فضفضه مع الامتحانات

**ahmed helmy** · 07-02-2010, 04:30 PM

طبعا كلنا كرهنا السيره دي ومحدش عايز يتكلم فيها ونستمتع بالاجازه ونعيش شويه بقي
بس هنا كل واحد هيقول ايه الانطباع اللي خده عن الامتحانات من وجهه نظره هو يعني كل واحد يتكلم من حيث
اسهل امتحان او اصعب امتحان
اكتر دكتور كان متعاون معانا في الامتحانات
اكتر دكتور عجزنا في الامتحانات
المواد اللي انت مطمن للنتايج بتاعها
المواد اللي انت مقلق منها
اكتر موقف ضحكك وانت بتمتحن
عجائب وغرائب الشفوي
اكتر ماده تعبت في مذاكرتها
الماده اللي انت قصرت فيها
يعني كل واحد يتكلم عن الحاجه اللي هو عايزها

**Pharmcist_girl** · 07-02-2010, 04:40 PM

هو بصراحه اكتر دكتور قدر موقفنا والضغط اللى علينا هو د_طارق مع احترامى الاكيد طبعا لكل الدكاتره

**ahmed helmy** · 07-02-2010, 04:49 PM

المشاركة الأصلية كتبت بواسطة ahmed helmy

اسهل امتحان او اصعب امتحان
الاسهل فارما والاصعب مدسنال)
اكتر دكتور كان متعاون معانا في الامتحانات
الدكتور طارق والدكتور عبد الله موافي
اكتر دكتور عجزنا في الامتحانات
الدكتور جلال معتوق
المواد اللي انت مطمن للنتايج بتاعها
الفارما والصيدلانيات
المواد اللي انت مقلق منها
الفيتو والمدسنال
اكتر موقف ضحكك وانت بتمتحن
لما دخلت امتحان الفيتو كنت مزاكر فولاتيل حلو والالكالويد مش قوي المهم بقول للي جنبي انت مزاكر حلو قالي الالكالويد قولتله حلو قوي يبقي نظبط بعض لو في اختياري او اكمل او حاجه سهل تتغش قالي ماشي
المهم بدانا الامتحان بعد 10 دقايق ابصله مبيكتبش قولت يمكن بيشوف اللي عارفه في الفولاتيل
بعد تلت ساعه ابصله برضه مبيكتبش قولت يمكن بيشوف الاسئله كلها الاول عشان يشوف اللي عارفه ويبدا حل المهم فات اكتر من نص ساعه ومكتبش كلمه قولت الموضوع ده فيه ان
بقوله في ايه بضحكه كده ردلي الضحكه وقالي (متحاولش) المهم سبته وقولت هو شكله مضايق من الامتحان
بعد ساعه لقيت المراقب بيقوله بص في ورقتك قولت بس يبقي بيحاول يغشلنا ربنا يعينه قاله فات نص الوقت قاله اي قام مسلم الورقه وخارج من غير ما يكتب ولا كلمه وهو خارج انا رميته بنظرات ولسان حالي (طب والالكالويد)
عجائب وغرائب الشفوي
دكتوره الصيدلانيات بتقولي انت شكلك مزاكر

اكتر ماده تعبت في مذاكرتها
الفيتو والبيو
الماده اللي انت قصرت فيها
الاساي بس ربنا سترها معايا في امتحان النظري
يعني كل واحد يتكلم عن الحاجه اللي هو عايزها

وكله كوم والتربيه العسكريه كوم

**Sincerity** · 07-02-2010, 04:54 PM

المشاركة الأصلية كتبت بواسطة Pharmcist_girl

هو بصراحه اكتر دكتور قدر موقفنا والضغط اللى علينا هو د_طارق مع احترامى الاكيد طبعا لكل الدكاتره

ودكتور سعيد بيومى ودكتوره سعديه ودكتور اسامه
دكتور شحته برده بس المشكله معايا كانت ف الوقت
وطبعا مع احترامى لكل دكاترتنا الافاضل

**queen** · 07-02-2010, 05:01 PM

بالنسبة ليا
احسن مادة حليت فيها هى الفارما
يعنى احسن درجة هتبقى الفارما بس فى البيبر لان العملى مضروب خالص
بالنسبة لباقى المواد مش حليت كويس
مش عارفة السبب منى ولا من الامتحان

اهم حاجة ان الامتحانات عدت بسلام ونركز بقى الترم التانى
اكتر موقف ضحكنى هو فى امتحان الاساى وانا بحل جزء الاحصاء افتكرت الاحصاء بتاعة ثانوى
اما الشفوى بقى
فأغرب شفوى معايا كان المديسينال

من الساعة 2 لغاية 3.30 كان العامل بيقول ان الدكتور بيتغدى وفجأة سمعنا انه لسة مجاش اصلا من اسكندرية وقالو انهم هيوزعونا وقد كان
وفعلا اتوزعنا عند دكتور نجلاء
وكانت بتدخل واحدة بواحدة وبعد عناء طويل وصلت على الباب وفجأة لقيتها بتقول خلاص يا جماعة الباقى ينزل عند دكتورة ماجدة الشربينى
نزلنا لقينا زحمة فظيعة برة وجوة وحصل اللى حصل بقى
المهم طلعت لدكتور محمد ابو بكر وقلتله
قالى خلاص انا همتحنكو وقفنا برة شوية ودخلنا لقينا دكتورة نجلاء موجودة فى المكتب وبتمتحن طلبة وهى اللى امتحنتنا برده
الحمد لله
ان الامتحانات عدت باقل الخسائر وان شاء الله ده مش يتكرر الترم التانى
معلش طولت عليكو
بس كنت مستنية حد يعمل الموضوع ده لانى كنت خايفة اعمله تضربونى علشان فكرتكو بالايام الحلوة

**Mohamed Al Gohary** · 07-02-2010, 05:11 PM

يااااه ايام والله

الفيتو بدات بالكالويد واكدت عليها .. كله قال لى خلاص ياعم انت كده ضمنت الفولاتيل هتخلص على طول .. اذاكر فيها مش ممكن مش عاوزه تيجي ابدا ومش عارف امشي فيها .. لحد ما بعت رساله للناس كلها .. يافايتو يا مغلباني فيكي حاجه مجنناني .. الالكالويد بتخش فى بعضها والفولاتيل بتخش فى ثواني ..

