة إن كان لازم يقع وكان لازم المظاهرات تكمل لغاية النهارده

لو كانت المظاهرات وقفت يوم ما تنحي أو حتي يوم ما سابها لعمر سليمان

واللي كانوا بيدافعوا عن شفيق لو كانت الناس سابته كان هيحصل إيه؟؟

ياريت كل واحد يرسم سيناريوهات في دماغه كان هيبقي الوضع إيه دلوقتي؟؟!!!


.
.
.

ياريت نفكر بتركيز ومن غير انفعالات أو عواطف

الفساد لما يتشال بيتشال علي بعضه مش حتة حتة وإلا مستحيل تمنعه

حسبي الله ونعم الوكيل

ملحوظة: ياريت الناس تخلي بالها وهي بتتفرج علي التليفزيون هي بتتفرج علي إيه؟؟؟ ونشغل دماغنا في اللي بيتقال

لغاية حالا في اللي بيقول إن الإسلاميين دبروا الموضوع دا

ودا مش حقيقي

وبصراحة .. لو حقيقة ..يشكروا
-----

نقطة أخيرة .. كلمة لازم اقولها

.
.

شكرا للدكتور عصام شرف

في ظني لو كان الراجل دا مجاش دلوقتي عمر البلاوي اللي بتظهر دلوقتي ما كانت هتظهر

شكرا للرجل لأنه نظيف وعفيف بالبلدي كدا (شبعان)

الرجل دا أثبت لناس كتير إن البلد فيها خير كبير ولسه

في كلام ملوش لازمة بيتقال هنا وهناك إن اللي بيحصل دا عشان يقع عصام شرف زي شفيق

وأظن دا مستحيل .. لأن التحرير في الفترة الجاية مليونياته هتاخد شكل مختلف

شكل التأييد لرئيس الوزراء والمجلس الأعلي للقوات المسلحة

عصام شرف وعد بأنه هيتحرك لتنفيذ حقوق الشعب بالتالي زي أي واحد يحاول يصلح في مكان فاسد هتقابله مشاكل كتير وضغوط
المجلس الأعلي للقوات لامسلحة بغض النظر اتفقنا عليه أو رفضناه .. عشان ياخد قرارات حاسمة أكيد هتقابله ضغوط كبيرة من جوا وبرا

بالتالي لازم يلاقوا تأييد شعبي جارف يشجعهم ياخدوا القرارات دون تردد

عارفين عاملة زي إيه؟؟

حسني مبارك قبل احتلال العراق

ولأول مرة وآخر مرة الإخوان يعملوا مظاهرة بتصريح رسمي ..

مبارك سنتها حب يقول لأمريكا إن الشعب مش معاهم

فسمح للإخوان بعمل مظاهرة مليونية في استاد القاهرة ومحيطه بتصريح رسمي

نفس القصة بالضبط

هتقابلهم ضغوط جامدة قوي عشان كدا لازم الناس تعلن تأييدها ليهم علي الملأ

عصام شرف ظهرت نغمة سخيفة بعد توليه المسئولية إنه إخوان أو له ميول إخوانية

ياريت نبطل النغمة السخيفة دي

نفسي نبطل نحرق اي حاجة حلوة في البلد

الراجل محترم (ومش كل المحترمين إخوان بالتأكيد لأن المحترمين كتير قوي)

وحتي لو كان كدا فمش مهم .. المهم هيعمل إيه ..

محتاجين الجهود تتوحد وتتفق وننسي الخلافات تاني

وفي الأول والآخر البلد دي كبيرة قوي وعظيمة قوي وتستاهل قوي

واتسرقت كتير واتنهبت كتير

وعشان ترجع للمكان اللي تستحقه هتحتاج مجهود جبار .. نقدر عليه أكيد ومش هنتنازل عنه

عشان كدا

لازم نحط إيدينا في إيدين بعض

مصر قدرها كبير قوي وأفتكر لما الثورة بدات كنت بقرأ التعليقات من العالم العربي كله بتبارك للمصريين انتفاضتهم ضد الظلم والفساد والاستبداد

تعليق يومها من فلسطين: (اثبتوا يا أهل مصر) كله مستنينا وعاقد آماله علي البلد دي

ودا قدر البلد دي.. يوم ما تقع العالم العربي والإسلامي كله هيقع بلا استثناء

هنضغط علي نفسنا وننسي آلامنا
(اربط الجرح وقاوم .. وامسح الدمع الحزين ..... لن ينال الحزن منا .. لن نساوم لن نلين)

البلد تقيلة وعشان كدا لازم تقف علي رجلين جامدين والرجلين دول لازم يكونوا كبار بالتالي لازم ناس كتير توقفها

يعني

كلنا

بلا استثناء

وواحدة واحدة هترجع هترجع

شخصيا متفائل جدا جدا جدا

ومن قلبي بقولها وياريت الكل يرددها تاني ومن قلبه

(بحبك يا مصر)

لو لم اكن مصريا لوددت أن أكون مصريا

.
.
.

