تساؤلات...وجواب واحد

[احمد شبند]

السلام عليكم ورحمة الله وبركاته

وعليكم السلام ورحمة الله وبركاته

ممكن اللى قاعدة جنبى مثلا تنزل ويطلع واحد يقعد جنبى انا بصراحة بحط جنبى شنطة او كتاب بحيث انه ميبقاش لامسنى او كدة فهل كدة بيرفع الحرج عنى ولا ايه

الله أعلم

أنا مسمعتش حد أتكلم فى النقطة دى ومقدرش اتحمل انى اقول ينفع ... أسأل ان شاء الله

ينفع مثلا وانا بصلى فى السجود فى كل الركعات اسبح بس وبعدين فى اخر ركعة ادعى ولا كدة يبقى غلط انى بخصص الدعاء فى السجدة الاخيرة انا عارفة انه احنا ندعى عادى فى اى سجدة وقبل التسليم لكن لو دعييت فى اخر سجدة بس يجوز

الامر واسع والحمد لله وبردو نغير من حين لاخر للخروج من اى حرج ...تقبل الله منا ومنكم .

ينفع فى صلاة الظهر بعد ما اكون صليت الاربع ركعات الفرض اصلى ركعتين السنة البعدية من غير ما اكون صليت الاربع ركعات السنة القبلية ؟

طبعا ينفع والشيطان ميدخلش علينا بكدا

بل ممكن كمان حضرتك لو بتواظبى عادتا على صلاة الرواتب من النافلة باننا نقضى الاربع ركعات القبلية بعد الصلاة لو فاتت بعذر

لفعل النبى حنما رؤي بعد العصر يصلى ركعتين فلما سئل قال شغلنى عنهما بنى فلان (يقصد ركعتين بعد الظهر ).

جزاكم الله مثله

هو مش بيكون كسل والله

بعمل كده وفقا للحديث وخاصه انه صحيح

لكن ان شاء الله اصليها فى موعدها دايما وربنا يغفر لنا تقصيرنا

لو حضرتك هتصليها فى وقت الفضيلة والصلاة ممكن تكون احسن من انها تتصلى فى وقت الدخول او مثلها

فلو أخدنا بالحديث يكون أفضل طبعا وحضرتك تنظرى للمصالح والمفاسد وتختارى الانسب باذن الله

( يعنى مثلا ممكن يكون تأخير الصلاة كويس بالنسبالك من حيث الهدوء مثلا او لو فى مصنع جنبكم مثلا لكن لو أخرتى الصلا ممكن اختك تعمل زيك وفى الاخر تتطنش فيبقى الاولى انى اصلى فى الاول كل الى اقصده النظر للمصالح والمفاسد بالنسبالى وبالنسبة برضو للى حوليا والله الموفق)

ربنا يسترنا ويرزقنا الصدق

ءامين

[تابعة محمد]

بسم الله الرحمن الرحيم
1-اشداء على الكفار :-
هل المقصود منها الكافرون الذين يسؤن للدين ام كل الكفار بشكل عام ؟
2-لو واحد نفسه فى طلب من ربنا ممكن يصوم علشان ربنا يحقق له الامنية يه ؟ يعنى الكلام ده موجود فى السنة ؟
جزاك الله كل خير على الموضوع .

[احمد شبند]

-اشداء على الكفار :-
هل المقصود منها الكافرون الذين يسؤن للدين ام كل الكفار بشكل عام ؟

الشدة هنا من جنس العزة وتختلف حسب الموضع

1- فى موضع القتال

تكون بمعنى الغلظة كقوله تعالى

( يا أيها النبى جاهد الكفار والمنافقين واغلظ عليهم )


2- فى السلم

أى مع الكافر غير المحارب وتكون بمعنى العزة فيكون المؤمن عزيز أمام الكافر ولا يذل نفسه ولا يظهر ضعفه أمامه ولكن يعامله بالقسط والبر

3- الكافر المحارب أثناء الهدنة

(فما أستقاموا لكم فاستقيموا لهم إن الله يحب المتقين )

