عوده الى كرسى الاعتراف مع M.Hegazy

[حنين الأمس]

السلام عليكم ورحمة الله وبركاته....

1)هناك من يمتلكون أقلاماً ذهبية لأنهم.....
1- يمتلكون مَلَكَة الكلمة....
2- يعشقون القراءة فأبت أن تتركهم إلا وهم شعراء ...
3- دائماً ما يحاولون البحث عن من يتملك مشاعرهم فلا يجدون أمامهم سوى أقلامهم لتحتويهم....

حضرتك مين فيهم ؟؟؟؟


2) أمامك علبة ألوان....أي لون ستأخذه لتعبر عن ما يلي؟؟؟ وماذا ستكتب به "جملة واحدة " ؟؟؟
الحزن
الصمت
الحنين
الفرح
الندم
التوبة
الفراق


3) حياتك تنقسم إلى شطرين...
شطر في الإمارات...
شطر في مصر...
هل تشعر بحنين إلى شطرك الأول؟؟؟ ولماذا ؟؟؟
وهل تعيش شطرك الأول بين جلابيب الثاني أم تجردت منه ؟؟؟


4) متى تهجر قلمك ؟؟؟ ولماذا ؟؟؟

...أعتذر عن الإطالة...

[M.Hegazy]

حسره عليها يا حسره عليها جت رجليها موش عارفه ايه كدا
المهم انها الاغنيه بتاعة ريا وسكينه
ما هي بقت هيصة خلاص ..

منور الكرسى يا دوكتر

ده نورك يا د.آية
....
الأسئله دى جاوب عليها :

1/ حاجه نفسك تغيرها فى حياتك وفى نفسك يعنى
نفسي أبطل حزن و يأس و يبقى عندي أمل في بكرة

2/هل فى سر فى حياتك مقولتوش لحد ابدا ولا حتى أقرب الأقربين ؟
السر يا دوك آية ميبقاش سر حتى لو طلع لمين كان .. عشان كده أسراري أنا حافظها و كاتمها .. و معروف عني إني شخصية كتومة جدا فيما يخص أسراري ..
3/انا اعرفك من فتره وجيزة بس بقيت صديق عزيز عليا جداا ايه اكتر حاجه بتضايقك فيا غير مناكفتى طبعا ههه
و إنتي برضه يا آية صديقة عزيزة و معرفة تشرف و الله و فخور جدا بيكي ..
اللي بيضايقني فيكي .. كتر انشغالك كده بيخليكي توقعي حاجات في النص .. فركزي و حاولي متعمليش كل حاجة في نفس الوقت ..
4/بما انك شاعر وكدهون يعنى هه لو حد طلب منك تكتب مدح فى شخص انت مبتحبوش تقبل ؟
مقدرش اعمل كده حتى لو نويت .. هضحك على مين يعني !! على نفسي !! و لا على اللي هكتبله القصيدة !! .. و لو حتى كتبتله هيبان إني كداب و شكل هيبقى وحححححححححش ..
وايه اكتر قصيدة ليك قريبه من قلبك
القصيدة اللي ألقتها في طابور المدرسة دفاعا عن النبي أيام الرسوم المسيئة ..
5/ ايه اكتر حاجه بتسعدك ؟ وبتخليك تبتسم ؟؟ وايه ممكن يخليك كئيب جدا وحزين ؟؟
أكتر حاجة بتسعدني إني اشوف الناس حواليا خصوصا عيلتي و أقرب الناس ليا و أصحابي و بعدين الدنيا كلها لو أمكن .. مش شايلين هم حاجة و بيبتسمو كده .. و كمان بفرح قوي لما بكون سبب في سعادة حد أو إني اعمل حاجة تسعد حد أو تساعد في كده ..


الوحدة أكتر حاجة بتخليني حزين و قلة سؤال الناس عليا برضه حاجة تزعل جدا جدا
6/ لما تخلص صيدلة ان شاء الله ايه طموحك وهتعمل ايه فى حياتك ؟؟
بإذن الله ربنا يوفقني و ادخل الجيش ضابط و هفضل فيه إن شاء الله لحد ما اتقاعد و في خلال فترة وجودي في البيت هيبقى فيه فاميلي بيزنس إن شاء الله و مشاريع كده ربنا يوفق الجميع و يتمها على خير

براحة ياجماعة ع مالكو لسة الدكتور مأخدش نفسه

قوليلهم يا دوك .. داخلين ضرب ضرب ضرب .. مفيش شتيمة !!!

