هل كلية الصيدلة كانت حلمك ؟؟؟

[الفراشة الرقيقة]

طبعا فيه كتير مننا كان حلمه كلية الصيدلة و ناس تانية كان حلمها طب و ناس تانية كان حلمها أسنان و غيرها من الكليات , يا ريت كل واحد يقول هل الكلية دى اللى كنت بتحلم بيها و لا لأ ؟؟ , و أنا عن نفسى كنت عايزة أدخل كلية العلاج الطبيعى مش عارفة كانت الكلية دى عاجبانى أوى بس مش معترف بيها أوى فى مصر

[LOVELY BIRD]

اولا الموضوع فكرته جميله جدا

ثانيا انا عن نفسي دخلت صيدله عشان بابا وماما كانو عايزينها. انا كان نفسي ادخل اعلام بس هما استخسروا مجموعي في اعلام وماكانوش عايزني ابعد في محافظه تانيه

المهم ربنا يوفقنا فيها

[dr.lobna]

انا كنت عايزة طب وجبت الطب فعلا
لكن والدي اعترض علي دخولي للطب مع انه كان مشجعني جدا طول السنين اللي فاتت
واجدعني عشان انا اللي هجيبلك السماعة وكلام من دا كتيييييييير
وطول الوقت كان قدامي هدف واحد وهو الوصول للقمة يعني م الاخر مكنتش شايفة غير الطب اما الصيدلة عمرها ماكانت مطمع او هدف ليا
مكنتش الا مجرد انها كلية ممكن ادخلها لو مجبتش طب

لذلك وهكلمك بصراحة يافراشة انا محبتش الصيدلة ولا دا الاحساس اللي كنت مستنياه لما ادخل اول سنة جامعة
هو الواحد ماشي فيها صحيح بس مش حباها
بس نعمل ايه بقي

لذلك انا فكرت ف حل ممكن يرحني شوية وهو اني ادخل طب تاني بس لما اخلص صيدلة
مش عارفة هو ينفع ولا لا
عارفة انها فكرة مجنونة شوية بس انا عاوزة كده
حاسة اني اتخليت عن حلمي حتي لو كان صعب او مستقبله مش كويس زى صيدلة بس برده حاسة اني مش ف مكاني

واديني اهوه بحاول اتكيف لحد ماتعدي ال4 سنييين واشوف انا لسه مسيطرة عليا الفكرة دي ولا عدلت عنها

وبجد فكرة موضوعك جميلة

[Shikamara]

أما انا بحب صيدله من وانا كنت لسه صغيره علشان كان نفسى أبقى زى ماما معى انى منكرش ان لما ظهرت النتيجه فكرت فى طب شويه صغيرين بس رجعت تانى لحلمى منذ نعومه أظافرى

[Dr\Emy]

انا كان نفسي ادخل كليات كتيرة جداااااااااا
كان نفسي ادخل فنون جميلة وشرطة و وصيدلة
التلاتة مع بعض
بس في الثانوية العامة اما كبرت
كانت حيرتي ما بين طب اسنان وصيدلة
لكن في النهاية قدري كان في صيدلة
وعلي فكرة صيدلة كلية جميلة جدااااااااااا

[الفراشة الرقيقة]

انا كنت عايزة طب وجبت الطب فعلا
لكن والدي اعترض علي دخولي للطب مع انه كان مشجعني جدا طول السنين اللي فاتت
واجدعني عشان انا اللي هجيبلك السماعة وكلام من دا كتيييييييير
وطول الوقت كان قدامي هدف واحد وهو الوصول للقمة يعني م الاخر مكنتش شايفة غير الطب اما الصيدلة عمرها ماكانت مطمع او هدف ليا
مكنتش الا مجرد انها كلية ممكن ادخلها لو مجبتش طب

لذلك وهكلمك بصراحة يافراشة انا محبتش الصيدلة ولا دا الاحساس اللي كنت مستنياه لما ادخل اول سنة جامعة
هو الواحد ماشي فيها صحيح بس مش حباها
بس نعمل ايه بقي