يذكرنا ربنا بالتقوى فى معاملتهم فلا نعتدى إلا أن يعتدوا

ولكن

بدون ظلم فالظلم ظلمات سواء مع المسلم أو الكافر

حتى أشد ءايات الجهاد نجد كثير منها ينتهى بقوله تعالى (واتقوا الله ) ( ان الله يحب المتقين )


لذا فللكافر ( الغير محارب ) له علينا حقوق وهو المعاملة بالقسط والبر من كحق الجار وعدم ظلمه أو إغتيابه أو سبه بل يجوز زيارته عند المرض بشرط أن يكون دعوة لله لا للمداهنة فى دين الله وهكذا

قال تعالى

( لا ينهاكم الله عن الذين لم يقاتلوكم فى الدين ولم يخرجوكم من دياركم أن تبروهم وتقسطوا إليهم إن الله يحب المقسطين . إنما ينهاكم الله عن الذين قاتلوكم فى الدين وأخرجوكم من دياركم وظاهروا على إخراجكم أن تولوهم ومن يتولهم فأولئك هم الظالمون )

فيجب التفريق بين الموالاه وبين البر

لو واحد نفسه فى طلب من ربنا ممكن يصوم علشان ربنا يحقق له الامنية يه ؟ يعنى الكلام ده موجود فى السنة ؟

يستحب الدعاء عند العمل الصالح عموما

بعد أى عمل من صوم أو تلاوة للقرءان أو بر بالاباء أو إصلاح بين المؤمنين وغيرها من أعمال البر يستحب الدعاء عموما

ولكن كما قال الله تعالى

( ادعوا ربكم تضرعا وخفية إنه لا يحب المعتدين )

أى المعتدين فى الدعاء

فالمؤمن لا يشترط على الله

لذك قال جمهور العلماء أن النذر لله بعمل الصالح مكروه ولكن اذا نذر العبد فيجب عليه أن يوفى عمله

يعنى لو حد قال نذرت لله لو نجحنى اذبح كذا ( الفعل دوت مكروه لانى وكأنى بشترط على الله وكدا ولكن لو حد قال كدا يجب عليه ان يوفى )

الفعل الى حضرتك ذكرتيه يشبه ذلك ولكن بالعكس

فالافضل والله أعلم

ان حضرتك تقدمى لله عملا وتدعى أثناء وبعد انقضاء العمل

وان يكون المرء على تمام العلم أن أى شئ يعطيه الله لنا فى الدنيا ما هو الا محض فضل من الله لا لاننا نتقرب الى الله بقربات هو من يسرها لنا وأعاننا عليها والله المستعان


وجزاكم الله خيرا

[تابعة محمد]

بسم الله الرحمن الرحيم
جزاك الله كل خير يا دكتور .
بس لو سمحت ممكن توضح التالى :-
1- فى دعاء سيد الاستغفار " و انى على عهدك ووعدك ما استطعت " ما الفرق بين العهد و الوعد ؟
2- فى الصلاة بنقول " التحيات لله و الصلوات الطيبات ......... " ممكن حضرتك توضح قصة هذا الدعاء يعى ما اهمية هذا الدعاء و اسبباب نزوله ؟
3- ما معنى الصحبة فى الله او بمعنى تانى ممكن لو فى بنت وزير معايا فى السكشن هل ينفع اصحابها علشان هى بنت وزير و انى ممكن احتاجها و لا ده هيكون حرام ؟

[Amira]

جزاكم الله خيرا على الموضوع ياد.أحـمد
متابعاه من الاول ...ربنا يبارك فى حضرتك

عايزه اسال سؤال صغير ...
لو البنت فى الكليه عايزه تتوضى ينفع مسح الرأس يبقى من تحت الطرحه بحيث يلمس جذور الشعر بس ولا لازم يبقى على جزء كبير من الرأس؟
جزاكم الله خيرا ونفع بكم ....آمين

[احمد شبند]

وجزاكم الله مثله

1- فى دعاء سيد الاستغفار " و انى على عهدك ووعدك ما استطعت " ما الفرق بين العهد و الوعد ؟

العهد له عدة تأويلات منها العبودية لله

وما أميل له هو قوله تعالى ( وإذ أخذ ربك من بنى ءادم من ظهورهم ذريتهم واشهدهم على أنفسهم ألست بربكم قالوا بلى شهدنا أن تقولوا يوم القيامة إنا كنا عن هذا غافلين )

فهو عهد العبودية لله المأخوذ على الخلق قبل خلق ءادم عليه الصلاة والسلام وهو الايمان بالله وتوحيدة وفعل المأمورات وترك المحذورات عموما .


