السلام عليكم
دفعة 2010 الكرام
يا رب تكونوا بخير.. عارفة انكم خلاص بتخلصوا امتحانات العملي وربنا يعينكم على النظري وتخلصوا على خير يا رب
موضوع البحث العلمي:
كلنا نسمع عن المركز القومي للبحوث وعن أكاديمية البحث العلمي
بس مش كلنا نعرف ان شغل الصيادلة هناك عن طريق التكليف
لما تدخلو في الموضوع هتعرفو ان التكليف ينقسم لجزئين
جزء الجهات الداخلية اللي هي الوحدات التابعة لوزارة الصحة
الجزء التاني الجهات الخارجية اللي بيتعمل فيها حاجة اسمها انتداب ممكن تتثبتوا بعدها في المكان ده زي مستشفيات الجامعة وزي المركز القومي للبحوث واكاديمية البحث العلمي
اللي احنا مكناش نعرفه بقى ان التقديم في المركز القومي للبحوث والاكاديمية مش بيكون مع باقي جهات التكليف زي غيره
امبارح سافرنا نسأل هناك في وزارة الصحة ووزارة التعليم العالي والمركز والاكاديمية
لقينا الرد بكل بساطة:" انتو لسه بتسألو؟ انتو كده اتأخرتو جدااا.. زمايلكم مقدمين ورقهم من شهر 8 اللي فات وخلاص استلموا هناك.. الاعلان عن الحاجات دي بيكون اعلان داخلي داخل المركز بس"
اللي هو الكلام ده واحنا لسه بنكتب رغباتنا في الوقت الحالي
يعني دفعتنا خدو شهادتهم وقامو طالعين على المركز قدمو وبدأو شغل واحنا في سابع نومة
واللطيف كمان اننا سألنا هل ممكن نأجل تكليفنا ونقدم مع الدفعة الجديدة وكان الرد ان كل سنة بياخدو من دفعتها مينفعش نعمل حاجة زي كده
انا حبيت أنقل الكلام ده ليكم من دلوقتي علشان اللي بيفكر يقدم هناك يبقى عارف انه لازم يتابع المركز من اول ما يتخرج... وطبعا مش محتاجة اقول احنا في مصر فياريت تدورلك على واسطة علشان الدنيا تمشي معاك
ربنا يوفقكم في امتحاناتكم وحياتكم بعد التخرج