لـيـه كـده يــا تـحـلـيـلـيـة ؟؟؟؟

[Anas]

السلام عليكم و رحمة الله و بركاته

بداية ... أنا هتكلم عن نفسي و عن اللي حصل ليا ...
و اللي حصل له نفس اللي حصل ليا و سكت ... هيفضل ساكت طول عمره
و هيحصل له أكتر من كده ... و هيفضل ساكت

* الزمان ... الثلاثاء 13/10/2008 ...

* المكان ... معامل الكيمياء التحليلية ... الدور الثالث ... المبنى الجديد (ج)

* الأحداث

رايح الكلية ... عندي معمل الساعة 9 صباحا بمعمل 3ج ... حلو لحد كده

ندخل المعمل الكبير اللي في الدور التالت ... في انتظار الدكاترة لتوزيعنا على البنشات في المعمل

الدكتورة : من رقم..الى.. في مكان كذا ... و من رقم..الى.. في مكان كذا

و من رقم..الى.. "مجموعتي" ييجو ورايا المعمل التاني

نروح المعمل التاني ... عبارة عن بنشين فقط ... و مفيش أي حاجة تانية
ولا كيماويات ولا أي حاجة
التراب مالي المكان ... و مفيش اضائة غير الشباك في الجنب

طلعنا الادوات ... غسلنا الادوات ... و اللي اتكسر اتكسر ... مفيش مشاكل لحد كده
واقفين نتفرج على بعض
عاوزين نشتغل !!!!

الدكتورة جت تقولنا ... " معلش يا دكاترة ... آخر 10 أرقام يرجعو المعمل الكبير تاني علشان المكان ده ضيق
و هو اصلا مش معملكم ... بس المعمل بتاعكم العمال مجوش لسه علشان يفتحوه !!! "
و مازلنا واقفين تفرج على بعض ...

نزلت استلفت سحاحة مكان اللي اتكسرت ... ورجعت تاني ... واقفين نتفرج على بعض
قلت أقرأ الشرح ... قرأته ... و فضلنا ... واقفين نتفرج على بعض

بعد مرور حوالي 45 دقيقة من زمن المعمل اللي هو اساسن ساعتين و نص
لقينا العمال جايبين لنا أربع زجاجات و حاطينهم على البنش ...

قلت كويس ... هنشتغل ... ألاقي ال 4 دول كلهم pot.permanganate
اللي هو ال titrant بس .... طب فين السامبل ... فين الباقي ؟؟؟

الناس ملت السحاحات ... و مستعديين للشغل ... و فضلنا واقفين ... نتفرج على بعض

بعد شوية ... " بعد مرور حوالي ساعة من المعمل الساعتين و نص "
الدكتورة جت تقولنا ... يلا يا جماعة ... " أخيرا لقينا لكم ملجأ !!! "

ملجأ ؟؟؟ !!!

ملجأ ... ليه ؟؟؟؟ ... و لمين ؟؟؟؟ ... ده احنا في صيدلة ... مش في مخيمات رفح

يا عم عدي الكلمة دي و متاخدش في بالك ... عدينا

رحنا المعمل التاني ... و انتظرنا الكيماويات تيجي و الناقص يكمل
" أثناء النقل ... اللي اتكسر اتكسر ... و اللي اتملا اتكب "

بعد ما رصينا الحاجة ... و بدانا شوية في الشغل ...
الدكتورة : لو سمحتم يا جماعة ... اللي مش معاه الكتاب يطلع بره
و يشتري الكتاب ... و الا مش هيحضر ... لإن الدكتور هييجي دلوقت

أنا أقسم بالله العظيم ... اني السنـتـيـن اللي فاتو اللي درسنا فيهم في قسم التحليلية
مفيش دكتور حط قلمه في كتابي العملي ولا سألني عليه من الأساس

مش مشكلة ... عدي دي ... الكتاب كده كده هنجيبه
و احنا كلنا عارفين الاهمية " القصوى " لكتاب التحليلية ... سواء النظري او العملي

مكنتش عامل في حسابي فلوس الكتاب 125 جنيه على كتابين أرفع من بعض
يا عم عدي دي كمان ... ما أنت جايب الميكرو ب 130 جنيه و العقاقير ب 150 و مقولتش لأ ... عدينا

المهم ... لفيت على اصحابي في المعملين التانيين و استلفت فلوس الكتاب و اشتريته
و نزلت اكمل شغلي ...

