Hibiscus sabdariffa infusion as a natural acid- base indicator

[pharmacistina]

خاطرة علمية تجريبية

السلام عليكم ورحمة الله وبركاته


بسم الله و الصلاة و السلام على رسول الله ..

عنوان الموضوع دة , كان عنوان كتبته في أوراقي الخاصة من سنة أو أكتر ..


أصلي كنت بحب عملي الكيمياء التحليلية و الطبية ..



فساعات الواحد بيحب يتسلى في البيت و خصوصا لما يبقى فاضي و مش لاقي شيء يعمله في الأجازة ..


أنا بحب الكركديه أوي يا جماعة .. بشربه على طول


كلنا لاحظنا قبل كدة ان الكركديه اللي لونه أحمر , لو فتحنا عليه الحنفية ( نغسل الكباية ) اللون بيتغير الى أزرق ..

أصل الواحد بعد لما يشرب بيبقى سايب شوية كركديه يعني المفروض , هما دول سبب اللون الأزرق


زمان و احنا في سنة أولى صيدلة بتهيألي درسونا في العقاقير نبات الكركديه Hibiscus

كانوا بيقولوا It is the dried calyx and epicalyx of Hibiscus sabdariffa مش فاكرة اسم العائلة كان ايه ..

المهم قالولنا انه بيتحول الى اللون الأزرق عند اضافة الماء .. عند اضافة الماء .. عند اضافة الماء

غير صحيح ,

أنا قلت في عقل بالي هل يمكن استخدام الكركديه ككاشف عن الماء في أي حاجة , مادام هو بيغير لونه في وجود الماء ..

جربت أحط ماء مقطر من بتاع اللي بنحل بيه المضاد الحيوي الشراب Purified water اللي الكيس بربع جنيه

حطيت كيس ماء مقطر على شوية كركديه فضل لونه أحمر ,

أحط كمان كيس مفيش .. still red

أحط كمان ..

الكلام دة كان في معمل الصيدلية ..

طبعا اللي شغالين في الصيدلية مبتسمين و أكيد بيقولوا في عقل بالهم ( لا حول ولا قوة الا بالله )


الفكرة مش فكرة اضافة ماء .. لأن الماء المتعادل neutral purified water لم يتسبب في تغيير لون


ولكن الخلاصة المائية للكركديه يتغير لونها بتغير تركيز البروتونات في المحلول .. يعني حسب درجة حموضة أو قاعدية المحلول ..


جبت بقى بيكربونات صوديوم م المطبخ علشان نكمل اللعبة .. أنا ما بصدق ألاقي حاجة أضيع فيها وقت

البيكربونات بتتحط على الطعمية علشان تخليها مقرمشة من برا و طرية و لذيذة من جوا ..

و الخل هو الحاجة المتوافرة في المطبخ و تعتبر حمض Acetic acid

قعدت بقى أعمل titration للصبح ..

Acid - base titration using hibiscus sabdariffa infusion as indiator

طبعا أنا معرفش تركيز الخل ولا تركيزات محلول البيكربونات اللي انا قاعدة بعملها .. لأني دوبت معلقة بيكربونات في دورق ماية و خلاص

بس باستخدام الماصات الـ Bulb ..

جبت عشرة ملل خل و سميت دة التركيز X

و جبت في أنبوبة اختبار تانية عشرة ملل خل آخرين و حطيت عليهم عشرة ملل ماء مقطر و خلطتهم و رجعت سحبت منهم عشرة ملل .. و سميت دة التركيز 1/2 X

و هكذا عملت تركيزات كتير ليها علاقة ببعضها لكن مش مهم تركيزها لأن انا معرفش دقة التركيز المكتوب على زجاجة الخل دة مش مزبوط أوي أكيد ..

عملت المعايرة باستخدام محلول البيكربونات ..

كنت بعتبر الـ End point هي اللون الأزرق .. بس الأصح طبعا ان الـ E.p هي اللون البنفسجي الجميل الواضح اللي أنا شفته .. بس الواحد كانن لسة بيجرب يعني


سجلت نتائج طلعتلي ..

