عرض للطباعة
ايه رأيكم نفتح كل اسبوع موضوع يناقش مشكلة من المشاكل اللي واجهتنا في الكلية ونطلع في الآخر توصيات، ونقفل الموضوع ونفتح موضوع تاني في الاسبوع اللي بعده. ده بالنسبة للكلية
ونفس الأمر بخصوص الدراسات العليا
بالنسبة للنقابة فأنا مقدرش افيد بحاجة تقريبا لأني لسة مشتغلتش ولا استلمت التكليف، اللي يقدر يفيدنا الخريجين اللي قبلنا
ها مين هيبدأ بأول موضوع؟ :)
فكره كويسه داميره
ربنا يسهل واقدر اقدم حاجه مفيده تنفع الجميع
يارب يا د/محمد، كلنا نتمنى نقدر نقدم حاجة للمجتمع كله وللمجال الصحي بشكل خاص، يمكن بتنقصنا الخبرة بس مع النقاش والبحث ان شاء الله هنقدر نعمل حاجات كتير
ياللا يا دكاترة مين هيقترح أول موضوع :)
د/يوجينا بدأت بطرح أول مشكلة هنــــــــــــــــــــــا
أتمنى من الجميع المشاركة، وأرجو تجديد النية قبل القراءة والمشاركة، يمكن فكرة بسيطة اوي من اي حد فينا تفرق في مستوى الصيادلة وتفرق مع الطلبة في الكلية بعد كده وتفرق في المستقبل الصحي في مصر
لو صدقنا النية بجد ربنا هيوفقنا
دكتور عبد الله بحييك على موضوعك جدا وتميز الفكره وعلو الهمه ورقي الطرح دي كلها حاجات مش جديده عليك
بعد التخرج ومواجهه الحياه العمليه بجد فعلا ثبت ان الواقع الدراسي منفصل تماما عن الواقع العملي المشكلات كتيره
قوي يادكتور وفيها المتعلق بينا احنا كصيادله على الصعيد الشخصي وعلى صعيد الكليه ومنها المتعلق بالاطباء ومنها المتعلق بثقافه المجتمع ودرجه الوعي عنده واللي تكاد تقل عن 50 %
لو سمحتلي هاخد كل نقطه واتكلم عنها شويه
يعني بالنسبالنا احنا كصيادله حديثي التخرج شئ مهين جداجدا يادكتور لما تتخرج كصيدلي وبتقدير عالي وتروح تشتغل في صيدليه وتلاقي نفسك واقع مع حد بدبلوم عمال يتنطط عليك لمجرد انك مش عارف مكان الادويه لسه وفاكر نفسه جاب الديب من ديله لمجرد انه محطم الرقم القياسي في تحضير الروشتات اللي بقاله 10 سنين بيحضرها هي هي بنفس الاسطمبه النظره للصيدلي على انه دسبنسر بس دي حاجه مقرفه بجد وللاسف ان اللي حطنا في المواقف دي هما الصيادله اصحاب الصيدليات اللي بيسترخصوا وبيجيبوا اي حد واهو بيظبط الاستوكات وبينضف ويطلع بره الصيدليه يودي ويجيب وبيديه اجر اقل من الصيدلي نظره تجاريه بحته القيم والمثل والارتقاء بالمهنه دي كلها حبر على ورق على ارض الواقع مفيش كدا طيب اسال سؤال فين النقابه بتاعتنا فين الادارات فين التفتيش ليه متتسنش عقوبات رادعه على الصيدلي اللي بيشغل غير الصيادله ليه ميبقاش في الزام ان الصيدليه يبقى فيها كاشير وعامل نضافه كشرط اساسي ويمنع منعا باتا اشتغالهم بالدواء وتبقى في غرامات على كدا هل النقابه عاجزه عن كدا ؟ مصلحه مين استمرار الوضع دا ؟ عارف يادكتور انا فكرت كذا مره ابطل شغل كنوع من الرفض والاحتجاج على الوضع دا بس لقيت ان يوم مانا همشي هييجي 10 بدلي منهم الدبلوم والتجاره والهندسه ويمكن الصيدله واي حد هيملى المكان ولقيت في الاخر انه احسن استمر لانه ع الاقل وجودي في المكان هيمنع حد من بره انه ياخده بس نفسي بجد اعيش لليوم اللي تبقى الصيدليه فيه مكان للصيادله وفقط
