عوده الى كرسى الاعتراف مع M.Hegazy

[صاحبة القلم الحائر]

ماشاء الله الدكاترة قايمين بالواجب وزيادة
ربنا يعينك يا دكتور
أنا بصراحة مش عارفة أسأل عن أيه
بس لازم أسأل لانى مش هكون موجودة الفترة الجاية
ع المنتدى فلازم اسيبلكم شوية أسئلة تذكار منى
أيه أكتر حاجة ممكن تضايقك فى أصحابك
لو حد قريب منك اوى جرحك جرح صعب اوى
وبعد فترة عرفت ان الحد ده مريض او فى مشكلة
ياترى هتعمل أيه ؟
خاطرة ونهايته أيه؟؟!! من اكتر الحاجات اللى عجبتنى
فى كتابات حضرتك
ممكن تقولنا ايه ظروف الخاطرة دى؟
ايه معنى الكلمات دى بالنسبة لحضرتك
(وفاء - حياة -حب - صداقة - تسامح )
صف لنا محمد حجازى فى سطرين
كفاية كدا ويارب اكون ضيفة خفيفة
جزاك ربى خيرا

[DR.BIBO]

السلام عليكم
حضرتك بتحاول تسعد كل اللى حواليك وديه حاجة بتسعدك طب ليه لما بتكون حزين مبتديش الفرصة للى حواليك انهم يحاولو يسعدوك او على الاقل يخففو عنك ؟ ساعات الفضفضة فى حد ذاتها بتبقى حل ولا ايه؟ ياترى لما بتضايق بتروح لمين تحكى معاه حتى لو مكنتش هتحكى فى الحاجة اللى مضايقاك بس بترتاح لما بتشوفه؟
حضرتك بتقول ان حياتك فيها حزن لدرجة انك لقبت نفسك بيه وقلت عنه حياتك ولكن من كان الحزن حياته لايستطيع اسعاد الاخرين ولا يكون حماسه معدى ينتشر كالنار فى الهشيم ولا يكون مجددا مغيرا فى حياة الغير
ولايستطيع ان يعين نفسه على الحياة وعشان كده شايفة ان حضرتك شايف حياتك بشكل غلط او حاطط نظارة سوده على عينيك مع ان الحياه كلها الوان قدامك واليوم اللى بيعدى مبيرجعش فلازم نلون كل يوم فيه لان الدنيا مش مستاهلة نزعل ثانيه واحده على حاجة مش فى ايدينا؟

ايه كان احساس حضرتك لما نجحت السنادى؟
هكمل بعدين شكرا واسفة لو كنت ضايقت حضرتك بكلامى

[M.Hegazy]

ماشاء الله الدكاترة قايمين بالواجب وزيادة

ربنا يكرمهم يا رب ..

ربنا يعينك يا دكتور
أنا بصراحة مش عارفة أسأل عن أيه
بس لازم أسأل لانى مش هكون موجودة الفترة الجاية
ع المنتدى فلازم اسيبلكم شوية أسئلة تذكار منى

عساه خير يا دوك إن شاء الله .. و ترجعي للمنتدى بألف سلامة ..

أيه أكتر حاجة ممكن تضايقك فى أصحابك

نقل الكلام بطريقة غلط خصوصا في المواضيع الحساسة .. و الكذب .. و اللف و الدوران في الكلام .. إحباطي و تثبيط عزيمتي .. و كفاية كده

لو حد قريب منك اوى جرحك جرح صعب اوى
وبعد فترة عرفت ان الحد ده مريض او فى مشكلة
ياترى هتعمل أيه ؟

الواجب ساعتها زيارة المريض .. خصوصا لو فيه بيني و بينه عشرة عمر و حتى لو مفيش بيني و بينه عشرة عمر و فيه معرفة بس فالواجب هنا زيارته فقط لا غير .. لأنه في الحالة دي هعامله على أساس إنه مريض له حق الزيارة مش حد جرحني و مش قادر أشوفه ..

