دردشة طلاب الصيدلة , هل استفدت من الدراسة بالكلية في حياتك ؟؟

[pharmacistina]

السلام عليكم ورحمة الله وبركاته

بعد التحية لكم اخواني و أخواتي ..

موضوع كان المفروض أعمله من زمان ,

هيكون موضوع متجدد ان شاء الله ..

هنتكلم فيه عن ايه اللي استفدناه من دراسة الصيدلة ..

أنا عن نفسي شايفة بجد و الله .. و أنا بحلف بالله .. اني استفدت من دراسة الصيدلة ..

و بقول دايما الحمد لله ان ربنا أكرمني بدخول هذا المجال ..

أنا عارفة أصلا مكنتش ينفع أكون غير pharmacistina

أي مجال تاني كان هيدفن حاجات كتير أنا بحبها ..

المهم

ساعات البنات يتكلموا قدامي يقولوا ايه ,, الكلام دة احنا بندرسه ليه ؟؟ الكلام دة ملهوش لازمة , يعني احنا هنحتاجه بعد الدراسة ؟؟

كلام كتير من هذا القبيل ..

و المؤسف أن البعض ينكر استفادته من الدراسة !!

فبقول تعالوا بصدق نقول ازاي استفدنا من دراسة الصيدلة ,

كل واحد هيقول على قده بقى ..

أنا مش فاضية حاليا خالص فهبدأ أكتب في هذا الموضوع يمكن بكرة ..


أنا حاطة ماسك mask حاليا

عملت ماسك في البيت ..

الماسك عبارة عن Olive oil emulsion

جبت مستكلة من المطبخ و طحنتها بالهون ,

المستكة هي الـ Emulsifying agent ..

و طحنتها كويس جداا بقت زي الدقيق ..

و حطيت عليها زيت زيتون ..

و قلبتها كويس ,
و بدأت أحط ماء .. ماية من الفلتر

واحد ميللي بواحد ميللي و أقلب بسرعة , و في اتجاه واحد عشان الـ Emulsion مش يفصل .. قالوا لنا كدة في سكاشن الصيدلانيات صح ..

قلبت لحد ما بقى أبيض زي اللبن ,

حاجة عاملة زي الكريم ..

حطيته في طبق ..

و بعدين حطيت على my face and hands ..

حاجة زي كدة أنا لو عملتها في الصيدلية متأكدة ان البنات هتيجي تشتريها كتير ..

أنا هروح بقى أشيله .. أكيد هيكون مفعوله ممتاز

طبعا أنا معملش حاجة وحشة أبدااا ..



انتظروا مشاركات عديدة في هذا الموضوع قريبا ..

[NonY]

واااااو
دا عامل زى كريم أسمنتكو بالظبط

و الله شكله حلو
هو الجلد بيمتصه و لا ايه ؟؟
أصله شبه كريم دوف اللى عندى

بس قوليلى هو الماسك دا لإيه بالظبط
أصلى عايزة أعمل حاجة جديدة

خلى بالك انا متكلمتش خالص على موضوع الاستفادة من الكلية
مش عارفة ليه

[احمد شبند]

go on dr

its only in ur house

sorry no time in phrmacy

try again since 1988

للاسف ده حالنا دلوقت معدش ينفع

بس والله مجهود جميل ميعملوش غير حد فعلا بيعشق الصيدلة

بالتوفيق

[yojeena]

هههههههه
مش عارفه ليه حاسه انك بتتكلمي عليا
بس برده انا مصمصمه علي نفس الكلام اللي قلتهولك ,,,,
ما فيش فايده
الجذور عايزه تترمي و نزرع جديد
سيبك من دا كله عايزه اعرف اخبار ايديكي ايه ......نحن نختلف عن الاخريــــن

[3aSseM]

أنا استفدت من كليتي

بجد كلية شديدة

[عبدالله عبدالرحمن]

شكرا على الموضوع
بس بصراحة
حتى الأن كل اللى اتعلمته من الكلية
مجال تطبيقه اكاديمى اكثر مما هو قابل للتطبيق فى الصيدلية الأهلية
يعنى اكثر حاجة استفدت منها جدا
كان الميكروبيولجى لما نزلت الصيدلية عرفت الفارق بين معرفة الدواء اسما ومعرفته جوهرا
احساس تانى ..