الشفوي كان كويس الحمد لله بستر ربنا ..

طبعا يومها بدانا فى البيو .. مفيش وقت .. نو تايم .. ولاول مره فى حياتي اطبق يومين ورا بعض ومانمش .. وانا كنت من الحزب التعيس اللى ذاكر الفايتامين وساب الليبيد ... لا وانا بذاكر اقول ان سؤال دكتور احمد ربيع هييجي مكتوب جمبه " وقف لله تعالى " وقبل ما ابدا احله اقف دقيقه حداد .. واقرا الفاتحه

خرجت من الامتحان طبعا قرفان .. وروحت الشفوي على طول .. وكان اول واخر مره اخش الشفوي بدري .. والحمد لله مكنش يفرق كتير عن النظري

..

جينا بنكلم يومها ايه يا جماعه هتعملوا ايه فى الفارما .. ردوا العيال فارما ايه ياعم .. دى قدامها 3 ايام بحالهم

بدات بجزء الدكتور حسن .. وبعد كده دكتور طارق .. ودخلنا الامتحان وكان كويس جدا .. والشفوي كان عند دكتور حمدي غنيم .. دكتور زي العسل والله .. كنت اخر واحد ادخله .. تطبيقا لمبدا ان الدكتور اللى يستناني مش انا اللى استناه

.. قالى معدتش فى حد بره قلت له لا .. خرج بره وقعد ينادي .. ايوه لجنه 12 .. لجنه 12

قال لى ها مذاكر ايه ؟؟ قلت له كله بس جزء الدكتور شحته خدته اخر يوم كده بسرعه .. قال لى طب خلاص بلاش جزء الدكتور شحته .. نسال فى الـ GIT .. عثل والله يا دكتور .. راح لافف كده وبص لى بجمبه وقال لى عارف الهيستامين .. وكملنا ..

الاساي طبعا كلنا قلنا مذاكرينها قبل كده .. وبدانا فيها متاخر .. واكدنا على جزء الدكتور شحته .. وشوفنا جزء الدكتور دينا .. واتفقنا كلنا نبدا بحل جزء الدكتورة دينا على اساس انه هيبقى كويس وبعد كده نشوف جزء الدكتور شحته .. وفوجئنا باللى حصل واخر سؤال فى جزء الدكتور شحته اللى بـ 16 درجه

الشفوي كان عند دكتورة اسمها حنان اكسترنال .. وبرضه تطبيقا لمبدا ان الدكتور اللى يستناني مش انا اللى استناه .. دخلت لها اخر واحده .. وجاوبت معاها ..

نيجي للميديسنال .. بدات بجزء الدكتور سعيد .. وكان الفارما عامله شغل كبير اوى .. وبعدها جزء الدكتوره سعديه .. وخدت جزء الدكتور محمد مصطفى وجزء الدكتورة داليا مع بعض .. وقعدت اراجع فى جزء الدكتور سعيد على اساس انه هيبقى اصعب جزء فى الامتحان واستراكشرات وكده .. وفى الاخر ييجي اسهل جزء .. لا وكل ما يسال على استركشر يجيبه مرسوم .. قلبت عليا مواجع الفيتامين ..
الشفوي كان عند واحد اكسترنال .. جيت اروح له كالعاده متاخر .. لقيته مشى .. روحت للدكتور محمود بكر ..
الصيدلانيات بقى كانت حكايتها حكايه .. كله كان متكل انه هيسيب جزء الدكتور محاسن ويخش بالمسائل بس .. بس انا مكنش ينفع اعمل كده لانى كنت ابدعت فى العملي .. ومسلمتش ولا لبوسه واحده

.. فكان لازم اخلص كله .. وللاسف لا خلصت كله ولا جمعت اللى ذاكرته .. انا ملهم ..

..

وفي الشفوي اتاكدت ان الدكاتره عرفوا المبدا بتاعي وبداوا يطبقوا عكسه .. الدكتور معدتش بيستناني .. عاد بيروح

..
روحت للدكتورة اللى انا عندها لقيتها روحت .. روحت لدكتور اسامه قلت له قال لى روح لدكتور اسماعيل رمضان .. سالني سؤال واحد اداني E+3 .. قلت خير يارب ..

عدت .. وكون انك تخلص امتحانات سنه تالته وانت كويس وصحتك كويسه .. وصوابعك لسه زى ماهم 10 صوابع .. فده في حد زاته انجاز .. فالحمد لله

**محمدابراهيم سلمان** · 07-02-2010, 05:45 PM

فى شىء غريب فى الدفعة دى حتى فى الاجازة ميحلاش الكلام الا فى الامتحانات ياجماعه الله يكرمكم محدش يفتح السيرة دى تانى مش هيبقى انتوا والتربية العسكرية عليا
-----

المشاركة الأصلية كتبت بواسطة Gohary