إلى دفعة رابعة .........

[Mohamed Al Gohary]

مش عارف ليه أنا متأثر أوى بتخرج الدفعه دي .. يمكن عشان أغلب اصحابي فيها بجد .. لقيت قلمي بيكتب وفي الاخر طلعت بدي .. مش عارف هتعجبكم ولا لأ ..






إلى دفعة رابعة

استنوا شوية
رايحين فين وسايبين الكلية
صدقوني دول أيام هنيه
مش هتتعوض صدقني إنت وهي
يا أجمل صحبه فراقكم صعب علي

بكرة لما تتخرجوا تعرفوا الهم الكبير
وتترحموا على أيام العضوية والعقاقير
اللى هتستنى عريس واللى هيستنى الجيش
واللى هيقعد على القهوه ويضرب حشيش
وكل ما تسأل على شغل يقولك مفيش

ماشي اتخرجوا بس افتكرونا
وكل يوم خميس تعالوا زورونا
ولما ننادي علي اسمعونا
بنحبكم بنحبكم وشكم ورونا
بس اوعوا في يوم من الايام تنسونا

مدرج ومعمل وسحاحه وشيت
وساعت الاجابه أخ نسيت
وواحد تاني يقول ياريتني ماجيت
وفي الشفوي تغرق وتتعلق بخيط

صيدله في القلب وفي العين
رغم انى كنت مقهور ومسكين
وفي كل سكشن يتحط لي غين
ولو اتسالت إنت ليه إنت مين
اقول أنا اللى ضاع من عمره سنين

دفعة 2010 دفعه لها تاريخ
دفعة عملت شربات من الفسيخ
خلوا الخمس سنين اسبوع
وفي يوم التوكسو نزلت دموع
مش على صيدلة عل عدم الرجوع
للسكشن والمدرج والمعمل والجوع
وللى مدمعش وادى الكلية كوع
ولفلان اللى لما تيجي تطلع يقولك ممنوع

دفعة جبر وعجيلة ورشاد والسلاب
خلاص كل الدفعه بقت على الباب
وكله هيقعد في البيت يستنى الجواب
وفي الاخر يطلع بخ سراب في سراب
ويقولك ده محمد اجنن واحمد تاب
وابراهيم سافر وسامح رجع وآب

طولت عليكم عارف بس حبكم بقلبي
عمري ما هنساكم ده وعد قدام ربي
كنتم زملاء كلية وهتبقوا رفقاء دربي
مبروك ياض منك له وداعاً يا حبي

[د\بوسى ربيع]

ميرسى يا محمد بجد على كلامى اللى خلانى عيطت وانا بقراه واحنا عمرنا ما هننسى الكليه ولا هننسى ايامنا الحلوه فيها ولا احسن ناس عرفناهم بس انا زعلانه علشانمكنتش فى الصوره دى ممكن نعمل واحده بعد كل امتحان نظرى

[monaa]

ميرسى يا محمد على كلامك الرائع ده
انا بجد مش كنت حاسه ان هزعل اوى كده لما نقرب نخلص!!!!!!!!!!
الصوره دى جميله اوى مين اللى فكر ف الفكره دى ونفذها بالشكل الجميل ده

[سوزران]

شكرا يا دكتور على المشاعر الجميله دى بس كلنا لها

[إيمان حمدي]

تسلم ايدك يا دكتور محمد بجد كلامك دا رائع
واثر فيا جدا انا مش عايزة اليوم دا يجي
وعايزة اصور في الصورة دي انا كمان

[سندريلا]

شكرا ليك أوى يا دكتور محمد

أحساسك وصلنا جدا

وصدقنى عمرنا ما ها ننسى صيدلة

حقيقى أحلى سنين عمرى

وانبارح بجد كان أجمل يوم فى ال 5 سنين

يوم عمرنا ما ها ننساه

بأحبكم كلكم يا دفعة 2010 يا أجمل صحاب وأجمل ناس قابلتهم فى حياتى

مش ها اوصيك عالكلية يا دكتور محمد دى غالية علينا أوى والله

تحياتى

نهى جميل

[Amira Said]

كلام جميل يا د/محمد،، وعقبال ما تتخرّج ونباركلك

[متفائل]

يا سيدى ع الأشعار

دا شغل كبير أوى

جزاكم الله خيرا

و عقبال ما نكتب لكم

العام القادم بإذن الله


فكرتنى بشوقى و هو بعيد عن مصر




اخـــــتلاف النــــــهار والـــــليل ينسي
اذكــــــرا لـــي الصبا وأيـــــام أنسي

وصـــــفا لـــي ملاوة مـــــن شـــــباب
صـــــورت مــــن تصـــــورات ومس

عصـــــفت كالصبا اللــــعوب ومـــرت
ســـــنة حـــــلوة ولـــــذة خــــــــــلس

وســلا مصر: هل سلا القلب عــــنها
أو أسا جـــــرحه الـــزمان المؤسي

كلـــــما مـــــرت الـــــليالـــي عـــــليه
رق، والعـــــهد فـي الليالي تقــــسي

مســـــتطـــــار إذا البـــــواخـــــر رنت
أول الـــــليل، أو عوت بــــعد جرس

راهـــــب فـــــي الضلوع للسفن فطن
كـــــلما ثرن شاعـــــهن بنــــــــــقس

يا ابـــــنة اليـــــم، ما أبـــــوك بـــخيل
مـــــاله مولعاً بمـــــنع وحــــــــــبس

أحـــــــرام عــــلى بلابـــــله الـــــدوح
حــــلال للـــــطير من كـــــل جـــنس؟

كـــــل دار أحـــــق بـــــالأهـــــــــل إلا
في خبيث مـــــن المـــذاهب رجـــــس

نفســـــي مـــــرجل، وقـــــلبي شراع
بهما في الدموع ســـــيري وأرســــي

واجـــــعلي وجهك (الفنار) ومجراك
يـــــد (الثغر) بــــين (رمل) و(مكس)

وطـــــني لو شـــــغلت بالخلد عـــــنه
نازعتني إلـــــيه في الخـــــلد نفسي

وهـــــفا بالفـــــؤاد فـــــي سلســـــبيل
ظمأ للـــــسواد مـــن (عين شمس)

شهد الله لـــــم يغب عـــــن جـــــفوني
شخـــــصه ساعـــــة ولم يخل حسي

[pharmacistina]

ربنا يكرمكم يااارب

د- محمد أخونا بجد و الكلمة فعلا صادقة , احنا بنحس انكم فعلا اخواتنا يعلم الله ..

أنا كمان لي صديقات بعزهم في سنة ثالثة كتير

خلاص هتبقوا كبار الكلية ..

ادعولنا احنا زعلانين اننا ماشيين ..

ربنا يوفقكم ..

[muna7assan]

ما شاء الله صوره رائعه ., على الرغم ان مش كل الدفعه موجوده بس حاسه ان شخصيه الدفعه كلها واضحه فيهابالتوفيق يا جماعه ويا رب كل واحد يجد ما يتمناه