و الدكتورة مازالت مصممة ان الدكتور هيمر على المعامل و اللي مش معاه الكتاب هيطرده

في أثناء الشغل ... في خطوة تسخين
نضور على ال flame ... مفيش flame
المعامل لسه جديدة ... و مفيش غاز
طب نسخن فين ... روحو المعمل الكبير و سخنو هناك

طبعا المعمل الكبير فيه طلبة ... و الطلبة دول عندهم نفس التجربة ... اللي فيها تسخين
و عدد ال flames اللي موجود مش كفاية

بفضل الله كان معظم اللي في المعمل خلصو شغل و منهم اللي مشي
" مهم بادئين قبلنا بساعة بحالها "

سخنا و رجعنا مكاننا نكمل شغل
خلصنا الشغل ... و كملنا الكتاب ... نضور على الدكتورة ... مفيش دكتورة
و لسه فاضل من وقت المعمل نص ساعة بحالها

طب نتاكد من مين من النتايج اللي طلعناها في الآخر دي ؟؟؟
و الاهم من كده عندي ... مين اللي هيعلم ليا الكتاب
الكتاب اللي طلعت مخصوص من المعمل علشان اشتريه
الكتاب اللي لفيت على أصحابي استلف منهم فلوس علشان اشتريه
الكتاب اللي عملـــ ... يا عم ماتعدي دي كمان ... انت بقت فارقة معاك ... عدينا

طب الدكتور مجاش ليه مر على المعامل ... ؟؟؟
طب الدكتورة راحت فين ؟؟؟
طب أروح لمين ؟؟؟ ... يا عم ما تسكت بقى و تمشي وانت ساكت
شوف هتعمل ايه في ال 3 ساعات اللي فاضلين لك على محاضرة التحليلة " تحليلية برضه هه "

... و خلصت الحكاية ...

*************

بالذمة حرام ولا مش حرام
بذنب ايه يحصل ده كله ؟؟؟
بذنب ايه يتكسر مني سحاحتين و ماصة 10 في أثناء النقل
بذنب ايه أخرج من البيت مستعجل على معادي ... و ابدا شغل بعد المعاد ده بساعة كاملة

ليه أخرج من المعمل ألف على المعامل التانية على أصحابي أستلف منهم فلوس الكتاب
مع العلم انهم لسه شاريينه من شوية ...
ليه أكمل الكتاب و انا متيقن زي اسمي ان مفيش حد هيضور عليه
ليه بعد ده كله ... محدش يضور عليه فعلا ... ولا الدكتور يمر على المعامل ؟؟؟

ليه أخرج من معملي للمعمل التاني شايل فلاسك فيها conc.HCl و ماشي بـيـن المعملين
ليه أروح للمعمل التاني علشان أسخن ... و أرجع بنفس الفلاسكة اللي بقى فيها HOT conc. HCl ؟؟؟
يحصل ايه لو لا قدر الله حد جاي مندفع و خبط فيا ولا حصل أي حاجة ... أو حتى وقعت عليا أنا "سامع حد بيقول آمين"

مين اللي كان هيبقى غلطان و اعمى و مش حريص في شغله و ماشي بسرعة و مهمل ؟؟؟
يا عم ما تحمد ربنا ان مفيش حاجة من دي حصلت ... و انت اهو قدامي صاغ سليم
و احسن من الأول كمان ... و قاعد في بيتك على النت دلوقت و مزاجك حلو

