لو حد عنده كلام حقيقى عن زيادة مصروفات الانتساب ياريت يأكدلى الحكاية دى (من 450 ل8000)كتير اوى

[Dr/HULK]

بسم الله الرحمن الرحيم

كنت عارفة ان التعليم المفتوح هو ان اى حد امتنع عن التعليم لفترة و يريد الاستكمال او اى حد عايز يكمل التعليم فى دراسة غير الى دارسها ممكن يلتحق به . اما الانتساب ان اى حد مجبش مجموع كلية معينة بس على درجات بسيطة يدفع فلوس زيادة و يلتحق بالكلية زى تجارة انتساب . و الكلام ده صح و لا لا و ايه هو الى صح ؟؟؟؟؟؟؟؟

دكتور خالد وضح فكرة التعليم المفتوح

وده بيكون عن طريق التعليم عن بعد يعنى الكورسات بتتبعت للطلبة على الايميلات اللى الجامعة يتسجلها ليهم

وفعلا مصاريفها عالية وبتاخد من اى درجة بس المهم تكون ناجح

بص يا محمد اللى الدكتور هاني هلال قاله بالظبط .. ان الانتساب موجود عادي خالص ومفيش اى مشكله .. الانتساب الموجه هو اللى اتلغى وبقى تعليم مفتوح بفلوس عاليه .. بس

لو كده مفيش مشكلة بس الخبر كاتب طلبة انتساب

مش معقول الصحفى مش عارف الفرق بين الانتساب والتعليم المفتوح

انت مستعجل ليه ؟ ما كله هيزيد عاجلا أو آجلا واللي مش هيزيد بكرة هيزيد بعده

انت في مصر يا دكتور بلد الزيادة والتقدم

بالنسبة ليا مش فارقة كتير هى سنة وهتخلص واستريح

لما دخلت كان فيه ناس بتكلمنا ان المصاريف كانت 12 جنيه

لما هتخرج هقول للى بعديا ايامنا كانت مصاريفنا 150 جنيه

كنت قرات الخبر ده من أيام قليلة على موقع جريدة اليوم السابع ...

بص يا دكتور ... هوطبقا لمعلوماتي أن في 3 انظمة هما اللي علهم الكلام اللي في الخبر ده

الانتساب - الانتساب الموجه - التعليم المفتوح

و الكليات اللي فيها النوع ده من الدراسة هما كليات : التجارة و الآداب و الحقوق و دار العلوم و على ما اعتقد كلية الخدمة الاجتماعية (الكلية مش المعاهد مش موجود منها غير تقريبا3 في جامعات : حلوان و الفيوم و تقريبا اسيوط )

1. الانتساب : (لم يتم الغاؤه)

نظام قديم معمول من زمان اظن قبل التمانينات كمان ... و هو بيقبل الناس اللي حصلت على مؤهلات و عايزة تاخد مؤهلات تانية...
بمعنى أن أنت مثلا ربنا كرمك و خلصت كلية صيدلة ... و عايز تاخد ليسانس آداب أو حقوق ...بتقدم ف النظام ده و بتدفع طبعا مصاريف زيادة عن الانتظام ...

و هو ده غالبا اللي الخبر يقصد أن سعره زاد عشان معتش حد يدخله ... لكن متلغاش لسه موجود

ياسلام يادكتور خالد على التقسيمة احسن من تقسيمة عمرو وجداوله

2. الانتساب الموجه : (تم الغاؤه هذا العام)

ده بقى مش بيقبل الناس اللي معاها مؤهلات ... لا ... ده بيقبل الطلبة الحاصلين على الثانوية العامة ... بس بتبقى درجاتهم أقل من درجات الانتظام بشوية ... فبيدفعوا مصاريف اضافية ...
لكن الفرق بينه و بين الانتساب زي ما قلتلك أنه بيقبل الطلبة الحاصلين على الثانوية العامة ... مش بيقبل خريجين ...
وده تم الغاء العمل به من اول العام الجامعي اللي جاي 2010-2011 ... و آخر دفعة هتبقى فيه هما الطلبة اللي
ربنا موفقهمش السنة اللي فاتت .. مفيش طلبة مستجدين لا السنة دي و لا بعد كدة خلاااص ..