خاطرة ونهايته أيه؟؟!! من اكتر الحاجات اللى عجبتنى
فى كتابات حضرتك
ممكن تقولنا ايه ظروف الخاطرة دى؟

هيا خربشة قديمة شويتين .. كتبتها لما بدأت المشاكل تظهر و بعنف مع خطيبتي و أهلها و كنت متوقع نهاية غير سعيدة بالمرة بس كنت بصبر نفسي بوعودها ليا .. و لكن اللي كان كان و كل حي راح لحاله ..
ايه معنى الكلمات دى بالنسبة لحضرتك
(وفاء - حياة -حب - صداقة - تسامح )

وفاء : صفة أصبح من يحملها في زماننا ده أسطورة ..
حياة : أرض بور .. بإيدنا نخليها جنة و نقطف الخير .. و بإيدينا نخليها جهنم و نقطف الشر ..
رحلة .. زادها العمل الصالح .. عشان نوصل لنهاية الطريق الجميلة ( جنة الخلد )
قصة قصيرة لا يعرف صاحبها متى و كيف تكون نهايتها

الحب : ألم و أمل .. انتظار و شوق .. لهفة و حنين .. مجهول الملامح .. و نهايته دائما ما تصدم ..

الصداقة : أمبول الصبر و السعادة .. سند وقت الشدة .. أحلى الأوقات بحلوها و مرها ..

التسامح : صفة جميلة تعكس صفاء روح صاحبها و تدل على طيبة قلبه و مدى رحابة صدره ..
صف لنا محمد حجازى فى سطرين

غامض .. معقد .. unpredictable

كفاية كدا ويارب اكون ضيفة خفيفة
جزاك ربى خيرا

و جزاكم الله خيرا مثله .. حضرتك نورتيني جدا ..

السلام عليكم

و عليكم السلام و رحمة الله و بركاته ..

حضرتك بتحاول تسعد كل اللى حواليك وديه حاجة بتسعدك طب ليه لما بتكون حزين مبتديش الفرصة للى حواليك انهم يحاولو يسعدوك او على الاقل يخففو عنك ؟

لأن أنا شخصية حساسة جدا .. و بصراحة كل من حاول يعمل كده بيخسرني في الآخر لأنه مبيعرفش يتعامل معايا على قد حزني .. و تقريبا لحد لحظتنا دي شخص واحد هوا اللي بيعرف يخفف عني و بيفهمني جدا و بيعرف يتعامل معايا و هو صديق عمري ( محمد فايز ) .. فعشان كده قررت ألا احتاج لحد إنه يسعادني عشان ما أخسروش ..

ساعات الفضفضة فى حد ذاتها بتبقى حل ولا ايه؟

مش معايا يا دوك .. أنا اعرف اسمع كويس قوي و أخفف عن الناس كويس قوي .. لكن اتكلم بجد دي حاجة صعبة قوي ..

ياترى لما بتضايق بتروح لمين تحكى معاه حتى لو مكنتش هتحكى فى الحاجة اللى مضايقاك بس بترتاح لما بتشوفه؟

والدي - ربنا يحفظه - لما بتكلم معاه بيريحني جدا في الكلام .. و من بعده صديقي و أخويا محمد فايز .. بس كده .. و يمكن كمان محمد بيفهمني من غير ما اتكلم ..

حضرتك بتقول ان حياتك فيها حزن لدرجة انك لقبت نفسك بيه وقلت عنه حياتك ولكن من كان الحزن حياته لايستطيع اسعاد الاخرين ولا يكون حماسه معدى ينتشر كالنار فى الهشيم ولا يكون مجددا مغيرا فى حياة الغير

مش قاعدة يا دوك .. و حتى لو دي قاعدة .. فلكل قاعدة استثناء .. اعتبريني الاستثناء ده و مش كلامي .. ده كلام الناس اللي عايشين حواليا و معايا .. و يكفيني كلمة سمعتها من عمتي .. قالتلي : يا ابني ابقى تعالى زورني كتير .. دخلتك عليا بالدنيا .. مجرد ما باشوفك بحس براحة و أمان ..

