عايزين نتغير

[منى امجد]

بسم الله الرحمن الرحيم
الحمد لله رب العالمين والصلاه والسلام على خير المرسلين
سيدنا محمد
مع بدايه شهر رمضان كان لازم نقف ونفكر
نقف ونغير
نقف ونصالح انفسنا
لازم نسال نفسنا ايه اللى فينا غلط
ايه اللى ربنا كارهه فينا
ايه اللى الناس كارهاه فينا
احنا صح
احنا ربنا بيحبنا
احنا صح
احنا الناس قبلانا
احنا
لو فكرت
كلنا لازم نتغير
طيب هنغير ايه فكرنا يمكن لبسنا يمكن معاملتنا يمكن عيشتنا كلها يمكن
بس اكيد هنلاقى وجه للتغيير
ممكن يجى فى بالنا حد زعلناه مره كنا غلطانين ونسينا نعتذر مره زعلنا امنا او ابونا مره غلطنا فى حق دينا مرااااااااااات كتير
خلاص حان وقت التغيير
يلا نساعد بعض نكشف عيوب بعض
مقصدش بنكشف عيوب بعض يعنى نحرج بعض فينا عيوب مش لازم تقول مين اللى فيه العيب يكفى تقول العيب وصاحب العيب هيفهم ان الكلام ده موجه ليه
رمضان يستاهل التغير
30 يوم نغير فيهم 30 حاجه مزهقانا من نفسنا
انا كل يوم زهقانه وندمانه وعايزه اتغير
ما تيجى نساعد بعض
ايدى فى ايدكم
ونساعد بعض للتغير
يعنى قول العيب ايه من وجه نظرك وقول اقتراح لحله الباقى يناقش يمكن مش عيب يمكن انت غلطان واكيد نفهم فى الاخر الراى الصح
ونتغير
ده موضوعى اول واحد هيكتب موضوع شايف انه لازم التغير فيه بقيت اليوم النقاش ومفيش مواضيع جديده
ممكن نبدا من النهارده وندخل رمضان مع التغيير
اتمنى الموضوع يكون كويس وينتفع بيه ناس كتير
السلام عليكم ورحمه الله وبركاته

[asfourelgana]

عليكم السلام ورحمة الله وبركاته

موضوع جميل جدا

ويارب كلنا نقدر نغير فيه الصفات اللي احنا مش راضيين عنها

انا نفسي ابطل عصبيه

وربنا يهديني

[نور الحياة]

وانا نفسى افهم الناس صح؟ مرة واحدة ف حياتى . المشكلة انى بفهم كل الناس ع انهم طيبين
موضوع جميل جدا
يااااااارب كلنا نتغير للاحسن

[البرنسيسة]

عليكم السلام ورحمة الله وبركاته

موضوع جميل جدا

ويارب كلنا نقدر نغير فيه الصفات اللي احنا مش راضيين عنها

انا نفسي ابطل عصبيه

وربنا يهديني

هذكرك بقول رسول الله()لا تغضب

انا عندى مشكلة انا كسولة قوى ونفسى اعرف استغل وقتى صح لانى بحس انى بضيع وقت كتير من غير فايدة

[منى امجد]

