أسف .....وداعا!!!

[عبدالله عبدالرحمن]

السلام عليكم ورحمة الله وبركاته

أعزائى أعضاء المنتدى الغالى ...
لم أكن أتوقع ان يكون موضوعى الأخير فى المنتدى بهذا الشكل
ولم اتوقع ان يأتى الموضوع الأخير بهذه السرعة (وأنا تقريبا لم أبدأ بعد فى منتدانا)

عندما دخلت المنتدى أول مرة بعدما سجلت العام قبل السابق كان لمجرد اضاعة الوقت المتبقى فى الأجازة
نعم كان هذا هو هدفى الوحيد.....

ولكنى كلما أمضيت وقتا أكثر على المنتدى كلما زاد حبى له ....
وعلى الرغم انه ليس الأجمل فى الشكل ولا الأثرى فى المحتوى
الا ان حبى له تعمق فى قلبى
أحببت هذا المنتدى لأنى وجدت فيه ذاتى وجدت أشخاص لهم نفس الهدف ويعانون نفس معاناتى
وجدت أشخاص على مستوى عال من التفكير وذو رؤية ثاقبة....
بعد ان كنت فقدت الأمل فى ان أرى صيادلة حقيقيين
يستحقون حمل اللقب الغالى
وبعد ان مللت من رؤية أشخاص لا ينتمون الى جوهر المهنة ولا يحترمون ماوصلو ا له من مكانة
أشخاص لا يعرفون قيمة ما أنعم الله عليهم بدخولهم هذه الكلية

تغيرت نظرتى لطلبة صيدلة ...وأصبحت أكثر أقتناعا بأن التغيير قادم مهما كانت المصاعب والعقبات
وقررت ان اكون جزء من هذا التغيير وان أساهم بأفكارى وجهودى فى تحقيقه

وهنا لى صفحات المنتدى العزيز حاولت بعض الشىء ....
أخفقت مرات فى موضوعاتى...
وأصبت بعض الشىء

ولكن الأن ...........
لم أعد أستطيع

كل شيء أصبح يقف خصيصا ليحبطنى ويمنعنى من الأستمرار
خذلت نفسى ومن حولى..
وأيقنت اننى لا أستحق البقاء
وأن على الأفساح لغيرى

أيقنت ان موعد الرحيل قد حان
وان الأستمرار بات مستحيلا

أنا لا أستحق ان أكون بينكم..
ولذلك قررت أن أرحل
لا أعرف الى كم من الوقت
ومتى سأعود؟؟؟؟!!!
ولكنى سأرحل
لأعود لبناء نفسى
بما يكفى للبقاء....
البقاء بين أشخاص مثلكم

سيقول أحدهم
اذا اردت الرحيل
فلماذا لا ترحل بصمت
ولماذا تقول هذا الكلام
اذا كنت لاترى نفسك أهلا لنا
فنحن لا نهتم بك

أقول أعلم هذا يأخى...
ولكن...
أردت الأعتذار والأسف والندم

الأعتذار لكل من قصرت فى حقه أو تسببت له فى ضيق بأى شكل من الأشكال والأسف على ما ضيعت من وقت الأعضاء فى توافه الأمور والندم على عدم بقائى بينكم وفقدانى لأهليتى للمكوث هنا
وأردت ان تدعوا لى فى رحلتى الطويلة والتى لن تكون سهلة
أردت ان تتمنوا لى التوفيق لأعود
لأعود الشخص الذى كنت أظنه انا على الأقل...

من اليوم لن يضايقكم dark yami بأى شكل من الأشكال
ولن تسمع قلمه يزعجكم بتوافه الكلام

لقدرحل ......................

والله أعلم متى يعود
أوصيكم بالمنتدى وبكلية الصيدلة
أرتقوا بأنفسكم وبها
جاهد من أجل ان تقول وبكل فخر
انا صيدلى ناجح أفدت وطنى ومهنتى والناس
فسلاما سلاما
والوداع لكل أعضاء المنتدى
أدين لكم بكل الشكر والأمتنان بما سكبتم فى روحى من جمال
وبما أكسبتم عقلى من خبرة

وأعدكم انه فى يوم من أيام الله
سوف أرد الجميل

سأشتاق لكم ولكلمة أهلا وسهلا بك د/dark yami
أستودعكم الله حافظ الودائع
.................................................. ..................................

السلام عليكم و رحمة الله وبركاته

[dr/dina]

ايه يا د/dark Yami الكلام الكبير ده.....
ليه الاحباط ده كله؟؟!!
هو فيه حد زعلك فى حاجه و لا ايه...؟؟!!
و بعدين أحنا كلنا هنا اخوات بنستفيد من بعض...
أكيد احنا استفدنا منك و انت استفدت مننا...
ليه بقه هتسيبنا و تمشى.....

