النتائج 1 إلى 2 من 2

الموضوع: الظباط المتخصصين

  1. #1
    Pharma Student
    تاريخ التسجيل
    Jul 2007
    الدولة
    Mansoura
    المشاركات
    149

    افتراضي الظباط المتخصصين

    بسم الله الرحمن الرحيم

    كتير نسمع عن الظباط المتخصصين لكن منعرفش عنها معلومات بالتفصيل وانا كنت كدا بردو
    ببساطة شديدة فيه نوعين :
    1 – ضابط / ضابطة ( متخصص/ متخصصة ) شرطة
    2 – ضابط متخصص حربية ( معرفش بيطلبو اناث ولا لأ بس اعتقد نهم بيطلبو عادي )
    أنا هتكلم عن تجربتي أنا بالتفصيل وهيا الشرطة باذن الله للتخصص يتاعنا كصيدلة
    نبدأ الأول نعرف ايه الي احنا محتاجينه علشان نقدم فحاجة زي دي :
    1 – التقدير ودا بيختلف من سنة لسنة وحسب احتياج وزارة الداخلية من كام سنة كدا كانو بيخدو مقبول لكن السنادي بداوا يخدوا من جيد بس
    2 – تجهز ورقك كالتالي : 1 –شهادة تخرجك
    2 – القيد العائلي للأب – للجد من الأب –للجد من الأم ( القيد العائلي من أصعب الأوراق الي ممكن تاخد
    وقت فياريت تكون عملها بدري قبل معاد التقديم )
    3 – صور شخصية ليك كتير هتحتجها فكل اختبار من الي هنتكلم عليهم فموضوع تاني باذن الله
    4 – براءة الذمة المالية بتجبها من أي مكتب بريد وتسيبها فاضية
    5 – 8 جند ودي بتجبها من منطقة التجنيد وتسبها فاضية دي الي أكادمية الشرطة بتراسل بيها الجيش لانك لو
    قبلت باذن الله فأكادمية الشرطة ملكش جيش
    6 – شهادة الثانوية العامة ولو كنت شهادة معادلة تجيب المعادلة من مكتب التنسيق ( هتلاقيها موجودة
    فالملف بتاعك الي موجود فالكلية هيسلمهولك بعد ما تتخرج من صيدلة باذن الله )
    7- شهادة التخرج للوالد والوالدة
    8 – صورة البطاقة بتاعتك
    9 – شهادة ميلادك ( تنويه بسيط أنت علشان تعمل قيد عائلي لازم بتكون عامل شهادة ميلاد لكل فرد من أفراد
    العائلة الي بتعملها القيد يعني لو هتعمل قيد عائلي للجد من الأب يبقى هتعمل شهادة ميلاد لجدك وزوجته الي
    هيا جدتك ولكل واحد من عمامك وطبعا شهادة ميلاد لوالدك لانه ابن جدك )
    دي أهم الأوراق الي تكون مجهزها وعامل حسابك انك هتحتاجها فالتقديم ان شاء الله