بسم الله الرحمن الرحيم
الحمد لله والصلاه والسلام على رسول الله
اتمنى اللى يكتب عيب يكتب كل حاجه من اسباب وحلول
المهم
انا مش هنتكلم عن العصبيه بشكل علمى يعنى
المهم احب اتكلم عن تجارب
يعنى احيانا العصبيه بتيجى لانك مش عايز تسمع راى اللى قدامك
حاسس ان رايك غلط نفس تكون كامل
ثلاث مشاكل
مش عايز تسمع راى اللى قدامك مشكله ليه دى فيها كبر ليه مش بتدى فرصه لحد ينصحك يعلمك يشاركك الراى يفهمك حاول تسمع هتكسب كتير حاول تصبر تشوف اللى قدامك عايز يقلك ايه مش يمكن يفيدك حتى ولو يقصد يحرجك
طب ازاى يقصد يحرجنى واستفيد منه اصل هيقلك عيبك فهتصلحه هو غبى بيقلك عيبك وناسى ان ممكن تصلحه هو فى باله انه يحرجك بس وايه يعنى تتحرج مره ولا تتحرج كل يوم بسبب عدم صبرك لسماع الكلام وعصبيتك
حل المشكله دى انك تسمع واصبر وافهم واطلع بنتيجه جربها كده وقول النتيجه
المشكله التاني احساسك بانك غلط
طلعلى واحد على وجه الارض مبيغلطش كلنا بنغلط المهم اعترف بالغلط بسرعه قبل ما حد يقلك
ليه اعترافك بانك غلط بيديك فرصه اولا انك تعيد تفكيرك وتوصل لتفكير صح ثانيا مش هتدى فرصه لحد يصلحلك وتتعصب رغم انه لو صلحلك وسمعت رايه انت اللى كسبان بس متديش لنفسك الفرصه انك متعترفش بغلطك لان فيها شىء من التواضع وعدم الكبر وده هيساعدك انك متتعصبش
المشكله الثالثه عايز تكون كامل
كل ماحد يقلك حاجه تقول غلط وتعمل حاجه تانيه وتبقى من جواك نفسك تكون انت اللى صح ومفيش حد غيرك انت ولو حاجه تانيه طلعت صح تعصب نفسك وتتنرفز على كل اللى يقابلك
دور وفكر على الحاجه الصح واتمنى انك تكون الصح لانك تعبت ولو حد تانى طلع هو الصح شوف عمل ايه واتعلم
موقف تانى
ممكن يكون سبب العصبيه مشاكل كتير
طيب وايه يعنى جرب كل ما تسمع حاجه تزعلك اضحك
والله جربتها
مش اضحك ضحك هستيرى لا ابتسم
ربنا هيسترها باذن الله
ضحكك بيديك فرصه انك تفكر تسترخى مع نفسك
احساسك بالراحه يدى احسن تفكير باذن الله
جرب مع كل مشكله وايه يعنى واضحك واقعد فكر وادعى ربنا
ومتعصبش نفسك
جرب الوصفه دى كده
اسمع فكر اصبر افهم اضحك وادعى
وقول النتيجه
اقلك بقى كلام طبى
العصبيه يعنى فى الاخر
ضغط
سكر
قلب
اكمل
كفايه احسن
دى وجهه نظرى ويمكن فى تجارب تانيه سبب العصبيه ياريت نسمع اراء تانيه
والسلام عليكم ورحمه الله وبركاته

-----
ماشى نخلى مشكله بكره باذن الله ان احنا بنفهم كل الناس طيبين وبعد بكره الكسل نشارك دلوقتى فى العصبيه

[منى امجد]

بسم الله الرحمن الرحيم
الحمد لله والصلاه والسلام على رسول الله
العصبيه برده ممكن تكون بسبب توتر امتحانات مستنى نتيجه فلازم لو فى موقف زى ده نستحمل اللى قدامنا هو مش ناقص اقل كلمه تنرفزه بل بالعكس نساعده
وبرده مفيش لازم للعصبيه حتى لو فى مشكله لانها هتتعبك اكتر مش هتساعدك فى التفكير حاول تهدى نفسك خالص
صحيح ممكن نكون عرفنا عيبنا بس عايزين قوه اكتر علشان نساعد انفسنا ان احنا نصلح عيبنا
الوقت اللى هتوصل فيه انك تصلح عيبك هو اسعد وقت فى حياتك
خليك قوى وغير عيبك
لانه ممكن يغير حياتك كلها
والسلام عليكم

[AbU ElKhAiR-Let`s Go]

فى البدايه بجد موضوع جميل
وبيفكرنى بذكريات أجمل وأروع وبجد كانت اجمل فتره عشتها فى حياتى
ويارب أكون اتعلمت منها كتير
وأتمكنى لحضراتكم التوفيق



وعلى فكره فى نفس الوقت ده السنه اللى فاتت قلت على شويه مشاكل أظن ان الحمد لله فيها حاجات اتغيرت وفى حاجات لسه
لكن أهم حاجه لسه مش اتغيرت
هيا العصبيه
العصبيه اللى بجد يعنى ممكن نقول وصلت لدرجه عدت مش لاقى ليها حل وزهقت منها فعلا

ادعولى بجد أتخلص منها

وشكرا لحضرتك وربنا يوفق حضراتكم

[منى امجد]

