ارجو المساعده

[غير مسجل]

انا اعدادي صيدله وحاسه اني تايهه ومش عارفه اذاكر حاجه او اذاكر منين؟؟؟؟؟
ارجو المساعده
انا حاسه اني هفشل في الكليه دي

[sunshine]

السلام عليكم

الاول اهلا بيكى ف الكليه

ندخل ف الجد بقى .. شيلى من دماغك فكرة الفشل دى خالص .. كلنا كنا كده ف الاول ..قعدنا اول اسبوعين تلاته تايهيين خالص ومش عارفين ولا فاهمين حاجه ف اى حاجه .. بس بالتدريج بتفهمى كل حاجه .. على فكره انا دلوقتى ف سنه رابعه و أعلى تقدير جبته فى الكليه كان ف اعدادى التيرم الاول .. يعنى ان شاء الله تقدرى تنجحى وتتفوقى عادى ..

مشكلة تذاكرى منين دى محلوله ان شاء الله .. كان نفسى اقولك ذاكرى من الكتاب بس طبعا الكليه عندها مشكله كبيره وهى ان الكتاب بيبقى بعيد كتير عن المنهج .. ونادرا لما هتلاقى دكتور مضبط كتابه مع المحاضرات ولو لقيتيه هيبقى مش منظم معلوماته ( بالضبط زى فكرة الكتاب المدرسى والملخص الخارجى ).. احنا بقى الملخص الخارجى بتاعنا هو ورق الكورسات اللى بيبقى موجود ف المكتبات .. هتلاقى اكتر من دكتور بينزل ورق ف الماده الواحده .. الحل بقى عشان تختارى تشترى ورق انهى دكتور فيه انك تحاولى على اد ما تقدرى انك تواظبى على حضور المحاضرات وتكتبى على اد ما تقدرى ورا الدكتور .. حتى لو ف اخر المحاضره لقيتى نفسك مكتبتيش غير سطرين .. بالتدريج هتفهمى اسلوب كل دكتور وتعرفى تكتبى وراه كويس .وممكن تسجلى المحاضره كمان . واول ما تخلصى محاضراتك تروحى لاى مكتبه وتجيبى ورق كل الدكاتره اللى نزلوا ف الماده دى وتسمعى المحاضره او تشوفى اللى انتى كتبتيه وتقارنيه بالورق ..وتشوفى اقرب ورق للمحاضره واللى اسلوبه حلو وبيفهمك المحاضره ..وتجيبى للدكتور ده على طول .. وتعملى كده ف كل المواد .. ممكن تلاقى صاحبتك ارتاحت لورق دكتور معين وانتى بترتاحى لورق دكتور تانى .. عادى خااالص المهم انه يكون قريب للمحاضره وخلاص ....

نيجى لوقت المذاكره بقى .. صعب انك تذاكرى ف الايام اللى بترجعى فيها من الكليه الا لو كان يوم خفيف اوى .. فحاولى تضبطيها انك تذاكرى ف يوم الريست اللى عندك والايام الخفيفه اللى ف الجدول..
العبره عندنا ف الكليه ف المذاكره هى التكرااااااااار .. يعنى تذاكرى المحاضره على مرتين كل مره تحفظى فيهم بنسبة 50 % احسن من انك تذاكرى المحاضره مره واحده بنسبة 100 % .. لانك غالبا كده كده تانى يوم هتلاقيكى ناسياها خالص .. التكرار بقى هو اللى هيثبتلك المعلومه ان شاء الله ..

اهم حاجه انك تركزى على مادتين عندك عشان دول اتقل مادتين ف التيرم الاول ف اعدادى :

1/ الكيمياء الفيزيائيه والغير عضويه ( اللى هى الكيمياء التحليليه ) : دى مادة منتهيه .. يعنى تيرم اول بس .. فلو لا قدر الله جبتى فيها درجه قليله مفيش تيرم تانى عشان تعوضى فيه .. ده غير انها ماده تقيله شويه..

2/ النبات : وده عشان هى ماده محتاجه حفظ ثم حفظ ثم حفظ .. وعلى فكره الماده دى مستمره معاكى طول الخمس سنين بتوع الكليه ..

باقى المواد طبعا مهمه بس المهم تركزى ع الاتنين دول عشان لو سبتيهم لايام الامتحانات مش هتقدرى تلمى المناهج بتاعتهم ..

والانجليزى احضرى فيه المحاضرات و علمى ف الكتاب ورا الدكتورة عشان تبقى مظبطاها عشان مبتتفتحش غير اليومين اللى قبل الامتحان

شدى حيلك كده وبلاش كلمة هفشل دى لانك طالما جبتى مجموع كبيرف ثانويه عامه ودخلتى كلية صيدله يبقى مش ممكن تبقى فاشله .. انتى ناجحه بدليل انك قدرتى تدخلى كلية الصيدله ..


بالتوفيق يارب

[كتبت موضوعين قبل كده]

انا اعدادي صيدله وحاسه اني تايهه ومش عارفه اذاكر حاجه او اذاكر منين؟؟؟؟؟
ارجو المساعده
انا حاسه اني هفشل في الكليه دي

هههههههههه نفس الاحساس و الله شكلنا احنا الاتنين محتاجين مساعده انا برده مش عارفة حاجة و حاسة انى فى دوامة مش عارفة اخرج منها و تعبانة من المشورة في الكلية لكن ان شاء الله في حد هيساعدنا احنا الاتنين قولى يارب

[ahmed kewan]

بسيطه اوي بس انتي اهدي


احنا لسه ف بداية الدراسة

نصيحتي ليكي اقعدي مع حد اكبر منك ف الكليه وهتستفيدي
والموضوع مش صعب كده متقلقيش

بالتوفيق

[EMAN EMY]

شكرا ع الرد
ربنا معانا

[dr.monalizaa]

ده احساس طبيعي

مكان جديد وجو جديد وأسلوب جديد

ركزو بس كده وباذن الله كله هيعدي

ربنا معاكو ومعانا