ولايستطيع ان يعين نفسه على الحياة وعشان كده شايفة ان حضرتك شايف حياتك بشكل غلط او حاطط نظارة سوده على عينيك مع ان الحياه كلها الوان قدامك واليوم اللى بيعدى مبيرجعش فلازم نلون كل يوم فيه لان الدنيا مش مستاهلة نزعل ثانيه واحده على حاجة مش فى ايدينا؟

الدنيا جميلة و كل حاجة و فيها حاجات حلوة كتيرة .. و اللحظة اللي بتعدي مبترجعش .. الكلام ده كله للي نفسه يعيش و حابب الدنيا .. تعالي بقى حضرتك نبص للصنف التاني من البشر و اللي زهدو في الحياة هيعوزو منها إيه !!! .. و لا حاجة يا دوك .. كل اللي عايزه منها حاليا إنها تسيبني في حالي و أخرج منها بسلام .. ليا مش عليا حاجة لحد ..

ايه كان احساس حضرتك لما نجحت السنادى؟

حسيت بسعادة غريبة .. كنت فقدت الإحساس ده من فترة كبيرة قوي يا دوك .. زي ما يكون حد ماسكني من دماغي و بيغرقني و بعد كده شال إيده من عليا و اتنفست .. لحظة التنفس دي هيا لحظة نجاحي .. اللهم لك الحمد ..

هكمل بعدين شكرا واسفة لو كنت ضايقت حضرتك بكلامى

نورتيني يا دوك بيبو .. و شكرا جزيلا لحضرتك على زوقك ..

و في انتظار حضرتك مرة تانية إن شاء الله ..

[نور الحياة]

دكتور محمد كنت عايزة اقولك حاجة بسيطة ياريت تتقبلها
لا تحزن انت قلبك طيب جدا فحراااااااااااااااااااااااام القلب ده يكون فيه نقطة حزن واحدة
قابلت حد مؤمن بقدرة ربنا كان مستنى يشرب من ماء زمزم عشان ربنا يشفيه بجد يومها علمنى يعنى ايه امل ف الدنيا دى
معاك يادكتور ان الدنيا ممكن تكون وحشة بس اللى لهم قلوب تؤمن بمن خلقها حق الايمان مش المفروض يزعلو
تقبل كلامى

[DR.BIBO]

بمناسبة ان النهارده اخر يوم لحضرتك معانا على الكرسى ان شاء الله
ايه اصعب سؤال اتسال لحضرتك؟
ايه اجمل سؤال اتسال لحضرتك ؟
ايه اللى استفدته من كرسى الاعتراف؟
ايه اللى ناقص كرسى الاعتراف وكان نفسك يبقى موجود؟
اوصف شخصية كل واحد من اللى سالو حضرتك؟
هو حضرتك ليه مسالتش حد من ضيوفنا اللى قعدو معانا على الكرسى؟
لو طلبنا من حضرتك خاطرة عن كرسى الاعتراف ومشاركة حضرتك كضيف فيه تقول ايه؟

[M.Hegazy]

دكتور محمد كنت عايزة اقولك حاجة بسيطة ياريت تتقبلها
لا تحزن انت قلبك طيب جدا فحراااااااااااااااااااااااام القلب ده يكون فيه نقطة حزن واحدة
قابلت حد مؤمن بقدرة ربنا كان مستنى يشرب من ماء زمزم عشان ربنا يشفيه بجد يومها علمنى يعنى ايه امل ف الدنيا دى
معاك يادكتور ان الدنيا ممكن تكون وحشة بس اللى لهم قلوب تؤمن بمن خلقها حق الايمان مش المفروض يزعلو
تقبل كلامى

كلامك جميل قوي يا دوك و معاكي حق في كل كلمة فيه ..

