dr- queen
و د- منار
و عليكم السلام ورحمة الله وبركاته
متزعلوش يا جماعة ,
حتى لو كنتوا انظلمتوا , طالوا بحقكم للآخر و قدموا تظلمات في المواد اللي حاسين فيها بالظلم ..
وان شاء الله يرجعلكم حقكم , و لو مش رجعلكم حقكم درجات في الدنيا هيرجع حقكم حسنات في الآخرة ..
و عادي العضوية أصلا هتحتاجي تقريها قبل سنة ثالثة لأنها هتساعدك كتير عشان تسمية المركبات في الكيمياء الطبية ..
أصل الطبية دي أخت العضوية
فعادي متشيليش همها أوي ..
و مادامك تعبتي فيها , تعبك دة مش هيروح و هتلاقي نفسك عشرة على عشرة في الطبية و الفيتو ان شاء الله ..
عارفين يا جماعة ..
في فلسفتي النتيجة دي عبارة عن ايه ..
النتيجة بالنسبة ليا عبارة عن تقييم الكلية لمستوايا حسب الورق اللي أنا حليته أقصد الامتحانات ..
قد أكون كنت تعبانة في يوم الامتحان و مقدرتش أحل بكفاءة تعبر عني , جايز
قد أكون أنا رايحة الامتحان أصلا مش مخلصة تماما كل حاجة , جايز
قد يكون الامتحان أصلا مش بيقيس فهم الطالب و لا كفاءته كصيدلي , جايز برده
لكن ..
اللي يقيمك بجد شغلك بعدين , و مستواك بعد كدة ..
و كلنا عارفين ان كتير من الناس ممكن يكون متخرج بتقدير عالي و هو مفيش في دماغه أي معلومات ..
يعني أسألكم سؤال ..
كم صيدلي في مصر اتخرج بتقدير ممتاز أو جيد جدا ؟؟ و كم صيدلي اتعين في الكلية مثلا ؟
الاجابة : كتير أوي
مين منهم عمل حاجة جديدة و لها قيمة ؟
الاجابة : .........
مش قصدي ان التقدير دة ولا حاجة , لاااا
لكن قصدي ان التقدير مش بالضرورة يدل على تقييم عادل لينا ..
زي لاعب كرة القدم ممكن يكون ممتاز أوي و لعيب , و ييجي في ماتش الناس تستغرب هو ايه اللي جراله !!
هل ماتش واحد أداءه فيه كان مش كويس أصبح هو دة التقييم ..
حتى لو انظلمتي ,
اوعي تفقدي الثقة في نفسك ..
و لو كل الدنيا قالت انتي مستواكي مش تمام ,
أنا عن نفسي ولا يهمني ..
المهم أنا شايفة نفسي ايه ..
و اللي شايفاه دة هيتحول لحقيقة ان شاء الله ..
و ربنا هيقيمك في المستقبل و هيقيمك في الآخرة ..
لأن المذاكرة دي عليها حسنات طبعا ..
و تقييم ربنا عاااااااااااااااااااااااادل ..
ماتزعلوش يا بنات ..
اثبتي لنفسك مش للناس انك قوية و كويسة و ممتازة ..
ولو في نفسك اقتنعتي بكدة , خلاص بقى ما تهتميش برأي الناس ..
حصل معايا كدة في اعدادي ,
و لقيت واحدة بتقترح اني أحول كلية تانية , طالما مستوايا مش نافع في كلية الصيدلة ..
ساعتها بدأت ميهمنيش رأي الناس ..
المهم انك عارفة انك أحسن من كل دول ..
و امشي حسب قناعتك دي ,
وربنا يوفقكم ..