السلام عليكم ورحمه الله و بركاته
أهلا بشباب أعدادي صيدله ...... هتنوروا الكليه السنه دي ^____^
من 3 سنين بالظبط ......
كنت قاعد زيكم بالظبط علي النت ببحث و بدور و بشوف أي معلومات عن صيدله
وبصراحه الواحد في البدايه بيحس انه خايف و قلقان و متوتر
بس مع الوقت الموضوع بتتعود عليه ... وهتحب الكليه جداااا
______________________________
ياتري ليه دخلت صيدله و ايه اهدافك ؟؟؟؟
______________________________
هل هو مجرد دخولك كلية من كليات القمة ... وهي 5 سنين وأتخرج .. وآخد لقب دكتور وخلاص .. ؟؟
اوعى يكون هو ده السبب اللي خلاك تختار الكلية دي ...
خلي عندك هدف أسمى من كده وهوا انك تقدر تعمل حاجه مفيدة ... لغيرك .... لبلدك ..
______________________________
بخصوص الدراسة في السنة الإعدادية
______________________________
في البداية لازم يكون معاك قاموس ... ويفضل يكون قاموس طبي سواء إلكتروني ...أو كتاب ... أو حتى على الموبايل ...
لأنك هتحتاجه بشكل كبير خصوصا في الأول
لأن زي ما احنا عارفين الدراسة هتكون بالإنجليزي ومعظم المصطلحات هتكون مصطلحات علمية ..
المواد عندنا عبارة عن ( لغة ونبات وحيوان وفيزياء وكيمياء )
بالنسبة للنبات // فهو بيكون فيه حفظ بكمية كبيرة وبيكون شبه مادة الأحياء اللي درستها فالثانوي
الحيوان// بيكون فيه مصطلحات كتير جديدة وبيكون فيه جزء تشريح ضفادع ... والتعرف على أجزاء الجسم
الفيزياء والكيمياء // ... مش هيختلفوا كتير عن اللي درسته فالثانوية العامة بس مع توسع إلى حد ما ... وطبعا باختلاف اللغة اللي درستهم بيها
واللغة // دي بتكون ماده من خمسين درجه سهلة أوي ومافيهاش حاجه .. وهي عبارة عن قواعد إنجليزي خفيفة كده ..
______________________________
بخصوص كيفية الدراسة والمذاكرة .....
______________________________
لازم على مدار الأشهر تجرب كذا طريقة وأكتر من وقت للمذاكرة وتشوف أنسب الطرق وأكثرها فائدة وتركيزا بالنسبة ليك ... ولازم تعرف أن مذاكرة الثانوية العامة حاجة ... ومذاكرة الكلية حاجة تانية خالص ...
أكيد فيه ناس بتسأل .. طب أذاكر منين ؟؟ مفيش كتب وزارة ولا حاجه ؟؟
الدكتور الي تفهم منه احضر له ....واكتب وراه
الدكتور الي مش تفهم..... منه بلاش تضييع وقتك علي الفاضي
المحاضرات بتنزل مكتوبه في 3 مكتبات : (( بيبر .....ميدان ....الفجر))
و كل الدفعه بتجيب المحاضرات دي عشان تذاكر منها
لأن المذاكره من الكتاب صعبه جداااااااااااااااا
فالبداية هتحس بنوع من التوهان وإنك مش هتنجح السنة دي و...و...
بس لازم تعرف إن الإحساس ده طبيعي جدا وكلنا حسينا كده فالأول ... وفي نهاية السنة جبنا أحلى تقدييييييير
__________________________________________________
و في الاخر و الاول
احنا اخواتكم الكبار و هنكون معاكم دايما باستمرار و هنساعدكم ان شاء الله
أخوكم محمد عليوه
أمين.م لجنه الاسر باتحاد الطلبه