حـــــــكــــــايــه مــــــصــــــــــر

[rose smile]

ابتدى منين الحكايه وياترى ايه النهايه
حكايه امه عمرها عمر الزمن
حكايه مايكتبهاش ولا مليون قلم
حكايه امه اسمها لوحده علم
(1)حــــكايه مصــــــــر
جدى كان فرعون اصيل
بنى الهرم فى حضن النيل
خطط بايده تاريخ طويل
حضاره ومجد ملوش مثيل
حكى الزمن عنهم مواويل
(2)حكـــــايه مصـــــــــــر
عصر الفتوحات ابتدى
والشعب بنوره اهتدى
اسلام عم البلاد
زاد فى تاريخ الامجاد
أمه عرفت ربها
وحدّت شعبها
لجل ما يعلى اسمها
(3)حكـــايه مصـــــــر
مره جه طوفان كبير
غرقنا فيه سنين كتير
من فرنسى بعده تركى
انجليزى واره اميركى
كله عدّى علينا وداس
وبقينا نمشى نطاطى الراس
والكل فكر اننا
موتنا خلاص
انتفضنا كام انتفاضه
بس كان حكم السياده
اننا نعيش عبيد
(4)حكــايه مصــــــــر
فجأه كده من غير ميعاد
لما شاء رب العباد
ان ترجع البلاد
انقلب ضباط احرار
حلفوا ترجع الديار
وانقضى الليل الحزين
وابتدى الفجر الجديد
(5)حكــــايه مصــــــــر
عدينا بحر من المحن
والزمن عمال فينا يمتحن
واللى كان ف يوم حمينا
جه يوم وبغى علينا
واهى كلمه وقالها اهالينا
الضمير بيموته النفوذ
والجاه بيغير النفوذ
واااه من اللى يعبد الفلوس
(6)حكـــايه مصــــــــر
المرار زاد علينا
والسكوت كتف ايدينا
وازاى بس هيطلع صوت
والصوت بقى بيساوى الموت
بس الظلم له نهايه
والثوره قامت ودى البدايه
(7)حكايــه مصـــــــــر
فى الميدان اتخلق النصر
فى الميدان عرفوا معنى ابن مصر
وحلما سوا حلم العصر
ازاى بكره هنبنى مصر
(8)حكايـــــه مصــــــــر
طلعنا بالحلم لسابع سما
بس الحلم ملوش يتحقق يوم على الارض
والثوره بقت فيلم خيالى
نشوفه حصرى فى دور العرض
والسيناريو بيتكرر تانى
وكأن الذل علينا فرض
والضباب كحل عنينا
والغيوم لافف حوالينا
وبكره بقى مش واضح لينا
بس هقولها واسمعها منى
الف مره الشمس تغرب
بس تشرق من جديد
الف مره الليل يطوّل
بس بكره صبحه اكيد
ومهما شهرالصوم يطوّل
بعده بردو هيجى العيد

امل ابراهيم

[M.Hegazy]

حلوة يا دوك تسلم إيدك .. ^_^

[قطر الندى]

جميلة يا أمولة تسلم الأيادى

[Dr_Cinderellaaaaa]

جميلة جدااااااااااااااااااااا يا أمل .. تسلم ايديكِ ..

[eeeman]

جميلة يا دوك تسلم ايدك

[rose smile]

حلوة يا دوك تسلم إيدك .. ^_^

شكرا يادوك والنقد سمعته قبل كده ^_^

جميلة يا أمولة تسلم الأيادى

سمكه شكرا ومنوره ياحبيبتى

جميلة جدااااااااااااااااااااا يا أمل .. تسلم ايديكِ ..

تسلميلى ياساره
دى فى ذكرى امتحان الصيدلنيات اكتبت تانى يوم بعده

جميلة يا دوك تسلم ايدك

شكرا يادكتوره ايمان ومنوره الموضوع

[mohamed fadel]

وتستمر الحكاية الى ان ترتسم بسمة الصباح ان شاء الله
بجد جميلة جزاكم الله خيرا

[A.Elrayes]

نفسي اسمعلها القاء بجد
رااائعة

[rose smile]

وتستمر الحكاية الى ان ترتسم بسمة الصباح ان شاء الله
بجد جميلة جزاكم الله خيرا

جميل التعبير بتاع ترتسم بسمه الصباح
منور يادوك
والحمدلله انها عجبتك

نفسي اسمعلها القاء بجد
رااائعة

شكرا يادوك
وان شاء الله احاول ارفعها القاء صوت

[rose smile]