السلام عليكم ورحمة الله
و عليكم السلام و رحمة الله و بركاته ..
عدنا بفضل الله ومنه وكرمه
وهبدأ معاك بأسأله سهل شويه لأنى هرجع تانى إن شاء الله
و ماله يا صاحبي .. احنا بيهمنا ..

أيون
ندخل على طول
*1* محمد حجازى يجلس ليتذكر بعض المواقف التى لا ينساه فى الفتره ما بين الرابعة من عمره وحتى السادسه
فما هى المواقف التى سيتذكرها ؟
امممممممم .. المواقف كتير بس أبرزهم :
- كانت عندي عادة عجيبة في الأكل .. كنت لما ابدأ الأكل أقول باسم الله ( عادي الناس كلها بتعمل كده ) بس لما كنت بخلص أكل كنت بقول صدق الله العظيم .. فبقت عادة في العيلة لما اقعد كتير على الأكل أو أطول ( كنت أكيل و أنا صغير ) كانو يقولولي ( مش ناوي تصدق بقى !!! ) ..

- اتذكر في الصف الأول الابتدائي في مدرسة مسافي الابتدائية بنين بدولة الإمارات .. كان أستاذنا الفاضل - حفظه الله - الاستاذ علي .. ادانا درس عن فضل الوضوء .. فكان بيقول اللي بيتوضى بيدخل الجنة .. المهم يعني .. قولتله طب و اللي يتوضى مرتين .. يدخل الجنة مرتين !!! ..

*2*محمد حجازى الطفل كيف يراه محمد حجازى الشاب ابن الثالثة والعشرين من عمره ؟
شخصية محبوبة و خفيفة الظل .. مصدر سعادة و بهجة .. صاحب كاريزما عالية .. و مجتهد للغاية .. و كان مجهوده و تفكيره دائما أكبر من سنه بمراحل .. يا ريت ارجع طفل تاني

*3*من هم رفاق الطفوله وهل أصبح أحدهم صديق العمر ؟
رفاق الطفولة لا يمكن نسيانهم ..
كريم سمير ، عبد الفتاح محمد ندى و أخوه عبد العزيز ( و دول انقطع اتصالنا غصب عننا لما بقيت في سنة 5 و معرفش عنهم أي حاجة من يومها )
أحمد محمد جمال هواش ( صديق العمر 15 سنة صداقة انتهت للأسف بسبب مشكلة كبيرة )
ياسمين أشرف ( قرينتي و منافستي اللدودة - أعز أعدائي - ) و أختها العسولة جدا بثنت ( بسنت يعني ) ..

