مشاهدة نتائج الإستطلاع: مواصافات الكتاب الجامعى المثالى

المصوتون
26. أنت لم تصوت في هذا الإستطلاع
  • أرى ان يستبدل الكتاب الجامعى بمرجع عالمى معتمد او كتاب مرجعى بترقيم عالمى

    6 23.08%
  • أن يتضمن الكتاب جزء خاص بالباوربوينت الخاص بالمحاضرات

    18 69.23%
  • أن يتضمن الكتاب العديد من الإيضاحات الشارحة و الصور و الرسوم و الجداول المقارنة

    23 88.46%
  • أن يكون الكتاب مبوبا و مفهرسا بعناية بأرقام الصفحات و المواضيع و المصطلحات

    24 92.31%
  • أن يتضمن الكتاب ملحق خاص بالمصطلحات الخاصة بالمادة و تعريفها مختصرا.

    22 84.62%
  • أن يتضمن الكتاب أسئلة متنوعة و MCQ بعد كل باب للتقييم الذاتى

    24 92.31%
  • أن يتضمن الكتاب ملحق خاص بأسئلة الإمتحانات السابقة أو إمتحانات مقترحة

    20 76.92%
  • يشير الكتاب لعنواين مواضيع اضافية متعلقة بالموضوع كنوع من التعلم الذاتى له 5% من أسئلة الإمتحان

    14 53.85%
  • يستخدم الكتاب البنط و الأيقونات و الألوان لجذب اهتمام الطالب و تركيزه على نقاط او تطبيقات

    23 88.46%
  • يجب ان يشير الكتاب لبعض المواقع العلمية و الحكومية على الإنترنت للإستزادة عقب كل بابا

    15 57.69%
  • ان يترك ورقة ابيض كفاصل و لتدوين الملاحظات عقب كل باب.

    17 65.38%
  • أن يكون الكتاب الجامعى الخاص بالقسم معتمد من إدارة الكلية

    16 61.54%
  • يوجد بالكتاب إستبيان لتقييم جودته حسب معايير الجودة الخاصة بالكتب العلمية تسلم لإدارة الكلية

    15 57.69%
  • أن يشمل الكتاب سيرة ذاتية مختصرة عن عضو او اعضاء هيئة التدريس المعنيين بتدريسه

    12 46.15%
إستطلاع متعدد الإختيارات.
صفحة 1 من 3 123 الأخيرةالأخيرة
النتائج 1 إلى 10 من 21

الموضوع: كتب الصيدلة ...رأيك يهمنا

  1. #1
    عضـو هيئـة التـدريـس
    تاريخ التسجيل
    May 2007
    المشاركات
    765

    افتراضي كتب الصيدلة ...رأيك يهمنا



    ماهى مواصفات الكتاب الجامعى المثالى (المانع من الدروس)؟


    من الأسباب المؤدية الى استشراء الدروس الخصوصية و التى اشار اليها الكثير من اعزائنا الطلاب فى الإستبيان كان رداءة الكتاب (المذكرة) الجامعى (راجعوا الإستبيان أو املأوه اولا). و فى هذا تختلف النظرات. فهل يجب ان يكون الكتاب مختصر أم مرجعى؟ نوع الورق؟ الغلاف؟ الرسوم و الإيضاحات؟ كيف يتناول الموضوع؟ به اسئلة ام اسئلة و أجوبة؟ وجه و وجه (أى مطبوع على وجه واحد) ام وجهين؟ الألوان؟ السعر؟ هل هناك امثلة لكتب أو مذكرات اعجبتك فى الكلية أو الجامعة تتمنى ان تسود طريقتها. هل لابد بالتعريف فيه بالدكتور واضع المادة؟ بإختصار كيف يغنيك عن الدروس.

    استشيركم فتفضلوا بالإقتراحات
    "من لا يتقدم يتقادم .. فلا بصمة و لا أثر"

  2. #2
    Pb Elite
    تاريخ التسجيل
    Nov 2007
    المشاركات
    2,371

    افتراضي

    بسم الله الرحمن الرحيم

    اولا بحيي حضرتك يا دوك على الموضوع ...وببارك لحضرتك على الترقيه وربنا يزيدك ان شاء الله .. ويبارك فيك ..

    عموما بكونى طالب من طلاب الكليه .. فهوه موضوع الكتب دى مش غريبه علينا ..

