اربع سنوات ونص تجربة تستحق القرأة (خريجى 2009 / 2010 بأذن الله)

[Dr/HULK]

السلام عليكم ياكبار المنتدى(او عواجيز المنتدى )

خلاص محدش يزعل انا هرد على سؤالكم وهو ايه اللى دخل واحد زيى فى القسم الخاص بيكم

الصراحة الموضوع اللى هكلمكوا فيه كنت عاوز اعمله السنة اللى جاية بصفة خاصة لكن بجد لقيت انه هيبقى احلى لما الناس كلها تشارك فيه

الموضوع ده هيبقى مشاركتك فيه هدفها الاول انك انت تقرأها باذن الله بعد 20 او 25 سنة وانتوا عواجيز برده

خلاص هبطل تريقة الموضوع من الاخر او الاول براحتكوا انتوا اصحاب المكان (محدش حتى عزمنى على حاجة ساقعة)

كل واحد فيكوا بقاله اربع سنين وتيرم فى الكلية

اكيد ليه ذكريات مع الكليةوالمنتدى واصحابه والجامعة

ذكريات جميلة(معظمها عند البنات)
وذكريات مش لطيفة(زيى وزى معظم الولاد)

المطلوب ان الموضوع يكون ان كل واحد يكتب اهم الاحداث اللى عاشها فى الكلية من احداث جميلة او احداث رخمة (محدش يتكلم عن الامتحانات)

المهم تكون المشاركة رأيك الحقيقى واصحابك اللى كسبتهم من الكلية والمنتدى
واحلامك اللى اتحققت فى الكلية .......الخ من الاحداث

لو الفكرة عجبتكم فيه فوق استفتاء هعمله
عبارة عن انشاء قسم جديد فى المنتدى
يكون زى
البوم المنتدى(عشان يبقى اسهل فى البحث عن الموضوع)

ويتحط فيه موضوع كل سنة خاص بالفرقة الرابعة زى الموضوع ده يكون بأسم مشرفى الفرقة عشان نفتكرهم لما نتخرج
(تكريما ليهم)
ولمانحب نقرأ ذكرياتنا فى المنتدى تانى ورأينا عن الكلية وهل بقينا مفتقدين ايامها
ولا.....

ياريت كل واحد ياخد وقته فى الكتابة لان الهدف من كتابتك انت قبل اى حد تانى

صدقونى الكلام اللى هتكتبه لما ترجع وتلاقيه هتشوف شعورالذكريات وتأثيرها عليك اد ايه
واصحابك اللى ممكن تكون نسيتهم او مأثر فى حقهم
ترجع تسأل عنهم تانى

يلا كلها 11 اسبوع وتتخرجوا ومش عاوزين نشوفكوا فى الكلية تانى الا لو عشان دراسات عليا

بالتوفيق للجميع

تحذير الموضوع للفرقة الرابعة بس وباقى الفرق عليها المشاهدة او المشاركة فى الردود من غير كتابت تجاربهم

كل واحد يستنى لما ييجى دوره ويدخل رابعة

[mimOoO]

الفرقه الاعدايه
كنت داخل حابب الكليه وبعد اول يوم كرهتا مكنتش متوقع ان الدراسه فيها كدة

المهم في اعدادي كنت تايه ومش عارف حد وتاني يوم دراسه اتعرفت علي ناس كتير بس ما استريحتش الافي واحد بس ولغايه النهاردة صاحبي وبعزة جدا
الترم الاول كنت مقدر فيه والتاني راح التقدير

اولي

عادي بقي اخدت علي جو الكليه وعرفت ناس كتير
السنه دي بقا كانت احلي سنه لاني بجد عرفت فيها اصحابي الانتيم ( الشله )
ومن يوميها واحنا بنعمل كل حاجه سوا في الكليه
من الشله دي بقي واحد اكتر واحد بعزة في الشله

