رسالة يعنى إيه؟؟
يعنى جواب هتبعته لشخص أو مجموعة؟ ولا كتاب فيه شوية نصايح؟ ويمكن يكون بحث مقدمه عشان تاخد شهادة عالية
طب نرجع لورا شوية ونشوف رسالة رسولنا الكريم كانت إيه؟ أكيد طبعا كلنا عارفين إنها دعوة الناس إلى ما أوحى إيه من الله عز وجل والأكيد الأكبر إن دى مش حصة عربي ولا تربية دينية أنا حبيت أقول بس إن كلمة رسالة ممكن يكون ليها معانى كتير والسؤال المهم دلوقتى ... أنا رسالتي ايه؟
طب ليه أتكلم عن نفسي وأفكر لوحدى ما تيجوا نفكر كلنا مع بعض... إحنا رسالتنا إيه؟ كام واحد فينا سأل نفسه فى يوم أنا رسالتي إيه فى الحياة؟ أنا موجود ليه؟ ممكن أفيد فى ايه؟
أكيد واحد هيرد عليا دلوقتى ويقولى طبعا احنا موجودين لعبادة الله وإعمار الأرض... كلام جميل طب يا ترى عملت إيه عشان تحقق الكلام اللى بتقول إنك موجود علشانه؟
يا ترى عملت حاجة عشان تغير فى الحياة حواليك؟ بلاش تغيير فى الحياة خليك فى نفسك عملت ايه عشان تتغير للأحسن وتحس انك انسان له قيمة؟
ليه وجودى فى الدنيا مختلف عن اى حد تانى يعنى مش مجرد اسم مكتوب على ورق بتتغير كل سنة عشان أصبح فى الورق ده ناس موجودة وناس تانية مش موجودة .. ممكن يكون ردك وأنا اعمل ايه؟ انا مخنوق بين جبال الكتب والمذكرات وبذاكر لحد ما ربنا يسهل...
طب انت بتذاكر ليه ؟ يا ترى عشان لازم تنجح عشان اهلك ما يزعلوش منك ويقولوا عليك فاشل واهو فى النهاية يبقى معاك شهادة كويسة هتدخل بيها على اهل عروستك إن شاء الله بدل ما تدخل بإيديك فاضية. ممكن تقولى انت بتذاكر عشان ترتب على الدفعة وتبقى معيد.. كويس لكن هدفك ايه من ده كله؟ الفلوس ولا الشهرة ولا الوجاهة الاجتماعية؟ ولا زى ما تيجي تيجي؟ حتى لو حققت كل ده تعتقد انك وصلت للهدف الاسمي فى حياتك ولا هتكون زيك زي الاف غيرك عدوا على الدنيا ومحدش حس بيهم لانهم باختصار ما تركوش بصمتهم فيها
عرفتوا يعنى إيه رسالة؟؟
وليه اخترنا اسم رسالة؟
ورسالتنا زى اى رسالة نبني ونعمر وننشر الخير فى النفوس
وهدفنا الأول والأخير إرضاء وجه الله سبحانه وتعالي
ونفسنا كل واحد يلاقي رسالته زى ما احنا بنحاول نلاقيها
وربنا يهدينا كلنا لما فيه الخير