نفسي أبطل أحبهـــــــا -بقلمي-

[Al-Shaimaa]

نفسي أبطل أحبهــــــا

نفسي أبطل أحبها

وأبطل أدوب من عشقها
نفسي أبطل احب مصر
بس ازاي ما احبهاش
وهواها مغروس في قلبي
ونيلها بيسري مع دمي
من الوريد للشريان
دي غلاوتها جوايا
ما يمحيها الزمان
نفسي أبطل أحبها
وأبطل احب أرضها
وحضارتها وعتقها
و أبطل أشتاق لجوها
وانسى على الرملة شمسها
و ذكرياتي على شطها
نفسي أبطل احبها
وانسى صوت الآدان
بيصحيني في فجرها
و انسى فيها الشوارع
يوم جمعة شكلها
نفسي أنسى أهلها
مسلمينها وقبطها
متجمعين في حضنها
انسى لمتي مع اهلي وسطها
نفسي انسى حبها
نفسي أنسى الدائري
نفسي أنسى طابور العيش
نفسي انسى الكومسري
ووقفتي في المترو والأتوبيس
نفسي انسى العيد على أرضها
فرحة ما تلاقي في الدنيا زيها
نفسي أنسى فيها ليالي رمضان
و لمتنا سوا ِنستَنا المدفع والادان
وسباقنا صغيرين عشان نختم القرآن
واحنا لسه عيال عرفنا فيها معني الايمان
اتعودت اصلي فيها كل فروضي في المسجد
اصوم مع امي التلاتة البيض
واسهر مع ابويا لقيام الليل والتهجد
واصحى من بدري على مدرستي
مع مينا وجرجس دول أهلي
ما عرفناش فيها معنى العنصرية
ولا زي ما بيقولوا جماعات ارهابية
ينتقم من اللي بيشوه صورتها النقية
نفسي ابطل احبها
عشان ابطل رد فعلي
لما اسمع كلمة ضدها
او لما اعرف ان حد جه على حقها
نفسي أبطل أحبها
نفسي أبطل أحب مصر


بقلمي
S.S

[M.Hegazy]

ما شاء الله قصيدة جميلة و معبرة جدا ..

[Al-Shaimaa]

ما شاء الله قصيدة جميلة و معبرة جدا ..

دي تاني خاطرة ليا بالعامية
وبعتبرها من هلاوس الامتحانات

اسعدني رأي حضرتك

[M.Hegazy]

كل ما كان الكلام مفهوم و سهل و بسيط .. و أقصد المكانة الوسط بين الكلام .. يعني لا متقعد و كله كلاكيع أو تافه و كل كلام فاضي .. فالموضوع بتاع حضرتك في الوسط و هوا ده المطلوب .. سهل و بسيط و معبر .. و وصلي أفكار و مشاعر حضرتك .. و هو ده الكلام الناجح ..

ده رأيي .. و أنا مؤمن بيه .. و اعتذر على الإطالة

[Al-Shaimaa]

كل ما كان الكلام مفهوم و سهل و بسيط .. و أقصد المكانة الوسط بين الكلام .. يعني لا متقعد و كله كلاكيع أو تافه و كل كلام فاضي .. فالموضوع بتاع حضرتك في الوسط و هوا ده المطلوب .. سهل و بسيط و معبر .. و وصلي أفكار و مشاعر حضرتك .. و هو ده الكلام الناجح ..

ده رأيي .. و أنا مؤمن بيه .. و اعتذر على الإطالة

شكرا مرة تانية لتحليل حضرتك
ربنا يكرمك رفعت من روحي المعنوية
ومفيش اطالة ولا حاجة يا فندم

[S!lent Tear]

...

nice,nice ya shosho..
waaiit 4 moore

[M.32L]

[drpinkysnow]

جميلة يا مشمش......................................... منتظرين المزيد

[Al-Shaimaa]

...

nice,nice ya shosho..
waaiit 4 moore

thx monmon
w isa el more x el agaza

جميلة يا مشمش......................................... منتظرين المزيد

شكراً على تعليقك يا دكتورة
اسعدني رأيك

[Nona Ali]

ما شاء الله

بجد جميله اوى



تسلم ايدك وفكرك يا قمر