Day 20 ... Final Episode
بعد مرور اكثر من شهر و نص في صيدلية ... بدأت ألاحظ تطورات جديدة ،
في البداية كنت ألقب بـ " دكتورة "
ثم ،،
اكتشفت ان فيه القاب تانية الصيدلي بيتعرف عليها بعد ما يقف في الصيدلية فترة :
1- أبلة \ أستاذة ، مع ان عمري ما فكرت اشتغل مدرسة ولا اي حاجة تمت بصلة لوزارة التربية و التعليم
2- بنتي .. ( دي كنت بسمعها من أم محمد الله يرحمها )
3- طنــط .. ( أطفال طبعا )
4- كتكوتة ... الصيدلية المكان الوحيد اللي ممكن يتقال لحد فيه يا طنط و يا كتكوتة في نفس ذات الوقت
5- باشا .... مش عارفة بعد كده هيسمونا ايـه ..
لو حد اكتشف اسامي تانية يا ريت يقولنا
==================
==========
=====
تعرفوا اللـوجـو ده بتاع ايـه ؟؟
ده بيكون موجود علي العلب و الصناديق المخصصة للتخلص من الحقن و الابر المستخدمة (sharps container )
- طبعا الكلام ده في الدول المتقدمة -
مفيش عندنا في الصيدلية حاجة مستقلة نرمي فيها الحقن ، بتترمي في الباسكت الكبير عادي مع علب الادوية الفاضية و الاوراق و الجرايد و اكياس الشيبسي ... الخ
في صيدليتنا مش بندي حقن ،، عشان كده مش بنستهلك حقن كتير و الأغلب بيتباع مش بيستخدم جوه الصيدلية ..
لكن أحيانا بيتعمل تركيبات تتطلب استخدام حقن
اشهر حاجة أمبول الـ Epidron
و بيتحقن جوه بخاخ الأنف Afrin
بعد ما بنعمل التركيبة بتتقفل الحقنة بالغطاء و بتترمي في الباسكت الكبير
- احيانا مع الزحمة بتتركن الحقنة علي احد الارفف و غالبا في الحالة دي الغطاء بيضيع
فمدربتي بتقوم ترميها عادي في الباسكت من غير غطاء ..
- في ابر تانية شائعة جداااا ، بتبقي صغيرة و بتتركب في جهاز معين بنشك بيها الاصبع و ناخد قطرة من الدم لعمل تحليل السكر
المشكلة بقة ان الباسكت مش بيحلل اللي جواه ذاتيا ،
في ناس وظيفتها توصيل الحاجات دي لمجمع النفايات
و بعدين احتمال يكون فيه ناس بتفرز المخلفات عشان اعادة التصنيع "recycling" ( احتمال مستبعد شوية )
طبعا اكيد في قطط و فران و كائنات أخري بتلعب في المناطق دي
و في ناس غلابة بتدور علي لقمة تاكلها ..
الخلاصة ان الحقن و الابر لما تترمي في الباسكت ده مش المحطة النهائية ليها ، لسه بتتنقل في اماكن تانية فيها ناس و احتمال كبير اوي انهم يتأذوا من الحقن دي ..
يبقة ممكن الصيدلية تكون بتعالج البرد و السكر و الضغط و في نفس الوقت بتساعد علي انتشار الـhepatitis و أمراض تانية بتتنقل عن طريق الدم ..
يا ترى الصيدليات اللي بيتعطي فيها حقن بشكل مستمر بتتصرف ازاي
و الأهم السيرينجات اللي بتتصرف كل يوم من الصيدلية الناس بتتعامل معاها ازاي
مش عارفة ..
ممكن نحد مش المشكلة دي بإننا نستخدم علبة او حتي برطمان بلاستك و يبقي ده المكان اللي بنرمي فيه الحقن و الابر و اي حاجة حادة ،
بحيث تبقي منفصلة تماما عن المخلفات التانية ..
و ننبه الناس اللي بتستخدم الحقن خصوصا اللي بياخدوها بصفة مستمرة زي مرضي السكر مثلا ، الاستجابة مش هتكون بنسبة 100% بس علي الأقل هتحس انك قدرت تنصح الناس و تعمل حاجة مفيدة اثناء تدريبك في الصيدلية
==================
========
====
.. Done ..
كده انتهت " يوميات BoNbOoNa في الصيدلية " ..
اشكركم جميعا من كل قلبي علي الدعم و المتابعة
و سامحوني علي التأخير و علي أي تقصير أو خطأ صدر مني ،،
اتمني الفكرة تستمر و الصيف الجاي ان شاء الله يتم افتتاح صيدليات كتير علي صفحات المنتدي أجمل و اقيم .. و اكيد ان كتب الله لي البقاء هتابعها بكل شغف
في مواقف كتير مش بعرف الاقي كلام مناسب اقوله فيها ... و ده واحد منهم
فقررت اختم بالدعاء اللي بدأت بيه في أول اليوميات
... اللهم آميــــــــن ..
~ الحمد لله الذي بنعمته تتم الصالحـات ~