المشاركة الأصلية كتبت بواسطة pharmacistina
ليه يا دكتور أنس ياريت تقول بجد , ليه ماله التكليف ؟؟
انا هتكلم عن فكرتي عن التكليف من واقع المعلومات القليلة اللي عندي
التكليف في الغالب عبارة عن حاجة من اتنين ... في صيدلية في مستشفى حكومي ... او في وحدة صحية
أسوأ حاجة في الاتنين هي العهدة !!!!
انا فاكر و انا في المستشفى يوميا لازم يعدو كل الاصناف الموجودة الصبح قبل ما نفتح للجمهور و بعد الضهر لما نقفل خلاص
فيتامين ب مركب 15 شريط × 10 أقراص = 150 قرص ... قيدي عندك يا فاطمة
فلاجيل 26 ازازة ... اموكسيل 12 شريط × 10 كبسولات = 120 كبسولة ... و هكذا
و طبعا كل حاجةبتتصرف بيكون مقابلها موجود روشتة
و يوم ما كان بيحصل عجز ولا حاجة كانو بيطلع يقطعو تذاكر من الشباك على حسابهم و يخلو الدكاترة يوصفو فيها الحاجات الناقصة و يظبطو العمل !!!
ده الجزء البسيط من الشغل " لو في شغل من الأساس "
و كمية لا بأس بها من الدفاتر و السجلات ... تتوقف على نوع المستشفى اللي فيها الصيدلية
" في عهد بتوصل لأرقام مهولة في صيدليات عادية مفيهاش أدوية بالمبالغ دي "
و كمان لو في علاج على نفقة الدولة تبقى كملت ... ده غير القسم الداخلي
على حسب المكان بتتحد طبيعة الشغل ... لو مكان كبير بيبقى الشغل كتير و بالتالي فرص الأجازات بتقل
لو مكان نص نص بيكو الشغل برضه نص نص و الاجازات بتبقى أكتر شوية
و طبعا كل الموجودين صيدلانيات ... و لو حضرتك دخلتي صيدلية مستشفى ولقيتي عدد من الصيدلانيات قاعدين يحكو مع بعض ... تأكدي ان العدد الرسمي للصيدلانيات زيادة على العدد ده بالنص على الأقل
الباقي بقى واخدين اجازات تتراوح من حمل و وضع إلى رعاية طفل إلى مرافقة زوج إلى اجازة اعتيادي
غير اللي بيقسمو مع بعض 3 أيام و 3 أيام و بيمضو لبعض ... و المدير عارف و بيمشي أموره
أنا كنت بتدرب في صيدلية في المنصورة ... كان معانا صيدلانية متخرجة من سنتين ف كان ليها يوم في الاسبوع بتيجي متأخرة و باين عليها مرهقة و تعبانة
و السبب انها في اليوم ده كل اسبوع بتروح كفر صقر تمضي في المستشفى و تيجي
و طول ما انا كنت قاعدج في صيدلية المستشفى بسمع بقى الحواديت ... انا جوزي عمل امبارح مش عارف ايه ... و رحت انا و ماما امبارح محل مش عارف اسمه ايه ... و حاجات من هذا القبيل
و أحلى كومنت سمعته و لسه فاكره من يومها " امبارح في قناة جديدة جوزي جابها عالدش اسمها موجة كوميدي بس انما ايه جميلة قوي قوي و بتضحك بجد "
كان فاضلهم شوية و يعملو زي الموظفات ... يقمعو ملوخية و يقطفو بامية