خطاب شديد اللـهجة للبنوتات الرقيقات

[Dr.A7med]

أنا فرحان جدا من موقف دكتور عطا الله النهاردة
بصراحة الأساذ المحترم حس بمعاناتنا إحنا الولاد
واتكلم عن حجز الأماكن
ويا رب يكون كلامه وصل للقوارير عشان أنا كنت بعييييييييييد في آخر المدرج

[محمد سمير]

هو موضوع الحجز ده بجد يضايق

ما فيش مانع تحجز لواحد او اتنين لكن تحجز بنش كامل

طبعا ما ينفعش

احنا عموما اتعودنا ان احنا نقعد فى ربع الجنب الشمال اللى ورا وباقى المدرج للبنات فقط


ما شاء الله معظم البنات امواس ما بيفوتوش محاضره (مش بحسد انا قلت ما شاء الله)

ههههههههه

[Anas]

أنا كلمت سيادة العميد النهاردة في الحكاية دي

و قاللي انه ان شاء الله هيشوف حل قريبا للموضوع ده

أنا مليش دعوة ... مبشوفش و انا قاعد ورا

[queen]

فعلا والله حكاية الحجز دى بقت حاجة تغيظ
يعنى انا جاية النهردة الساعة 8.30 ولقيت كل اللى قدام محجوز قعدت ورا وكان فى دوشة والجو كان حر
وحتى شفت موقف من يومين وضايقنى
كان فى ولاد قاعدين فى البنش التانى فقامو خرجو لان المحاضرة بدات متأخر فلقيت بنات شالو الكتب بتاعتهم وقعدو انا والله زعلت جدا وكنت هتخانق معاهم وبعدين الولاد جم وخدوا كتبهم ورجعو ورا
بس ان شاء الله بعد ككدة زى ما دكتور عطا الله قال فى المحاضرة النهردة لو لقيت مكان محجوز هقعد فيه واللى يحصل يحصل
والمصيبة ان ممكن الناس اللى محجوز ليها مكان ميجوش اول محاضرة واحنا نقعد ورا
والغريب فى كدة بقى النهردة لقيت ناس محجوز ليها مكانين
بجد بقت حاجة مش لاقية كلمة اوصفها بيها غير زى ما دكتور عطا الله قال النهردة ان دى قله احترام

[thelovertiger]

انا حاسس ان احنا فى الكليه دى هيجلنا يوم والبنات هتبلعنا

[pharmacistina]

هو انتم عندكم حق و الله ..

الكترة نست البنات انها بنات برده ..

بيحصل قدام لجان الشفوي مزاحمات و دة شيء غير لائق ..

المفروض الشباب لهم نص المدرج بالطول .. يعني لهم بنشات قدام و بنشات ورا في المدرج ..

مينفعش البنات تقعد قدام تماما و الشباب ورا خالص ..

الدكتور المفروض يقول في المحاضرة و ينبه على الموضوع دة ..

و البنات قدام الشفوي المفروض نراعي شوية الأمور , صحيح احنا بنعتبر الزملاء اخواننا لكن برده ميصحش الزحمة , علشان ايه يعني !! كام دقيقة ..

[amir2010]

انا حاسس ان احنا فى الكليه دى هيجلنا يوم والبنات هتبلعنا

انا كنت ارجو ان الموضوع ده يتحل من قبل البنات لان مفيش حد هيحترمنا لو محترمناش بعضنا البعض وحافظنا علي بعض
وربنا يوفق الجميع ويدي كل واحد علي قد نيته

[monosh]

يا جماعة والله ...احنا كمان بنات وبنروح المدرج بدرى أو متأخر ومش بنلاقى مكان.

وبيكون الحل ...الكراسى.

دا إذا لقيناها......ياريت بجد نحترم مشاعر بعض أكتر من كده.

عيب قوى نبقى دفعة واحدة (يعنى أخوات)...وبينا مشاكل كده.


ربنا يهدى الحال....ويوفقنا جميعا ان شاء الله.

[lovely princess]

ربنا معاكم يارب ..
بجد دمي بيتحرق جدا لما بسمع الموضوع ده
البنات مبقوش يراعوا انهم بنات و موضوع الحجر ده فعلاً مستفز ..

المفروض إن المدرج يتقسم نصين بالطول فعلا و اي ولد جه قعد ف النص بتاعه محدش يلومه لأنه ليه الحق يستفيد من المحاضرة زي اي بنت ...

راعوا بعض يا جماعة و اي بنت تقول للتانية احجزيلي ..المفروض بشكل لائق تعتذرلها و تقولها لو عايزة تحضر المحاضرة تطلع ف الوقت ..لو اتأخرت تقعد ورا ..

نحاول يا بنات على قد ما نقدر نوفر لغيرنا الراحة و الاستفادة من المحاضرة سواء لطالب او طالبة

[5ald m7md]

السلام عليكم
أنا شايف إن الموضوع مش موضوع بنات و إولاد ( طبعا دا مينفيش إني مش مبسوط من إللي البنات بتعملة و كمان مش مبسوط من سلبية الولاد ) بس الموضوع موضوع إننا بجد مش منظمين و دي بقت حاجة .......... لو أي حد بحسبة بسيطة عد الناس إللي في المدرج هيلاقيهم أكتر من 600 و دا خصوصا في المجموعة أ علشان ( كل الناس مش عارف لية بتحضر فيها ) و مش بتلتزم بمعادها و دا طبعا من البنات أكتر جدا جدا من الولاد إللي معظمهم أساسا مبيحضروش .
طب لية يا بنات لية يا إخواتنا بتعملو فينا كدا و في نفسكو كمان المدرج يزهق و الجو حر و الواحد بيبقي قاعد علي عينه إية إللي هيحصلكو لو كل واحدة حضرت في مجموعتها ولا لازم تجيب بنت خالتها و صاحبتها معاها علشان لو حضرت لوحدها هتتخطف ( طبعا أنا أسف علي طريقة الكلام ) بس الموضوع دا بقي سخيف جدا و مضايقني شخصيا لإن المفروض خلاص إننا كبار ..... فعلا مصريين