عوده الي الرزاله ولكن مستقبلا مع مراتك

[ahmed helmy]

تلبيه لرغبه الاعضاء قررت العوده شويه للرزاله

الصبح وانت رايح على شغلك وهى نايمة تعمد اسقاط اى شيئ او خبط الباب بصوت عالى علشان تصحيها هى كمان 00 اشمعنى انت ؟ ولو حاولت ترجع تنام تانى قالها مادام صحيتى حضري الفطار بقى

اذا كنت بتتفرج على التلفزيون وهى عايزة تغير القناة 00 قالها معلش الحلقة دى مهمة جدا واحد صحبى شافها على القناة الفضائية وقالى ان الحلقة دى هى المسلسل كلة 00 ولو كنت بتتفرج على ماتش كورة هيبقى الموضوع اسهل 00 كل ما حد من اللاعبين من اى فريق يمسك الكورة قالها معلش ثوانى بقى انا حاسس ان الكورة دى جون حتى لو كان حارس المرمى ماسك الكورة والماتش واقف لان فى واحد مصاب
( ملاحظة : اغلب النساء ذو ثقافة كروية ضعيفة )



اصح يوم الجمعة بهمة ونشاط وجهز الافطار لزوجتك(ده طبعا لغرض معين) ومتنساش انك تستخدم 15 طبق واكبر كمية من الملاعق والشوك و 5 حلل من اللى عندكم فى المطبخ و 10 كوبيات لاعداد طبق بيض وسندوتش جبنة
طبعا يراعى ترك اثار سمنة على الارض مع ترك التلاجة مفتوحة وقشر البيض فى الحوض

فى عيد ميلادها اعملها تورتة عيد ميلادها بخمسين شمعة ولو سألتك لية خمسين رغم ان عندها 25سنة بس ؟ اتحجج بضعف الاضاءة فى البيت وانت بتبص على النجفة اللى عندكم اللى فيها 30 لمبة مع ابتسامة صفراء خفيفة

لو عملة ريجيم اجرى على السوبر ماركت ومحلات الحلويات واملى التلاجة شكولاتة وحلويات وجاتوهات 00 يرعى التجول وانت مستمتع بأكل الجاتوة امامها

متنساش رأيك فى طبيخها لو عاملة لحمة قالها حلو اوووى الفراخ دى 00ولو طبخة بامية 00 جميلة اوى الملوخية دى حطة عليها اية ؟؟ ولو عملة كيكة قالها انا بحب اشرب شاى مع البسكويت الحلو دة !!

لو طلبت منك تنشر الهدوم قولها حاضر مع ابتسامة حانية (ابتسامه التماسيح وبرضه لغرض معين )وبعد ما تخلص نشر الهدوم
ادخل عليها وقولها انا نازل اجيب الهدوم اللى وقعت منى فى الشارع ولو سألتك هو اية اللى وقع ؟ اذكر لها كل هدومها اللى كانت مغسولة مع فردة شراب من بتوعك علشان متبقاش مقصودة منك !

لو الزوجة قررت مسح الارضيات فى البيت حاول انك تروح وتيجى على المناطق
المبلولة متحجج بأنك محتاج تتصل ضرورى بواحد صحبك ومرة عطشان ومرة تانية بتجيب الجرنال ومفيش مانع انك تقول انك حاسس ان التليفون هيرن كمان شوية

لو كانت مشغولة فى نظافة البيت او مع الاولاد وطلبت منك تغسل كوبتين الشاى بتوع الصبح الموجودين فى الحوض ارجعلها كمان دقيقة من دخولك المطبخ وانت ماسك كوبية من الاتنين وهى مكسورة واسألها فى براءة ارمى دى فين ؟؟

وانت قاعد تتفرج على التلفزيون وهى طالع عينها فى تنظيف البيت وبعد ما تخلص وتيجى يدوبكك تقعد تستريح جنبك بصلها وقالها حبيبتى معلش ممكن كوبية مية علشان ضهرى بيوجعنى !!

[@Noh]

فعلا رزالة بجد
لاحول ولا قوة الا بالله.

[ahmed helmy]

فعلا رزالة بجد
لاحول ولا قوة الا بالله.

الطيب احسن ليه بقي هو انتي كنت داخله فيا شمال ورجعتي غيرتي رايك ولا ايه
ع العموم انا ليا رجالتي ع المنتدي او بمعني تاني ورايا رجاله تاكل الظلط

[river]

ده عند اكتر من الرزالة

وبعدين لو حد فكر بس انه يعمل كده

فاكيد مصيره معروف هيبقى ايه

وبعدين بنفكركم بس

ان كيدهن عظييييم

جميل يا دكتور

gooo on

[buffy]

دا كتير محدش هيستحمل اى حد كدة خالص

[M.32L]

هى دى الرزاله ولابلاش

[Rooose]

طب والله مواقف تضحك أوي ي ي ي ي ي
بس
اعتقد انه مفيش حد ابدا بالرزالة دي
لان البني ادم اللي كدا مش هيستحمل نفسه اصلا ....
عشان كدا
معتقدتش ان دا ممكن يحصل ابدا !!!!!

[dr.noody]

دا اذا واحد فكر فى الرزالة دى يبقى اكيد قضى على نفسه لانه اكيد هايلاقى نفسه فى الشارع بس مش على رجليه ...

[dr_koko]

وحياتك من اول موقف هيعمله مش هيكون ليا الا رده فعل واحده بعدها هينادوني بحرم المرحوم فلان الرزل وبصراحه اللي تجوز واحد زي ده تبقي ريحت اهله واصحابه وهو البشر وظلمت نفسها

[dr_orchida]

ههههههههههههههههه
حسبي الله والله