جيت أحلى خطوة بقى كانت الرسم البياني للنتائج..

علاقة بيانية بين التركيز و الـ E.p ..

حاجة كدة زي الـ Titration curve

و الله كنت برسم بأمانة .. مش هضحك على نفسي يعني ..

بس طلع لي بقى خط مستقيم ايه .. اتبسطت أوي

( نقطة واحدة اللي كانت شاذة عن الخط المستقيم ) قلت مش مشكلة أكيد المعايرة دي كانت غلط ..



الكلام دة كان و أنا في سنة ثالثة صيدلة ..

السنة دي و أنا في سنة رابعة , قلت أجرب حاجات أكبر شوية ع الموضوع دة ..

حطيت Sulphuric acid .. ماية نار من اللي بننظف بيها في البيت ..

اللون بتاع الكركديه فضل أحمر بل و ازدادت شدته أكتر من الأول كمان ..

جيت حطيت صودا كاوية NaOH .. بتنشرى من العطار و برده لها استخدام في الأغراض المنزلية ..


الصودا الكاوية بقى أتتني بكل ما هو جديد ..

كمية قليلة من الصودا الكاوية مع محلول الكركديه تعطي لون أخضر ..

لذا زودنا كمية الصودا الكاوية يتحول لون المحلول الى اللون الأصفر ..


الله ع الحاجات دي .. كنت مبسوطة أوي الحقيقة .. وبعدين رجع ضميري أنبني اني ضيعت وقت كتير و كان المفروض أذاكر أحسن ..


المهم ..

الاستنتاجات Conclusions


1- الكركديه فيه مركبات الـ Anthocyanin التي لها حساسية للحامضية أو القاعدية في المحاليل المائية

2- الكركديه لونه أحمر أصلا ( من البداية ) لأن فيه أحماض ضعيفة , على ما أعتقد فيه tartaric acid و حاجة اسمها Hibiscicic acid و بتهيألي malic acid .. مش متأكدة من أسماء الأحماض دي .. بس اللي يتذوق ورقة كركديه جافة هيلاقيها حامضة جداا أكيد فيها أحماض ضعيفة ..

3- البيكربونات NaHCO3 قاعدة ضعيفة تتسبب في تحول لون الكركديه من اللون الأحمر الى اللون الأزرق

3- الـصودا الكاوية قاعدة قوية تتسبب في تحطيم مركبات الـ Anthocyanins و تكوين مركب لونه أصفر اسمه شالكون chalcone المعلومة دي موجودة في كتاب كيمياء العقاقير بتاع د- فريد بدرية .. مهو أنا لجأت للكتاب دة علشان ألاقي فيه تفسير اللون الأصفر لأنه حيرني فترة ..

4- كلنا عارفين ان اللون الأخضر = أزرق + أصفر

اللون الأخضر هو ناتج من كمية بسيطة من الصودا مع محلول الكركديه ..

نص الكركديه اتكسر و بقى chalcone لونه أصفر و النص التاني لم يتكسر و لكن تحول من اللون الأحمر الى اللون الأزرق .. مهو الصودا الكاوية برده قاعدة التركيزات القليلة منها تغير لون محلول الكركديه الى اللون الأزرق زي البيكربونات بالضبط ..

5- حمض الكبريتيك H2SO4 دة حمض قوي .. يزيد من شدة اللون الأحمر لمحلول الكركديه ..



التسؤلات التي دارت في خاطري ..


1- هل تم استخدام محلول الكرديه في اجراء معايرة تحليلية من قبل ؟؟

2- هل يمكن أن يحل الكركديه مكان الـ Methyl orange و الـ Phenol phethalin ؟؟ أرخص بكتير منهم

3- يا ترى ما هو الـ PH range اللي بيشتغل فيه هذا الـ Hibiscus anthocyanins ؟؟

4- هل يمكن استخدام هذا الـ principle كأساس لتقييم جودة شحنة من الكركديه ..
Quality control of Hibiscus sabdariffa

على أساس انه شدة اللون تقاس بالـ spectrophotometer بعد اضافة كمية متفق عليها من حمض أو قاعدة معينة ..