لذلك انا فكرت ف حل ممكن يرحني شوية وهو اني ادخل طب تاني بس لما اخلص صيدلة
مش عارفة هو ينفع ولا لا
عارفة انها فكرة مجنونة شوية بس انا عاوزة كده
حاسة اني اتخليت عن حلمي حتي لو كان صعب او مستقبله مش كويس زى صيدلة بس برده حاسة اني مش ف مكاني

واديني اهوه بحاول اتكيف لحد ماتعدي ال4 سنييين واشوف انا لسه مسيطرة عليا الفكرة دي ولا عدلت عنها

وبجد فكرة موضوعك جميلة

يا حبيبتى مهما نقول مش بناخد غير نصيبنا و سبحان الله نصيبنا ده بيبقى مكتوب من قبل ما نتولد و معظم الناس اللى بتعترض على طب لأن سنين دراستها كتير أوى و أغلب الناس بتقول إنها مش حلوة للبنت و أكيد والدك قصده مصلحتك مش أكتر و على العموم صيدلة كلية جميلة بس لو حبناها

[Messi]

من وانا صغير وانا بكره صيدله.....مع ان فيه ليا احد قرايبي كان فيها
لكن كنت بكرهها .....وذادت كراهيتي ليها اكتر و اكتر لما دخلت (ث.ع) تحديدا من اولي ثانوي وهوه اول عهد ليا بال(كيمياء) وكنت بكره الكيمياء جدا جدا ......وبحب الاحياء جدا
عشان كده كنت بكره صيدله جداااااا

لكن بعد نتيجه التنسيق ....دخلت صيدله...
وبدأت احبها
لانها ببساطه اصبحت (امر واقع).....واي امر واقع لازم الانسان يكيف نفسه معاه بحلوه وبمره...
لكن الحقيقه احيانا بيحصل مواقف تخليني اكره صيدله ....

افتكر اول سكشن نبات في حياتي ....
كنت رايح الساعه 2 والسكشن يخلص 5
احنا خلصنا الشغل بتاعنا الساعه 3.5 تقريبا
وكنت انا ومعظم اصحابي لسه ما اتغدينا....ولا حتي فطرنا عشان كان فيه محاضرات من الصبح
بجد كنا تعبانين جدا جدا...

وكنت ما اعرفش يعني ايه (دكتور)؟؟؟؟؟؟
فروحت زي الشاطر للدكتور ....... وسألته ينفع نروح بقي اصل تعبنا انهرده يا دكتور



كان رد الدكتور طبعا ....انتم عارفينه
وياريته كان رد بس......ده كماااان


طبعا انا بعد لما روحت ......كنت عايز اسيب الكليه وكرهتها جدا. وكرهت الماده وكرهت نفسي...
لكن سرعان ما عرفت ان ده الوضع الطبيعي

[chocolata]

شكرا على فكرة الموضوع يافراشه تسلمى


الحقيقه انا دخولى صيدله مكنش الحلم بالنسبه لى لكن اكيد مفكرتش فيها غير فى اخر سنه لانى كنت مستصعبه طب اوى ومش حابه طب اسنان
واللى اهلنى اكتر هو مجموعه اللى محطليش اختيار اساسا غير صيدله ووقتها دا كان اختيارى وكمان اهلى طبعا معترضوش لانها مازالت فى القمه
الحاجه اللى كنت بفكر فيها واللى ناس كتير كانوا بيقولولى هو دا مكانك الصحيح هو كليه الاعلام تحديدا الصحافه
اللى ليها اكتر علاقه بالكتابه
انا كنت بتخيل دا احيانا واتمنى اد ايه كان هيبقى ليا دور مهم اشارك بيه لكن كنت برده بزعل انا ليه ميناسبنيش انى اكون فى صيدله وخاصه انى جزء من مؤسسه متكامله بتشترك فى العلاج وتخفيف الالم وعشان كده بفكؤر فى اهميه دورى حتى لو الناس بدات تستخف بيه بس لغايه دلوقتى مش شايفه اى اهميه ليا فى الكليه دى لانى لسه منزلتش مجال العمل ولغايه محس بذاتى فى الكليه دى مش كدراسه كعمل فعلى
هافضل معتبره نفسى مجرد تلميذة