يا عم اسكت انت خالص ... كفاية كده ... قاعد من الصبح تقولي عدي ... عدي
و انا عمال اعدي ... و مفيش فايدة

*************

آسف اني طرحت الموقف بالصورة دي ... مع اني متاكد ان الصورة أحسن من كده بكتير

أنا اللي قلته ده من ضيقي و زعلي
على انه يحصل ده كله من قسم التحليلية المعروف بنظامه و دقته
القسم اللي كتير مننا بيعتبره من أفضل الأقسام في الكلية

يا ريت بجد الموقف ده مش يحصل تاني ليا ولا لأي حد

و آسف على الإزعاج

* * * * * * * * *

بسم الله الرحمن الرحيم

تعقيب على الموضوع " بعد حضوري للمعمل الثاني"

بعد حضوري للمعمل الثاني ... حسيت و الحمد لله إن حاجات كتير اتغيرت

و حسيت إن اللي أنا كتبته هنا و اللي زمايلي كتبوه بعدي
حسيت انه لقى صدى عند المسئولين في القسم
و تحسب لهم هذه النقطة و يحسب لهم أيضا سرعة الاستجابة

و بجد المرة دي أنا خارج من المعمل مش زعلان

* مش زعلان لان الكتاب اللي اشتريته المرة اللي فاتت و فضلت اكمل فيه و مش لقيت حد يصححه ... صححته المرة دي

* مش زعلان لاني لقيت flames في كل مكان في المعمل
" بالرغم من إن عددهم كان قليل جدا ... بمعدل واحد لكل 5 طلبة تقريبا"
بس مش زعلان لان القسم مش بإيده حاجة زي دي

* مش زعلان لاني لقيت على كل بنش مجموعة كاملة من الكيماويات اللي هنشتغل بيها في المعمل و مفضلتش أضور على زجاجة ناقصة

* مش زعلان بالرغم من ان لحد الساعة 9:15 المعامل لسه مش اتفتحت
رحت الكلية القديمة اجيب سحاحة مكان المكسورة " لمزيد من المعلومات راجع الجزء الأول "
رجعت لقيت المعامل اتفتحت ... و لما جيت أروح المعمل اللي لفيت عشانه المرة اللي فاتت علشان ادخله
لقيته اتقلب معمل ابحاث ... و سألت و عرفت اننا في الدور اللي تحته
بصراحة كنت هزعل ... بس عرفت ان القسم ملوش مسئولية في كده

مش زعلان أبدا و الحمد لله .... بل بالعكس ... فرحان

* فرحان لاني عرفت إن كل كلمة اتكتبت هنا سواء مني أو من زمايلي ... الدكاترة شافوها
و بفضل ربنا عالجو التقصير اللي كان حصل في اليوم ده على قدر استطاعتهم

* فرحان لان الدكتورة في المعمل جزاها الله كل خير قدمت لنا شرح كافي و وافي و عملي عن الشغل اللي هنشتغله ...
و اللي عرفت فيما بعد إن بعض السكاشن محصلش فيها حاجة من دي

* فرحان لان في ناس ناس كتير مسئولين تفهمو كلامي ده و عرفو المقصود منه و بفضل الله التقصير اتعالج

بس .... اللي مزعلني حاجة واحدة بس ....

ان دكتور عزيز عليا جدا و أنا بحبه في الله يزعل مني على حاجة انا مش قلتها و مش قصدتها
و بجد أنا من ساعة ما عرفت زعله مني و انا زعلان ...
و زعلت اكتر لما عرفت السبب ... لاني مليش أي يد فيه

و يا ريت بجد يسامحني اذا كنت اتسرعت في كتابة كلمة ... و جت مني بدون قصد اسائة

* * * * * * * *

و في النهاية ... كلمة اوجهها لكل المسئولين في قسم الكيمياء التحليلية

ان اللي كتبته هنا ... سواء المرة دي او المرة اللي فاتت
اذا كان فيه نوع من سرد بعض التقصير اللي حصل
فده عمره ما كان نقد موجه أو عن قصد
و لكنه كان عتاب لطيف من طالب ... لكيان له عنده صورة جميلة جدا ... خاف انها تتهز قدامه