    دى عاده فى معظمنا من المراحل السابقه ...
    وانا احب اتكلم عن نفسى فى الموضوع ده .. الكتاب الوحيد اللى زاكرت منه ومش استعنت بأى مزكره خارجيه هو كتاب الأحياء فى الثانوى و برضو كتاب الفيزياء... ولكن الكورسات اللى كنا بناخدها فى المراحل السابقه ... كان المستر بينزل مزاكرات وكده .. فأكيد كنا بنهمل كتب التربيه والتعليم (( مع العلم انها مش كويسه اساسا والمعلومات اللى فيها مش موضحه كويس )) ..

    وبالنسبه بقى لكتب الكليه .. فإحنا كطلبه اعدادى لسه مش اخدنا غير البوتانى والكيمسترى
    وبالنسبه للبوتانى فالمزاكره من الكتاب اكاد اقول انها صعبه لأن الكتاب شكله يخوف بصراحه ..


    لكن كتاب التحليليه التيرم الأول ... الجميع كان بيزاكر منه ... على م اعتقد ..مع الإستعانه بالورق الخارجى

    وارى ان ضيق الوقت والملل عند الطالب من المزاكره ..هوه اللى دفع معظمنا مش يزاكر من الكتب دى .. فالكل يريد الخلاصه دائما ... والبساطه فى عدد الورق هوه السبيل الوحيد لذلك

    مع الإستعانه ببعض الأسئله واجوبتها ,,, وبعض الصور التى تثبت الفهم وتضفى على المعلومه سرعه فهمها ...

    وبالنسبه للألوان يعنى مش مشكله خالص ..
    وبالنسبه لموضوع السعر ده ... فأنا عن نفسى اقول ان السعر ممكن يبقى وسط مابين القادرين او غير القادرين .. انا مثلا قادر انى ادفع واشترى كتبى فيه ناس تانيه مش بتعرف ... فلازم نبقى وسط ..
    ويكون فيه استثناءات لبعض الطلبه

    وانا من وجهه نظرى ان الكتاب اللى ينزله الكليه ,, مش يبقى مرجع وكتاب فى نفس الوقت ..
    انا افضل انها تنقسم لمزكره للمنهج .. ومرجع يلجأ ليه الطالب اذا احتاج فهم شيىء ..او حب انه يستزيد بشىء


    وموضوع التعريف بالدكتور واضع الماده دى ..مش فيها اى مشكله خالص ...ممكن تضاف و ممكن تتحذف عادى يعنى ..لأ ن كل دكاتره الكليه نار على علم .. وغنين عن التعريف.. ما شاء الله ..

    واللى مش عارف دكتور اكيد هيعرفه بعد كده ..

    اسف على الإطاله وتقبل مرورى يا دوك عطا الله ورأى المتواضع




    التعديل الأخير تم بواسطة Aésmaïl ; 26-02-2008 الساعة 07:51 PM

  3. #3
    Pharma Student
    تاريخ التسجيل
    Feb 2008
    المشاركات
    314

    افتراضي

    . فهل يجب ان يكون الكتاب مختصر أم مرجعى؟
    مختصر .. وحتي لو كان مرجعي فيفضل فصل الجزء المطالب بيه الطالب في بداية الكتاب مثلاً والقسم المرجعي للأستزادة بعد الجزء الخاص بما يطالب بيه الطالب عشان مش من مجرد شكل الكتاب أتخض وأضعر بالرهبة

    نوع الورق؟
    ياريت أبيض بلاش اللون الأصفر ويكون حجم الكتاب كبير من ناحية الطول زي كتب الصيدلانيات يعني بلاش الحجم الصغير بتاع العقاقير

    الغلاف؟
    الجواب بيبان من عنوانه وانا شايف مثلاً كتب الصيدلانيات ليها غلاف ورونق مميز عن بقيت الأقسام

    الرسوم و الإيضاحات؟
    الرسوم موجوده في الكتب حالياً لكن مش بشكل بارز ومنسق كفاية

    كيف يتناول الموضوع؟
    في صورة نقط واضحه زات تعداد نقطي ورقمي بارز وبلاش أسلوب السرد