كان ليا حلم تانى هو انى اكون طبيب نفسى لكن مش للمجانين بالمعنى الحرفى يعنى
ميكونش دا تخصصى بالضبط ،حبيت الفكرة دى لانى كطبيب نفسى مهمتى اريح اللى ادامى وابقى مصدر ثقه
طبعا مسئوليه صعبه جدا لان انا كمان بشر هل قدرتى فعلا تستوعب انى الاقى حل ولا انا مجرد مسكن لاى مرض اجتماعى بيجى لاى شخص ؟
طبعا كل دا كان بييجى فى تفكيرى حتى بعد ما دخلت الصيدله عشان انا عارفه ان الواقع مختلف كتير عن طريقه تفكيرى فى المهنه دى بالتالى تنازلت عن الفكرة واقعيا بدخولى كليتى

انا اسفه انى طولت ويمكن بعدت عن الموضوع شويه بس انا حبيت اقول على احلام كان بتجيلى
شكرا مرة تانيه على الموضوع الجميل

[muna7assan]

انا كان نفسي ادخل كليات كتيرة جداااااااااا
كان نفسي ادخل فنون جميلة وشرطة و وصيدلة
التلاتة مع بعض
بس في الثانوية العامة اما كبرت
كانت حيرتي ما بين طب اسنان وصيدلة
لكن في النهاية قدري كان في صيدلة
وعلي فكرة صيدلة كلية جميلة جدااااااااااا

سبحان الله انتى زيي يا ايمان بالظبط
ماعدا فنون جميله
بس شرطه وصيدله اسكندريه أو القاهره دى فضلت فى دماغى كتيــــــــر ., أه والله
بعد ثانوى كان ممكن أدخل أى طب فى الجمهوريه
بس كل الدكاتره البشريين اللى نعرفهم قالولى بلاش أحسن ., هتضيعى عمرك وخلاص
والنص بالظبط رشح لى أسنان والنص التانى رشح لى صيدله
بس أنا كنت مياله لصيدله أكتر..
وكنت كل ما أقول لحد انى دخلت صيدله المنصوره علشان التوزيع الجغرافى
يبص لى نظره شفقه ويقولى ياااااه المنصوره دى صعبه قوى
بس الحمد لله ماحطتش دا فى بالى ودلوقتى الحمد لله باحبها جدا
ولو خيرونى انى ارجع بالزمن واختار كليه تانيه بردو هأختار صيدله المنصوره

[عبدالله عبدالرحمن]

السلام عليكم ورحمة الله وبركاته
قبل ما اتكلم عن الكلية اللى انا كنت عايزها
احب اوضح حاجة مهمة
اولا ان اختيار الكلية ده امر بيخضع لعدة اشياء
اولا ان انت تبقى عارف التوصيف الصحيح للكلية
يعنى تبقى عارف كويس الكلية اللى انت رايحها محتاجة ايه
وانت محتاج منها ايه
يعنى متكونشس عايز طب عشان انت شايف الناس بيقولوا عليه كلية قمة
ومترفضوش برضه لما الدكاترة يقولولك هضيع عمرك والكلام الغريب ده
انت عايز ايه
هدفك ايه
لو انت محدد هدفك صحيح
هتعرف توجه نفسك نحو الكلية المطلوبة
واللى فعلا هتتكيف فيها بسهولة
فالعملية مش سهلة
يعنى انت بتحط لنفسك كذا اختيار
وبعدين تروح الكليات دى
وتستفسر من الدكاترة هناك
وبعدين تسأل الطلاب
وبعدين تسأل الخريجين
بنفس الترتيب ده
عشان يكون عندك رؤية شاملة
للى هتواجه لما تدخل الكلية وتتخرج
بحيث تبقى عارف المصاعب والمشاكل اللى هتواجهك ومتكرهش خياراتك بعض كده
لكن ان انت تمشى على كلام الناس
وخلاص
يبقى اكيد مش هترضى عن خيارك النهائى
ودائما هتقعد تقول مش انا الى اخترت
ده فلان اختار
وهى دى المشكلة عندنا فى مصر
ان انت لما بتسأل حد بيقولك رايه الشخصى
اللى هو مقتنع بيه
ومبيقولش رايه كمهنى
ومبيحاولش يعرض كل اوجه الموضوع
بعد الكلام ده كله
انا كان نفسى ادخل
طب
وكنت محدد الهدف ده من اولى اعدادى
وكله كان مشجعنى عشان ادخل كلية
القمة الأولى
وطول الفترة دى حلمى ان انا ادخل طب
مكانش عشان البالطو لأبيض
وعمرى ما حلمت على الأطلاق انى اكشف على مريض
وفى نفس الوقت عايز ادخل طب
-طبعا لأن رؤية المجتمع العامة وعدم معرفتى بتوصيف الكلية المناسبة
لهدفى -
كل ده كان مخلينى قاعد اقول عايز طب وخلاص
وبدون ما افهم الكلمة دى معناها ايه ومستقبلها ايه