بالنسبه للكليه متفقه تماما مع كلام يوجينا المناهج محشيه حشو ملوش اي لزمه الكليه بتعطي معلومات لكن مبتعلمناش ازاي نستفيد بيها عارف يادكتور انا نفسي قوي اقدم اقتراح لاداره الكليه ان تبقى في ماده دراسه تفاعليه كدا يبقى اسمها درج كومبينيشن تبقى في صوره روشتات مغلوطه كل طالب ليه مثلا 10 روشتات في الترم ياخدهم ويبقى السؤال كاتش ذا ارور مثلا او وضح البنفت من السنرجزم دا او يكتب بريفلي عن الحاله والرول بتاع كل درج في التريتمينت ياخد الروشه وينزل الصيدليه يجيب اصناف الروشته كلها يشوفهم بعينه يصورهم بالموبايل ويعمل بحث كامل بقى عن كل صنف في الروشته الماده الفعاله بتاعته ايه يعرف هو ايه الكلاس بتاعته بيشتغل ازاي بيعالج ايه يجيب كل الدوسج فورم الموجود فيها الدرج دا بتركيزاتها المختلفه ويعرف تعارضاته الدوائيه ويجيب اكبر قدر من الادويه بتحتوي على نفس الماده دي بشركاتها ويبقى دا في صوره مشروع ليه لو مفهمش اي حاجه يرجع للدكتور بتاعه ويساله وبكدا ابقى وصلت للطالب المعلومه بشكل ظريف وحولته من مجرد ريسيفر للمعلومه في المحاضره الى كوليكتور ليها فهل نتوقع بعد كل دا ان الطالب ممكن ينسى الدوا دا او يطلعه في كومبينيشن هو كونترا انديكيتد معاها او يطلعه في غير محله ؟؟؟؟؟؟
دي نقطه من دور الكليه نقطه كمان التعريف بمجالات العمل الصيدلي وطبيعه العمل في كل مجال من اهل الخبره فيه يعني مثلا كتير من الطلبه بيبقى نفسه يشتغل في الجامعه ويتعين معيد طيب انا كطالبه هبقى حابه اعرف هل المعيد دا لازم يكون من العشره الاوائل بس طيب ممكن يحضر في كليه تانيه بتقدير اقل من الامتياز طيب ايه التدرج الوظيفي الجدول الزمني للانتقال من مرحله لمرحله تقريبا قد ايه ا؟يه الفر ق بين الرتب الجامعيه ايه المدرس وايه المدرس المساعد وايه الاستاذ اهي دي كلها حاجات اهو بس جوا الجامعه ومفيش توعيه بيها طيب ميديكال ريب ننظم يوم ونجيب فيه مندوبين شباب يكلموا الطلبه والندوبين درجات في مندوب عادي وفي سوبر فايزور وفي وفي يعرفوهم على مصاعب العمل على مميزاته وعيوبه يكلموهم بلغه السوق التارجت والحرق والحاجات دي العمل الحر والصيدليات منتفق مع مدير صيدليه وييجي يكلم الطلبه ويحكيلهم عن شروط ترخيص الصيدليه وعن طبيعه العمل والمواقف اللي من خلالها الطالب نفسه يستشف اهميه دور الصيدلي صيدلي المستشفيات كمان ييجي ويتكلم الصيادله اللي في المصانع يكلمونا سواء شغالين في خطوط الانتاج او في الابحاث الصيادله اللي فاتحين مخازن ادويه برضه يكلمونا عن كيفيه ادارتها وطبيعه العمل فيها شركات التوزيع من واقف في صيدليه ومسمعشي عن المتحده وعن ابن سينا منجيب الناس دول ويفهمونا طبيعه العمل بتاعهم وفي مليون مجال بجد احنا محتاجين نعرف عشان منبقاش كل واحد على قد المكان اللي هو في وخلاص اللي بيشتغل في صيدليه يفضل متبرمج علها وخلاص ولايفقه شئ عن الاخر لا عاوزين يبقى اعرف شئ عن كل شئ واعرف كل شئ عن شئ عشان يبقى فيه فلكسيبيلتي انا النهارده بشتغل في صيدليه حبيت اشتغل في مصنع يبقى عندي خلفيه عن طبيعه الشغل مش ابقى ميح وعلى فكره انا رايي ان الكليه لازم تخصص يوم للحاجات دي ويبقى الحضور فها الزامي لان اهميتها لاتقل باي حال من الاحوال عن اهميه الماده العلميه لانه اولا واخيرا هي دي الفيلدز اللي احنا بنتعلم عشان نوظف علمنا فيها فعيب قوي لما نبقى جاهلين بيها