    به اسئلة ام اسئلة و أجوبة؟
    أسئلة فقط ليتيح الجانب التفاعلي بين الطالب والدكتور وأسئلة واجوبه لكي يتدرب الطالب علي اسلوب الإجابه ودي نقطه مهمه ساعات الإجابه بتكون كلمه الدكتور عايز يشوفها وتحتها خطين

    وجه و وجه (أى مطبوع على وجه واحد) ام وجهين؟
    وجهين عادي مفيش مشكله


    الألوان؟
    مش ضروري

    السعر؟
    الأسعار الحاليه مناسبه

    هل هناك امثلة لكتب أو مذكرات اعجبتك فى الكلية أو الجامعة تتمنى ان تسود طريقتها؟
    الصيدلانيات التيرم الأول بتاع تانيه أعتقد أنه الأقرب للشكل المناسب عدد الصفحات قليل منسق بطريقه جيدة

    هل لابد بالتعريف فيه بالدكتور واضع المادة؟
    طبعاً لأن أنا افتخر لما أقول بيدرسني الدكتور كذا وعامل كذا وبتديني طاقه أني أحاول أبقا زيه واجتهد يمكن في يوم يكون ليا كتاب في الكليه واكتب تعريف بيا انا كمان

  4. #4
    Pharma Student
    تاريخ التسجيل
    Dec 2007
    الدولة
    مجرة درب التبانة
    المشاركات
    161

    افتراضي

    السلام عليكم
    ازيك يا دكتورنا العزيز (اسف : يا استاذ دكتورنا العزيز )
    نتمني ان حضرتك نكون بصحة كويسة

    الكتاب الجامعي هو سبب من الاسباب الكبري لأستشراء عادات سيئة بين الطلبة ادت في النهاية لفشل في المنظومة التعليمية

    بمعني انى مش فاهم حاجة من الكتاب
    أقوم احضر محاضرات و بدل ما افهم الدكتور بيقول اية أقعد اكتب اللى بيقوله
    و مع مرور الوقت هاتعب من الكتابة واحس انى مش فاهم حاجة
    أقوم اشتري ورق الدروس اللى بينزل في المكتبة
    شوية مافهمش حاجة من الورق
    اقوم أخد كورس في المادة عند الدكتور اللى كاتب الورق

    اما في الوقت الحالي معتش بأمر بالمراحل الكتير اللي في الأول و بأريح نفسي و اوفر وقتي و اروح اخد كورس في المادة و خلاص

    اما الكتاب مختصر أم مرجعى؟
    دي مشكلة للدكتور : هل ينزل مرجع لما الدكاترة برة يشوفوه يقولوا يا سلام دا الدكتور بيدرس كورس كبيييييييييير و المنهج قوي جدا
    ولا يكتب حاجة مختصرة (نوت) تقوم الطلبة تستريح و تذاكر من الكتاب
    طبعا بالنسبة لقسم زي العقاقير أختار الخيار الأول
    أما قسم الصيدلنيات اختار الخيار التانى

    و بالتالي لو حضرتك سألتني عن احسن كتاب كان عندك في السنتين اللى فاتوا؟؟
    أقول لحضرتك طبعا كتاب الدكتور الكبير الدكتور الشابوري
    نظام تنسيق سهولة في الفهم نظافة الورق (يكفي انى انا ذاكرت من الكتاب و لم أشتري ورق في المادة نهائيا و جبت في المادة الترم التانى 139 من 150)
    كتاب فارما الدكتور طارق المادة العلمية فيه جامدة لكن التنسيق في الكتاب مش موجود (كله مكتوب بخط واحد ) انا بجد ممكن انسق الكتاب لوجه الله بس الدفعات اللى جاية تستفيد
    بينما كتاب التحليلية ذاكرت منه و شلت المادة الترم الأول لأن الدكاترة مش بيشرحوا منه اساسا و لاغيين نصه (أمال الكتاب بيتباعلنا ليه من الاساس)أكيد مورد مالي للقسم

    اما اللون و الغلاف و الكلام دا فمحدش بيبص على الكلام دا

    اسئلة ام اسئلة و أجوبة؟
    لو اتعمل كدا هانرجع لمذاكرة الثانوية العامة احفظ و دش (أل يعنى احنا مش بنعمل كدا دلوقتى)

    السعر
    يا دكتور عطاالله في مادة واحدة زي الفيتو انا أشتريت كتاب المادة ب160 جنيه و رميت الكتاب
    مجموع الورق الخارجي هايكون في الترمين برضة بحوالي ال160 جنية (80لكل ترم)
    يعنى دافع 320 جنيه في شوية ورق دا غير الكورسات اللى هاتوصل ل500جنيه (بأحاول اليومين اقنع والدي أنه يختلس اي حاجة من الحكومة )
    يعنى الطالب مش بيوفر (مش بمزاجة دا غصب عنه)
    مش بأقول ماينزلش كتاب ب160جنيه بس مش حرام انى اشتريه و أرميه

    انا في صيدلنيات تانية اشتريت الكتاب ب90جنية بالعملي
    و لم اشتري أي ورقه في المادة بعد تعهد الدكتورين الفاضلين بعدم خروج الامتحان من الكتاب


    التعريف بالدكتور
    ماأظنش ان عندنا دكاترة بيكتبوا كتب (ماعدا القلة زي الدكتور الراضي و دكاترة الفارما و الصيدلنيات)
    كله من على النت و نسخ و لصق حتى انه في بعض الاحوال لا يتم قرائته (لا أعتقد ان المراجع ال500 ورقة حد بيكتبها)
    جملة قرأتها في كتاب
    ..... is not unlike Hormon.......
    يعنى اية الجملة اساسا بالعربي (هو مش مش زي الهرمونات)
    طبعا كنت اتمنى اوري حضرتك الجملة بس لأسف الكتاب اترمي بعد ماقريت الجملة
    أو جملة (للمزيد من المعلومات أنظر الرسم صفحة 653 )مع العلم ان الكتاب كله 200 صفحة ومفهوش رسم لكن اللى نسخ من الأصل ماقرأش اللى نسخه

    أو كتاب الميكرو بتاع الترم التانى (ممكن حضرتك تشوفه بنفسك)

    أمنياتي لكتاب كليه صيدلة سنة 2020
    ماأظنش ان بعد 10 سنين هايكون حصل تطور جامد
    بس على الأقل الكتاب بقى منسق جدا (خطوط باحجام مختلف و بولد و ايطالي و مخطط)
    اية المشكلة لما المعلومة المهمة يكون جنبها كلمة مهمة أو رسمة ايقونة على شكل لمبة و علامة تعجب كبيرة و و الكلمات المهمة تتكتب بخط تقيل و أول كلمة في البراجراف تكون كبيرة اية المشكلة ان الكتاب يكون شكله يفتح النفس
    بلون واحد دا كتاب جامعي (غير كتب ابتدائي اللى بيححب الأطفال في التعليم)
    الأمتحان يكون بيجي من الكتاب (أمال انا هاشتري الكتاب ليه)
    الكتاب مكتوب بخطوط واسعة علشان لو عايز أضيف معلومة
    مش عيب ان الدكتور وهو بيشرح يكون بيقول اللى في الكتاب بالنص(ماهو اللى كاتبه)
    بس المشكله انه ينزل حاجة و يشرح حاجة تانية و في الاخر يمتحنا في حاجة تالته (أبحاث مثلا)

    الكتاب يكون فيه معلومات للقراءة فقط (دي مفيدة جدا: أن والواحد فاضي يقلب في الكتاب يلاقي معلومات لذيذةتحببه في المادة) زي أن المادة السامة دي هي اللى استخدمت في اغتيال فلان الفلاني

    للأسف انا شخصية علمية بأحب التفصيل و التدقيق و التحليل لو فضلت اكتب هاقعد للصبح علشان عندي كلام كتيييير و المشكلة كبيرة
    على العموم حضرتك مشكور على الموضوع و علي سعة صدرك
    و اتمنى ان حضرتك ماتكنش بتزعل من اي نقد او اي كلام انا بقوله (أنا كنت هاعمل زي كل مرة و بعد مااكتب المشاركة ماأرسلهاش بس قررت أضحي بنفسي في سبيل الأجيال القادمة )
    السلام عليكم
    فادي محمد (ثالثة صيدلة)


  5. #5
    عضـو هيئـة التـدريـس
    تاريخ التسجيل
    May 2007
    المشاركات
    765