لغاية ماالنتيجة ظهرت
وجبت مجموع الصيدلة وملحقتش الطب
زعلت فترة وقلت ازاى
واتهزيت فى فترة اعدادى
وفكرت فى ان انا ارجع اخذ طب بعد صيدلة تانى
بس كل ده
بدأ يختفى تدريجيا
مش لأنى رضيت بالأمر الواقع
او خلاص بقى
لأ
لأنى وجدت هدفى وحلمى الحقيقى موجود فى صيدلة
ووجدت ان الصيدلة دى من اجمل العلوم اللى ممكن الواحد يدرسها
كل فروع العلم بكل تخصصاته
بتدرسها
وده بيعطيك فرصة ما بيحصلش عليها اى حد
انك تنهل من بحر العلم
وبتخرج شخص تانى
فلا يستوى الذين يعلمون بالذين لا يعلمون

طبعا انا بقول ان الصيدلة علم جميل
لكن اللى احنا بناخذه فى الكلية
ده حاجة كده تمشى نفسك بيها
عشان تفهم الدنيا ماشية ازاى
انت بقى اللى هتعلم نفسك
بنفسك
وهتحس بمتعة العلم الحقيقية لما تخلص فصل فى مرجع
او تعمل بحثك الاول
او ..
او..
حاجات كثير مكنتش هتحسها لو انت مش فى صيدلة
فانا باحمد ربنا انه اختار لى الكلية دى
ومسابنيش اختار اختيارى اللى كان ممكن يخلينى اندم بعد كده..

وانا بنصح كل طلاب اعدادى
حاولوا تفهموا صيدلة بجد
وحاولوا تخرجوا من اطار ورق الدروس والمراجعات
للمراجع
ادخلوا مكتبة الكلية واستخدموها
واستخدموا النت عشان تفهموا انتوا بتدرسوا ايه
شوف هدفك ايه من الكلية
ناوى تشتغل فى صيدلية
اهتم بالفارماكولوجى واقرا كثير فيها
واجتهد فيها جدا
عشان تقدر تحمى المريض من مخاطر الدواء وتحقق ذاتك
ووظيفتك باتقان
ولو كنت ناوى على الأبحاث فاجتهد فى الفرع اللى انت انوى تشتغل فيه
واقرأ فيه وابحث
واعمل ابحاث خاصة بيك
ودرب نفسك على طريقة البحث العلمى الصحيحة

لازم نعرف ان احنا موجودين فى وقت مهنة الصيدلة فى اقل معدلاتها فى مصر
وان احنا مطالبين باصلاحات كثيرة جدا
والبداية من نفسنا
ومتنتظرش ان احد هيقولك تعالى انا هساعدك
ساعد نفسك بنفسك
وده ما يمنعش ان انت
تكون مع المجموعة اللى لها نفس توجهاتك
عشان تشد من ازرك وتوجهك لما تتوه
واسعى نحو اساتذتك
قرب منهم واستشرهم
وهتلاقى عندهم النصيحة السليمة
والأرشاد الصحيح

وكلها كام سنة وهتلاقى نفسك صيدلى زى الفل
عارف هو رايح فين وهدفه فين

لكن..
هتفضل تذاكر عشان تنجح
وتأخذ الشهادة
هتاخذ الكلية لعب وتذاكر الورقتين
فى اخر السنة
اعرف ان النتيجة مش هتعجبك فى الأخر
هتنجح وهتاخذ الشهادة ياسيدى
لكن عمرك ما هترضى عن نفسك
وعمرك ما هتسامح نفسك على الفرصة اللى انت ضيعتها

معلش انا طولت
بس كان لازم اقول الكلمتين دول ...

وشكرا على طرح الموضوع