3.التعليم المفتوح :
نظام معمول حديثا...معرفش عنه حاجة تقريبا... وهو مطبق في كليات الحقوق و الآداب و التجارة و الاعلام و أقسام في كلية الزراعة...(بس معرفش اذا كان كل الكليات دي متاحة في كل الجامعات و لا منظمينها بطريقة معينة)
و ده المفروض أنه هيحل محل نظام الانتساب الموجه (الملغى)... و كمان ينفع على ما اظن بدل الانتساب( متسألنيش ازاي بقى)

انا متأكد لو سألت الوزير نفسه مش هيعرف يجاوب

طيب هتفرق ف ايه ... معرفش .... بس هو نظام عليه كلام كتير ... و الدولة بتروجله بقالها كذا سنة ...و كانت جت السنة اللي فاتت و خلت الالتحاق به لأي حد حاصل على أي مؤهل خلال خمس سنوات ... أو أي طالب ناجح ف الثانوية العامة بمجموع 50 % !!!!

و بس على كدة دي التفاصيل اللي عندي فكرة عنها ...و الله أنا مبسوط ... مبكتبش الكلام مترتب كدة من حوالي مثلا اربع سنين بغض النظر (امتحانات تالتة ثانوي زي ما انت عارف).. ربنا يكرمك انك فكرتني بالزمن ده و الله

يلللا دنيــــــــــــا

كل سنة و أنتو طيبين و اسف ع الاطالة طبعا

[Mohamed Al Gohary]

لا عادي يا محمد واكتر من كده كمان

انت ممكن تلاقيه مش صحفي اصلا

[dr.monalizaa]

بالنسبة ليا مش فارقة كتير هى سنة وهتخلص واستريح

لما دخلت كان فيه ناس بتكلمنا ان المصاريف كانت 12 جنيه

لما هتخرج هقول للى بعديا ايامنا كانت مصاريفنا 150 جنيه

هيا الزيادة في مصاريف الكليات بس؟؟؟؟

كله بيزيد وبكرة تبقى رب أسرة ومسؤول عن بيت وتشوف بقية الزيادات بنفسك

[Dr/HULK]

لا عادي يا محمد واكتر من كده كمان

انت ممكن تلاقيه مش صحفي اصلا

على فكرة فهمت الموضوع

دى اسعار الانتساب لما يكون واحد خلص كلية وعاوز ينتسب لكلية من كليات الانتساب بعد كده

دى هتكون مصاريفه

اما الانتساب بتاع طلبة الثانوية العامة اللى بيكون فرق الدرجات فيه بسيط

فاتلغى يعنى لو مجبتش مجموع الكلية تدخل كلية غيرها

هيا الزيادة في مصاريف الكليات بس؟؟؟؟

كله بيزيد وبكرة تبقى رب أسرة ومسؤول عن بيت وتشوف بقية الزيادات بنفسك

شايفها على فكرة كفاية بس اوح السوق واشوف تعبيرات وجوه الناس

ولا بيتنا فى اخر الشهر

[ameer]

وزير التعليم العالي: لا زيادة مطلقا في مصروفات الانتساب الموجه

قال الدكتور هانى هلال وزير التعليم العالي إنه طالب الجامعات والمعاهد الخاصة بتخفيض مصروفاتها.

واكد هلال أنه لازيادة مطلقا في مصروفات الانتساب الموجه وأن مانشر من شائعات بزيادة المصروفات لاصحة له على الاطلاق.
وأشار فى برنامج 48 ساعة مساء الجمعة إلى أن الحاصل على مؤهل جامعى ويريد الحصول على آخر فى تخصص مختلف، عليه أن يسدد حوالى 4 ألاف جنيه.
وقال الوزير أنه يوجد فى الوزارة مخطط عام للتعليم العالي وهناك تنبؤ بما يحتاجه سوق العمل فى مصر من جميع التخصصات فى كل الكليات حتى عام 2022، وقد أعلنت الوزارة عن احتياجات كل كلية من الطلاب واعدادهم قبل اعلان نتيجة الثانوية العامة بأسبوع.
ولفت إلى أن تطوير التعليم فى الجامعات المصرية ينقصه التمويل لتواكب الجامعات الدولية والعالمية وبالنظر الى تصنيف احسن 500 جامعة على مستوى العالم سنعرف أنها جامعات عدد طلابها لايزيد عن 500 طالب وتتلقى تمويلا ضخما، ولكن جامعة القاهرة مثلا بها 250 ألف طالب.
واعتبر الوزير أن الكتاب الجامعي أصبح بدعة ولايوجد جامعة فى العالم توزع كتبا للطلاب كما نفعل لكنها تعطيه مؤشرات وعناوين الموضوعات ويبحث الطالب فى المكتبة وما يحدث لدينا فى الجامعات لا يزيد عن المعرفة في الكتب الجامعية فقط.