وفي النهاية .....

يقول النبي: "إن الله عز وجل يملي للظالم حتي إذا أخذه لم يفلته"

يقول تعالي:

"وما النصر إلا من عند الله"
حَتَّى إِذَا اسْتَيْأَسَ الرُّسُلُ وَظَنُّواْ أَنَّهُمْ قَدْ كُذِبُواْ جَاءهُمْ نَصْرُنَا فَنُجِّيَ مَن نَّشَاء وَلاَ يُرَدُّ بَأْسُنَا عَنِ الْقَوْمِ المجرمين"
"قل بفضل الله وبرحمته فبذلك فليفرحوا هو خير مما يجمعون"

.
.
.
اللهم ائذن لشريعتك ان تحكم ولقرآنك أن يسود

اللهم ولي علينا من يصلح يارب العالمين

وحد صفوفنا وبارك في بلادنا والهمنا سبل الرشاد

جمع كلمتنا واعل رايتنا واقدر لنا الخير حيث كان

اللهم أرنا الحق حقا والباطل وباطلا

واحفظنا وبلادنا من كل منافق وفاسد

اللهم أهلك الظالمين وبالظالمين وانتقم منهم

تقبل يارب شهداءنا وأكرم مثواهم وتقبل منهم وألهم أهاليهم الصبر والثبات

إلهي

ربي

أعداؤنا من كل جانب يدبرون لنا في الخفاء

وعملاؤهم بيننا يدبرون لنا في صمت

فاجعل كيدهم في نحورهم

واجعل تدبيرهم تدميرهم

وشتت أفكارهم وأذهانهم واعمي أبصارهم وبصائرهم يارب العالمين
يااااااارب

رجاء::
معركتنا ضد الفساد تحتاج إلي دعم من خارجنا

دعم أظنه موجود لكن المتاح منه أكبر لمن يطلب

الدعم الرباني الإلهي

لا تنسوا
.
.
البعد الإيماني للمعركة .. وهي والله فعلا معركة .. أصعب من حرب 73 نفسها

فهي حرب لمن بيننا من الفاسدين والمتلونين

ياااارب الطف بنا

.
.
.
بحلم ببكره
6/3/2011
بين نسيم الحرية وزهر الياسمين المتفائل أدعوكم للحاق بنا في هذا المكان الرائع

حقل الحرية .. والأمل
.
.

[L SMA7Y]

لغاية حالا في اللي بيقول إن الإسلاميين دبروا الموضوع دا

ودا مش حقيقي



وبصراحة .. لو حقيقة ..يشكروا

في ظني لو كان الراجل دا مجاش دلوقتي عمر البلاوي اللي بتظهر دلوقتي ما كانت هتظهر

شكرا للرجل لأنه نظيف وعفيف بالبلدي كدا (شبعان)

الرجل دا أثبت لناس كتير إن البلد فيها خير كبير ولسه

تمام

تعليق يومها من فلسطين: (اثبتوا يا أهل مصر) كله مستنينا وعاقد آماله علي البلد دي

الفلسطينين كان في منهم اللي بكرهنا وبيقول علينا خونه ,, وفعلا احنا كنا في عهد مبارك مقصرين جامد في حق فلسطين

بس خلاص ابشروا

ملحوظة: ياريت الناس تخلي بالها وهي بتتفرج علي التليفزيون هي بتتفرج علي إيه؟؟؟ ونشغل دماغنا في اللي بيتقال

معدتش بتفرج علي تليفزيون وريحت دماغي
كله من علي النت الوقتي

[بحلم ببكره]

الفلسطينين كان في منهم اللي بكرهنا وبيقول علينا خونه

ليس كرها في مصر ولكن كرها في نظام الحكم في مصر

وبكره الأيام تثبت إن التشويه اللي حصل للفلسطينيين إعلاميا كان مدبر

والأيام بيننا
.
.
.
بحبك يامصر

[DR.BIBO]

اااااااااااااااااااااااامين يارب
حضرتك يادكتور ليك مواضيع كتير بتكون مثار جدل واختلاف
بس مش عارفة ليه كلام حضرتك المرة دى اثر فى يمكن لانه كله طالع من القلب كله بيدور على مصلحة مصر وبيبعد عن اى مصالح شخصيه كله بيحلم بمصر فى مكانها الطبيعى دولة متقدمة ومستقرة والفسادفيها قل جدا ولو موجود بيتم محاربته مصر بتتبنى بايدين ولادها انا متفائلة جدا ان شاء الله الخير جاى
معلش لو كلامى مش مترتب بس ده اللى انا حساه
شكرا جزيلا على الموضوع ده

