الموسم الثالث و الأخير من سلسلة اليوميات الممتعة سارة و عمر .. " يوميات بابا عمر و ماما سارة " .. تـــابعوني

[M.Hegazy]

السلام عليكم و رحمة الله و بركاته ،،،

بناء على رغبتكم ،، و استكمالا للجزء الثاني من :
( يوميات اتنين متجوزين )

احمل بين يدي اليوم بداية حياة مختلفة ،، و أسرة من أسر المجتمع الشرقي الأصيل مع صاحبي الظل الخفيف سارة و عمر و زعبلة ( يحي )

بين يديكم اليوم الموسم الثالث و الأخير :
( يوميات بابا عمر و ماما سارة ) ..

و نستكمل مع سارة و عمر بقية القصة ..


لمن لم يتابع الجزء الأول : ( يوميات اتنين مخطوبين ) .. يمكنكم قراءة اليوميات من على هذا الرابط :

http://www.pharma-board.com/board/sh...ad.php?t=21496

لمن لم يتابع الجزء الثاني : ( يوميات اتنين متجوزين ) .. يمكنكم قراءة اليوميات من على هذا الرابط :

http://www.pharma-board.com/board/sh...ad.php?t=22309


اسيبكم بقى مع بداية الموسم الثالث و الأخير ..

تــــــــــابعوني و الحلقة الأولى بعد قليل ..



Dr.M.Hegazy

[M.Hegazy]

.. الحلقة الأولى ..





سارة : احتضنت يحيى بقوة ونحن عائدين الى منزلنا وكأنى أخاف أن يغيب عن عينى لحظة واحدة ....

رفضت كل المحاولات أن يحمله أحد بدلا منى فى السيارة ... أخاف لو تركته أن يتسلل ويدخل داخل رحمى مرة أخرى !!


لا أستطيع أن أبعده عن أحضانى لحظة وعندما طلبت الممرضة ان تودعه حجرة الأطفال كى أستريح من ارهاق الولادة رفضت باصراروكدت أقتلها .....

ورفضت حتى أن ينام فى سريره الصغير فى المستشفى وأصريت أن ينام بجوارى وأفسحت له مكانا ليكون ملتصقا بى .....
ألم يكن ينام بجوار قلبى لأيام وشهور؟! كيف أستطيع فراقه وقلبى أحبه قبل أن تراه عينى ؟!

أجمل طفل رأته عينى .....
ولا لأنى أمه أقول هذا ؟ أمه ؟! سبحان الله كيف تحولت فى شهور قليلة من فتاة بريئة تستطيع حشو العالم فى جيوبها وتلمع عيونها بالحيوية والاندفاع والجنون الى أم هادئة عاقلة تخشى من نسمة الهواء أن تصيب ولدها ؟
وتوافق بلا تردد أن تموت ولا يخدش اصبع وليدها ؟

سبحان الله .....
لا يمكن أن تتحول الأنثى الى هذه الدرجة بملء ارادتها بل لابد من غريزة ربانية تغزو قلبها بعشق هذا الطفل قبل أن تراه كى تقبل كل هذا الألم والارهاق حتى يشب وليدها رجلا .....
يالله حتى فى عشق المرأة لأطفالها يكون الله ثالثهما !!!


عمر : والله وبقيت أب يا عم عمر !!!!
ايه ده ازاى يعنى ؟ يعنى المفروض أعمل ايه ؟
لا أنا بجد لسه متلخبط وحاسس انى اتاخدت على خوانة يارجالة .......
يعنى أخرج من البيت لوحدى ونرجع تلاتة ؟
بس برضه ح أطير من الفرحة وكل ما أبص ليحيى أشوفه ملاك جميل نائم فى أحضان أمه التى ترفض أن يحمله غيرها ....
وناقص تديهولى على عرض حال دمغة !

بس بجد أنا لو منها وشفت العذاب ده كله لا يمكن أخلى حد يلمسه ....
الحمد لله ان الأم هى اللى بتولد مش الأب !!!
وكفاية العض والخربشة اللى شفتهم من سارة فى الولادة !!