*4*أى الألعاب كنت تحبها وأنت طفل ؟
العربيات و المكعبات و كان عندي عجلة الله يرحمها بقى شافت أيام .. و كنت بحب ألعب الفيفا الزاحفة اللي كانت بتتلعب على الأتاري اللي هيا فيها 5 لاعبين دول .. و كنت بحب الألغاز و الحاجات اللي فيها غموض ..
*5*ماهى أحلام الطفوله ؟
أول حلم : كان نفسي ابقى عسكري مرور ..
تاني حلم : كنت بتمنى ابقى جراح قلب ..
كنت بحلم بالسفر و بحبه قوي و كمان كان نفسي في مرحلة من مراحل طفولتي إني أبقى رئيس جمهورية ..
*6*أى المواد كنت تفضل وأنت فى المرحله الابتدائيه ؟
العلوم و الرياضيات و التربية الإسلامية و الموسيقى
*7*هل هناك من مدرسين المرحله الابتدائيه من أثر فى شخصيتك ؟ اذكر بعض المواقف التى لن تنساها معه ؟
طبعا كلهم لهم الفضل الكبير للي أنا فيه دلوقتي ..
و اتذكر من مواقفي مع الاستاذ علي .. كان بيخليني اطلع على السبورة و اشرح للفصل الدرس كاملا .. و كنت بضرب اللي بيغلط و اللي بيجاوب صح بديله بونبوني .. و وصلت بيه ثقته في أكتر من مرة إن كان بيسيب الفصل و يخليني اشرحلهم و اسكتهم ..
*8*هل كنت تحب المدرسه ؟ إن كنت تحبها فلماذا وإن كنت تكرهها فلماذا أيضا ؟
على عكس ناس كتير .. كنت بحب المدرسة جدا جدا .. لأني كنت بلاقي نفسي فيها .. كنت بحب النشاط و الحركة و التفكير المستمر .. و مكنتش بلاقي محيط يساعدني على كده و إني أطلع طاقتي دي غير المدرسة ( و مننساش أبدا برضه دور البيت اللي مقلش ابدا عن المدرسة ) ..
*9*هل أخذت دروس خصوصيه فى المرحله الابتدائيه ؟
لا .. أبدا ..
*10*باستعراض شريط حياتك فى الفتره من الصف الأول الابتدائى وحتى الصف الخامس الابتدائى اذكر لنا أغرب موقف تجده وأسعد موقف وما هو الموقف الذى تريد أن تحذفه من هذا الشريط ؟
أغرب موقف : وفاة جدي رحمة الله عليه .. مكنتش افهم طبعا في السن ده يعني إيه موت .. بس شفت موقف في اليوم ده عمري ما هنساه أبدا .. كنت بشب من سور السلم و ببص تحت في بير السلم على الناس .. لقيت والدي و عمي رحمة الله عليه بيحضنو بعض جامد و هما بيعطو ( و دي من المواقف القليلة اللي بشوف فيها والدي بيعيط ) .. الموقف ده أثر فيا جدا و دفعني للتساؤل : هما زعلانين قوي كده ليه !!! و بعدها بفترة قصيرة لما حسيت بغياب جدي رحمة الله عليه و عشان كان هوا قريب مني جدا .. بدأت افهم و لأول مرة في حياتي أحس بطعم الفراق ..

أسعد موقف : لما والدي حفظه الله راح معايا مدينة دبي عشان نستلم عدة جوايز ليا هناك و البسمة مالية وشه و فرحان بيا و فخور كده .. بجد افتقد لشكل وجه والدي ده جدا جدا ..

موقف أريد حذفه من شريط الذكريات : مفيش صراحة .. لسبب بسيط جدا .. حياتي زمان لو جتلي فرصة إني أكررها .. هعيشها بنفس الأسلوب و هبقى مش عايز اكتر من اللي حصلي أنه يحصلي .. بحب حياتي و بحب شريط ذكرياتي ده و باعتز بيه جدا بمره قبل حلوه ..
دول كفايه عليك مؤقتا

بس هرجعلك تانى
تنورني يا أبو حميد .. مستنيك ..
وإن شاء الله نشوف نزود شويه المره الجايه

لك منى أطيب الأمنيات

أشكرك بجد يا أبو حميد أثرت في نفسي ذكريات ما اجملها من ذكريات .. أشكرك من قلبي بجد و نورتني ..

السلام عليكم ورحمة الله وبركاته....
و عليكم السلام و رحمة الله و بركاته ..

1)هناك من يمتلكون أقلاماً ذهبية لأنهم.....
1- يمتلكون مَلَكَة الكلمة....
2- يعشقون القراءة فأبت أن تتركهم إلا وهم شعراء ...
3- دائماً ما يحاولون البحث عن من يتملك مشاعرهم فلا يجدون أمامهم سوى أقلامهم لتحتويهم....

حضرتك مين فيهم ؟؟؟؟
التاني و التالت ..

2) أمامك علبة ألوان....أي لون ستأخذه لتعبر عن ما يلي؟؟؟ وماذا ستكتب به "جملة واحدة " ؟؟؟
الحزن : عنواني
الصمت : تلميذي
الحنين : دائي
الفرح : حلم بعيد المنال
الندم : قلما شعرت به إلا على عبادة ضاعت مني
التوبة : اللهم اجعلنا من التوابين .. التوبة سلاح المؤمن
الفراق : قصة حياتي


