هاتجيب معيدين ودكاتره منين

[sokar-resala]

السلام عليكم ياجماعه
يمكن انا اول مره اشارك بموضوع علي منتدي المناقشات بس الفكره جات في بالي قلت اعرضها عليكوا وادينا بنفكر مع بعض بصوت عالي
الموضوع ببساطه هو
ان كل بنت بتلاقي ماما من وهيه لسه صغيره تقولهاانا نفسي اشوفك عروسه وتتجوزي كده دكتور او معيد ويكون راجل ويكون............... وتبدأ تحط في لسته طويله بس ده مش موضوعنا
المشكله دلوقتي
احنا هانجيب منين معيدين ودكاتره تكفي العدد ده كله
وكمان ليه كل الامهات مقياس العريس الكويس بالنسبه لهم انه يكون دكتور اوظابط
طب لو البنت حبت واحد وكان مثلا زميلها او كان في كليه تانيه (بمنطق مكتب التنسيق) اقل من كليه بنتها يبقي ايه الحل
طب لو كان الشخص ده فيه ميزات كتير واخلاقه كويسه ياتري هايرفضوه عشان تنسيقه في الثانويه العامه مادخلوش صيدله او طب
ده من ناحيه الامهات
اما بالنسبه للبنات
انا عايزه اعرف انتي ممكن ترتبطي بحد من كليه تانيه(بمنطقهم) اقل من كليتك
حتي لو كان بيجمع بين ميزات كتير والميزات ديه اكتر من العيوب بكتيييييير ده لان طبعا (مافيش انسان كامل) ؟؟؟؟
انا كان نفسي اعرف رأيكوا بكل صراحه
وعايزه اعرف من
الشباب
لو له اخت هايرضي يخطبها لحد مش من نفس مستوي الكليه بتاعتها ولا هايكون رأيه ايه
وياتري لو هو حب واحده افضل منه في بعض الاشياء هو هايتقبل الموقف ولا هايتعامل معاه ازاي
وهل فعلا راي الاهالي ان لما يكون الزوجه افضل من زوجها في بعض الاشياء حتي لو بسيطه حياتهم بتتأثر بالسلب ولا الكلام ده فيه مبالغه ؟؟؟
انا في انتظار مشاركتكوا .....

[yojeena]

اما بالنسبه للبنات
انا عايزه اعرف انتي ممكن ترتبطي بحد من كليه تانيه(بمنطقهم) اقل من كليتك
حتي لو كان بيجمع بين ميزات كتير والميزات ديه اكتر من العيوب بكتيييييير ده لان طبعا (مافيش انسان كامل) ؟؟؟؟
انا كان نفسي اعرف رأيكوا بكل صراحه
بصي يا جميل
انا بصراحه ومن غير لف ولا دوران
عايزه اللي ارتبط بيه يكون من يا اما دكتور او صيدلي او مهندس
لان مركزه الاجتماعي يهمني
وانا مش بقلل خالص من الكليات التانيه لا والله
بس بعد اما بتطلع عنينا في الكليه بتهيالي من حقنا ننقي ونشترط شروط معينه
و ده لان في حاجه مضيقاني كمان بقي اي حد الوقتي يقول انا عاوز صيدلانيه
ليه بقي؟؟؟؟؟؟؟؟
عشان تفتح له صيدليه بزمتك مش حاجه تغيظ
وعلي فكرة من حقك انك تشطرتي انه يكون خريج كذا عااااااادي خالص
لكن الاول ندور علي الاخلاق و انه يبقي قريب من ربنا


وهل فعلا راي الاهالي ان لما يكون الزوجه افضل من زوجها في بعض الاشياء حتي لو بسيطه حياتهم بتتأثر بالسلب ولا الكلام ده فيه مبالغه ؟؟؟
فعلا دي حقيقه بس مش دايما نقدر نقول في حالات بسيطه
و علي فكرة لو كانوا متفاهمين وبيحبوا بعض ولا يهمهم كلام الناس
لكن اللي ممكن ياثر علي مسار حياتهم اذا شعر الزوج بالغيره من مراته او انها اهم منه او ناجحه في شغلها اكتر منه
في الحاله دي بيبقي السبب منه واكيد الحياه بينهم بتبقي مستحيله
وانا اعرف ناس كده
انا في انتظار مشاركتكوا .....