ووعدك

عدة أقوال أيضا

أبرزها هو الحشر والعرض على الله او يوم الحساب عموما



وفى كتاب عون المعبود لشرح سنن أبى داود:

(وأنا على عهدك ووعدك) أي أنا مقيم على الوفاء بعهد الميثاق، وأنا موقن بوعدك يوم الحشر والتلاق (ما استطعت) أي بقدر طاقتي.

- فى الصلاة بنقول " التحيات لله و الصلوات الطيبات ......... " ممكن حضرتك توضح قصة هذا الدعاء يعى ما اهمية هذا الدعاء و اسبباب نزوله ؟

بالنسبة لسبب النزول

فهو كغيره من العبادات هو من تعليم الله لنبيه ولكن لم يثبت حديث الاسراء بأن هذا هو نص كلام لله لنبيه فى المراع

دا كلام للشيخ ابن باز رحمه الله

من هنا


أما بالنسبة لبعض فوائد هذا الدعاء

ممكن متابعة هذه المشاركة من قبل

من هنا

وبقيتها من هنا

3- ما معنى الصحبة فى الله او بمعنى تانى ممكن لو فى بنت وزير معايا فى السكشن هل ينفع اصحابها علشان هى بنت وزير و انى ممكن احتاجها و لا ده هيكون حرام ؟

الاخوة فى الله ... أكبر من تكتب فى سطور ولكن هى محبة بين شخصين أصلها ومبدأها ومنتهاه الله سبحانه وتعالى

فى تولد دون سبب الى ان الله يقذفها فى القلوب يجمعهما العمل لرضا الله ولا يتفرقون الا أيضا طلبا لرضا الله

والصراحة بقت قليلة اوى والى يلاقى معاه حد كدا يبقى ربنا رزقه بشئ كبير اوى فى الدنيا

لو حب اى حد يعرف محبته لحد هى لله ام لا فليعرضها على امرين:

الاول: قوله ( لا يؤمن أحدكم حتى يحب لأخيه ما يحب لنفسه ) ودى أول درجة فى الحب فى الله

إنى لما يكون فى أيدى حاجة بحبها أوى أتمنى انى اخويا الى بحبه فى الله يكون معاه نفس الشئ حالا


الثانى : وهو قول ربنا ( ويؤثرون على أنفسهم ولو كان بهم خصاصة )

دى درجة أعلى شوية وهى لما يكون فى أيدى حاجة وبحبها أوى مرضاش اخدها لنفسى واروح اديها لأخويا فى الله ..


كل واحد يعرض أخوته لأخيه فى الله على الدرجتين دول ويشوف هو أخوته من أنهى درجة فى دول

( للعلم هذه علامات وليست منتهى الاخوة والمحبة فى الله )

هل ينفع اصحابها علشان هى بنت وزير و انى ممكن احتاجها و لا ده هيكون حرام ؟

مصاحبة لا يشترط فيها المحبة

فعلها النبى فى الهجرة مع كافر حتى يضلل المشركين


ولكن لاثواب عليها


كقوله تعالى

( وما ءاتيتم من ربا ليربوا فى أموال الناس فلا يربوا عند الله )

دى مش معناها الربا الى هو محرم

معناها انى ادى مثلا هدية لواحد ليست لله ولكن علشان لما أطلب منه طلب يعملهولى قال الله فهيها بانها لاتربوا عنده فليست عليه ثواب وصيغة الاية توحى بالكراهه والله أعلم..

عايزه اسال سؤال صغير ...
لو البنت فى الكليه عايزه تتوضى ينفع مسح الرأس يبقى من تحت الطرحه بحيث يلمس جذور الشعر بس ولا لازم يبقى على جزء كبير من الرأس؟

جزاكم الله مثله وبارك فيكم


لا مش من تحت الطرحة ولا حاجة من فوقيها

نقلا عن شخنا الشيخ مصطفى حفظه الله :

وذلك بالمسح على الناصية ثم باقى الطرحة

لان النبى مسح على ناصيته وأتم المسح على عمامته .