شكرا لحضرتك .. و نورتيني و الله ..

[محمد سمير]

السلام عليكم

ياريت تدينا خلفيه عن نوعية المشاكل اللى حصلت بينك وبين اللى كانت خطيبتك غير حكاية عدم نجاحك

عشان كلنا نستفيد ونتجنب المشاكل دى

وياترى انت شايف انها اتخلت عنك فى شدتك ولا لأ

[M.Hegazy]

بمناسبة ان النهارده اخر يوم لحضرتك معانا على الكرسى ان شاء الله
ايه اصعب سؤال اتسال لحضرتك؟
أمامك علبة ألوان....أي لون ستأخذه لتعبر عن ما يلي؟؟؟ وماذا ستكتب به "جملة واحدة " ؟؟؟
الحزن
الصمت
الحنين
الفرح
الندم
التوبة
الفراق
( دوك حنين الأمس )
ايه اجمل سؤال اتسال لحضرتك ؟
باستعراض شريط حياتك فى الفتره من الصف الأول الابتدائى وحتى الصف الخامس الابتدائى اذكر لنا أغرب موقف تجده وأسعد موقف وما هو الموقف الذى تريد أن تحذفه من هذا الشريط ؟
( دوك محمود أبو الخير )
ايه اللى استفدته من كرسى الاعتراف؟
أولا : استرجعت ذكريات كتير جدا جدا جدا جميلة قوي و أحيانا صعبة قوي .. و اكتشفت حاجات جديدة فيا .. و عرفت نظرة الناس ليا إزاي .. و كمان عرفت ناس طيبين قوي و اجتماعيين جدا ..
ايه اللى ناقص كرسى الاعتراف وكان نفسك يبقى موجود؟
الأسئلة تبقى بالدور .. واحدة واحدة يعني ..
اوصف شخصية كل واحد من اللى سالو حضرتك؟
صعب جدا يا دوك بيبو أوصف شخصية أناس تعاملت معاهم من خلف حجاب و هو النت .. لازم اتعامل معاهم وجها وجها و أشوف منهم مواقف و تعابير و ردود فعل .. بس مبدأيا كل الناس اللي دخلو و سألو من طريقة كلامهم فيهم كام صفة جميلة قوي : التفاؤل و الأمل و الإصرار و الفضول الإيجابي و طريقة الحوار تدل على البيئة و التربية و الرقي .. قمة الذوق و الاحترام كما يغلب عليهم خفة الظل .. ربنا يبارك فيهم يا رب
هو حضرتك ليه مسالتش حد من ضيوفنا اللى قعدو معانا على الكرسى؟
بصراحة إنتو شايفين شغلكم جامد قوي و ما مخلتوش حاجة مسألتوش فيها فاكتفيت بالمشاهدة و التعلم .. و أرجو إن محدش يكون زعل ..
لو طلبنا من حضرتك خاطرة عن كرسى الاعتراف ومشاركة حضرتك كضيف فيه تقول ايه؟

سألني سمير في رسالة .. نريدك ضيفا ..
فقلت له فيمَ ؟؟!! قال لي في منتدانا كرسي اعتراف ..
و قد جرى فينا هذا الموضوع عرفـــًـا ..
دخلت فوجدت المنتدى غرفا ..
محمد علي سلام و بيبو و أخيرا سمير ضيفا ..

كرم الضيافة وجدنا .. و بالأسئلة أمطرنا كوابل السيل ..
أخذنا نلهث من هول الأحداث .. و أصبحنا كالحصان بلا ذيل ..

راجعنا الماضي و الحاضر و المستقبل .. في شريط الذكريات ..
تسامرنا وتبادلنا الضحكات و حينا آخر أوجعنا ألم الآهات ..
توافد الكل لمعرفتنا و صرنا ككتاب قيّم مفتوح الصفحات ..

دي حاجة على السريع كده يا دوك بيبو .. مقدرتش أكمل ..