موضوع حلو اوي يا دكتورة
و ما فيش بنت الا واكيد فكرت او تعرضت ليه

[Chimera]

اعتقد ان قليل جدا إللي بيفكر بالطريقة دي ..
يعني مش معقول كل الدكاترة يتجوزوا دكتورات
و المهندسين مهندسات ..!!!
و هكذا
.,,

[drsherbiny]

اولا احب اهنيك علي الموضوع الحيوي وياريت نتعود علي كده منك

تاني حاجة احب ااقولك انا عندنا في بلد والدي ( انا ساكن في المنصورة ) في دكتورة بشرية متجوزة ميكانيكي هيا بصراحة لقت ملهوش لازمه الشغل في الوضع ده واعدت

يا دوكتورة في مشكله فوق ماتتخيلي في موضوع الجواز الايام دي يعني زمان مكانش يجرؤ ان واحد بكالوريوس تجارة مثلا يتقدم لطبيبه بشرية او صيدلانيه

الوقتي ليسانس اداب ومعاه شقته بيخش اي بيت وعينه بجحه كمان لانه عارف انه في ظل الظروف دي هوا مميز وعمره مهيترفض ابدا

بصي الاهل طبعا لو متقدم لبنتهم دكتور هيطيروا من الفرح طبعا لانه مهما كان مركز اجتماعي بس عاوز ااقولك لو مثلا معهوش شقه وغيره ليسانس اداب ومعاه شقه وعربيه وغيره تتوقعي الايام دي هيكون رايهم ايه

لازم تاخدي بالك اني بقول عن التفكير اللي ماشي الايام دي مش رايي الشخصي

الشباب
لو له اخت هايرضي يخطبها لحد مش من نفس مستوي الكليه بتاعتها ولا هايكون رأيه ايه
وياتري لو هو حب واحده افضل منه في بعض الاشياء هو هايتقبل الموقف ولا هايتعامل معاه ازاي

والله ده كان تفكيري علطول ومازال بس لوجهة نظر ان لازم علي االاق يكون الاتنين من كليه علميه عشان فعلا الكليات العلميه بتلافع من مستوي الذكاء والتفكير وغالبا الزوج بيكون حساس من الحته دي

الحمد لله اختي علوم ومتجوزه مهندس

انا عن نفسي شايف الصيدلي كمستوي علمي واجتماعي ممكن يرتبط باي واحده واكيد مش هترفض مش غرور والله بجد بس انا عارف الظروف عامله ازاي بس طبعا لازم اهم مقومات الزواج وهيا الشقه ثم الشقه ثم الشقه

[SmSm]

شكرا ع الموضوع الرائع يا سكر
أنا رأيي أهم حاجة الأخلاق وموضوع الكلية ده...يعني مش ذنبه حصلتله أي حاجة في الثانوية العامة واضطر انه يدخل كلية عادية أهم حاجة انه يبقى طموح ويحاول يثبت نفسه أكتر عشان محدش يقدر يفرق بينهم..

ربنا يوفقك
ويرزقك الرضا

[MaZeN]

شكرا ع الموضوع الرائع يا سكر
أنا رأيي أهم حاجة الأخلاق وموضوع الكلية ده...يعني مش ذنبه حصلتله أي حاجة في الثانوية العامة واضطر انه يدخل كلية عادية أهم حاجة انه يبقى طموح ويحاول يثبت نفسه أكتر عشان محدش يقدر يفرق بينهم..