    افتراضي

    و عليكم السلام و رحمة الله. شكرا يا د. XFady على المشاركة الإيجابية و لو كان فيها بعض التعبيرات الصارمة. عموما هذا مانحتاجة تماما و هو ان يكون الطالب اكثر تفاعلا فى المنظومة النعليمية و الإجتماعية و إلا كيف يكون التطوير و التغيير. مؤمن انا بذلك. هناك مشكلة خفية فى لاوعى كثير من الطلبة الا و هى عدم جدوى الإخلاص فى تحصيل المعلومة. يظهر ذلك من خلال بعض المظاهر الواضحة مثل الإنتقائية فى المذاكرة و الإستسهال فى كيفية التحصيل و كذلك العاطفية فى الإستدلال و الحكم و التنفيذ. هذا الموضوع الذى نتناقش فيه يعرفنا بعض من اطروحات الطلاب فى امور تتصل بدراسته مباشرة. و لكن عندما نرى ان خريج الصيدلة ليس له القدرة على التواصل العلمى و المهنى (الا بالتدريب التخصصى و تحت ضغط الحاجة) مع زميله الطبيب فى المستشفى او العيادة او حتى فى مصلحة تجمعهما (مثل الطب الشرعى) او نرى انه قد ترك المجال للعطارين (مع انه يمكن ان يدير مخزن اعشاب متخصص بحكم قانون مزاولة المهنة) فقد اصبح الموضوع هنا لايرتكز فقط على مشكلة الكتاب الجامعى برغم اهميته بقدر ارتكازة على من اى زاوية ينظر اليها الطالب لينجح و ينجح فقط. المشكلة اصبحت فى بعض جوانبها هى كيفية التحصيل اهو من الكتاب ام من المحاضرة ام من المكتبه ام من المناقشة و التواصل مع الاساتذه (البعد الغائب من ذهن معظم الطلاب) ام من كل ما تقدم. استفدت كثيرا مما شاركت به و ارى انها مع مشاركات الاخرين يمكن ان تساهم فى التطوير الى الأفضل فيما يتصل بأمر الكتاب او كثير مما يتعلق بالعملية التعليميه.
    "من لا يتقدم يتقادم .. فلا بصمة و لا أثر"

  6. #6

    افتراضي

    اتمنى ان اللى نذاكر منه ورق مكتوب بخط ايد الدكتور ينزله للطلبه ..

  7. #7
    Pharma Student
    تاريخ التسجيل
    May 2007
    الدولة
    في ضميري
    المشاركات
    1,139

    افتراضي

    شكرا يا دكتور علي الموضوع
    وانا رأيي زي رأي Gohary انا شايفه ان خط اليد بيخليني اذاكر احسن
    كمان انا بقترح حاجه
    دور الدكتور في الكليه مش انه يدخل المحاضره ويقعد يشرح
    انا طلبه جامعه يعني الدكتور يقول اقرؤا كذا وكذا والطلبه تقرأ وبعدين بدل ما الدكتور يشرح يكون حلقه للنقاش لتأكيد المعلومات
    انما بالشكل ده بصراحه المحاضره بتبقي ممله
    عشان اقعد مثلا من الساعه 8 صباحا للساعه 1 اسمع لمجموعه من الدكاتره بدون اي تغيير
    جايز الماده العلميه بتتغير بس مع مرور الايام اكيد بيحصل الملل
    عموما يا ريت نقدر ظروف كل الطلبه مش ناخد الطريقه اللي بتريح بعضهم ونتعب الباقي
    يا ريت نعتد بالوسطيه
    تحياتي
    التعديل الأخير تم بواسطة آيه محمد ; 18-07-2008 الساعة 11:33 PM

  8. #8
    Pharma Student
    تاريخ التسجيل
    Sep 2008
    المشاركات
    590

    افتراضي

    انا شخصيا كل الى محتاجه فى الكتاب

    حجم الخط يكون مناسب
    الورق ابيض وخامته كويسه
    الطباعه تكون نظيفه وواضحه
    الشرح باسلوب متسلسل بعيدا عن الحشو والتعقيد
    ________________________
    وده اضعف الايمان
    واعتقد انه مقبول وفى المتناول
    __________________________
    لكن علشان الكتاب يبقى مجله
    الوان وكلام من ده
    خلينا نكون واقعيين
    مش هيحصل
    ________________________