تانيه
الموقف اللي افتكرة وبيضحكني ان اننا كان علينا محاضرة في جزء المخدرات بتاع العقاقير كنت قاعد مع صاحبي وقالي تعالا نحضر قولت ليه بلاش مش هنقدر نصبر ع القعدة قالي لا هنقعد طلعنا الساعه تلاته وتلت المحاضرة جت الساعه تلاته ونص الا خمسه لقيته بيقولي معتش قادر اكمل قولتله مش قولت ليك من الاول وبعدها معدناش حضرنا الا محضرتين تقريبا في الترم كله

ثالثه
الناس قعدتع تقول دي سنه صعبه ومودها مووت وضلمه بس انا مش ذاكرت الا اخر السنه وعديت بتقدير
اول سنه خدنا فيها مديسنال وكرهت المادة دي من اول يوم ختها فيه
ودي اول سنه احس فيها اني بالكليه

رابعه
مش فاكر اي حاجه كل اللي فكرة انهم قالو من تاني اسبوع ان جدول الامتحانات مضغوط وكدة
وتقريبا كنت بنزل السكاشن بس واروح تاني

انا كتبت اللي حبيت اقوله بس لكن في حاجات مش ينفع اقولها

[pharmacistina]

فكرة جميلة , هشارك في هذا الموضوع قريبا .. و هحكي

[Dr/HULK]

الفرقه الاعدايه

كنت داخل حابب الكليه وبعد اول يوم كرهتا مكنتش متوقع ان الدراسه فيها كدة

المهم في اعدادي كنت تايه ومش عارف حد وتاني يوم دراسه اتعرفت علي ناس كتير بس ما استريحتش الافي واحد بس ولغايه النهاردة صاحبي وبعزة جدا
الترم الاول كنت مقدر فيه والتاني راح التقدير

اولي

عادي بقي اخدت علي جو الكليه وعرفت ناس كتير
السنه دي بقا كانت احلي سنه لاني بجد عرفت فيها اصحابي الانتيم ( الشله )
ومن يوميها واحنا بنعمل كل حاجه سوا في الكليه
من الشله دي بقي واحد اكتر واحد بعزة في الشله

تانيه
الموقف اللي افتكرة وبيضحكني ان اننا كان علينا محاضرة في جزء المخدرات بتاع العقاقير كنت قاعد مع صاحبي وقالي تعالا نحضر قولت ليه بلاش مش هنقدر نصبر ع القعدة قالي لا هنقعد طلعنا الساعه تلاته وتلت المحاضرة جت الساعه تلاته ونص الا خمسه لقيته بيقولي معتش قادر اكمل قولتله مش قولت ليك من الاول وبعدها معدناش حضرنا الا محضرتين تقريبا في الترم كله

ثالثه
الناس قعدتع تقول دي سنه صعبه ومودها مووت وضلمه بس انا مش ذاكرت الا اخر السنه وعديت بتقدير
اول سنه خدنا فيها مديسنال وكرهت المادة دي من اول يوم ختها فيه
ودي اول سنه احس فيها اني بالكليه

رابعه
مش فاكر اي حاجه كل اللي فكرة انهم قالو من تاني اسبوع ان جدول الامتحانات مضغوط وكدة
وتقريبا كنت بنزل السكاشن بس واروح تاني

انا كتبت اللي حبيت اقوله بس لكن في حاجات مش ينفع اقولها

شكرا لردك يادكتور بس انا عندى تعليق

حضرتك بتتكلم عن اربع سنين!!!!!

مش اربع ايام

فكرة جميلة , هشارك في هذا الموضوع قريبا .. و هحكي

على فكرة مشاركتك تجربتك فى الكلية معانا هتخليك

تقدر تقيم المرحلة دى فى حياتك بعد التخرج باذن الله

كتير مننا نسى ايام المدرسة وكان نفسه انه يقدر يسجل كل لحظة فيها عشان يفتكرها لما يكبر

هدف الموضوع ده برده نفس الشىء

وهو اننا نلاقى حاجة تفكرنا بالايام دى

[Messi]

فكره كويسه..........فكروني كماااااان اربع سنين ..اقولكم ...