ربنا يوفقك

معاكي

[sokar-resala]

شكرا للكل علي المرور

دكتوره يوجينا انا معاكي انه من حقك انك تتشرطي وتتأمري بس مايكونش كل اللي انت بتفكري فيه الكليه وبس
وذي ماانت قولتي الاخلاق والايمان
وكمان باقي الاراء انا بأيدها
وشكرا جدا لدكتوره سلمي علي الدعوه الجميله ديه ربنا يتقبل منك
وياريت الكل يدعيلي انا يرزقني الله الرضا والقناعه
مرسي قوي لدكتور شربيني
ودكتور مازن

[ملكة الدموع]

موضوع جميل جدا
وانا عن نفسى مش هتفرق معايا الكليه كتير اهم حاجه انه يكون انسان راقى فى كل تصرفاته
ويكون على مستوى عالى من الذكاء والثقافه
من الاخر يكون احسن منى .... فى اكتر من جانب
لانى مقدرش اتجوز انسان اقل منى فى اى حاجه
ده مش معناه انه لازم يكون اعلى منى فى الشهاده
بالعكس انا اعرف ناس صيادله ومهندسين واطباء كمان
اللهم احفظنا ... دخلوا الكليات وخرجوا منها ويامولاى كما خلقتنى
مستفدش اى حاجه اكتر من حته ورقه مكتوب فيها المهنه كذا...

كل امنيتى اتجوز انسان ابقى فخوره بيه ....
ويكون فيه ميزه تميزه عن غيره .... ميزه واحده بس حتى تخلينى اتنازل عن باقى عيوبه
لان فعلا مافيش انسان كامل

زوجى ده لازم يكون كبير جدا فى نظرى ....
باخلاقه ... بثقته فى نفسه.... باحترامه ليا... بمعاملته مع الناس
وبمدلول معاملة الناس ليه....
وانه يكفينى الحاجه لغيره ... سواء ماديا او معنويا


اسفه جدا انى طولت
بس الموضوع عاجبنى جدا

[sunshine]

انا شايفه ان القضيه مش قضية تجاره او اداب ولا حتى طب و هندسه قد هى ما قضية ان الشخص ده يكون طموح يعنى ممكن اللى اتخرج من كليه عاديه ده يبقى احسن من الدكتور كثقافه وبريستيج كمان لو هو حد طموح ومجتهد وبيبص لقدام دايما ساعتها انا عمرى ماهحس بفرق بالعكس ده ده اللى انا هبقى مطمنه على نفسى معاه اكتر من المهندس او الدكتور اللى واقف محلك سر بس طبعا زى ما قولتى يا سمر ان الاهل غالبا بيبقو مش مقتنعين بوجهة النظر دى وده بس لانهم بيبقو عايزين لبنتهم احسن واحد فى الدنيا من وجهة نظرهم

[black]

انا من رائى ان يا فرحتى اخد واحد كل الناس تتكلم عنة بس فى الاخر يهنى او انة ميتقيش ربنا فيا او يعذبنى معاة وبعدين بعد كدة يبقى عندى اولاد معقدين يبقى استفدت ايه
عموما انا فى الاول وفى الاخر يوم ما هتعامل مع انسان هتعامل معاه وانا ناسية شهادته دى ايه اصلا كل اللى هكون محتاجة لية حد يحتوينى ويعاملنى بالمعروف
اما فكرة الشهادة البنت بتفكر فيها عشان ترضى الناس لكن لوفكرت شويه هتلاقى انها يوم ما تتعب فى حياتها الناس مش هيفيدوها فى حاجة وكتير بنلاحظ ان فى ناس مستواهم العلمى مش عالى ولكن سبحان الله ربنا مديهم قبول جامد اوى من كل الناس وفية ناس على مستوى عالى اوى علميا بس الناس بتستعيذ بالله بمجرد لما تيجى سيرتهم
لكن اكيد احب انى الاقى الاتنين مع بعض لكن لو تعرضت للاختيار هختار الانسان مش الشهادة