لأنه كلما زاد محتوى الكركديه من الـ Anthocyanins كلما كان دة كركديه حلو ..



هي خاطرة حبيت أحكيها لكم ..

تربط بين العقاقير ( كركديه ) و التحليلية ..

لأن كل العلوم الصيدلية حلقة واحدة متصلة لا يفصلها حدود , لكن تحتاج الى تطبيق و توظيف .. و قد أمرنا الله بالتأمل و النظر فيما حولنا ..


غالبا قد تكون الفكرة مستهلكة أو مسجلة من ذي قبلو أنا لم أسمع عنها الله أعلم ..

لكن هذه الفكرة أنا عشتها و لم أقرأها تماما كما هي ..

هذة الخاطرة مقدمة من الصيدلانية \ منى

الفرقة الرابعة - كلية الصيدلة جامعة المنصورة
-----



دة التركيز العالي من الـ NaOH و اللون الأصفر بتاع الـ chalcone
-----



التركيز القليل من الـ NaOH و اللون الأخضر هو خليط من الأزرق و الأصفر

[pharmacistina]

دة اللون البنفسجي المفروض بس كان بدأ يدخل على الأزرق ..
-----



دة بقى الكركديه مع الـ H2SO4
-----







دي من أحلى الصور ..

صورة اللون الأحمر مع الأزرق في أنبوبة واحدة و بينهم اللون البنفسجي ..

دة يحصل باضافة محلول البيكربونات من بالـ dropper
-----



دي صورة عائلية للألوان جمب بعضها ..

[عبدالله عبدالرحمن]

بارك الله فيكم ..
يادكتورة
مجهود رائع
وتفكير مميز كالعادة
فى الحقيقة المشروع ده
كان فى زميلة لنا فى التدريب الصيفى مع الدكتور عطا الله
عرضت انها تقدمه لكن لم تقم به
وفعلا ظللت اتسائل بشأن امكانية استخدام
خلاصة الهيبيسكس كindicator
بس لى ملاحظة واحدة
الشغل بتاع حضرتك
منطقى ..
نوعا ما ولكنه
يميل الى ان يكونqualitative
يعنى حضرتك مقدرتيش تحددى range pH
اللى بيشتغل فيه
وكذلك لما حضرتك استخدمتى حمض وقاعدة ضعيفة
فى المعايرة اعطى لحضرتك خط مستقيم!!!
ودى حاجة غريبة جدا
لأن عادة لما بنعمل معايرة لحمض ضعيف ضد حمض قوى او العكس
فى وجود الأيندكاتور المعتادة
الcurve
لايعطى اى خط مستقيم..
ولا يعطى اىsharp E.P
لذلك
لا نقوم معايرة حمض ضعيف امام قاعدة ضعيفة ابدا.
لكن فى نفس الوقت قد يكون هذا
الامر جيد جدا
لأنه بكده سيكون الهبيسكس
مناسب لعمل هذا النوع من المعايرات
تبقى امر مهم
(هل قمتى حضرتك باستخدام مواقع المجلات العالمية للأطلاع على الأبحاث المنشورة
فى هذه الشأن
سيساعد هذا كثير فى وضع مسار استراتيجى لما ستتخذه التجربة
عند القيام بها بالشكل العلمى الدقيق)
لكى لاتضيع الجهود اللى حضرتك قمتى ببذلها
يجب عليكى ان تعملى بstandard solution
حتى تكون النتائج موثقة
وكذلك يجب القيام بعمل standardization for indicator
لكى نستطيع تحديد التغير فى اللون وrange pH
الخاص بكل لون على حدة
الأمر الأخير هو ان خضرتك ان الأنثوسيانين
بتتكسر للشلكون فى وجود القواعد القوية
هل هذا يعنى ان الأنديكاتور لن يكون صالحا
للأستخدام فى الpH
العالية
!!
لكن فى النهاية اعتقد ان ما قمت به من بحث
يعتبر بداية طيبة لبدء بحث اكثر تنظيما واكثر دقة
ربما يكون نواة بحث صيفى قادم
!!
جزاكم الله خير
على مشاركتنا
هذه الخاطرة الطيبة

[pharmacistina]

فى الحقيقة المشروع ده
كان فى زميلة لنا فى التدريب الصيفى مع الدكتور عطا الله
عرضت انها تقدمه لكن لم تقم به
وفعلا ظللت اتسائل بشأن امكانية استخدام
خلاصة الهيبيسكس كindicator

أضحكتني هذه العبارة ..

لأن الطالبة دي هي أنا

و هذا مشروعي
-----

(هل قمتى حضرتك باستخدام مواقع المجلات العالمية للأطلاع على الأبحاث المنشورة
فى هذه الشأن
سيساعد هذا كثير فى وضع مسار استراتيجى لما ستتخذه التجربة
عند القيام بها بالشكل العلمى الدقيق)

حاولت أبحث في GOOGLEPATENT

لكن كثرة النتائج صدعتني فلم أصمد في البحث ..

هي حقيقة علمية عرفتها و عجبتني نفسي أعمل الكلام دة للـ MO و الـ PhPh قصاد الـ Hibiscus

تفتكروا الموضوع حلو يعني يستاهل ؟؟

[dr/noony]

الموضوع جميل يامنى والله ما شاء
واكيد يستاهل بس المهم المصابرة والاصرار و التوجيه السليم
يعنى اعتقد عشان توصلى لنتائج لازم تدرسى ماستر
لان الدراسة بتفرق كتير وبتفتح معلومات وطرق جديدة فى البحث

حاولت أبحث في Googlepatent

لكن كثرة النتائج صدعتني فلم أصمد في البحث ..

اى بحث طبعا بيبقى مرهق ومتعب جدااااااااا( اتهرينا السنة دى
كنت بدخل على مواقع افضل اقرأ وفى الاخر كنت ممكن اطلع بسطر ولا جملة من المقالة )
لكن فى ناس بتقضى عمرها كله سعيا لتحقيق نظرية وممكن يوصل اولا بس
يكفيه شرف المحاولة ويمكن يكون ده دوره ويجى حد بعده يكمل

ربنا معاكى يامنى يارب ويزيدك كمان وكمان

[pharmacistina]

بس الـ Curve فعلا كان خط مستقيم !!

بجد مش خيالات

أنا أصلا سجلت النتائج قبل ما أشتري ورقة رسم بياني أصلا لاستبعاد العامل النفسي ان أنا اللي أطلع curve بمزاجي


المشكلة الواحد عنده امتحانات اليومين دول

هااانت ان شاء الله

شكرا يا نها و د- عبد الله

[Messi]

ده كلام كبير قوي
ربنا يوفقك د.pharmacistina

[عبدالله عبدالرحمن]

these two papers

here

here
are
good enough to start a promising research
however,
some results are completely inconsistent
with your conclusion
especially in weak acid-weak base titration
i think you should revise your work again

but i think it is interesting research

and it is good chance to remember and apply theories of
analytical chem.

good luck<>

[AbU ElKhAiR-Let`s Go]

بصراحه أنا مبسوط جدا جدا جدا جدا
لأنى متأكد 100% أن مشوار الألف ميل يبدأ بخطوه
بجد الطموح جميل أوى
ربنا يوفقك يا دكتوره/ pharmacistina

Goooooooooooooooooo On

[dr.muslima]

ماشاء الله جميل جدا تفكير حضرتك

والاجمل ان حضرتك حاولتي والتجربة ممتعة جدا وامتعتينا واحنا بنقراها

تفتكروا الموضوع حلو يعني يستاهل ؟؟
اكيد طبعا الموضوع يستاهل
صحيح في حاجات مكتوبة ما فهمتهاش لاني لسه ما اخدتهاش بس بجد التجربة ممتعة جدا وعجباني اوي
ربنا يبارك في حضرتك وتقدري توصلي لنتايج مظبوطة