الحلقة السابعة عشر ( العشاء )جلسنا حول الطاولة و يمكنك توقع أماكن الأفراد بسهوله حيث يجلس العروسان جنبا إلى جنب ,, في حين يجلس خالد إلى جواري ,, أمّا خالي و زوجته فيجلسان على طرفي الطاولة ,, دعك من كل هذا فالأهم أن سارة تجلس أمامي مباشرة مما أتاح لي من حين لآخر خطف نظرة أو اثنتين دون أن يشعر بي الحاضرون ,, كانت في قمة الخجل فهي الآن محاصرة بين خطيب يجلس جوارها و حبيب يجلس أمام عينيها يتابع حركاتها وسكناتها ,, و إليكم جزء من الحوار :-( خالي ) ____ شد حيلك شويه يا دكتور عاوزين نفرح بيك ..( أنا ) ____ ما الامتحانات خلصت خلاص والنتيجة بانت و نجحت يا خال ,, انت ما تعرفش ولاّ أيه ؟؟( محمد ) ___ خالك قصده تخطب مش قصده النتيجة خالص ..( خالي ) _____ عاوزين نشوف من ست الحسن والجمال اللي ربنا راضي عليها و هتكون مراتك ...( أنا ) ____ لا يا خال أنا مابفكرش في المواضيع دي دلوقت , أنا لسه قدامي بدري ..( خالي ) ___ بدري من عمرك يا بني دا انت والدك متجوز والدتك و همه عمرهم سبعة عشر سنة ,, انت دلوقت عمرك ثلاثة و عشرين سنه و بتقول لسه بدري !!( أنا ) ___ ما هي الحياة اختلفت عن زمان يا خال ,, زمان كانت الأمور سهلة ,, واحد بيحب واحدة يروح يخطبها وبعدين يشوف أي غرفة فاضية عنده في البيت و يتجوز فيها والمهر كان كام تلاقيه كان ربع جنيه ,, أمّا دلوقت الأمور صبحت صعبة و معقّدة ..( خالي ) ____ المواضيع مش بالسهولة دي ,, طب انت تعرف ان أبوك و أمك كان بينهم قصة حب اسطورية زي اللي بتشوفها في الأفلام ,, و احنا ما كنّاش نعرف و والدتك كانت هتتخطب لواحد تاني لولا والدك دخل على جدّك و معاه المأذون ,, ددفع المهر و لبّس الشبكة و اتجوزوا في أقل من اسبوع ...( زوجة خالي )____ " بعدما توقف الطعام في حلقي و كادت تخرج روحي " أشهد ألاّ إله إلاّ الله ,,, مالك يا حبيبي فيه أيه ,, ناوليه مياه يشرب بسرعة يا سارة ..( سارة ) " و هي تكاد تموت من الضحك " اتفضل المياه ,, الكلام واقف في زورك و لاّ الأكل ؟؟( أنا ) ____ الاتنين ,, دا مين دا اللي بيجيب في سيرتي دا ؟؟؟( محمد ) ____ و احنا نعرف منين ما اللي بيحبوك كتير ..( زوجة خالي ) ___ والدك ما حكاش لك القصة دي قبل كده ؟؟( أنا ) ____ طبعا ,, طبعا حكى لي دا احنا حتى كنّا في سيرتها امبارح ...( سارة ) ____ بس ازّاي والدك اتجوز والدتك و هيه مخطوبة لواحد تاني ؟؟( أنا ) ____ كنت لسه بسأله نفس السؤال دا امبارح و ما جاوبش عليّه ..( خالي ) __ أنا أقول لك ,,, احنا كنّا قرينا فتحة والدتك لواحد تاني فوالدك لمّا عرف راح عمل تحرياته عن التاني دا و عرف إنّه كان بيحب واحدة تانية بس أبوه رافض يجوزها له وأبوه هوه اللي إيجه و قرأ معانا الفاتحة ,, والدك راح للراجل التاني و عطاه مبلغ معين يشتري بيه بيت صغير و يتجوز اللي بيحبها و في نفس اليوم دخل على جدّك و معاه المأذون و خلّص كل حاجة في قاعدة واحدة ...( أنا ) ___ انت متأكد إن والدي عمل كده ؟؟( خالي ) ___ أنا كنت مسافر السعودية ساعتها خالك صالح هوه اللي حكى لي أصله كان بيحب أبوك وكان واقف في صفه ..( أنا ) ____ أكنّ أبو وفاء كان بيحب أبويا و واقف في صفه !! سبحان الله و أنا أقول البت وفاء جايبة الجدعنة دي منين أتاري الحاجات دي وراثة عندهم في العيلة ..( سارة ) ___ بس والدك كان حظه حلو ,, أنا بقى أعرف قصة مشابهة بس الاختلاف إنّ الراجل التاني في القصة دي كان مقتدر ماليا و كمان والده موافق على الجوازة ..( محمد ) ____ كده الأمور أصعب يبقى الشخص اللي يحب البنت المخطوبة فرصة معدومة ..( سارة ) ___ عندك حق ,, أنا برده قولت نفس الكلام بتاعك دا بالظبط ,,, بس هوه متمسك بالأمل شكله كده بيتفرج على أفلام هندي كتير ...( أنا ) _____ ماهي البنت برده لازم تساعده متفضلش ساكته وسايبة كل حاجة عليه ..( سارة ) ___ تساعده إزّاي حضرتك ,, تروح له البيت و تقوله إنّها بتحبه و تطلب إيده من والده ؟؟( أنا ) ___ لا ,, تحط لخطيبها السم في الأكل و كده يبقى البطل خلص من الاتنين واستريح ,, قول لخطبتك تسكت يا محمد ..( محمد ) ___ يا عني انت أول مرة تعرف سارة ما هي طول عمرها خيالية و عايشه في عالم تاني ..( زوجة خالي ) ____ أنا لو كان عندي بنت تانية كنت جوزتهالك يا ابراهيم ,, دا انت ألف من تتمناك ..( أنا ) ____ ربنا يخليكي يا مرات خالي ,, والله أنا بحبك كده لله في الله ,, بس لو كانت زي سارة يبقى يفتح الله ...( سارة ) ____ أيه ؟ أيه ؟ ما سمعتش ان كنت بتقول أيه ؟؟ ممكن تقول تاني ..( أنا ) ___ " بعد فاصل من التهتهه " لا انت سمعتي أيه ؟؟ أنا كنت بقول و أنا لاقي واحدة تانية زي سارة فين ؟؟انتهى وقت العشاء و طلبت من خالي السماح لي بالرحيل ,, لا أدري تلك الحالة التي تنتابني عند رؤيتها أشعر و كأنني أعيش حلما جميلا لا أود أن العودة منه للواقع ....إبراهيم رأفتالحلقة القادمة ( حل وسط )
رد مع اقتباس
