# وارجع تانى امشى #

[محمد سمير]

لما باروح كل يوم
بالليل من شغلي

وأبقى ماشي فى
الشارع أنا وبس لوحدى

ساعات بقعد
أكلم فى ظلى

وأقوله لإمتي بقي ياعم
هتفضل ماشى ورا منى

هو أنا عملتلك حاجة
ولا إنت غاوى تضايقنى

وساعات بقعد أدندن
ومع نفسي أغني

مالشارع هس أسكت
يعنى مفيش حد سامعني

وممكن أقعد أمثل
مشهد من فيلم عجبنى

وأسقف برده لنفسى
أصل مفيش حد شايفنى

وساعات بفتكر واطلع
من جيبى موبايلي

واشوف يمكن حد
إتصل بيا أو كلمني

بس بلاقي دايما
مفيش حد عبرنى

واحطه تانى في جيبي
وارجع تانى أغني

وساعات بشوف ناس
ملامحها غريبة عنى

وكالعادة بابعد عنهم
وأعمل نفسى مابشوفشى

ممكن تسمو ده خوف
بس هيا دى طبيعتي

إنى بخاف من كل حاجة
حواليا مدام مش بتاعتي

وساعات كتير أحب
أبص فى ساعتى

وألاقى العقارب
فيها مبتتحركشى

مع إنى طول اليوم
مش بفكر غير فى شغلى

بس تقريبا الوحدة
بتخلي الوقت مش بيمشى

وبرده ساعات أعد
فى البيوت اللى جمبى

بس بعدها أقول لاما انا عبيط
او دماغى بتشتغلنى

و ممكن أقعد أفكر
في كل حاجة حصلتلى

من أول ماصحيت من النوم
لحد مانا ماشى دلوقتى

بس دايما وسط مانا بافكر
بتيجى حاجة وتشغلنى

زي مثلا عربية ماشيه
تيجى فجأة تنورلى

أو قطة تختفي بسرعة
بعد ما بتظهرلى

وساعتها انسى كل حاجة
وأرجع تانى أمشى

[DR.BIBO]

دمها خفيف وغريبه
بس انا مش فاهمه الجمله ديه
إنى بخاف من كل حاجة
حواليا مدام مش بتاعتي

[saraa]

كلمات معبره وجميله شكرا

[محمد سمير]

دمها خفيف وغريبه
بس انا مش فاهمه الجمله ديه
إنى بخاف من كل حاجة
حواليا مدام مش بتاعتي

طالما حاجه مش بتاعتى

يعنى مش ملكى وما اقدرش اتصرف فيها فببعد عنها

نورتى التوبيك

[العيون الضاحكة]

لحظات ممكن كلنا نعيشها بس اكيد مش هنعرف نكتبها ونعبر عنها بالصورة الجميلة دى.

كلمات معبرة يا دكتور

وحدة مع ملل مع روتين يومى مع احساس بان الايام زى بعضها

بس نصيحة منى..حضرتك لازم تغير جو ضرورى ....لان الوضع كده ميطمنش.

[تابعة محمد]

لحظات ممكن كلنا نعيشها بس اكيد مش هنعرف نكتبها ونعبر عنها بالصورة الجميلة دى.

كلمات معبرة يا دكتور

وحدة مع ملل مع روتين يومى مع احساس بان الايام زى بعضها

بس نصيحة منى..حضرتك لازم تغير جو ضرورى ....لان الوضع كده ميطمنش.

انا متفقة مع الراى ده جداااااا .
بس لذيذة وكلماتها خفيفة ......... وبعدين تحس بالجو الى فيها كانك انت الى ماشى فعلا .

بس مش عارفة عندى احساس ان محدش بيعمل كده دلوقتى ........ يعنى محدش لسه بيمشى يغنى او يضحك مع نفسه او دماغه تشتغله ...... كل الناس اكبر همها تفكر فى الفلوس .

-----
بسم الله الرحمن الرحيم
وبعد اذن حضرتك انا عايزة اعملها انقلها على الول عندى على الفيس ....؟؟

[محمد سمير]

بسم الله الرحمن الرحيم
وبعد اذن حضرتك انا عايزة اعملها انقلها على الول عندى على الفيس ....؟؟

اتفضلى طبعا

بس ابقى بلغينى هنا ردود الافعال

[sara ahmed]

وابقى ماشى فى الشارع انا وبس لوحدى
ياااه كل ده تاكيد مصدقينك والله
بجد روعه لانها بتحصل فعلا بالتوفيق

[same7]

حلوه وخفيفه واتمنيتها اطول من كده يا ابو رولا

[محمد سمير]

كلمات معبره وجميله شكرا

نورتى التوبيك