انا مش مهتم اوى بمسالأة التحضيرات الصيدلية
على عكس حضرتك
اللى واضح جدا من خلال موضوعاتك
ان حضرتك بتحبى تعمليها

بس حضرتك جبتى مستكة منين
دى غالية
مازال اللى استفدت بيه من الكلية على الورق
وانتظر تطبيقه فى وقت قريب اذا شاء الرحمن

[pharmacistina]

بس حضرتك جبتى مستكة منين
دى غالية

المستكة في برطمان صغير جمب برطمان الحبهان cardamom .. بيتعمل بيهم الشوربة ..

المستكة غالية جدااا أنا عارفة , ماما لسة متعرفش اني خلصت نص المستكة الموجودة علشان أعمل الـ emulsion دة ..

ربنا يستر لما تعرف ..

هههههه

عادي هما في البيت متعودين مني على كدة ..

مخلصة الكركديه و الخل و البيكربونات و ماية النار conc. sulphuric ..


أنا بلاقي سعادتي في معامل الكلية ..
لما نطبق الصيدلة , و لما أحس بقيمة ما تعلمت بحس بمنتهى السعادة ..

علشان تكونوا عارفين ..

لما تكون عايز تبقى حاجة كويسة و حاجة مختلفة ..
You must make the difference

لازم تتعب و تشقى و تفشل و تحبط و تطلع و تنزل ,

تروح البيت يوم فرحان و طاير من الفرحة , و يوم تاني تكتئب و تعيط ..

هي دي الحياة و دة الكفاح اللي المفروض نعيشه عشان نوصل لهدفنا ..

اارضاء ربنا و أن نكون نموذج مشرف للصيدلي ..

ساعتها الواحد يقابل ربنا و هو مستعد لأنه عمل المطلوب منه ..

انما نكون ناس عايشة كدة بلا هدف ..

هتكون أسوأ حياة , أسوأ احساس في الدنيا ان الواحد يحس انه عايش في الدنيا دي ملهوش لازمة ولا له معنى ..

يا جماعة بالله عليكم ..

انتو أحسن ناس و الله ..

استغلوا امكانياتكم .. احلموا تكونوا أعظم الناس و أعظم صيادلة .. You will

مفيش حاجة تمنعني من اني أحلم و أتخيل نفسي أعظم صيدلانية في الدنيا دي ..

و مش هسمح لأي حد يحبطني ان شاء الله أو يوقفني ..

و متبطلش تدعيها أبداااا .. ( اللهم استعملنا و لا تستبدلنا )
( اللهم أعزنا بالاسلام و أعز بنا الاسلام )
( اللهم انفعنا بالدين و العلم )

في كل ركعة في كل سجدة ..

على فكرة .. أنا كصيدلانية مش اهتمامي التحضيرات بس ..
أنا بحب كل حاجة فيها تشغيل مخ و تطبيق و استفادة من المعلومات اللي خدناها ..

عارفين يا جماعة ..
ساعات الواحد يكون صامم و حافظ كتب كتيييييييير ,

And so what ???

ما الفائدة من قراءة مئات و آلاف الكتب اذا لم نطبق هذا العلم و نسخره لراحتنا و خدمتنا و اسعادنا ..

اضربلكم مثال ..

أنا عندي بالطو أبيض اشتريته في الأجازة اللي أنا رايحة بعدها سنة اعدادي صيدلة ..

البالطو دة عشرة عمري .. عندي بلاطي كتير بس دة له معزة خاصة ..

أول بالطو اشتريته في حياتي ..

البالطو دة استعملته أربع سنين و بستعمله حاليا للسنة الخامسة و هفضل محتفظة بيه ..

البالطو دة شاف من جميع أنواع البقع في المعمل .. و دلوقت مازال نظيف أبيض ..أنا كنت بغسله على طول

كان شيء جميل اختيار نوع الـ solvent اللي هيدوب البقعة دي ..

حسب نوع البقعة بيتوقف تنظيفها ..


لأن المنظفات دي كيماويات .. و البقعة مادة ..


في رأيي الكيمياء أم العلوم ..

الكيمياء أصل علوم الكون ..

كل الكون يسير بظواهر كيميائية ..

أنا ايدي مادة كيميائية و شايفة الشاشة بتفاعل كيميائي في العين و ضربات قلبي عبارة عن حركة أيونات ..

لذلك عشقنا الكيمياء .. أنا و أنتم

عارفين يا بنات أي رواسب سوداء في السيراميك دي عبارة عن sulphide ppt الله أعلم ايه الـ cation بتاعها


بتدوب في dil H2SO4 و تخلي السيراميك و الأسطح بيضاء بتلمع .. و يتصاعد H2S


لما تحس بنفسك و تفهم ازاي الأدوية بتشتغل و ازاي تحقق منها أكبر استفادة و ازاي تستخدم الأعشاب ..