السلام عليكم
و عليكم السلام و رحمة الله و بركاته ..
ياريت تدينا خلفيه عن نوعية المشاكل اللى حصلت بينك وبين اللى كانت خطيبتك غير حكاية عدم نجاحك

عشان كلنا نستفيد ونتجنب المشاكل دى

وياترى انت شايف انها اتخلت عنك فى شدتك ولا لأ

اعتذر عن الإجابة المفصلة للسؤال ده يا د. سمير ..

بس هقول لحضرتك و لكل اللي متابعين حاجة مهمة ..

لما حد يفكر في الارتباط .. يحاول على قد ما يقدر ما يطولش فترة بعده عن اللي هيرتبط بيها دي كتير .. لأن ده غلط كبير قوي و بيعمل مشاكل من مفيش ..
تاني حاجة .. محدش يفكر ف الارتباط أثناء الدراسة .. باختصار لأنه موضوع فاشل جدا إلا مع قلة قليلة من الناس ..
تالت حاجة بقى .. لو ربنا رزقكم و خطبتو أو اتجوزتو .. لازم تفعلو مبدأ التنازل عن الهيافات .. يعني مفيش داعي نقف على الواحدة لبعض و نتعلم إزاي نسامح بعض على أخطائنا و زلاتنا لأننا في الأول و في الآخر بشر و لو فعلا حد بيحب حد و صادق في حبه ده مش هيتخلي عن حبيبه عشان قال كلمة في وقت غضب أو عمل موقف يمكن ميكونش مقصود بيه حاجة وحشة بس زعلنا .. اللي بيحب بجد بيصبر و بيسامح و بيتعلم إزاي يتعامل مع سلبيات الطرف التاني و يحاول يصلحها بهدوء .. و كمان لحظات الغضب أو النرفزة مينفعش حد يتكلم فيها في حاجات مصيرية أو يتكلم فيه عن علاقته بالطرف التاني أو يوعد أو يتوعد لأن ده بيقلب بمصايب في الآخر .. كمان فيه حاجة مهمة .. دايما نحاول نفترض حسن النية إلى أن يثبت الطرف الآخر العكس .. افترض حسن النية و اطلع غلطان أحسن مما افترض سوء النية و اطلع غلطان .. و بالنسبة للرجالة بالذات متحاولش تفرض رأيك مع البنت أو تضغط عليها في حاجة معينة .. اللين و الرفق و الحوار و الكلام المقنع بيريح البنت و بيحسسها بالأمان ناحيتك و بتقدر ساعتها خوفك عليها و هتحس بأمان كبير ناحيتك .. و كمان بلاش نرفزة عليها أو تعلية نبرة الصوت .. بس فيه حاجات معروفة مينفعش السكوت فيها و لازم يتاخد موقف صارم فيها عشان متتكررش .. و يا ريت بالنسبة للرجالة كمان .. اسمع كلام البنت للآخر و ما تقاطعهاش و هيا بتتكلم و شوف وجهة نظرها إيه لأن ليهم وجهة نظر مختلفة و في حاجات بيفهموها كويس قوي و حاول تاخد رأيها في القرارات المصيرية و دايما تشاورها و تسمعها .. و ساعة غضبها متاخدش منها كلام و تهديها و متكابرش قصادها و تحاول تأجل الكلام في أي حاجة لحد ما تهدى .. بالنسبة للبنت : تجرب تسمع لخطيبها أو جوزها و تسمعه للآخر و متقاطعهوش و نبرة صوتها في الكلام متبقاش أبدا أعلى من صوته ،، و عيب قوي تزعق فيه لأنه غالبا بيبقى أكبر منها في السن بالإضافة إلى إنها لو احترمته هتخليه غصب عنه يحترمها .. لما يبقى غضبان متاخديش منه كلام و متحوشيلوش و تفكتريله الحاجات الوحشة ،، افتكري الحلو و شوفي هوا غير إيه في حياتك ،، خليه ميحسش براحة في الكلام إلى معاكي إنتي و بكده تكوني كسبتيه و كسبتي إنه يتكلم معاكي في كل حاجة و ميخبيش عنك حاجة ،، المواضيع و الأخطاء تتعالج بروية و هدوء و بالتفاهم و الكلام ،، تحاولي تسمعي كلامه طالما مش بيقولك حاجة غلط أو حاجة حرام ،، لأنه لما بيتكلم و بيطلب منك تعملي حاجة بيبقى من خوفه عليكي و حبه ليكي مش عشان عايز يتحكم فيكي و الكلام الغريب ده ،، لأن الإنسان ده إنتي آمنتيه على نفسك و محدش هيخاف عليكي قده .. و لو مش مقتنعة بكلامه حاولي تتكلمي معاه بالراحة و تقنعيه بحجة كويسة هيسمعلك و لو اقنعتيه يبقى كده خلاص ..
اكتفي بهذا القدر و للموضوع بقية للي عايز يسمع نصايح يسأل في أي وقت ..
نورتوني يا دكاترة و شكرا جزيلا لكل اللي شاركو ف الموضوع ..

