جدول الامتحانات مناقشه عامه ومفتوحه " أخبار جديده

[Mohamed Al Gohary]

بسم الله الرحمن الرحيم ..

هنتكلم كلام كتير .. اولا لازم نعلم جيدا ونثق تماما فى ادارة كليتنا .. الدكتور محمود بكر والدكتور حسن الكاشف .. ولازم نكون متاكدين وواثقين تماما من انهم بيعملوا الافضل لينا .. ومش هيكون في ايديهم حاجه لينا تتعمل وفى مصلحتنا ومش هيعملوها .. لاشك في ذلك ..

الوقتي كلنا عارفين الوضع اللى العالم كله فيه من موقفه تجاه وباء انفلونزا الخنازير .. وعارفين ان البلد في حالة طوارىء .. وفيه قرارات كتير بتتاخد لمواجهة انتشار هذا الفيروس ..

هنتكلم عن اللى يخصنا .. قرار وزير التعليم العالي بضغط مدة الامتحانات لاسبوعين فقط ..

طبعا كلنا شوفنا الاعلان وقريناه وهو متعلق فى التابلوه الخاص بكل فرقه .. مننا اللى تنح ومننا اللى ذهل ومننا اللى جت له حاله هستيريه وقعد يضحك ..

وبدا الكلام يكتر ويتقال كلام كتير ..

وبصفة المسئوليه توجهت ممثلا عن اتحاد الطلاب الى كل من السيد الاستاذ الدكتور محمود بكر العشماوي عميد الكليه .. والسيد الاستاذ الدكتور حسن الكاشف وكيل الكليه لشئون التعليم والطلاب .. ولكم ان تسألوهم عن مدى صدق كلامي ..

الدكتور محمود بكر قال لى ان القرار جاء بالفعل الى الكليه .. وانه متماشي مع معايير الجوده .. بمعنى ان مثلا التيرم التاني كالمعتاد يبدا من نص شهر فبراير .. وينتهى كاملا فى اول النصف التاني من شهر يوليه ..
مدة الدراسه بالكاد تصل الى نصف شهر ابريل .. ونبدا من بعدها الامتحانات العملي ..

مما يعني ان مدة الدراسه من نص شهر فبراير وحتى نصف شهر اربعه اى شهرين .. ومدة الامتحانات من نصف شهر ابريل وحتى نصف شهر يوليه .. اى شهرين ..

كيف تتساوي فترة الدراسه مع فترة الامتحانات فى كليه تسعى الى الاعتماد !!

واضاف ان الامتحانات من قبل كانت بهذا النظام يوم ويوم ..

وشهد على هذا الحديث الدكتور سري ..

ذهبت بعدها للدكتور حسن الكاشف .. الذي اكد على كلام الدكتور محمود وقال ان الامور ليست واضحه تمام الوضوح حتى الان .. وكل شيء جائز .. ممكن يتم تعديل الجدول كمان كان فى الاعوام الماضيه .. ومن الممكن ان يتم تاجيل الدراسه تماما فى اى وقت ..

وسالته عما يقوله الطلاب من تجميع توقيعات او تنفيذ اى شيء للاعتراض .. وقلت له بالنص ماذا تنصح الطلاب فى الوقت حالى هل من الممكن ان يقوموا بأى شىء الان من الممكن ان يكون له أثر تجاه قرار وزير التعليم العالي .. قال لى الدكتور حسن ان الشيء الوحيد الذي يقدر الطلاب على فعله ويكون له نتيجه واضحه هو ان يذاكروا مبكرا .. وان لا يعتمدوا على الفواصل بين المواد ..

بعدها كان هناك اجتماع مع الدكتور احمد بيومي شهاب الدين رئيس الجامعه .. ومثل اتحاد الكليه فيه محمد السلاب امين مساعد الاتحاد السنه الماضيه ..
وشرح له محمد السلاب كل شيء ونوه الى ان النظام فى الكليات العمليه يختلف تماما عن الكليات النظريه نظرا لوجود امتحانات العملي وامتحانات الشيتات التي تسبق الامتحانات النظريه ...
ووضح ايضا لسيادة رئيس الجامعه ان صيدله تختلف عن كلية الطب .. لان كلية الطب درجات الامتحان النظري ليست الاساس .. بل هناك درجات الروندات والشفوي والكيسيس .. والورقه الامتحانيه تبلغ فى بعض المواد 20% مثل امتحانات الـ mcq .. ووعد رئيس الجامعه بنقل كل وجهات النظر لمعالي وزير التعليم العالي ..

بعد ذلك قام الدكتور حسن باعلان جدول مبدئي مقترح للامتحانات .. ووجدنا ان الامتحانات اصبحت لمدة ثلاث اسابيع وليس اسبوعين .. وهذا الاستثناء صاحبه هو ادارة الكليه عندنا ..

وبذلك بناء على هذا الجدول اصبح هناك مادتين كل اسبوع .. بواقع مادة قبلها يومين وماده قبلها 3 ايام بما فيها يوم الجمعه ..

