نصائح للخريجين الجدد

[ياسر عباس عبد المجيد]

عايزين نعرف ايه الاوراق المطلوبة بالنسبة للخريجين الجدد وايه الخطوات اللى هنمشيها نصائحكم بالنسبة لطلبة بكالوريوس

[ياسر عباس عبد المجيد]

السلام عليكم..
اخوانى الصيادلة..انا عامل لكم موضوع طبعا منقول ودقيق جدا عن جميع الاوراق المطلوبة لاستخراج كارنيه النقابة وترخيص مزاولة المهنة من وزارة الصحة لأول مرة والتكاليف..امشى معايا خطوة بخطوة..

اول خطوة: حضر الاوراق دى:

اوراق خاصة بالنقابة

1- شهادة تخرج (اصل)
2- شهادة الميلاد (صورة)
3- البطاقة الشخصية (صورة)
4- الموقف من التجنيد (صورة) وخد معاك الاصل
5- 2 صورة شخصية
6- شهادة المعادلة للجامعات الخاصة (صورة)والشهادة دى انت اول ما بتستلم شهادة البكالوريوس بتقدم عليها فى جامعتك وبتدفع رسوم وبعدين بتستلمها بعد شهر تقريبا.
7- صحيفة الحالة الجنائية (اصل)ودى انت بتروح القسم التابع له وبتدفع حوالى 10 جنيه وبياخدوا بصماتك ولازم بطاقتك تبقى معاك وبتستلم الفيش بعد يومين او 3 ايام
حتسلم الاوراق دى بالاضافة الى ورقة بيانات بتاخدها من النقابة مجانا بتملاها وتسلمها مع الاوراق فخد معاك قلم.

الاوراق دى هى اللى النقابة بتاخدها منك لكن لازم تحضر كمان الاوراق دى قبل ما تروح وهى الخاصة بترخيص مزاولة المهنة من وزارة الصحة:

الاوراق الخاصة بوزارة الصحة:

1- شهادة تخرج (اصل عربى)
2- شهادة الميلاد (صورة)
3- البطاقة الشخصية (صورة)
4- الموقف من التجنيد (صورة واصل)
5- 4 صور مختومة بختم الكلية
6- ايصال سداد النقابة (سيذكر لاحقا)
7- دوسيه مفتوح للحفظ (بتاخده من وزارة الصحة ب 1 جنيه)
8- نموذج صحة 13 (من وزارة الصحة)
9- شهادة المعادلة للجامعات الخاصة (اصل)
10- شهادة التشريعات للجامعات الخاصة (اصل) ودى بتقدم عليها فى جامعتك وبتاخدها فى نفس اليوم
11- شهادة حسن سير وسلوك للجامعات الخاصة (اصل) ودى بتقدم عليها فى جامعتك وبتاخدها فى نفس اليوم
12- شهادة تدريب 800 ساعة مختومة بختم الصيدلية والادارة التابعة لها للجامعات الخاصة (اصل)ودى لازم يكون معاها صورة من ترخيص الصيدلية

ملحوظة: الاوراق اللى مطلوب تصويرها ممكن تصورها فى النقابة لما تروح مجانا.

الموقف من التجنيد(الاصل) بيرجعلك تانى مع الترخيص

الخطوات:

بعد ما بتحضر الاوراق دى كلها خد معاك 235 جنيه.
روح الصبح بدرى النقابة وهى فى الشارع اللى خلف دار الحكمة اللى فى شارع القصر العينى..جنب نقابة الاطباء مباشرة.
اطلع الدور الثانى وسلم الاوراق الخاصة بالنقابة وحتدفع 200 جنيه وتاخد ايصال سداد النقابة.

بعد كده حتطلع على وزارة الصحة (من 9 صباحا الى 2 مساءا) ودى حشرح لك مكانها فين بالتفصيل كالاتى:

اطلع على شارع القصر العينى وخلى دار الحكمة على شمالك..وكمل على طول حتلاقى بنزينة التعاون على يمينك واخدة ناصية..سيب الشارع اليمين اللى هى على ناصيته وسيب كمان الشارع اللى بعده هى اليمين اللى بعد كده..يعنى اليمين رقم 3 بعد بنزينة التعاون..

ملحوظة هامة جدا:
بلاش تاخد عربيتك عشان مش حتلاقى خرم ابرة تركن فيه..ولو ركنت صف تانى فى اى مكان حتاخد مخالفة 200 جنيه..والشارع بتاع الوزارة ده اتجاه واحد وممنوع دخوله من شارع القصر العينى..عشان تدخله بالعربية خش اليمين اللى بعديه فى شارع اتجاهين بعدين خش يمين فى يمين لكن مستحيل تلاقى ركنة وحتدوخ ال 7 دوخات..
احسن لك خد تاكسى او اى مواصلة..

بعد ما توصل وزارة الصحة حتقدم الاوراق المطلوبة هناك وحتدفع 10 جنيه دمغة لو حكومة.. و 12 جنيه دمغة لو خاصة
+ 1 جنيه ملف

حتسلم اوراقك للموظف وحيقول لك تلزق الدمغات على الاوراق وتدفع 19 جنيه فى الخزينة.

بعد كده حتستنى حوالى 3 ساعات عشان تاخد الترخيص.

اول ما تاخد الترخيص اطلع على النقابة تانى واديهم الترخيص حياخدوا صورة منه وحيدوك معاد تيجى فيه تاخد الكارنيه وتحلف القسم ومبروك بقيت صيدلى.

اخر حاجة بقى دى صور الورق اللى فيه كل المطلوب منك
وتفبلوا هذه منى لكم:
منــــــــــــــــــــــقول

[Islamicmanners]

ورق وزارة الصحة النقابة هي اللي بتخلصه يا دكتور انت مش بتسافر في حته
نقابة صيادلة المنصورة بتقوم بالواجب و بتستلم كل حاجه منها