لكم مني خالص التحية ..

و اعتذر جدا عن تأخري في الرد ..

[DR.BIBO]

اوصف شخصية كل واحد من اللى سالو حضرتك؟
صعب جدا يا دوك بيبو أوصف شخصية أناس تعاملت معاهم من خلف حجاب و هو النت .. لازم اتعامل معاهم وجها وجها و أشوف منهم مواقف و تعابير و ردود فعل .. بس مبدأيا كل الناس اللي دخلو و سألو من طريقة كلامهم فيهم كام صفة جميلة قوي : التفاؤل و الأمل و الإصرار و الفضول الإيجابي و طريقة الحوار تدل على البيئة و التربية و الرقي .. قمة الذوق و الاحترام كما يغلب عليهم خفة الظل .. ربنا يبارك فيهم يا رب

اكيد صعب نعرف شخصية حد من على النت بس بيبقى فى انطباعات عامة بتتوقعها عن كل شخصية
ده كان قصدى والضيوف اللى قعدو معانا قبل كده على الكرسى جاوبو السؤال ده على هذا الاساس

هو حضرتك ليه مسالتش حد من ضيوفنا اللى قعدو معانا على الكرسى؟
بصراحة إنتو شايفين شغلكم جامد قوي و ما مخلتوش حاجة مسألتوش فيها فاكتفيت بالمشاهدة و التعلم .. و أرجو إن محدش يكون زعل ..

اصل ردود حضرتك حسستنا انك هتسال كتير فلما حضرتك مسالتش استغربت بس كده واكيد محدش زعل

سألني سمير في رسالة .. نريدك ضيفا ..
فقلت له فيمَ ؟؟!! قال لي في منتدانا كرسي اعتراف ..
و قد جرى فينا هذا الموضوع عرفـــًـا ..
دخلت فوجدت المنتدى غرفا ..
محمد علي سلام و بيبو و أخيرا سمير ضيفا ..

كرم الضيافة وجدنا .. و بالأسئلة أمطرنا كوابل السيل ..
أخذنا نلهث من هول الأحداث .. و أصبحنا كالحصان بلا ذيل ..

راجعنا الماضي و الحاضر و المستقبل .. في شريط الذكريات ..
تسامرنا وتبادلنا الضحكات و حينا آخر أوجعنا ألم الآهات ..
توافد الكل لمعرفتنا و صرنا ككتاب قيّم مفتوح الصفحات ..

دي حاجة على السريع كده يا دوك بيبو .. مقدرتش أكمل ..

ديه اول خاطرة عن كرسى الاعتراف معانا وبجد ادت للموضوع شكل مختلف
نورت الموضوع يادكتور محمد وكنت ضيف مميز معانا على الكرسى

[M.Hegazy]

متشكرين لحضرتك و لزوقك يا دوك بيبو .. ربنا يكرمك و يبارك فيكي يا رب ..