وهذا الجدول كما هو موضح ( مقترح ) .. لكن مقترح بالنسبه لترتيب المواد وليست مدة الامتحانات .. لانها لن تغير الا بتغير الوضع الحالي او بقرار ..

بما يعني ان مدة الامتحانات ثلاث اسابيع بواقع مادتين كل اسبوع .. القابل للتغبير هو ترتيب المواد ..

وهذا يعني ان النقاش مفتوح بالنسبه للجدول لترتيب الامتحانات ..

وكل قسم فرقه هناك توبيك خاص بذلك .. ارجو من كل دفعه ابداء ملاحظاتها واقتراحاتها على ترتيب المواد فى الجدول ..
وكل ذلك سيتم اخذه عين الاعتبار من قبل الدكتور حسن الكاشف عند وضع الجدول النهائي ان شاء الله ..

اتمنى ان تكون الامور قد وضحت .. وهذا التوبيك غير مغلق .. لمن يريد ان يستفسر عن اى شىء .. لكن اى اقتراحات او ملاحظات بالنسبه لترتيب المواد ارجو ان يكون في التوبيك المخصص لذلك فى قسم كل فرقه ..

اخيراً : ارجو ان لا ننساق وراء من يريد اثارة بلبله وحاله من عدم النظام داخل الكليه بشكل او باخر .. وان نكون واقعيين ومتحضرين ..

من يريد اى اعتراض او ابداء اى ملاحظه عليه التوجه لمكتب الدكتور محمود بكر او مكتب الدكتور حسن الكاشف .. وهما يستمعان الى كل شيء ويردون بصدر رحب على كل الاستفسارات .. وهمهم الاول والاخير بالتاكيد هو مصلحة الطلاب ..

-----


التوبيك الخاص بالفرقة الاعداديه

التوبيك الخاص بالفرقة الأولى

التوبيك الخاص بالفرقة الثانية

التوبيك الخاص بالفرقة الثالثة

التوبيك الخاص بالفرقة الرابعه

[عبدالله عبدالرحمن]

كيف تتساوي فترة الدراسه مع فترة الامتحانات فى كليه تسعى الى الاعتماد !!

واضاف ان الامتحانات من قبل كانت بهذا النظام يوم ويوم ..

اعتماد الكلية لن يتم فى ظل وضع المناهج الحالية
وكذلك بسبب كيفية عملية التقويم المتبعة حاليا

كما اوضحت سابقا ان قصر مدة الأمتحان يأتى بعد وجود مناهج مناسبة لنوعية اخرى من الأمتحانات

كذلك تقسيم درجات التقويم على عدة اختبارات وليست مجتمعة فى اختبار واحد
يعنى متجيش تقيمنى فى 110 درجة من ال 150
فى يوم واحد وتقولى استعد له فى يومين
حتى مع المذاكرة المسبقة
طبيعة المنهج التى تعتمد على الحفظ اكثر من الفهم
تتطلب مراجعة المنهج اكثر من مرة
وبعدين ياريت نبعد الأعتماد عن الموضوع
لأن اى طفل عارف ان الكلية مش واقف اعتمادها على البند ده
لسه فى حاجات تانية كثير قبل ما نتكلم عن الأعتماد
بس مش موضوعنا

[BonaBart]

صباح الفل يا جوهرى


انا عايز اعرف ايه دوافع هذا الاقتراح

هل الانفلونزا بس ولا في سبب تانى ؟؟؟؟

لو المشكلة عشان الانفلونزا بس
يبقى مفيش مشكلة
زى ماقلت قبل كدا

احنا اساسا وقت الامتحانات مابننزلش الا ليوم الامتحان

يعنى ف جميع الاحوال هننزل 6 مرات مثلا

ايه الفرق بقى
لو نزلناهم كل يومين او كل اسبوع


بالعكس

دا هيبقى زحمة جدا
يعنى كل يوم فرقتين بيمتحنوا وزحمة وشفوى وبهدلة

واكثر عرضة لانفلونزا الطيور

و انفلونزا اللى مش طيور

أرجوكم

يا جماعة خدوا اجازة نص السنة
واعطونى يومين امتحان زيادة

خدوا اجازة اخر السنة
واعطونى وقت اذاكر وافهم

مش معقول كدا
اليومين اللى الواحد بيذاكر فيهم
يلطشوهم منه كدا

[Mohamed Al Gohary]

اللى اقصده يا عبدالله ان الامور فى هذا العام غير مستقره والكلام مش مرتبط ببعضه انت اللى ربطه ..

ومتنساش انى بنقل كلام اتقال ليا ..

ولو يهمك تعرف السبب اوى يا دكتور ميدو ممكن تسال وزير التعليم العالي صاحب القرار ..

[BonaBart]

ولو يهمك تعرف السبب اوى يا دكتور ميدو
ممكن تسال وزير التعليم العالي صاحب القرار ..

