شكر وعرفان وتقدير للأخ الكبير لنا الدكتور محمد رضا

[Mohamed Al Gohary]

مادة النبات .. مادة النباتات الطبية .. مادة العقاقير ..

كلها مسميات لقسم واحد .. كنا نترقبه جدا ونخشى اكبر ما نخشى من امتحانه العملى .. وسكاشنه الطويله .. والـ main drug وغيره ..

لكن الحقيقه السنه دى .. الوضع اختلف تماما ..

وليه ميختلفش واحنا معانا الدكتور محمد رضا .. اللى فعلا كان اخ لينا كلنا قبل ما يكون دكتور علينا ..

متاخرش عن حد ومكتفاش بالشرح فى المدرج والمعمل .. لاجالنا هنا على المنتدى وجاوب علينا وناقشنا ورد على استفسارتنا .. وحط لنا اسئله ومتاخرش عن أى حد احتاجه فى اى حاجه فى اى وقت ..

لا وكان فيه نظام جديد كمان السنه دى .. شيت كل سكشن على اللى قبله .. صحيح كلنا اتضايقنا .. وعملنا حسابه .. لكن محدش ينكر انه فادنا كلنا .. وحسنا بقيمته الوقتى .. بدل ما كنا لسه هنفتح منهج العملى لاول مره الوقتى ..

وشغل المعمل كمان .. كان بيروح لواحد واحد تقريبا ويساعده انه يطلع كل حاجه تحت الميكروسكوب ..

ورغم ان عدد ساعات المعمل زادت ووصلت لخمس ساعات .. وكلنا خفنا من كده .. الا اننا لما كنا بنخلص شغل مكنش بيقعدنا .. وتقريبا وقت المعمل مكنش بيزيد عن 3 ساعات ..

انا شخصيا اول تيرم اشتغل كل السكاشن .. وتطلع معايا الشرايح والـ key element كلها بطريقه ممتازه .. حقيقى استمتعت جدا بسكاشن العقاقير .. وبالعمل تحت اشراف دكتور زى الدكتور محمد رضا ..

وان شاء الله الرفحه كلها تكمل بالامتحان العملى اللى هيكون سهل وحلو ان شاء الله ..

فاللهم جازه عنا كل الخير .. خير ما جازيت دكتور عن طلبته .. وزده ولا تنقصه واعطه ولا تحرمه واكرمه ولا تهتنه .. فهو يستحق كل الخير ..



جزاك الله خير يا دكتور محمد

[Sincerity]

مشكور دكتور جوهرى عل الموضوع....بجد دكتور محمد يستاهل اكتر من كده.....ماشاء الله شرحه رائع فى المدرج وكمان بيعيد لينا الشرح مره تانيه فى السكشن وكفايه الاسئله اللى بينزلها لينا على المنتدى بجد اكتر من رائعه ......والشيت اللى كل سكشن فادنا كتير اوى على الاقل عندنا خلفيه عن المنهج بدل مانكون لسه رايحين نفتح الماده لاول مره دلوقتى زيها زى باقى المواد...فعلا اول سنه السنه دى افهم العقاقير واحس انها مش عبء كبير زى باقى المواد .....

ربنا يجازيك يا دكتور محمد عنا كل خير

[Pharmcist_girl]

السلام عليكم ورحمه الله وبركاته

انا بشكر د/جوهرى على الموضوع ده اللى هيدينا فرصه نقول كلمه شكر بسيطه د/محمدرضا لا تتناسب مع مجهوده الجامد جدا ده والرائع والمتميز فى ان واحد .......................

ان كان فى المحاضره او المعمل او المنتدى

بجد شكرا لحضرتك احنا حبينا العقاقير نظرى من د/منى زغلول و عملى من د/محمد رضا اللى بيساعدنا وبيشجعنا ......................

وصدق د/جوهرى فى انه قال ان" د/محمد رضا اخ لينا قبل ما يكون دكتور علينا "....

واتمناله التوفيق والنجاح علميا و اجتماعيا ونشوفه استاذ لقسم العقاقير باذن الله

[WhiteBird]

والله قلتوا اللى كان نفسى اقوله..
د.محمد جزاك الله كل خير على الاهتمام بينا ومعاملتنا كأخوه لك بكل ماتحمله الكلمه من معنى .. ان شاء الله ربنا يوفقك ونشوفك فى اعلى الدرجات ومن تقدم لتقدم باذن الله..

[do3a2_alganna]

يا جماعة فعلا انا مش عارفة اقول يكفى اوى ان اول ماعرفنا ان السكشن 5 ساعات اتخضينا طبعا وقولنا معقول هنشتغل عقاقير 5 ساعات بس فعلا والله السنة دى العقاقير شغلها ممتع جدا والوقت بيعدى بسرعة بجد طبعا دا بفضل الدكاترة اللى عندنا فعلا مفيش كلمة شكر تديهم حقهم ربنا يجازيهم كل خير ويوفقهم جميعا.

[dr_shimaa]

جزاك الله خيرا بجد يادكتور محمد سكاشن العقاقير كانت من أجمل السكاشن السنه دى

وتقريبا كلنا كنا بنعرف نطلع الشرايح كلها وواضحة كمان.والشيتات كمان خلتنا مش خايفين من
امتحان عملى العقاقير زى باقى المواد

جزاك الله عنا كل خير وجعل كل مساعدتك لينا فى ميزان حسناتك ووفقك للخير دايما

[dr queen]

أنا بعد الكلام اللى اتقال ده مش هقدر أقول غير جزاكم الله عنا كل خير د/ محمد وكل الدكاترة اللى فى القسم بجد ،

ويكفى انى كنت خايفه اكره شغل العقاقير السنة دى او تكون اقل من قبل كده ..

لكن الحمد لله بجد كانت من احسن المواد فى شغل العملى ،
وبتبسط جدا لما الاقى اصحابى اللى كانوا بيكرهوها وكانوا ما بيعرفوش يطلعوا حاجة فى السكشن
دلوقتى ما شاء الله بيشتغلوا كويس ومستمتعين بالمادة جدا
او على الاقل مش كارهينها ..


فجزاكـــــــــــم الله عنا كل خير جميعــــــــــا ..

[monosh]

ألف كلمة شكر مش كفاية.

لكل الناس اللى بتتعب معانا وبتساعدنا وبيحسوا بالمعاناة اللى احنا فيها.....


ربنا يجازيهم عنا كل خير ديما يارب ويجعلها فى ميزان حسناتهم ان شاء الله.

[pinky]

انا بضم صوتى لصوت دكتور جوهرى
وفعلا بنشكر دكتور محمد رضا جزيييييييييييييييييييييييييييييييييل الشكر
جزاه الله عنا كل خير

[سامح هادى]

فعلا ألف شكر لدكتور محمد رضا اللى أكيد مجهوداته ساهمت فى تخفيف عبء كبير عننا
وكمان أحب أشكر دكتورة ولاء كامل على مجهودتها الطيبة فى عرض المنهج بطريقة شيقة
وعلى معلوماتها الجميلة اللى بتقولها فى السكشن
فى الحقيقة قسم العقاقير السنة دى حاجة تانية
مستوى مختلف وطريقة تعامل راقية
فعلا يستحق كل الشكر والثناء من أولالعاملين
لحد رئيس القسم
وأتمنى من الله ان يديم هذا التفوق ويبارك خطاه

الف شكر تانى