و كما قال الشاعر

أعاتب ذا المودة من صديـق *** إذا مـا رابـنـي مـنـه اجـتـنـاب
إذا ذهـب العـتـاب فـليس ود *** و يبقى الود..ما بقي العتاب

[dr,mona]

ما هو دا السكشن بتاعى


لا والطريق كان واقف وانا جاية

وقولت بقا فيها طرد اكيد اكيد يعنى


بس لقيت بقا كل دا


دى كانت حصة العاب

بس احسن ما فى الموضوع اننا خرجنا بدرى

[dr_chamommile]

عندك حق دكتر انس في كل كلمة قلتها ويريت حد يسمعلنا


احنا بقي العيب كمان زياده علي كده


ان المية قطعت في السكشن هههههههه

فيه حاجة احلي من كده

نروح نملي البيكر مية عشان نغسل الادوات كل شوية من الحمام
ههههههه

سكشن تحليلية مفيهوش مية شفتو التطور

وبعد كم مرة كده المية قطعت كمان من الحمام

نلف بقي علي مية وكاننا في صحرا وكل واحد في ايده بيكر يعيني زي ما نكون في معمل تحاليل سوري ههههه

بجد بجد كان معمل وحش جدا جدا معرفش قسم التحليلية اتحسد ولا ايه ؟؟

[dr_amoona]

السلام عليكم ورحمة الله وبركاته

شكرا يا د/ أنس إنك طرحت الموضوع ده
لإني فعلا مضايقة جدا من اللي حصل في سكشن التحليلية وخاصة السكشن بتاعنا ((( الملجأ ))))
بدون reagent ولا flam ولا أي حاجة غير الأدوات بتاعتنا وبس اللي اتكسرت طبعا **.. ناس كتير جدا عملت زي أنس واستلفوا فلوس الكتاب ،، على أساس انه د/ فتح الله هيلف ...
غير كل ده إن وقت السكشن كله ضاع في انتظار العامل على ما يجيب reagents !!!!! والزحمة أثناء التسخين في المعمل التاني ....شيء مؤسف بجد
مش عارفة أقول ايه لكن أتمنى بجد إن اللي حصل السكشن اللي فات ميحصلش تاني .. لأنه ده بيضيع وقت كبير قوي ومش بنلحق نشتغل
بشكرك مرة تانية يا انس إنك فتحت الموضوع جزاك الله خيرا

[عبدالله عبدالرحمن]

والله يادكتور أنس اليوم ده كان من أغرب الأيام فى الكلية
وكل شىء كان متلغبط ووحش والواحد كان مضايق لدرجة كبيرة
والحمد لله انى لقيت حد بيفكر انه يتكلم ويقول على واقع مرير
وادعى ربنا ان اليوم ده ميتكررش تانى

[Amira]

السلام عليكم و رحمة الله و بركاته

بداية ... أنا هتكلم عن نفسي و عن اللي حصل ليا ...
و اللي حصل له نفس اللي حصل ليا و سكت ... هيفضل ساكت طول عمره
و هيحصل له أكتر من كده ... و هيفضل ساكت

* الزمان ... الثلاثاء 13/10/2008 ...