[warrior]

لا حول ولا قوة الا بالله
ايه موجة الأحباط المنتشرة الأيام دى
انت نسيت يابنى الشركة بتاعتنا اسمها ايه
اسمها ارفع معنوياتك
اكيد كلامك مش صحيح خالص

ولكن ربنا يوفقك وترجع تانى زى ما انا اعرفك

[lost*soul]

دارك يامى ......

اه الكلام ده كله حرام عليك

ارجع ومتزعلش

كلنا اخوات والاخوات اوقات يكون بينهم زعل بس م معنى كده حد بيسيب البيت ويمشى


ع فكرة الاعضاء الى بتعمل المنتدى مش اى حد تانى ولو عايزة تحقق وتترقى بنفسك ابدا بنفسك هنا واكيد هتلاقى حد بنفس تفكيرك وتتجمعو سوا

[wh_kaboo]

فكرك حلو قوى يا دارك يامى
واحب اهنيك على جراءتك الا متناهية فى الاعتراف ان المنتدى ليس الأجمل فى الشكل ولا الأثرى فى المحتوى واحنا كلنا زيك كنا داخلين نضيع بس بعد كده الواحد اتعرف على اصدقاء من كل الدفعات والمراحل منهم من هو اهل للصداقة ومنهم من اقول لهم اسف انى عرفت شخصية مثلك
بس مش لدرجة انك تسيب المنتدى خالص ممكن تبطل كتابة هنا او هنا ممكن ما تشاركش بس لازم تكون موجود ؟؟؟
وعايز اقولك والله ما انت اللى عايز تمشى بس فيه ناس مشت بالفعل اعضاء الكل بيسال عليها اعضاء كانت هيا اللى مشغلة المنتدى بس زى ما انت قولت واللى اكيد فيه ناس حاسة بيه غيرك بس اللى مش عايز يتكلم اللى مشى فى هدوء.....بس نمشى ليه هوه المنتدى بتاع مين ؟؟؟؟؟
بتاع الادارة ..... لألألألأ
بتاع المشرفين ....لألألألأ
بتاع الكليه......لألألألأ
امال بتاع الاعضاء ..... انا معاك ان المنتدى وللاسف اللى شغال فيه الموضوعات الهايفة جدا (ده مش غلط فى الاعضاء بس دى طبيعة المصرى ) واكبر دليل شوف نسبة المواضيع والمشاركات فى كل قسم وانت هتعرف الدليل ؟؟؟؟؟

وفعلا زى ما قالت زوزو الاعضاء الى بتعمل المنتدى مش حد تانى ؟؟؟؟؟

لو فيه حاجة مضيقاك اتكلم وفضفض مع الناس هتلاقى اللى يسمعلك لو ما كانش من الادارة هيكون من المشرفين او من
الاعضاء اللى اكيد هيلبوا طلباتك ؟؟؟؟؟

بس لا تترك بيتك انت ليك حق فيه ؟؟؟؟

وفى النهاية اتمنى اشوفك موضوع قريب فى المكان المناسب

وتقبل مرورى

[* Esraa_resala *]

اولا شكرا ياكتر شخصيا قبل اى حاجه علشان اغلب مواضيعك فدتنا كتير

وبصراحه مش حل لما تلاقي مشاكل او مساوء فى اى مكان انك تنسحب منه ليه ماتحولش تصلح فيه

وبصراحه المنتدى اغلبه كويس بس لو اغلب الاعضاء هيعملو زى حضرتك كده المنتدى هيقع خالص

والمفروض المنتدى ده وجهتنا وصورتنا قدام اى طلبه من كليات تانيه يعنى لازم نحاول نصلح فيه لو فيه

اى نقص وبجد انا رائ من رائ زوزو المنتدى باعضائه اكتر منغير العضاء ولا حاجه بجد

فياريت حضرتك ماتحرمناش ابدا من مواضيعك المفيده والمهمه ليا والى اكيد بتتحسب فى ميزان حساتك

اكيد وماضيعش ابدا خير من ايديك

[lost*soul]

ياريتك وليد لو تعرفه بجد قابله فالكليه وقوله يرجع مينفعش كده

هو طالب ف كليه صيدليه ووجوده هنا امر طبيعى

كلنا مش هنتفق وهنعدى اختلاف ف اراء

بس لو حسيت انك غير محترم فمكان ابعد عنه

حسيت شخص مش بيحترم ابعد عنه

لكن تبعد عن المنتدى ككل لا طبعا

لو كل واحد هيحصلى مكشله هنا وينسحب ونلاقى نفسنا احسن ناس ف الانسحاب وم المجتمع الصغير للكبير هنضع