طيب حاجه كمان مناهج العملي فيها خلل وفيها فجوه عن الواقع برضه يعني انا دلوقتي هل يعقل اقعد ادرس سنه تالته ترم بحاله سبوزيتوري وسنه رابعه ترم بحاله تابلتس وامتحنه واقيمه على اساسهم انه صيدلي كويس او لا في حين انه يستحيل حد يجيله الصيدليه ويقله حضرلي تابلت ولا سبوزتري انا كنت ومازلت مع ان الصيدلي يعرف كيفيه تحضير كل الدوسج فورم بس مش لدرجه انه يقعد طول الترم يعمل تابلت وسوزتري طيب مافي تحضيرات الدكاتره بتكتبها ف الروشتات طيب منجيبها ونخلي الطلبه يشتغلوها يعني في تحضيرات للجلديه ولحب الشباب وللبواسير طب مانعلمهم ازاي يحضروا دي مظبوط ونخليهم يشتغلوها في المعامل اوقع وافيد من الترمات اللي ضايعه في حاجات ملهاش تطبيق واقعي دي
التحاليل الطبيه لازم يكون ليها نصيب من الذكر عاوزينها تفعل شويه في ماده زي البايو او البارا انا عارفه انهم بيتناولوا اجزاء منها بس محتاجين تركيز اكتر برضه ليه مش بنتعلم في الكليه قياس الضغط وعطيان الحقن هتقلي الحقن دي دور الممرض تمام كلام سليم بس دا في حاله ان كل واحد في البلد بيقوم بدوره ولايتخطاه لكن الواقع ان الناس بتروح تاخد حقن عند التمرجيه والحلاقين يبقى لما اعرف انا كصيدلانيه ازاي اديها يبقى انضف اهو حتى نضمن ان في مراعاه للنضافه العامه برضه قياس السكر في الدم
انا هكتفي بالقدر دا في المشاركه دي ولي عوده باذن الله وربنا يرزقنا الاخلاص في القول والعمل ويجعل عملنا خالصا لوجهه الكريم تحياتي مره تانيه ع الموضوع
أيوة كده الناس الجميلة دي بدأت تظهر تاني :)
انا سعيدة اني شفت مشاركتك يا سمر ، ما شاء الله مشاركة ثرية وطرحتي فيها أكتر من نقطة، عندي طلب ليكي، الكلام الخاص بموضوع مواد الدراسة ياريت تاخديه كابي في موضوع يوجينا علشان تسهيل المناقشة والنقط التانية اللي أثرتيها تفتحي بيها موضوعات مستقلة علشان ندي لكل نقطة حقها
وان شاء الله كل أسبوع هنثبت موضوع علشان ياخد حقه في النقاش
بحييكى جدااااا يادكتورة عالكلام المحترم ده ومتفقة جدا مع كل كلامك
وبحييكى جدا علي اقتراحك ده وياريت بجد يتحقق
ياريت كل النقاط دى تؤخذ فالاعتبار لانها بجد ممكن تغير من وضعنا كتيراقتباس:
المشاركة الأصلية كتبت بواسطة summer breeze
اقتباس:
المشاركة الأصلية كتبت بواسطة Amira Said
ربنا يكرمك يااميره دا بس من ذوقك وطلباتك كلها اوامر:)
شكرا يا د/عبد الله علي فتح الموضوع ده ولزملائنا الكرام والكلام ده رصد لما يحدث والدور التنفيذي غائب تماما والمتمثل في دور النقابه اللي نايمين في العسل ومش حاسين بأي حاجة وأنا مش عارف وظيفة أعضاء النقابه ايه لأن النقابه أصبح عدم وجودها أفضل من وجودها المهين ده لنا والفساد فيها للرأس والمفروض ان دي الجهة اللي عارفه مطالبنا وتطالب بتنفيذها ياعني هيا الأساس ...
اقتباس:
المشاركة الأصلية كتبت بواسطة محمد فهمي
ياريت بس ياد محمد ما نلقيش بالتهم كده من غير اثبات
ونقول الفساد للرأس
كلنا هدفنا تطوير والرقى بمهنة الصيادله
لو فى اى حاجه غلط نحاول نظبطها ونصححها
ولو فى فساد يبقى موثق بورق وادله