    أول لما تشوف الاعلان فالجرنال ان باب التقديم فتح ( فيه دفعة استثنائية بتبقى فشهر 5 والدفعة الأساسية الي حضرتك هتقدم فيها فشهر 8 ) بتروح التجمع الأول فالقاهرة الجديدة وهو دا مكان أكادمية الشرطة (( طبعا يكون معاك ملف حلو كدا مجهز فيه شهادة التخرج بتاعتك علشان دي الي هتدخل بيها وهتكون سبب فمعاملة كويسة ليك لو قارنتها بطلبة الثانوي )) لو حبينا نتكلم ازاي توصل هناك ببساطة شديدة تركب من أي موقف أي عربية متجهة القاهرة وتطلب من السواق ينزلك الدائري ومن الدائري هتلاقي ناس بتنده شرطة أو حربية أو جوية طبعا تركب عربية رايحة شرطة .
    تبدأ قصة كفاحك فأكادمية الشرطة من أول لما تدخل من بوابة رقم خمسة ويتم تفتيشك عليها للدخول وياريت لو تكون دكتور ناصح كدا وتظهر شهادة التخرج بتاعتك للعسكري الي واقف وهو هيتعامل معاك بشيء من الاحترام طبعا .
    أول اختبار :احنا دلوقتي رايحين أول يوم علشان نسحب الملف هتفاجأ بانهم بيقولولك اقلع هدومك بعد ما تسحب الملف علشان اختبار المقاس ( قياس عرض الصدر ميقلش عن 83 سم وقياس الطول ميقلش عن 165 سم دا بالنسبة للمتخصصين فقط ) واختبار القوام (( الي هو وزنك ودا بيكون حسب الطول طبعا ))
    ثاني اختبار :
    اختبار الطبي ودا عبارة عن كشف طبي في 10 عيادات داخل الأكادمية
    1 – معمل بياخد منك عينة دم وبول
    2 – عيادة أسنان
    3 – عيادة نفسي ودا غير الاختبار النفسي الي هتمتحنه بعد نجاحك فالطبي وبيكون فيوم تاني
    4 – عظام
    5 – رمد ( مسموح ليك الكشف بالنظارة عادي جدا )
    6 – جلدية
    7 – جراحة
    8 – باطنة
    9 – أنف وأذن
    10 – صدر
    ثالث اختبار :
    الاختبار النفسي ودا هيجيلك ورقة فيها 65 سؤال عبارة عن 60 اختياري ودول بيقسوابيهم مقدار عصبيتك وقدرتك على التحمل وحب المغامرة وفيه 5 اسألة مش عرف بيقيسوا ايه الصراحة ولكن هقول سؤال منهم / ما وجه الشبه بين الطائرة والسيارة ؟
    بعد مابتحل الأسئلة بيسحبوا الورق وبيتصحح وانت قاعد ولو ناجح هيقولولك روح لو فيه شك فحاجة هتدخل مع الدكتور يسألك شوية أسئلة متقلقش عادي ناس كتير دخلت وعدت عادي لأن مع الوقت الضيق ممكن تستعجل فاجابة سؤال ودا وارد جدا فبيحاول يتأكد من اجابتك ويستفسر انت جاوبت دي ليه كدا
    رابع اختبار :
    الاختبار الرياضي ودي أصعب مرحلة هتقبلك فالتقديم سواء كنت رياضي أو لا الموضوع كله محتاج صبر وايمان بربنا لان الاختبار بجد صعب وظروفه صعبة وهتعرف ليه دلوقتي
    الاختبار بينقسم الى 3 أقسام في نفس اليوم :
    1 – قفزة الثقة بدون درجة النجاح فيه لائق او غير لائق ( كلنا اكيد نسمع عنها ودي قفزة من على مسافة 7.5 متر يعني من الدور ال 3 كدا تقريبا فحمام السباحة ودي هتكون أسهل حاجة فالرياضي)
    2 – المهاري بدون درجة النجاح فيه لائق أو غير لائق ( عبارة عن اجتياز حواجز في زمن 32 ثانية ايه بقى الحواجز دي) مانع بارتفاع 80 سم / حمل كرة طبية وزنها خمسة كيلو بعد المانع مسافة 10 متر / القفز أعلى صندوق بارتفاع 120 سم/ جري زجزاجي بين 6 أعلام / عبور من أسفل واعلى الموانع
