عايز تحب المذاكرة و تذاكر صح بدون ملل ...

[الفراشة الرقيقة]

الامتحانات قربت وعلى الابواب
زهقان ومش عارف تذاكر وحاسس ان السنه دى........
عايز تبقى الافضل بدون ماتتعب نفسك
.......

لو عايز تحسن مذاكرتك
اتبع

الأكل:

لازم تهتم بالأكل , و خصوصا الأكلات إللي ممكن تحسن أداء الذاكرة.. مثل :

التمر- اللوز- الحليب- التفاح –العنب الغامق- و كل مشروبات الصويا..

و كمان العسل و شاي الجنزبيل و عصير الجزر محفزات رائعة للذاكرة...

النوم:

فيه بعض الأبحاث بتقول إن النوم هو مرحلة بيقوم فيهاالعقل بتثبيت
المعلومات إلي خدناها طول اليوم ..
يعني يفضل سيادتك تنام بعدالمذاكرة شوية بدل ما تفضل سهران الليل بطوله و انت مش مركز و قاعد تذاكر برضه !
الراحة مهمة و لازم تذاكر و انت مركز ,
و تنال قسط مناسب من النوم.. بس إوعى يبقى النوم هو و سيلتك المفضلة للهرب من المذاكرة ...
انا باقول نام لك شوية بعد ما تذاكر مذاكرة كتيرة..

التنظيم:

مهم جدا قبل ماتذاكر , ترتب الورق و المذكّرات و الكتب بتاعتك..
كل مادة لوحدها و كل جزءلوحده.. عشان تعرف بالضبط (حجم) كل مادة..
عشان تعرف بالضبط فاضل لك إيه و ذاكرتايه فتقدر تعرف هاتذاكرها في وقت أد إيه.
التنظيم نص المذاكرة.. لأن الورق لو كله على بعضه , مش هاتعرف تذاكر و هاتيأس
و تسيب المذاكرة و تقوم..
لأنك مش عارف راسك من رجليك.. خليك فاكر : التنظيم نص المذاكرة.

بلاش لخبطة:
أي عمل غير منته في حياتك , ممكن يخلي بالك مشغول..
فضي نفسك للمذاكرة و بلاش تخلي بالك مشغول في 5962 حاجة !

الضحك:

الحاجات المضحكة عمرها ما بتتنسي..
لو فيه معلومة معصلجة معاك
حطها في نكتة او بص لها كإن دمها خفيف ..
اخترع النكت و اسخر من المنهج اللي بتحفظة هاتلاقي نفسك بتحبه
و عارف تذاكره..

اهتم:
من المهم أن تكون مهتم بما تقرأ..
يعني حاسس انك عايز تعرف المعلومة دي فعلا وعايز تستفيد منها..
خلييك حاسس بالفضول نحو الموضوع عشان تلاقيه مسلي.. و حط دماغك في الموضوع ..

قرر:
قرر إنك هاتحفظ المنهج بنسبة 100% مهماكلفك الأمر ,
و ذاكر بهذه العقلية و انت مصمم إن : يا انا يا الأمتحان بقى !

سبب رئيسي بيخلينا مش عارفين نحفظ , و هو اعتقادنا الداخلي ان ذاكرتناضعيفة !

لو آمنت ان ذاكرتك قوية و قلت كده لنفسك ,
و قررت إنك هاتحفظ وتستوعب المنهج كله بأقل تفاصيله, هاتترسخ جواك الفكرة دي .

خليك إيجابي:
حط خطوط تحت الكلام المهم , لخص النقاط المهمة , سمع لنفسك , .....
اعمل حاجات ملموسة تحس منها إنك ماشي في الطريق الصحيح و مش سلبية.

ركز في التفاصيل:
اعتبر كل معلومة صغيرة مهمة ..
و اعتبر انك هاتحكي كل التفاصيل دي لواحد صاحبك بكرة و انتم خارجين مع بعض..
اعتبر إن فيه ناس صحابك عايزين يعرفوا التفاصيل دي و انك هاتحكيهالهم بكرة..

و خلي بالك ..

ادي نفسك فرصة انك تنسى شوية .. كل ما تذاكر كتير, هاتنسى حاجات مش مؤثرةقوي..

لكن لو مذاكرة قليل, لو نسيت معلومة واحدة هاتروح في أبو نكلة!

اتكلم بصوت عالي :
بكده حواس كتير هاتشتغل على المعلومة دي .. اشرح المعلومة دي لحد , أو اكتبها واقرئها تاني
.. ماتبقاش بس مستقبل سلبي للمعلومة, طلعها من جواك برضه -بأي طريقة-
عشان ترسخ المعلومة أكتر.

[صاحبة القلم الحائر]

موضوع جميييييييييييييييل جداااااااااا
وانا عن نفسى استفدت منه
ربنا يكرمك ويجازيكى كل خير
تقبلى مرورى

[SCORPION.R]

موضوع جميل
فى حاجات بعملها بالفعل وفى حاجات إن شاء الله هعملها
لكن بالنسبه لفكرة الاحساس بالفضول ناحية المنهج
متهيألى دى صعبه شويه فى بعض مناهجنا دا لو مكانش معظمها ممل بالفعل

[محمد فهمي]

جزاكي الله كل خير...نصائح هامه جدا
جاء في وقته بالفعل

[Amira]

النوم:

فيه بعض الأبحاث بتقول إن النوم هو مرحلة بيقوم فيهاالعقل بتثبيت
المعلومات إلي خدناها طول اليوم ..

عشان كده انا نايمه طول النهار
بثبت المعلومااات

التنظيم:

لما باجى اذاكر ماده لااازم كل الورق يطلع قداامى لو 20 مذكره كلهم يبقى قدامى
تيجى أمى تعدى ميعجبهاش المنظر ... تحط كله فوق بعضه

نقطه الخلاف دايما بينى وبين انا مبعرفش اذاكر غير لما المكتب يبقى مليان ورق

سبب رئيسي بيخلينا مش عارفين نحفظ , و هو اعتقادنا الداخلي ان ذاكرتناضعيفة !

لو آمنت ان ذاكرتك قوية و قلت كده لنفسك ,
و قررت إنك هاتحفظ وتستوعب المنهج كله بأقل تفاصيله, هاتترسخ جواك الفكرة دي .

تمــام
الكلام ده لسه متقـال ليـا يوم النتيجه بتاعه الترم الاول

ربنــا يكـرمك

[dr corundom]

جزاكم الله خيرااااااااااا..

[DR DOOLA]

انا بشوف اى معلومه مسليه الا الاورجين بتاع العقاقير مش عارف احبه ليه ؟ الواحد يحب A.C aw uses momkn y3ni chemical test

bs tslm 2edk 3la l topic

[romaysaa]

طبعا شكرا ع الموضوع ويارب بس نطبقه وبإذن الله ربنا يوفقنا جميعا وتكون سنة سعيدة على الجميع

بلاش لخبطة:
أي عمل غير منته في حياتك , ممكن يخلي بالك مشغول..
فضي نفسك للمذاكرة و بلاش تخلي بالك مشغول في 5962 حاجة !

إنت عديتهم إزاي

بصراحة لو جيتيلي أنا في دماغي أكتر من كده بكتييييييييييييييير

[طيور الجنه]

نصايح فى وقتها يا فراااشة

ربنا يكرمنا جميعا وينجحنا