3) حياتك تنقسم إلى شطرين...
شطر في الإمارات...
شطر في مصر...
هل تشعر بحنين إلى شطرك الأول؟؟؟ ولماذا ؟؟؟
الإمارات عشت فيها 15 سنة تقريبا .. يعني أغلب حياتي هناك .. بس عمري ما نسيت بلدي لحظة و دايما كنت بتغني بيها رغم عدم إلمامي بتاريخها و ما حواليها ..
فأكيد بحن للإمارات .. لأنها ادتني اللي ملقتوش هنا في بلدي و كنت فيها إنسان ناجح و مثابر و صاحب طموح كبير .. ده غير إنها في الجانب الإنساني مني عشرة عمر ( و العشرة متهونش إلا علي ..... ) .. و كمان هناك عشت سنين و مراحل مختلفة من عمري و اتربيت هناك تربية اعتز بيها جدا ..
وهل تعيش شطرك الأول بين جلابيب الثاني أم تجردت منه ؟؟؟
أيوة بعيش .. مهما كان و لو لفيت بلاد الله زي ما بيقولو .. عمري ما أنسى بلدي اللي كنت بتعب عشان ارفع راسها في كل حتة و يقولو ( ده ابن مصر ) .. و في نفس الوقت عمري ما أنسى بلد كانت صاحبة الفضل عليا في حاجات كتير في حياتي ( بلدي التانية الإمارات ) ..
باختصار أنا مصري- إماراتي ( الاتنين مع بعض )

4) متى تهجر قلمك ؟؟؟ ولماذا ؟؟؟
عندما يأبى و يصر على أن يشعرني بالعجز .. لأن قلمي حافظ سري و اللي بيعبر عن اللي جوايا كويس قوي ..
...أعتذر عن الإطالة...

شرفتيني يا دوك .. و نورتيني و أسعدتني باسألتك الجميلة دي .. لكِ كل التحية و الشكر ..

[**mahasen mohamed fouad**]

بالراحه شويه يا دكاتره هههههههههههههههههههههههههه انتو خلتوه كرسى الانتقام .........من الاسئله طبعا مش من الضيف

[Dr_Cinderellaaaaa]

ايه ده !! مش معقووووووووووووول
حضرتك قاعد على كرسى الاعتراف يا دوك !!
ربنا يكون فى عونك ..
بس أنا فرحانة فيك بصراحة ..
شوية أسئلة وهرجع تانى ؛؛
هل أنت راض عن نفسك (بنسبة كام فى المية؟)
هل تعترف بالصداقة بين الرجل و المرأة ؟
حكمة تؤمن بها جدا ؟؟؟
اذا أردت ان تبكى فعلى ماذا ستبكى ومن ستختار ليمسح دموعك ؟؟؟
شىء أو شخص غير مجرى حياتك ؟؟؟
كلمة تود سماعها كل يوم ؟؟؟

كفاية كده .. عشان ماتزعلش ..

[*Jessy*]

نورت الكرسي يا دكتور

[نور الحياة]

ازيك يادكتور محمد
انت ليه حزين ع طول؟
انا ليه بحس انك جواك كلام اكبر من الكلام اللى بطلعه ع المنتدى ؟
ليه كان نفسك تبقى دكتور قلب؟
ايه مصدر السعادة ف حياتك؟
بتحب الدنيا قد ايه؟وعايزز ايه منها؟وحققت قد ايه من طموحاتك؟

[حنين الأمس]

شرفتيني يا دوك .. و نورتيني و أسعدتني باسألتك الجميلة دي .. لكِ كل التحية و الشكر ..

ربنا يكرمك يا د.محمد
حضرتك من القلة القليلة الذين يحتفظون بالجنسية المزدوجة

[E.Raafat]

السلام عليكم
أيه يابني اللي مبهدلك كده مش قلتلك متلعبش في منتدى الناس التنين ,,,,,,,,,,, المهم أسأل بقى
1) بما إن كان من طموحاتك تكون رئيس الجمهورية ( ودا مازال حلمي حتى الان ) شايف مصر إسلامية ولا أيه؟؟؟
2) التفاني في العمل العام أكثر ما يميز محمد حجازي ,,,, من قدوتك في هذا ؟؟؟؟
3)لو رجع بيك العمر ( زي ما انت بتتمنى ) ياترى هتكمل تعليمك في الإمارات أم هنا ؟؟؟؟
4) طموحاتك كمشرف على المنتدى الأدبي ؟؟؟؟؟؟؟
بس ياسيدي شوف أنا طيب إزاي ؟؟؟

[M.Hegazy]

بالراحه شويه يا دكاتره هههههههههههههههههههههههههه انتو خلتوه كرسى الانتقام .........من الاسئله طبعا مش من الضيف

قوليلهم يا دوك محاسن قوليلهم ..