والمشكلة انى مش عارف أشيله خالص وحاسس انى بأشيل قطعة كريستال ستنكسرمن اى حركة خاطئة ....
والكل يصرخ فى : سارة وأمى وحماتى بألف تحذير ( حاسب حتلوح رقبته – حط ايدك فى ظهره – ما تبوسوش جامد – دقنك ح تشوكه !!!!)
حتى قررت أن أتفرج عليه وهو على ذراع أمه.....
يعنى لو سمحت لى !!

رغم ان أنا اللى دفعت كل التكاليف فى المستشفى وخلافه.... وكمان اكتشفت ان عبارة (ألف مبروك واللى جاب لك يخلى لك !) معناها ادفع ياسيدى من سكات !
سمعتها ألف مرة من العمال والممرضات فى المستشفى حتى توسلت لهم أن نرجع البيت فورررررررررررررررا

سارة : آه واضح ان تأثير المسكن حيبدأ يروح وبدأت أشعر بأنى 10 فتوات ادونى علقة جامدة جدا أو انى مشيت من طنطا لأسوان !!!!!
آلام فى كل جسمى ولا أريد الا أن أنام وتركت تحضير الطعام وأمور البيت لأمى وحماتى وأخذت يحيى بجوارى وأنا أكاد أتفتت من التعب واستغرقت فى النوم فى لحظات معدودة .......

ايه ده هو أنا لحقت أنام ؟ ده أنا ما كملتش نصف ساعة ؟
ده صوت قطة ده ولا ايه ؟
ياااااه مين ده ؟! آآآآآآآآه ده يحيى !!!!!

ايه يا حبيبى بس الله يهديك بتعيط ليه نفسى أنام ولو ساعتين بجد ح أموت من التعب .....
ياماااااااااما الحقينى أعمل ايه ؟

وجاءت أمى على صراخى وهى تضحك وتقول( علشان تعرفى الغلب اللى انتى وريتهولى وانتى صغيرة !)

فرددت وأنا أكاد أبكى
(طيب ياماما خديه دلوقتى علشان أنام وادى له رضعة ...
وأنا أول ما أصحى ح أعرف كل حاجة على طول !!!!!)

فرفضت باصرار وردت على(بلاش دلع قومى رضعى الولد ده ميت من الجوع )

فرددت بتعجب ( أرضعه ؟! ازاى ؟ مفيش لبن لسه ..لا لا ما أعرفش اتكسف ياماما )
فردت وهى تكاد تضربنى ( تتكسفى من ايه يا مجنونة انتى !!

يالا الولد ح يموت من الجوع وبعدين هو لما يرضع يا حبيبتى ربنا حيبعت له رزقه وحييجى اللبن يالا بلاش دلع )

فرددت باستسلام
(طيب ياماما ....من فضلك أخرجى وأنا حأرضعه !)

فخرجت وتركتنى معه وضممته الى والقمته صدرى بأيدى مرتجفة وأنا أتوقع أن يرفضه أو الا يعلم كيف يرضع .....
وياللعجب كأنه غريق وجد قارب النجاة وجدته يحرك شفتيه الصغيرتين ويرضع بكل هدوء واطمئنان ...

سبحان الله من علمه هذا ؟
سبحانك يارب ...من أين سيأتى الحليب ؟
..آه ..أشعر بشرايين صدرى تتفتح ...وقنواته المغلقة منذ ولدت تتفتح لتستقبل رزق الله من الحليب الطاهر بمجرد أن طلب صغيرى رزقه من الله .......
وأخذ يرضع يحيى حتى ارتوى ونام هانئا ....
وسالت دموعى وأنا أرى عظمة الله تتجلى فى هذه المعجزة الربانية.....

عمر : ممنوع أدخل أودة النوم علشان سارة ويحيى نايمين فيها ..وماما نامت فى الأودة التانية وحماتى فى المطبخ ....
طيب أنام فين عند البواب ؟
من أولها كده يايحيى باشا حنتركن على الرف ؟
ماشى ياعم بس لما تكبر ح أوريك !
خلاص حأنام فى الصالون وأمرى لله بس فى البرد ده ؟!
يالا علشان الواحد يقوم عنده كساح ونخلص بقى !

بس سارة وحشتنى ويحيى كمان وحشنى طيب أعمل ايه ؟ فتسحبت لأنام بجوارهما فى دفء الحجرة ومشيت على أطراف أصابعى وفتحت الباب بمنتهى الهدوء لأجد سارة حبيبتى نائمة فى بحر عميق من شدة الارهاق وبجوارها الباشا الذى احتل مكانى !!

ووجدتها فرصة لأدقق فى ملامحه لأجده ورث عيون سارة الجميلة ولونها الخمرى وأخذ لون شعرى الأسود وذقنى ولمست بشرته الحريرية وأنا أتمنى أن يكبر فورا لألعب معه وأعرفه أنى والده .....
وقبلته بحرص شديد ولكن يبدو أنى أقلقت منامه فاستيقظ يبكى ...
وحاولت اسكاته لم أعرف طبعا فصحيت سارة مفزوعة واكتشفت جريمتى وصرخت فى
( حرام عليك يا عمررررررررررررررررررر)!!!!!!!:


يتــــــــبع ،،،،



Dr.M.Hegazy

[E.Raafat]

أف مبروك ياعمر ,,,,ألف مبروك ياسارة وعقبال عندنا جميعا ,,,,,,, متابعين معاك يادكتور بس بلاش تتأخر علينا

[M.Hegazy]

عذرا يا دوك .. عملت حادثة عطلت شغل كتير عندي ..

اعتذر عن التأخير في أي شيء ..

جزيل الشكر على المتابعة ..

[E.Raafat]

سلامتك يادكتور محمد وياريت تطمنا أكتر على حضرتك

[M.Hegazy]

الحمد لله يا دوك إبراهيم .. جت سليمة و إصابات خفيفة إن شاء الله ..

العربية اللي محتاجة تظبيط جامد شوية ..

بس الحمد لله على كل شيء ..

[chemist girl]

حلقه جميييله
شكرا يا دوك
وألف سلامه مره تانيه

[dodhh]

الاول الف سلامه عليك يادكتور طمنا عليك ومتابعين معاك كالعاده

[M.Hegazy]

.. الحلقة الثانية ..




عمر : لا أدرى لماذا تذكرت فيلم الحفيد -والأب يبكى وهو يشترى لوازم الولادة من مغات ودجاج وخلافه –
وأنا مع حماتى نشترى لوازم البيت والمغات وو و....

مع طبعا اللهمز واللمز من حماتى اننا مفروض نكون اشترينا كل الحاجات دى قبل الولادة .....
وانا أتحجج بأن سارة ولدت قبل ميعادها وطبعا لم أقل اننا لم نملك ما نشترى به جناح كتكوت !!

واشترينا كمية من الدجاج تكفى حى شبرا وطن مغات وحلبة وسكروعسل وأرز ووووووو.......

وكدت أبكى أنا الآخر وأترك حماتى وحدها وأتعلل أن عندى مشوار لليونسكو!!
لولا انى وجدتها وقت الحساب تخرج مبلغا ضخما وتحاسب هى ...
رقصت من السعادة وأنا أقطب جبينى وأقول ( ليه كده بس يا طنط ؟
طيب لو ما كنتيش تحلفى !!!!!!)

سارة : (ايه يا جماعة هو أنا وحش؟
ازاى آكل فرخة كاملة لوحدى ؟ وكمان مسلوقة ؟ لا بجد حرام !!)

ولم تجد توسلاتى صدى أمام روسيا وأمريكا أقصد ماما وحماتى ...
أخيييرا أجدهم متفقين فى شىء منذ زواجى الا وهو ضرورة جعلى كالدرفيل بعد الولادة من كثرة الطعام ...

فأجدنى فى الصباح مضطرة الى شرب كوب كبير جدا من المغات الذى تعلوه طبقات من السمن البلدى والمكسرات والذى يكفى وحده الى جعلى شبعانة لمدة شهر ....

ويتبعه كوب كبير من الحلبة بالعسل الأسود مش عارفة ليه وكل ما أبدأ بالاعتراض تجتاحنى نظرات نارية من الطرفين تجعلنى أبتلع الكوب والملعقة أيضا

.....والمشكلة انى مطالبة بشرب كميات لا نهائية من المغات والحلبة طوال اليوم ....
وعندما أرى الكوب الميمون يتجه نحو فمى يكاد لسان حالى يقول ( اشربى يا شابة ماحدش بياكلها بالساهل !!)

ووقت الغداء أجدنى مضطرة الى أكل فرخة ضخمة فى حجم الديك الرومى وحدى لا أعرف لماذا ؟
ومثلها فى العشاء !!!!!
لا أعرف لماذا يظنون ان من تلد لابد أن تتحول الى فيل بزلومة ؟

فينك يا عمر
؟!!!!!!!!

عمر : سبحان الله نفس الهجوم اللى هجم علينا بعد الزفاف هجموا تانى بعد الولادة !!!
الزيارات ليل ونهار بس المرة دى الوضع مختلف ان حماتى هى اللى بتقوم بخدمتهم والنساء يدخلون لسارة فى حجرة النوم وأنا أتدبس مع الرجالة فى الصالون ....
ولازم الكل يشرب مغات ليه ولدوا هم كمان ؟

بس بصراحة المرة دى فيه نقوط كتير ليحيى ...
بصراحة هو وش الخير علينا كفاية انهم وافقوا على موضوع شغلى الجديد فى نفس يوم ولادة يحيى ...
صحيح سبحان الله عمرى ما تخيلت معنى الاية (نحن نرزقهم واياكم ) بالشكل ده..
يعنى ربنا قدم رزق الاطفال على رزق الاباء ....
الحمد لله ربنا يخليك لينا يايحيى .....

سارة : (جايبة الوحاشة دى منين يا سارة ؟! )
كلمة سمعتها من كل من زارونى واغتظت لها جدا وكنت أغضب وأكاد أقول محدش يقول على ابنى وحش ده زى القمر .......

عندما غمزت لى أمى ان الكل لازم يقول كده علشان لو البيبى تعب لا قدر الله مانقولش انهم حسدوه !!!
طيب ما يقولوا انه جميل ويقولوا ما شاء الله !!!!

لا والأغرب ان ماما كانت تأمرنى أن أتظاهر بالاعياء الشديد وانى شفت الأهوال فى الولادة علشان برضه الحسد !!!

وكنت أرى نظرة نارية منها لو وجدتنى ضحكت بصوت عالى او اقترحت الخروج من غرفة النوم للجلوس مع صديقاتى فتعيدنى هذه النظرة الى النوم على السرير والتظاهر بالكساح !!

عمر : آآآآآخ نفسى الضيوف دول يمشوا علشان أنام شوية ...

والبيت محتاج فليبينية علشان يرجع لحالته الطبيعية وطبعا علشان حماتى هى اللى ح ترتب البيت ما ينفعش أطنش ولازم أساعدها دى مش سارة علشان أسيبها تعمل كل حاجة وأنا سلطان زمانى !!

لا والمشكلة كمان ان بعد حملة الترتيب القاتلة لن أستطيع النوم فى غرفة النوم كالمعتاد .....
يكفينى سهرة امبارح والحفلة اللى كان نجمها الأوحد الأستاذ يحيى
من سيمفونية صراخ متواصل حتى الفجر وعزف منفرد من بكاء سارة لفشلها فى اسكاته .......
وكنت أنا المتفرج الوحيد فى هذه الحفلة وحاولت المساعدة ولكنى فشلت بالطبع فأخذت البطانية وسلمت أمرى لله ونمت فى الصالون !!!

طيب أنا فى أجازة حاليا حتى الاسبوع القادم عندما أبدأ العمل فى الشركة الجديدة .....
ودول ناس لازم أكون فايق جدا معاهم ح أعمل ايه فى الحفلات المسائية للأستاذ ؟
ربنا يستر ....

سارة : آآآه أخيرا الضيوف مشيوا خلاص ...نفسى أنام ...
أنا بقيت باعتبر النوم ده حاجة كده زى الحلم العربى !!

البيه طول النهار نايم وطول الليل صاحى مش فاهمة ليه ؟!!
بجد بأبقى خلاص حأرمى نفسى من البلكونة علشان ينام وبرضه مفيش فايدة ...

وطبعا عمر مش عارفة أصلا أشوفه من ساعة الولادة على طول مطرود من الأودة .....
ياربى كل الأمهات بيتعذبوا العذاب ده ؟
طيب والأم اللى بتصحى بدرى علشان شغلها بتعمل ايه ؟

آآآآه الحفلة ابتدت جاية يا يحيى باشا !!!!


يتــــــــبع ،،،،



Dr.M.Hegazy

[E.Raafat]

دي ضريبة النجاح ,,,, متابع معاك يادوك ,,,,,,,,,,,,,,