[memo_88]

بغض النظر عن التفاصيل لكل سنه فانا هقول الخلاصه
نظام التعليم فى مصر ده نظام فاشل
اولا مافيش اى نظام تعليم فى الدنيا يقول ان الطالب يقعد فى الكليه من 8 الصبح ل 8 بليل
فى الاول تيقى الحماسه واخده الناس فتقول لا انا هاحضر كل المحضارات وبعد شويه انتوا عرفين
ثانيا مافيش نظام تعليم فى الدنيا يقول ان واحد يحضر السكاشن بس ويورح يشنرى ورق الدروس ويجيب امتياز و جيد جدا
ثالثا نجى بقى لكارثه الكتب كل كتاب بقى بعشروميت جنيه عشان يترمى فىالدرج
طب يعنى هى الناس مابتفهمش فيها ايه مايبفى الكتاب مختصر كلمه ورد غطاها زى ورق الدروس اللى اثبت نجاحه واللى عايز يتطور يبقى يروح لل تكست بوكس لكن الكتاب قد كده وماحدش يفتحه اصلا
ولا عملى زى التوكسو كل معيد بيتكلم من دماغه من غير مصدر يعنى 5 ورقات بربع جنيه مش هيفرقوا مع القسم فى الكتاب
رابعا كارثه الكليه امتحان النظرى قمه المسخره و لكن فى بعض الاقسام محترمه برضه
يعنى دكتور يحط الجزء بتاعه كله سؤال واحدةو لاطباعه المتحان اللى يبقى الخط مش باين ولا الكلام كله مضغوط فى صفحه ونصف واللى يغيظك يسيبوا نصف الصفخه الباقى فاضى ابيييييييييييض
خامسا المصيبه الكبرى المناهج يمكن سنه رابعه هما اكتر ناس يحسوا بيه كام مره خدنا chromtographyor protiens or carpohydrates
وفى قسم ويمكن فى نفس الترم يعنى مفيش نصف ساعه للتنسيق بين الاقسام
سادسا ياريت ناخد بالنا ان فى كل جامعه فى الدنيا امتحان النظرى بيكون عليه اقل درجات فى التقييم العام
سابعا و اخيرا التعيين و المعديين مين قال ان العشره الاوائل هما اللى يكونوا معيدين ناهيك عن المحسوبيات فان التعليم ده ملكه يعنى ممكن واحد حفيظ او صميم ولكن مايعرفش يدرس
المهم الناس تستفيد وحد يسمع

[mo7med]

المفروض نعمل موضوع ونسمية
بعد أربع سنين ونصف استفدت اية؟

[حنين ابراهيم]

ياجماعة اناكانت اكبرامنية فى حياتى انى ادخل كلية الصيدلة ودخلتها مع البهدلة اللى شوفتها فيهابس احب انى افتكر زكرياتى فيهاوالموضوع عاجبنى اوى

[سمسوما]

على فكرة فيه قسم للترفيه ... اللى عايزين يسمعوا حواديت ممكن يروحوا هناك
المشرفين سايبين الموضوع ده هنا ليه مش فاهمة !!
الهدف من المنتدى الإفادة
احنا يعنى لو قلنا نصيحة فيه حد هيسمع كلامنا !! .. يبقى احنا مش فى مصر بقى
-----

المفروض نعمل موضوع ونسمية
بعد أربع سنين ونصف استفدت اية؟

عندك حق و الله

بس احنا استفدنا من السنة اللى فاتت كتير .. الحق يقال

[Dr/HULK]

على فكرة فيه قسم للترفيه ... اللى عايزين يسمعوا حواديت ممكن يروحوا هناك
المشرفين سايبين الموضوع ده هنا ليه مش فاهمة !!
الهدف من المنتدى الإفادة
احنا يعنى لو قلنا نصيحة فيه حد هيسمع كلامنا !! .. يبقى احنا مش فى مصر بقى

على فكرة الموضوع انا عملته فى القسم ده لان طلبة الفرقة الرابعة خلاص تيرم وباى باى (بأذن الله)

ولو كانت فكرته نجحت كنت هعرض على المشرفين عمل قسم خاص بالفكرة دى عشان قسم الفرقة الرابعة بيبقى ارشيف وبيبقى للاطلاع فقط

وكان الهدف من الموضوع ان الطلبة يقدروا يكملوا مشاركات فيه بعد التخرج