ايه ده !! مش معقووووووووووووول
حضرتك قاعد على كرسى الاعتراف يا دوك !!
ربنا يكون فى عونك ..

بس أنا فرحانة فيك بصراحة ..
يا ربنا .. ليه كده !! هوا أنا عملتلكو إيه !! ده أنا غلباااااااان ..
شوية أسئلة وهرجع تانى ؛؛
ماشي ..
هل أنت راض عن نفسك (بنسبة كام فى المية؟)
كنت راضي عن نفسي زمان بنسبة 90 % .. دلوقتي معتقدش حتى أجيب 55 % - 60 % .. يعني مقبول بالزق
هل تعترف بالصداقة بين الرجل و المرأة ؟
حددي معنى و شكل الصداقة دي و أنا أقولك إذا كان ينفع و لا لأ .. .. لكن الصداقة المطلقة عن نفسي غير معترف بيها لأن لازم يبقى فيه حدود و ضوابط .. مجيش أحط النار جنب البنزين و أقول مش هتحصل حريقة !!!
حكمة تؤمن بها جدا ؟؟؟
لكل مجتهد نصيب ..
اذا أردت ان تبكى فعلى ماذا ستبكى ومن ستختار ليمسح دموعك ؟؟؟
هوا أنا تخصص كآبة .. لكن دموع و الكلام ده بيني و بين نفسي .. فلو بكيت هبكي على حاجتين و بجد : يوم ضاع و أنا حاسس إن ربنا مش راضي عني فيه ، و هبكي على نفسي و اللي وصلتله دلوقتي ..
اختار ليمسح دموعي .. بإيدي أنا .. لكن أحب امسح أنا دموع الناس و لو هتغرق فيها ..
شىء أو شخص غير مجرى حياتك ؟؟؟
عمي ميسرة رحمة الله عليه .. غير مجرى حياتي في حياته و حتى بعد موته ..
كلمة تود سماعها كل يوم ؟؟؟
الحمد لله
كفاية كده .. عشان ماتزعلش ..

إزاي بس يا دوك .. كلامك و أسئلتك و تشريفك ليا حاجة تسعدني جدا .. أشكرك ..

نورت الكرسي يا دكتور

منور بأصحابه يا دوك .. إن شاء الله نبقى نجيلك زيارة ..

ازيك يادكتور محمد
الحمد لله يا دوك .. تمــــــــــــام ..
انت ليه حزين ع طول؟
مين قالك كده يا دوك .. بالعكس و الله .. الناس بتحب تشوفني عشان بخلي مودهم حلو و بخليهم يتبسطو كده و يهيسو ..

حزني يا دوك له أسباب كتيرة .. كنت زمان بقدر اكتم الحزن ده و اسيطر عليه سيطرة كاملة .. لكن بدأ يبان عليا للأسف الشديد الفترة اللي فاتت دي .. زي ما تقولي كده فاض بيا .. بس عموما يعني يمكن تكون حساسيتي الزيادة هيا المشكلة
انا ليه بحس انك جواك كلام اكبر من الكلام اللى بطلعه ع المنتدى ؟
ده أكيد .. و من طبعي يا دوك إني شخصية كتومة للغاية ..
ليه كان نفسك تبقى دكتور قلب؟
عشان جدي رحمة الله عليه كان تعبان بالقلب .. و أنا كنت مفكر إن دكتور القلب بيخلي الناس تخف و بيبقو فرحانين .. ده السبب المعنوي ..
السبب المادي .. كنت بتفرج على عمليات قلب مفتوح و أنا صغير و كنت مهتم جدا بتشريح و رسم القلب ..
ايه مصدر السعادة ف حياتك؟
مهما لفينا و دورنا .. هتلاقي السعادة في الآية اللي بقولك عليها دي .. ربنا سبحانه و تعالى بيقول في كتابه العزيز : " و من أعرض عن ذكري فإن له معيشة ضنكا و نحشره يوم القيامة أعمى " .. يبقى العبرة في : ( ما أحلى الحياة في طاعة الله ) هوا ده مفتاح السعادة الحقيقية الأبدية ..
مصادر سعادتي التانية .. في سعادة الناس اللي حواليا .. بجد أكتر حاجة ممكن تسعدني إني أشوف شخص يهمني فرحان و مبسوط .. ده قمة السعادة عندي ..
بتحب الدنيا قد ايه؟وعايزز ايه منها؟وحققت قد ايه من طموحاتك؟

مش بحب الدنيا خالص مالص ..