* المكان ... معامل الكيمياء التحليلية ... الدور الثالث ... المبنى الجديد (ج)

* الأحداث

رايح الكلية ... عندي معمل الساعة 9 صباحا بمعمل 3ج ... حلو لحد كده

ندخل المعمل الكبير اللي في الدور التالت ... في انتظار الدكاترة لتوزيعنا على البنشات في المعمل

الدكتورة : من رقم..الى.. في مكان كذا ... و من رقم..الى.. في مكان كذا

و من رقم..الى.. "مجموعتي" ييجو ورايا المعمل التاني

نروح المعمل التاني ... عبارة عن بنشين فقط ... و مفيش أي حاجة تانية
ولا كيماويات ولا أي حاجة
التراب مالي المكان ... و مفيش اضائة غير الشباك في الجنب

طلعنا الادوات ... غسلنا الادوات ... و اللي اتكسر اتكسر ... مفيش مشاكل لحد كده
واقفين نتفرج على بعض
عاوزين نشتغل !!!!

الدكتورة جت تقولنا ... " معلش يا دكاترة ... آخر 10 أرقام يرجعو المعمل الكبير تاني علشان المكان ده ضيق
و هو اصلا مش معملكم ... بس المعمل بتاعكم العمال مجوش لسه علشان يفتحوه !!! "
و مازلنا واقفين تفرج على بعض ...

نفس اللى حصل لنا فى اول سكشن تحليليه حطوا شويه مننا فى المعمل اللى لسه مبنى جديد تقريبا برده الدور التالت وشويه وزعوهم فى المعمل الكبير والدكتوره بتشرح الخطوات بالميا على اساس انها sample وtitrant واحنا المفروض نتخيل لحد ما العامل جاب الsampleو titrant
واشتغلنا بس الحمد لله مفيش حاجه اتكسرت

ربنا يخرجنا من الكليه دى على خير يارب

[Pharmcist_girl]

والله يا دكتور انت عندك حق تفرقع من الغيظ مش تتنرفز بس
على فكرة احنا برضه كان عندنا 4:30 والدكتور مجاش الا بعد تقريبا 45 دقيقه
البنش اللى احنا واقفين عليه مكنش فيه ميه _بدايه مبشره_كله وقف من غير نظااااااااام ال flames محدش ولعها الا احنا ما قلنا وواحد لكل بنش او بنشين
مع ان اكتر قسم محترم وبنحبه هو التحليله staff بتاعها من الصغير للكبير ممتاز بس لازم الكليه توفرلنا جو مناسب للشغل وشكرا ليك يا دكتور على فتحك الموضوع

[آيه محمد]

والله فعلا كان اسوأ معمل تحليليه في حياتي
بس الدكتوره تعاطفت معانا وتساهلت في الكتاب نظرا لانها بتدينا من السنه اللي فانت
بس قالت مش هتدخل حد تاني من غير الكتاب
اما بالنسبه للادوات والميه والفلامات محدش ينكر ان كان فيه اهمال
بس يا رب يتصلح وعذرهم ان المعامل لسه جديده
بس يا ريت المواقف دي مش تحصل تاني

[Anas]

الموضوع ده أنا كنت عامله ... و كان باسمي

مش عارف اتغير ازاي و بقى بإسم dr,mona‏ ازاي ؟

على العموم ... الدكتورة dr,mona‏ كانت في نفس المعمل و نفس الظروف

تعددت الأسماء .... و المعاناة واحدة

[~Am@ny~]

ايييييييييييييييييييه المعاناه والمراره ف الكلام دىى

عموما ياريت حد يسمع الكلام ده ويشوف حل لانه واضح انه كان يوم صعب

بس الحمد لله السكشن عندنا كان تمام جداا وطلعنا النتايج اكيورت وكل حاجه كانت برفكت والحمد لله

بس انا فعلا حسيت باللخبطه والناس داخله خارجه معملنا واستغربت اكتر لما لقيت الناس لسه

بتسخن واحنا خلصناااااااااا ماشين يعنى !!!

عمومااااا خير وان شاء الله اكيد فيه حل لان واضح ان المشكله ان كل المعامل اتجددت وكده

مش التحليليه بسسسسسسسس

وحصل خير يا انس ان شاء الله السكشن الجاى هيكون احسن وهيضوروا ع الكتاب وع الشفوى والغياب

فتحوا بقى العين علينا احنااااااااا