[Amira]

لا مش من تحت الطرحة ولا حاجة من فوقيها

نقلا عن شخنا الشيخ مصطفى حفظه الله :

وذلك بالمسح على الناصية ثم باقى الطرحة

لان النبى مسح على ناصيته وأتم المسح على عمامته .

جـــــــزاكم الله خيــــــراً يا د.أحـمد
مكنتش اعرف انه ينفع المسح من على الطرحه
ربنا يكرمك يااااااااااااارب

[N00R EL _SHAMS]

طب بالنسبه للشراب المسح كمان يكون من عليه ولا لازم يتخلع ؟؟

ولو مسحنا من عليه ووصل ميه للقدم من جوه نخلع الشراب ونمسح ع القدمين ولا نسيبه عادى ؟؟

ولو احنا ماشيين م البيت على وضوئنا الصبح ينفع نصلى على الوضوء دوت ولا لازم نجدد وضوئنا؟

وجزاكم الله خيرااا

[white light]

لا مش من تحت الطرحة ولا حاجة من فوقيها

نقلا عن شخنا الشيخ مصطفى حفظه الله :

وذلك بالمسح على الناصية ثم باقى الطرحة

لان النبى مسح على ناصيته وأتم المسح على عمامته .

جزاك الله خيرا يا دكتور احمد

اول مره اعرف المعلومه دى

[احمد شبند]

جزاكم الله مثله جميعا وربنل يكرمكم يا رب وجعلنا الله وإياكم من أهل الجنة


قبل الاجابة على الأسئلة بتاع المسح على الشراب دى شوية قواعد:

1- لازم الشراب يكون ملبوس على طهارة يعنى على وضوء.

2- مدة المسح للمقيم يوم وليلة وللمسافر ثلاثة أيام بلياليهن .

3- لا يشترط فى الشراب انه يكون سميك او خالى من الثقوب (خلافا لبعض أهل العلم ممن اشترط ذلك وبذلك قال الشيخ مصطفى العدوى )

وذلك لان اغلب الصحابة كانوا فقراء على الاغلب واغلبهم ما كان يملك سوى شيئين فقط يلبسهما وعمر امير المؤمنين كانت ثيابه مرقعة فلاشك ان الجورب بالتأكيد كان به ثقوب وأيضا لم يرد اى نص صريح يفيد باشتراط ذلك والله أعلم .

(الكلام السابق نقلا عن احد طلاب الشيخ مصطفى ينسبه للشيخ )

نيجى للاسئلة

طب بالنسبه للشراب المسح كمان يكون من عليه ولا لازم يتخلع ؟؟

لا طبعا مخلعوش

( مهو لوخلعتوا يبقى اصبح لازما عليا انى اغسل الرجلين )

والهيئة كالاتى بعد ما امرر ايدى فى الماية

انفضها كدا

وبعدين امسح وش القدم من على الشراب فى نفس الوقت باديا الاتنين بس

ولو مسحنا من عليه ووصل ميه للقدم من جوه نخلع الشراب ونمسح ع القدمين ولا نسيبه عادى ؟؟

لا منخلعش

الصحابة رضوان الله عليهم كانوا فقراء (معظمهم ) اكيد كان بيتسرب ماية برضو معاهم

وقلنا نبقى ننفض ادينا من الماية بعد ما نمررها تحت الحنفية

ولو احنا ماشيين م البيت على وضوئنا الصبح ينفع نصلى على الوضوء دوت ولا لازم نجدد وضوئنا؟

مش فاهم الصراحة

منا لو ماشى على وضوء ومحصلش اى حدث ايه الى يخلينى اتوضا تانى
(الا لو اردت اصابة اجر الوضوء دا امر اخر )


(مش عارف انتابنى بان ممكن يكون فى لبس فى مسألة المسح على الجورب بانه يشترط فيه اصلا انه يكون ملبوس على طهارة علشان كدا حضرتك سألت السؤال ده تأريبا )

بارك الله فيكم جميعا

فى امان الله