    3 – الملاعب 400 درجة مطلوب منك 40% ودا الفرق بينك وبين الثانوي لان مطلوب منهم 50 % : اسبرنت 60 متر فزمن لا يقل عن 9 ثواني / مطلوب منك 20 عقلة جيب الي تقدر عليه / الوثب من الثبات مسافة 180 سم / اخر حاجة وأصعبها جري 800 متر بالزمن ( تلف التراك مرتين اتنين بدون توقف محتاجة منك تظبيط نفس واياك اياك تتنفس من الفم وأوعىتجري بسرعة فالأول لأنك مش هتعرف تكمل بعد كدا المسافة طويلة ) / بعد كدا وانت قاعد بعد ما تكون مت في حاجة اسمها ميل الجذع للأمام بيقيسو بيها مرونة جسمك بان بتقعد فوضع كانك بتعمل تمرين البطن بالظبط وتمد ايدك قدامك وتدفع بايد مسطرة على جراية
    ( ملحوظة اختبار الملاعب بيتعمل الساعة 2 بتفضل قاعد حوالي ساعة فشمس التجمع الأول يعني شمس الصحرا ودي غير أي شمس علشان كدا يكون معاك ازازة مية متلجة من بتكم وازازة عصير كبيرة )
    ( خلال فترة ظهور نتيجة الرياضي القسم أو المركز الي حضرتك تابع ليه هيبعتلك مندوب يجي ياخد منك بيانات عن أقاربك لحد الدرجة الرابعة) ( الدرجة الأولى الأب والأم/ الدرجة التانية الأخ/ الدرجة الثالثة الأعمام والأخوال/ الدرجة الرابعة أبناء الأعمام وأبناء الأخوال )
    خامس اختبار :
    اختبار القدرات ودا ختبار معلومات عامة اختياري زي مثلا
    ما هو الثقلان ( الانس والجن )
    من أمر بحفر قناة السويس ( الخديوي سعيد )
    مخترع المصباح الكهربائي وهكذا
    سادس اختبار :
    اختبار السمات ودا عبارة عن اختبار على الكمبيوتر :
    150 سؤال مقسمين عشرات و خمسات وكل عدد من الأسئلة ليه زمن محدد بعد كدا ينتقل أوتومتيك على مجوعة الأسئلة الي بعدها ( أسئلة فيزيا وأسئلة مطولة حسابية وأسئلة بتقيس قوة الملاحظة)
    و 150 سؤال نفسي في زمن 15 دقيقة واياك تستعجل علشان تخلصهم كلهم الفكرة كلها انك تجاوب اكبر قدر منها فأسرع وقت لكن مش شرط كلها يعني فيه الي بيجاوب 140 ويسقط وواحد مجاوب 80 ينجح
    سابع اختبار :
    كشف الهيئة
    تروح لابس قميصك الأبيض بكم ( الحربية هيا الي بنص كم ) وبنطلونك الأسود وجزمتك السودا وتكون أسد واقف ورافع راسك فوق انك وصلت للمرحلة دي بكل فخر بيكون في الاختبار دا رئيس الأكادمية (مساعد وزير الداخلية اللواء أحمد البدري حاليا ) ( وممكن يكون متواجد وزير الداخلية اللواء أحمد جمال الدين حاليا ) وبعض اللواءات بتدخل تقف على استاند أحمر قدام اللجنة وممكن يسألك فأي حاجة فملفك ولكن أول ما بتدخل تقف بتقول اسمك/ كليتك/ جامعتك/ تقديرك /نسبتك فالثانوية العامة بالظبط/ وهوايتك واياك تقول كورة
    وطبعا التعليمات دي هتخدها من العسكري قبل ما تدخل على لجنة الهيئة
    ثامن اختبار :الطبي المتقدم ( العرض العام )
    أشعة على المخ ورسم قلب وتحاليل وبالتوفيق باذن الله للجميع ويارب تكون المعلومات دي مفيدة ولو بقدر بسيط فالموضوع دا
    ودا رابط للموضوع على ميديا فير الموضوع منسق على الورد أحسن من كدا http://www.mediafire.com/view/?8f4d68bwb176pfi
    التعديل الأخير تم بواسطة kareem_abuzaid ; 08-11-2012 الساعة 09:54 PM سبب آخر: اضافة رابط

  2. #2
    Pharma Student
    تاريخ التسجيل
    Feb 2008
    المشاركات
    82

    افتراضي

    الاختبارات دي للاولاد بس مش كدا :d يعني لو عايزه اقدم اكيد مليش دعوه بالاختبارات دي

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •