نصائح مطبخية للبنات وبس !!!!(part2)

[dr/lool]

هكمل معاكم يا بنوتاتي النصائح::

المشكلة الرابعة
البطاطس مش مقرمشة

أوقات تانية كتير نفسك تروح على طبق بطاطس مقرمشة ولذيذة ولكن بعد ما تقلي البطاطس وتطلعيها من الزيت تلاقيها طرية وعاملة زي الفطير...
وعلشان تتخلصي من المشكلة دي وتحصلي على البطاطس المقرمشة اللذيذة يبقي يا ريت بعد ما تقشري البطاطس وتغسليها وتقطعيها تنقعيها في ميه مضاف إليها معلقتين ملح ومعلقتين خل وسيبيهم لمدة ساعة وبعد كده اقليها في زيت بس لازم في الأول تخلي الزيت يسخن كويس على النار لأنك لو قلتيها في زيت غير ساخن هتمتص الزيت وهتطلع طرية.

المشكلة الخامسة
عفن الخبز

من المشاكل اللي ممكن تقابلك مشكلة "عفن الخبز" خصوصا مع الحر الشديد اللي احنا فيه..
وعلشان تتخلصي من المشكلة دي يا ريت أول ما تجيبي العيش لو كان لسه ساخن يبقى تهويه كويس وبعد كده تحطيه في كيس نايلون ناشف وتحطيه في التلاجة، وبكده ممكن يعيش معاكي لمدة أسبوع من غير ما يحصل له أي حاجة نهائي ولما تحبي تاكليه تطلعيه وتسيبه لمدة خمس دقائق وبعد كده تسخنيه في المايكرويف أو على البوتجاز .

المشكلة السادسة
الفراخ أو اللحمة لزقت منك وأنت بتحمريها

أوقات تانية كتير لما تيجي تحمري الفراخ أو اللحمة أو حتى السمك تلاقي إنهم لزقوا في طاسة التحمير وعلشان تتغلبي على المشكلة دي يبقى يا ريت تقدحي الزيت أو السمنة كويس على النار علشان لما تيجي تحطي أي حاجة هتحمريها ما تلزقش منك.

المشكلة السابعة
الليمون ناشف

ساعات بتبقي مفكرة إن عندك ليمون في التلاجة وعلى الأساس ده بتعملي الأكل لكن تفاجئي إن الليمون اللي عندك طلع ناشف ومفيهوش ميه كتير في الوقت ده يبقى يا ريت تجيبي الليمون اللي عندك وتحطيه في كوباية ميه دافية لمدة خمس دقائق وبعد كده تاخديه وتضغطي عليه بإيدك جامد وبعد كده تعصريه

استنوني قريب

[WhiteBird]

شكرا ع المعلومات الجميله انا استفدت م الموضوع ده ..
ومنتظره منك المزيد من المعلومات الخفيفه دى..

[sosoo]

فعلا معلومات قيمة جدا شكرا ليكى

[dr_chamommile]

معلومات حلوة بجد

انا عارفة البطاطس وبعملها كده وفعلا لما تسيبيها نص ساعة او ساعة كده وتقليها بتبقي مقرمشة خالص ولذيذة
والخل كمان مفيد في حجات كتيرة جدا ومطهر كمان

مشكورة يا دكتورة

[اشراقة أمل]