انا بس عايز اعرف سبب مقنع يخلينى اسلم بالامر الواقع
ولا اسلم وخلاص لكل اللى يخصنى

القصد من كلامى لو السبب الانفلونزا
يبقى اسمحوا لى
دا مبرر غير مقنع بالمرة
زى ما اسلفت سابقا


ولا هى قرارات وخلاص تجاه ازمة الانفلونزا

ولازم حضرة معالى السيد وزير التعليم العالى
يراعى ف قراره دا
ان الكليات كلها مش زى بعضها
كليتنا عملية وكمان تختلف عن باقى الكليات حتى العملية منها


طب استفسار اخير يا جوهرى
هى الامتحانات العملى هتبدأ امتى
والنظرى هتبدأ امتى

هل ف نفس الميعاد ولا هتتقدم ؟؟؟

[Mohamed Al Gohary]

بص يا دكتور ..

الواضح وده تحليلي انا .. ان الوزير عاوز يقصر فترة الامتحانات باى شكل عشان الاجازه تيجي وخلاص ..
طيب جميل الحل انه يقدم الامتحانات وتبدا بدري .. بس تبدا بدري ازاى واصلا الدراسه بداه متاخر ؟؟

يبقى الحل انه يضغط فترة الامتحانات ..



بالنسبه لامتحانات العملي فدى بتاعة الاقسام ..

بالنسبه لوقت بدا النظري فلسه متمش تحديده لكنه مش هيبقى زى ما الناس بتقول فى نص ديسمبر ان شاء الله ..

[mayada a7md]

واللة عندك حق يا دكتور ميدو في كل الي قولتة تحياتى ليك دا حتي انتوا واخدين علي الوضع بتاع الا متحانات شوية انما احنا مش فاهمين ولا عارفين هنمتحن ازاى
-----
الرسالة الي نوصلها للكلية راعونا وخلاص

[Amira Said]

مشكلة الكليات العملية ان في عملي قبل النظري و في شيتات قبل العملي و في خلال فترة الشيتات و العملي المحاضرات شغالة عادي فمينفعش نعتبر دي فترة امتحانات بس و لا فترة دراسة بس
دلوقتي في سكاشن موجودة في الجدول 5 ساعات و احنا بناخد منهم 3 ساعات بالكتير، ده كل اسبوعين،، فلو نضغط السكاشن شوية بحيث نمتحن العملي في السكشن الرابع و يكون عندنا فرصة كويسة قبل النظري هيكون شيء كويس
نضغط السكاشن بمعنى ان ممكن ناخد السكشن الثالث و الرابع مع بعض
و برضه ايه الفائدة ان يكون الشيت في يوم و العملي في يوم، و الشيت ده بنذاكر فيه العملي، فأنا بذاكر العملي مرة للشيت و مرة لشفوي العملي و مرة للعملي،، ده غلط، المفروض نمتحن كل العملي مرة واحدة علشان نبقى واقعيين لما نقول المفروض نذاكر النظري اولا بأول
ده رأيي

[BonaBart]

بص يا دكتور ..

الواضح وده تحليلي انا .. ان الوزير عاوز يقصر فترة الامتحانات باى شكل عشان الاجازه تيجي وخلاص ..
طيب جميل الحل انه يقدم الامتحانات وتبدا بدري .. بس تبدا بدري ازاى واصلا الدراسه بداه متاخر ؟؟

يبقى الحل انه يضغط فترة الامتحانات ..



بالنسبه لامتحانات العملي فدى بتاعة الاقسام ..

بالنسبه لوقت بدا النظري فلسه متمش تحديده لكنه مش هيبقى زى ما الناس بتقول فى نص ديسمبر ان شاء الله ..

كمان هوا دا التفسير اللى عندى
وانا رديت عليه فوق وقلت انه مش مقنع

تقصير مدة الدراسة دى ماشى
بس الكلام دا مايبقاش لينا
للمدارس ابتدائى واعدادى ماشى
عشان التكدسات ف الفصول والكلام دا
وعندهم ممكن يضغطوا المناهج عادى
اساسا الطلبة مابيحضروش ولا بيهتموا بالحضور

انما الكليات اللى هى المفروض التعليم المفتوح
والمفروض ناس فاهمين واكتر وعى
ماينفعش يحددوا اقامتهم قصدى دراستهم بالشكل دا

بس انا ف رايى دا هروب من مسألة انتشار الانفلونزا ف الجامعة
وعلى فكرة ممكن تنتشر قبل الامتحانات
بس هى اجراءات تنفع عند الاستجوابات

[Larine_Resala]

جدول الامتحان اللي بالمنظر دا ينفع لكليات النظري ومش نافع لينا بالمرة خصوصا اننا بنمتحن امتحانين مش امتحان واحد فلازم نكون مستعدين للمادة كويس والجدول دا مش هينفع لينا بأي حال م الاحوال