ارجع دارك بلاش الكلام ده

ضايقك حد قوله

خد حقك مش تنسحب كده

ف اقرب وقت مستنياك ترجع

فكرك حلو قوى يا دارك يامى

الاحلى منها تاخد حقك وتدى حقوقك

[WhiteBird]

مش عارفه اقول ايه .. بس دارك يامى انت من الاعضاء اللى كنت بحترم فكرهم وبستفاد منهم..والانسحاب مش حل كان من الافضل تواصل معانا وتوصلنا فكرك واكيد هتلاقى اللى يفهمك ونحاول نرتقى بالمنتدى..

ع فكرة الاعضاء الى بتعمل المنتدى مش اى حد تانى ولو عايز تحقق وتترقى بنفسك ابدا بنفسك هنا واكيد هتلاقى حد بنفس تفكيرك وتتجمعو سوا

شكرا زوزو قلتى المفيد..

[d\omnya]

انا مش عارفة اية اللى مخليك تقول كدة بس المهم ان انا بردة كنت بحترم آرائك جدا ومواضيعك كمان والمفروض انك ماتسمحش لحد انة يضايقك وفعلا لو انت شايف انك مش كفء للمنتدى يبقى لازم تصلح من نفسك وتطورها ولو انت شايف ان المنتدى مش كفء يبقى لازم تصلح فية وتطورة واحنا نسمع لآرائك ونحاول نطبقها بس مش تنسحب .وبعدين كلنا هنا اخوات واصحاب وبنقضى وقت حلو مع بعض ومحناش اعداء لبعض.

[Dr nour]

ولكن الأن ...........
لم أعد أستطيع

كل شيء أصبح يقف خصيصا ليحبطنى ويمنعنى من الأستمرار
خذلت نفسى ومن حولى..
وأيقنت اننى لا أستحق البقاء
وأن على الأفساح لغيرى

أيقنت ان موعد الرحيل قد حان
وان الأستمرار بات مستحيلا

أنا لا أستحق ان أكون بينكم..
ولذلك قررت أن أرحل
لا أعرف الى كم من الوقت
ومتى سأعود؟؟؟؟!!!
ولكنى سأرحل
لأعود لبناء نفسى
بما يكفى للبقاء....
البقاء بين أشخاص مثلكم

كلمات محزنه جدا .................أكيد الدافع وراء قولها أحداث كثيره مجهوله بالنسبه لنا
بس اللى أعرفه ان فى كل طريق بنمشى فيها بيكون فيه عراقيل وصعوبات تعوقنا ولو وقفنا عند كل عقبه وتملكنا احساس اليأس والفشل مش هنوصل لشئ
المنتدى ماهو الا اعضاء لأن المشرفين والاداره ماهم الا اعضاء فى المنتدى كمثل غيرهم من الأعضاء ولكنهم يتمتعون بمميزات معينه..................وزى ماذكر قبل كدا ان لو كل عضو ترك المنتدى مش هيبقى فى منتدى أساسا
وكلنا بنخطأ وبنرتكب الصواب ..............مفيش شخص فينا لم يتعرض للحظات كان يشعر فيها أن الدنيا سوداء ............بس لازم نفكر ازاى نتغلب على مشاكلنا ونواجهها وازاى نعرف نتعايش مع الآخرين
_______________________
على العموم الكلام مش هيفيد لأن حضرتك اللى أخذت القرار وحضرتك اللى ممكن تتراجع فيه بس فى شهاده كان نفسها أقولها منذ فتره ويمكن تكون دى آخر فرصه لى لقولها
حضرتك من الأشخاص ذو الأقلام المميزه فى المنتدى ................وذو تعبير خاص
يمكن فى البدايه كنت مستغربه الاسلوب وخصوصا لما كتبت احدى المواضيع وكنت شايفه ان الموضوع ده أوفر بأسلوب صعب جدا وبمهاجمه صريحه وتجريح مبالغ ..........وكنت من أشد المعارضين للأسلوب ده
بس أيقنت بعد فتره انى تجنبت الصواب فى رأيى ..............وأيقنت ان فى بعض الجوانب اللى حضرتك ذكرتها كانت صحيحه جدا
________________________
فياريت حضرتك تتراجع فى القرار ده لأننا هنكون مبسوطين بوجود أخ ذو رأى وفكر يحترم بينا