عايز منها تسيبني في حالي ..

حققت تقريبا الربع الأول منها .. لسه الــ3 أرباع الباقيين .. و الله المستعان ..

ربنا يكرمك يا د.محمد
حضرتك من القلة القليلة الذين يحتفظون بالجنسية المزدوجة

ربنا يعز حضرتك و يكرمك يا رب .. شكرا لرد و تواجد و متابعة حضرتك ..


اعتذر عن التأخر في الرد و ذلك لظروف سفر والدي - ربنا يوصله بالسلامة إن شاء الله ..
-----

السلام عليكم
أيه يابني اللي مبهدلك كده مش قلتلك متلعبش في منتدى الناس التنين ,,,,,,,,,,, المهم أسأل بقى

تووووووووبة يا راجل .. توبة ..

1) بما إن كان من طموحاتك تكون رئيس الجمهورية ( ودا مازال حلمي حتى الان ) شايف مصر إسلامية ولا أيه؟؟؟

يا ريت تبقى مصر إسلامية .. يااااااااه .. هنبقى من أرقى الأمم و أعزهم ..

شوف يا سيدي .. من وجهة نظري اللي على قدي .. سيدنا عمر بن الخطاب قال : ( نحن قوم أعزنا الله بالإسلام فإن ابتغينا العزة بغيره ، أذلنا الله ) .. و اللي يقولك الإسلام دين مش دولة .. أقوله ثانية واحدة من فضلك ..
الإسلام دين و دولة و دستوره القرآن ..
ربك سبحانه و تعالى قال : ( اليوم أكملت لكم دينكم و اتمم عليكم نعمتي و رضيت لكم الإسلام دينا ) ..
يعني بلغتنا العامية : كل حاجة تمام و مش ناقص غير التطبيق و من قبله الفهم الصحيح ..


2) التفاني في العمل العام أكثر ما يميز محمد حجازي ,,,, من قدوتك في هذا ؟؟؟؟

رسول الله قدوتي و مثلي الأعلى في كل شيء و لله الحمد .. و على قد ما أقدر بحاول اتبع هديه و سنته .. و من كثرة قرائتي لسيرته ..
و كان أيضا والدي أعزه الله كان دائما وقودي في هذه النقطة و كان دايما يحفزني و يحمسني و يشجعني و يقف في صفي جدا .. و من بعده جدي رحمة الله و عمي ميسرة أخو والدي ( رحمة الله عليه ) ..
3)لو رجع بيك العمر ( زي ما انت بتتمنى ) ياترى هتكمل تعليمك في الإمارات أم هنا ؟؟؟؟
لو كانت الثورة مقامتش هنا .. كنت هفضل هناك طبعا .. لأن كنت هاخد مركز محترم و مرموق جدا هناك و كنت هريح والدي من العذاب اللي شايفه ..
4) طموحاتك كمشرف على المنتدى الأدبي ؟؟؟؟؟؟؟
إنشاء ديوان أدبي باسم المنتدى و رواده إن شاء الله .. يبقى الأول من نوعه .. و هتبقى عادة تورث إن شاء الله .. يعني لما نروح كلية صيدلة جامعة المنصورة بعد 20 سنة - يدينا و يديكو الصحة - نلاقي في المكتبة هناك ديوان سنوي باسم الكلية و باسم المنتدى .. شوف إنتا بقى .. هيبقى إنجاز كويس ..
دي أكبر و أكتر حاجة شاغلاني بخصوص المنتدى الأدبي ..
بس ياسيدي شوف أنا طيب إزاي ؟؟؟

حبيبي يا دوك إبراهيم .. نورتني و أسعدتني بمشاركتك و كلامك الطيب .. أشكرك من قلبي ..

[moslma]

انا بقي هاسألك سؤالين صغنتتين؟
انت عمرك ما جرحت حد؟ولو حصل وجرحت حد ياتري ايه اسبابه وممكن تصلح الجرح ده ولا لا
********
ان شاءالله لما تدخل الجنة تحب مين من الدنيا يكون معاك هناك