بسم الله الرحمن الرحيم
الحمد لله الرحمن الرحيم والصلاه والسلام غلى رسول العالمين
اولا متاسفه انى وقف عن الكتابه اربع ايام
بالنسبه للعصبيه بجد سهل انك تغيرها لو شلت الكبر والغرور والاحساس الزايد بالذات وانك تسمع غيرك
على فكره طول ما فيك عصبيه عمرك ما هتكون الاحسن
بالعكس لما بتسمع غيرك وتتفاهم معاه بدون عصبيه بتكون دايما الافضل لانك كل مره بتتعلم
انا كان فيا برده شىء من العصبيه
قعدت اتكلمت مع نفسى ليه بتتنرفزى بتزعقى
لقيت ان السبب ان لما بغلط مش عايزه اعترف بالغلط مش عايزه حد يصلحلى
بضايق لو حد قالى عيبى
قلت لنفسى طيب ما تسمعيهم ادى لنفسك فرصه تتغيرى
بعدها لما حد يجى يقلى عيبى بتنرفز من جوايا الاول وبعدين افتكرت عهدى مع نفسى انى هتغير ولازم اتغير ده لو عايزه اكون الافضل بقيت اسمع كنت بجادل الاول ولو حتى بصوت واطى بعد كده لقيتنى استفدت لقيتنى لما بسمع بفهم عيبى بغيره فبقيت الاحسن
الحمد لله انى قدرت وكلنا نقدر نتغير
لو وقفنا واتكلمنا مع نفسنا ولو خمس دقايق ايه مميزاتى وعيوبى
مميزاتى انميها وعيوبى الغيها
واكون واثق ان الله هيعنى لو انا عايز اتغير بجد
خلى بالك اكبر المشاكل بسبب العصبيه
اول ماتلاقى نفسك متعصب اخرج عشان تتكلم مع نفسك
متتديش لنفسك فرصه انك تغلط فى حد بتحبه
قوم اتوضى لسه متنرفز صلى ركعتين
عالج نفسك
اللى لسه العصبيه تعباه يسمع دروس تنميه بشريه عن العصبيه
http://www.youtube.com/watch?v=qfIQcdD5AXU
http://www.youtube.com/watch?v=t6nmDn-cBw0
يارب الفيديو يفيد
ده بالنسبه للعصبيه
ياريت نشارك بعض فى الاراء ان شاء الله نستفيد
بالنسبه احساسك بان كل الناس طيبين
ده شىء طيب بس محتاج حاجه معاه الحذر
يعنى مش اول يوم تتكلم مع صاحبه جديده تعرف كل اسرارك تعرف كل حاجه عنك اه انتى حاسه انها طيبه بس يمكن لو عرفتيها اكتر تتطلع اسوأ خلق الله
مفيش مشكله باحساسك ان الناس كلها طيبه بس راعى انك لسه معرفتيش اللى قدامك ده ايه
خلى فى داغك الاسوأ لو طلعت وحشه
مثلا
واحده متعرفهاش جه فى دماغك سر ليكى قولى لنفسك لو طلعت وحشه الكليه كلها هتعرف سرك الكليه كلها هتنتقضك مش هتقدرى تحطى وشك فى وش حد مش هتقدرى تواجهى لا يبقى امسك لسانى
صحيح انتى شايفاها طيبه لانك انتى طيبه بس انتى مش عارفه هى هتبقى ايه
وفى حياتك عموما يبقى فى حذر مثلا
فى الشغل واحده اول يوم تشتغل لقيتك متاخره فقالتلك روحى انتى وانا هكمل مكانك
روحتى الشغل تانى يوم لقيتى الدنيا بايظه ومكملتش وسرقت واتهمتك انتى
مش عايزه تقولى انك مشيتى بدرى وهى قالت هتكملك شغلك علشان متخديش جزا لا هى جبتلك سجن على طول الجزا ده بتاع الناس الفافى انما استحملى السجن بقى
فى ناس فعلا بتعمل العن من كده
وحكايه حقيقيه فعلا واحده امنت لوحده وسكنتها عندها ايجار يعنى وطيبه الدنيا فيها
بعد شهر حصل جريمه قتل وكمان طلع جوزها تاجر مخدرات والحكايه كانت داخله فى اختطاف اخوها لسبب مش مهم ايه هو
ولنفس الست برده قبلها واحد طيب وكويس هيجوا هو ومراته وبنته وناس طيبين خالص
الراجل طلع تاجر مخدرات برده ومراته دى مراته بورقه عرفى وهو كان بيجيب ستات البيت لغرض غير نبيل و مراته اللى بورقه عرفى كانت شايه مسدس معاها للطوارىء
مقدرش اقول فى دى طيابه
بس توقى فى اللى قدام الخير بس يكون عندك حذر للى متعرفوش
والسلام عليكم ورحمه الله وبركاته

[منى امجد]

بسم الله الرحمن الحيم
الحمد لله رب العالمين والصلاه والسلام على رسول الله
بالنسبه للكسل بالنسبالى يعنى ده مش مشكله المشكله سبب الكسل
مفيش هدف
مفيش حاجه نعملها
فالنتيجه قاعدين
كسل لو فى حاجه نعملها نحس فيها باننا قدمنا حاجه مش هيكون فى كسل ولا حاجه
لازم ندور على حاجه نعملها ويكون فى هدف علشان لما يحصل نحس بالفرحه بجد ولازم يكون فى خطه لتحيد الهدف متهيالى كده تخلصنا من الكسل وحققنا حاجات كتير تفرحنا بجد
والسلام عليكم ورحمه الله وبركاته

[AbU ElKhAiR-Let`s Go]

ربنا يوفق حضرتك ويجازيكى كل خير

وياريت فعلا كل الناس تشارك مع حضرتك

تقبلى تحياتى