  9. #9

    افتراضي



    اشكر حضرتكم علي تواجدك الدائم معنا

    وعلي أسلوبك الفريد في التعامل مع الطلبة


    فهل يجب ان يكون الكتاب مختصر أم مرجعى؟


    مش هتفرق المهم يكون باسلوب سلس مفهوم

    وأنا بقترح

    عمل ملزمات

    كل ملزمة تكون فيها محاضرة أو اتنين

    وده عشان يبقي فيه تجديد كل سنة عن اللي قبلها

    وكمان تكون بنفس أسلوب الدكتور في المحاضرة

    نوع الورق؟ الغلاف؟


    مش هقول ورق فاخر بس يكون متوسط الجودة

    والغلاف يا ريت يكون فيه اهتمام بتصميمه

    الرسوم و الإيضاحات؟

    يا ريت الكتاب يبقي مليااااااااان رسومات

    كما يقول المثل "صورة تغني عن ألف كلمة"

    كيف يتناول الموضوع؟
    بطريقة سلسلة وشيقة تحبب الطالب في الكتاب

    به اسئلة ام اسئلة و أجوبة؟
    اسئلة واجوبة

    ولا مانع من الأسئلة الغير المحلولة التي يتم مناقشتها مع الدكتور في المحاضرات

    وجه و وجه (أى مطبوع على وجه واحد) ام وجهين؟
    مش هتفرق بس لو كانت علي الوجهين يبقي فيه مساحات عشان نزود ملحوظات


    الألوان؟
    يا ريت تكون بلون آخر مع اللون الأسود (مثلا اسود وأحمر)



    السعر؟
    يكون معقول مش غالي ولا رخيص


    هل هناك امثلة لكتب أو مذكرات اعجبتك فى الكلية
    كتب الصيدلانيات خصوصا جزء الدكتور الشابوري (غالبا بتبقي مطبعة اسمها بلال Belal Press

    وهي اللي بتطبع كتب هندسة )

    أو الجامعة
    كتب هندسة وطب بتعجبني أوي


    هل لابد بالتعريف فيه بالدكتور واضع المادة؟
    اكيد طبعا لابد من وضع تعريف بالدكتور وC.V كمان


    بإختصار كيف يغنيك عن الدروس.
    المشكلة مش في الكتب بس المشكلة في طريقة الشرح بتاعت الدكتور وطريقة وضع الامتحانات

  10. #10
    مسئول الجمعية العلمية
    تاريخ التسجيل
    Nov 2007
    المشاركات
    1,173

    افتراضي

    السلام عليكم ورحمة الله وبركاته

    أنا حابب أقترح اقتراح
    أولا لازم الكتاب يكون مرجعى وبشكل وافى وكافى للطالب وده علشان يقدر يلم القدر المناسب من المعلومات اللى تقدر تفيد
    بس ده مينفعش طبعا لطالب عايز يذاكر مثلا أو بيستعد لامتحان

    والحل

    انه يكون فى ملحق صغير للكتاب "المرجع" مكتوب بشكل واضح ومريح لعين الطالب وبيحتوى ع ما يطلب من الطالب فى الامتحان وما يشرحه الدكتور فى المحاضرة بشكل ملخص يسهل مذاكرته وفهمه

    فالكتاب المرجع له وظيفته و الملحق له وظيفته حتى لا نضر المحتوى العلمى ونفيد الطالب فى نفس الوقت

صفحة 1 من 3 123 الأخيرةالأخيرة

المواضيع المتشابهه

  1. رأيك ايه في فصل السكاشن ؟؟؟؟؟؟؟
    بواسطة Ramy Saad في المنتدى منتدى المناقشات
    مشاركات: 77
    آخر مشاركة: 09-01-2012, 08:35 PM
  2. ايه رأيك فى اللى انت عملته فى نفسك؟ (رأيك مهم)
    بواسطة a_elkamhawy في المنتدى المنتـدى العـام
    مشاركات: 9
    آخر مشاركة: 01-08-2009, 01:10 AM
  3. ...رأيك يهمنا...
    بواسطة same7 في المنتدى الفرقة الاولى 2009
    مشاركات: 4
    آخر مشاركة: 07-07-2009, 03:06 AM
  4. رأيك يهمنا فى استبيان الأداء التدريسى
    بواسطة Dr. Atallah F. Ahmed في المنتدى التطوير المستمر لكليات الصيدلة
    مشاركات: 6
    آخر مشاركة: 18-05-2009, 09:57 AM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •