بسم الله
فى كلمتين فى نفسى لازم اقولهم عشان الانتخابات
فى ناس مش هيعجبها الكلام بس انا لازم اقوله عشان ضميرى يستريح
مفيش حد يقولى ما تحاوليش تقنعينا احنا حرين فى راينا
ازاى يعنى؟؟
هو اللى انت هتختاره ده يبقى رئيسك لوحدك مثلا ولا كلنا هنتدبس فيه
كل واحد ناوى تنتخب شفيق
نفسى اساله
هو انت مش عايش فى اللى احنا فيه؟؟
انت متعرفش حد كان بيتاخد من بيته فى عز الليل عشان كلمة قالها؟؟
متعرفش حد قضى سنين من عمره فى المعتقل من غير اى سبب؟؟
متعرفش ان البطالة مالية البلد وان الشباب مش لاقى يتجوز؟؟ وان الجرايم زادت بسب المستوى الاقتصادى اللى احنا عايشين فيه؟؟
ما سمعتش عن العشوائيات؟؟ وولاد الشوارع؟؟
عجباك المرتبات اللى الناس بتاخدها؟؟
راضىى ان بلدك بتتنهب قدام عينيك؟؟
انت ما سمعتش ان قطر الصعيد؟ والعبارة اللى غرقت؟؟ واهل الدويقة؟؟ و........
عجباك الرشاوى والواسطة؟؟
نفسى اعرف انت شفت ايه من عهد مبارك يخليك عاوز ترجعه تانى؟؟؟؟؟؟
مسمعتش عن التعذيب اللى كانوا بيتعذبوه؟؟ والناس اللى ماتت؟؟ والنساء اللى اعراضها انتهكت؟؟
فين نخوتك وكرامتك؟؟
ومفيش حد يضحك على نفسه ويقول ان شفيق مختلف
يا ترى بقى سيادته لو كان مختلف كان مبارك وثق فيه وجابه رئيس وزراء له فى اصعب وقت فى مصر؟؟
واحد مبارك وثق فيه فى الوقت ده
يا ترى هو ايه؟؟؟؟؟؟؟؟؟؟
وبلاش حجج فاضية عشان هيرجع الامن
امن ايه؟؟
هو اللى هيقضى على البلطجية فى يوم مش مكن يرجعهم فى يوم برده؟؟
امن ايه تحت الذل والقهر؟؟
عاوزين الامن اللى كان فى عهد مبارك؟؟
وما تقوليش احسن من الاخوان
والله انا مش مصدقة
يعنى لما ربنا يسالك عن اختيارك
ليه اخترت واحد فاسد وانت عارف كده كويس وما اخترتش واحد انت واثق انه لا قاتل ولا فاسد ولا حرامى
هتقوله ايه؟؟؟؟؟؟؟؟؟؟؟
.............
انا مش هطول ..بس بجد مش عارفة اللى هينتخب شفيق هينام مرتاح الضمير ازاى
اما الناس اللى ناوية تقاطع
فبعد كده لما تكون ماشى فى الشارع وظابط يوقفك يشتمك من غير سبب افتكر انك قاطعت وما شغلتش عقلك انك تختار افضل الموجودين
وابقى اتبسط ساعتها بفكرك العالى وثقافتك الواسعة اللى خلتك تقاطع
الانتخابات عاوزين يزوروها ..اكيد
بس حضرتك لما تقاطع هتسهل عليهم المهمة
...........
اخر حاجة حابة اقولها
بعد اقل من 40 يوم من الامومة
وبعد حبى لابنى فى الايام القليلة دى
بقول لكل واحد هينتخب شفيق
خاف من دعوة امهات الشهداء(كما نحسبهم)
اللى شافت ابنها بيكبر قدام عينيها
وعشان نزل يقول للظلم لا
اتقتل فى موقعة الجمل ساعة ما كان شفيق رئيس الوزراء
الجمال اللى سيادته قال انها كانت رايحة ترقص فى التحرير
فى استفزاز واضح واستخفاف بعقولنا
دعوة المظلوم مستجابة
وانت لما تختار واحد وانت عارف انه ظالم تبقى بتعين ظالم انه يظلم
هل تستطيع ان تلقى الله وانت من اعوان الظالمين؟؟؟
ومفيش حد يقول الاختلاف فى الراى لا يفسد للود قضية
الاختلاف المرة مش هيفسد الود بس ..ده هيفسد البلد ومستقبلنا ومستقبل ولادنا
................
اللهم دبر لنا فاننا لا نحسن التدبير