و ما أدراكم ما الأعشاب ..

الصيدلة علمتني ازاي اختار الأكل .. و أظن كلنا عارفين العقاقير و محاضرة دكتورة منى زغلول ..

I,m proud to be a pharmacist

[Chimera]

الحقيقة الكلية فيها معلومات حلوة ..
بس انا شخصياً حاسس اني لو قعدت ع النت شهر اتصفح معلومات طبية و صيدلية
هتعلم اكتر من إللي اتعلمته ف الكلية ف 5 سنين ..!!!

يمكن عشان انا بكره مجال الطب و الصيدلة ده جداً .. عشان كده مش بهتم اني اتعلم بغرض الاستفادة قد اني اتعلم عشان احل ف البابر ..!!

بالتوفيق للجميع

.,,

[Dr/HULK]

في رأيي الكيمياء أم العلوم ..

الكيمياء أصل علوم الكون ..

كل الكون يسير بظواهر كيميائية ..

مين اللى قال كده

انا شايف ان الفيزياء اهم بكتير

والدليل ان اى دولة متقدمة فى مجال الفيزياء الفرق بينا وبينها

10000000000000000000000000000
ساعة

بس مش ده الموضوع

الموضوع بيتكلم عن مدى استفادتنا من الكلية صح....

انا بجد استفدت حاجة بحياتى كلها

انك مش لازم تستنى الاخرين عشان يساعدوك فى زمن الانتظار فيه ضياع للمستقبل

حد يفهمنى بس الجملة اللى فوق دى عشان بعد ماكتبتها مش فاهم منها حاجة

[pharmacistina]

مين اللى قال كده


انا شايف ان الفيزياء اهم بكتير

صحيح الفيزياء مجال مهم جدااااا و كذلك الرياضيات و المجالين دول بيصنعوا تقدم جامد جداااا لأي أمة ..

لكن على فكرة ..

حتى الظواهر الفيزيائية أصلها كيمياء ..

مثلا ظاهرة فيزيائية زي التوصيل الكهربي أصلها حركة الالكترونات الموجودة بالذرة و كل ما يتعلق بالذرة من الكيمياء ..

كون الذرة الوحدة البنائية لجميع المواد يجعلنا نعتقد ان الكيمياء تفسير جميع الظواهر الأخرة ..

هو دة رأي شخصي ..

أصلا جميع العوم حلقة واحدة متداخلة ..

و معلومة برده ..

الفيزياء أيضا من تخصص الصيدلي ..

فاكرين ال physical pharmacy بتاعة سنة ثانية صيدلة ؟؟

الصيدلة الصناعية في سنة رابعة هي كمان فيزياء ..

يعني انت كصيدلي درست أو لنقل ( أخدت فكرة و لو بسيطة ) عن الكيمياء و الفيزياء و الأحياء فمن المفترض أن تكون مثقف جدااا ..

دة رأيي و الله ووجهة نظري بعرضها ليكم و أحترم جدااا أي آراء معارضة ..

يمكن عشان انا بكره مجال الطب و الصيدلة ده جداً

طيب و ليه يا دكتور دخلت مجال حضرتك مش حابه ,

يمكن لو كنت دخلت المجال اللي بتحبه أكيد كنت هتبقى بارع و كويس جدااا فيه ..

الثانوية العامة الفاشلة في مصر جعلتنا نسعى وراء لقب ( دكتور ) و ندفع في سبيل هذه الكلمة عمرنا ..

75 % أو أكثر من اللي درسوا الطب في مصر , دخلوا كلية الطب علشان ينالوا لقب ( دكتور )

و كذلك نفس الوضع عندنا ..

ليه الواحد يضيع سنين عمره في دراسة مش بيحبها !!!

هي كلمة دكتور دي ايه أصلا ؟؟!!!

مش مهم أكون دكتور أكون تمرجي أكون عامل نظافة .. المهم أشتغل حاجة بحبها أقدر أعطي فيها و أكون مبسوطة ..

الثانوية العامة رفعت تنسيق كلية الصيدلة خلت الناس تدخلها عشان المجموع ..

أصل الطالب لما يكون جايب 97 % بيستخسر مجموعه انه يدخل كلية زي كلية العلوم مثلا , و يقول خسارة المجموع أما أدخل صيدلة ..

دي مشكلتنا في مصر و في مجتمعاتنا العربية ..

لن نتقدم أبدااا طول ما نظام الثانوية العامة موجود ..

نقول ايه بس .. الله المستعان ..