[بحلم ببكره]

حضرتك يادكتور ليك مواضيع كتير بتكون مثار جدل واختلاف

صدقا يا دكتورة بيبقي غير مقصود والواحد بيجبر لي إنه يتغمس فيها (ومن غير زعل أغلبها مش أنا اللي كتبتها لكن كنت بعلق علي الكلام بس)

لكن عموما الفترة الجاية أظن هتظهر فيها حقائق ومفاجآت هتغير قناعات كتير قوي عند ناس كتير

بس مش عارفة ليه كلام حضرتك المرة دى اثر فى يمكن لانه كله طالع من القلب كله بيدور على مصلحة مصر وبيبعد عن اى مصالح شخصيه

ربنا يعلم يا دكتورة القسم دا مفيش ولا موضوع كتبت فيه عشان مصلحة

كله عشان البلد وربنا يشهد بكدا

لكن مش مهم

المهم المستقبل

وربنا هيتكفل بالباقي


ومرة خامسة بقولها

بنحبك يا مصر

[DR.BIBO]

صدقا يا دكتورة بيبقي غير مقصود والواحد بيجبر لي إنه يتغمس فيها (ومن غير زعل أغلبها مش أنا اللي كتبتها لكن كنت بعلق علي الكلام بس)

لكن عموما الفترة الجاية أظن هتظهر فيها حقائق ومفاجآت هتغير قناعات كتير قوي عند ناس كتير



ربنا يعلم يا دكتورة القسم دا مفيش ولا موضوع كتبت فيه عشان مصلحة

كله عشان البلد وربنا يشهد بكدا

لكن مش مهم

المهم المستقبل

وربنا هيتكفل بالباقي


والله يادكتور انا مش قصدى انا قصدى ان الموضوع ده بالذات مكانش بيتكلم عن اى حاجة ممكن الناس تختلف عليها لانه بيتكلم عن مصر وانا فاهمة كويس اوى ان حضرتك كل حاجة كتبتها كنت تقصد مصلحة مصر


ومرة خامسة بقولها

بنحبك يا مصر

]


بنحبك يامصر حتى اخر رمق

[WhiteBird]

(بحبك يا مصر)
بحبك يابلدى

اللهم ائذن لشريعتك ان تحكم ولقرآنك أن يسود

اللهم ولي علينا من يصلح يارب العالمين

وحد صفوفنا وبارك في بلادنا والهمنا سبل الرشاد

جمع كلمتنا واعل رايتنا واقدر لنا الخير حيث كان

اللهم أرنا الحق حقا والباطل وباطلا

واحفظنا وبلادنا من كل منافق وفاسد

اللهم أهلك الظالمين وبالظالمين وانتقم منهم

تقبل يارب شهداءنا وأكرم مثواهم وتقبل منهم وألهم أهاليهم الصبر والثبات

اللهم آمين..

[eman mohammed]

انا كنت فى وقت من الاوقات جالى ياس فظيع
بس بعد كلام حضرتك بجد جالى امل وتفاؤل من جديد
يارب احفظ مصر
ودم الشهدا لازم يكون له ثمن وثمن غالى اوى اغلى من اى ظالم انه يقدر يسدده
النظام السابق اقل مايقال عليهم الغباء
الغباء حتى وهم بيخفوا اثارهم فضحوا نفسهم بنفسهم
يارب انصرنا على القوم الظالمين
يارب انت القوى ونحن الضعفاء
يارب احمى مصر من جميع اعدائها

[dr.monalizaa]

بحبك يا مصر ولو اني مش عاوزاها تبقى بس كلام

عاوزة كل واحد بيحبها يثبت انه بيحبها بجد مش كلام وبس

يثبت انه بيحبها بكل ما للكلمة من معنى

انا بحبك يا مصر من كل قلبي

بشكرك يا دكتور على الموضوع الجميل دة

[الجنة مرادى]

كالعادة موضوع متميز

جزاكم الله خيرا

اللهم ائذن لشريعتك ان تحكم ولقرآنك أن يسود

اللهم ولي علينا من يصلح يارب العالمين

وحد صفوفنا وبارك في بلادنا والهمنا سبل الرشاد

جمع كلمتنا واعل رايتنا واقدر لنا الخير حيث كان

اللهم أرنا الحق حقا والباطل وباطلا

واحفظنا وبلادنا من كل منافق وفاسد

اللهم أهلك الظالمين وبالظالمين وانتقم منهم

تقبل يارب شهداءنا وأكرم مثواهم وتقبل منهم وألهم أهاليهم الصبر والثبات

أميييييييييييييين


وبأعلى صووووت

بحبك يا مصر