السلام عليكم ورحمة الله وبركاته
بعد التحية للجميع ..
ميـــن فينا جرب مرة يكتب مذكراته ؟؟؟؟
طيب مين بيداوم على كتابتها ؟؟
طيب أكيد كلنا عندنا صور في مراحل عمرنا المختلفة ..
في بداية موضوعي أحب أوضح - من وجهة نظري - فايدة كتابة المذكرات ..
المذكرات فقرات بسيطة بنكتبها بتسجل حاجة في حياتنا ..
ممكن ذكرى حلوة ..
ممكن ذكرى حزينة ..
ممكن ذكرى غاضبة ..
ذكرى طموحة ..
أو خطة للمستقبل ..
انتقاد لحياتنا ووضعنا ..
مذكرات عتاب النفس وحسابها وما أصعبها و أكثرها ..
و من أهم المذكرات المذكرات اللي بتوصف شخصيتنا وكمان المذكرات اللي بنقرر فيها نغير شخصياتنا للأحسن ..
المذكرات مش تضييع للوقت ..
بالعكس المذكرات في رأيي أحسن من الصور الفوتوغرافية ..
لأنها بتحفظ الاحساس و الفكر أما الصورة بتحفظ الشكل ..
وكمان لأن المذكرات أقدر أشوف منها هل أنا في تقدم للأحسن من حيث السلوك و القيم وغيره ولا تأخر للأسوأ ..
المذكرات الطموحة و الخيالية ..
بقول فيها نفسي أكون كذا ..
نفسي أعمل كذا ..
تعقبها مذكرات سعيدة أنا كنت كذا و عملت كذا ..
تعقبها مذكرات الشكر ( سبحانك اللهم وبحمدك , عدد خلقك , ورضا نفسك , وزنة عرشك , ومداد كلماتك )
أحيانا خصوصا بالنسبة ليا ..
قد تغني المذكرات عن الصديقة ..
و الله لن تجد من يحفظ سرك مثل الورقة و القلم ..
بس بشرط انك تخبيهم كويس من الناس ..
خبيهم من الناس , ويمكن بكرة ييجي يوم تعطيهم لأولادك مثلا أو لحد انت بتعزه تقوله ( شوف ازاي أنا كنت زمان ) ..
ممكن انت تقرأهم وتضحك على نفسك زمان ..
مذكراتي أنا بكتبها بتواريخ الأيام و الساعات والدقايق ..
كتابة المذكرات - في رأيي - شيء بناء جدااااا
و أنا بكتب قريب قلبت عدة صفحات في الكشكول ..
لقيت بعض الحاجات المكتوبة بتسجل عبرة من الحياة ..
عبرة عرفتها مش من النصيحة ولا قريتها في كتاب..
عبرة من الحياة من موقف حصل معايا أو مع حد قريب مني فأثرت فيا ..
.حابة أعرض بعض هذه الخبرات و المواقف بشكل غير مباشر ..
لعلها تقنع غيري وآخد بيها ثواب ..
ملحوظة هامة : أنا مش أحسن من أي حد هيقرأ موضوعي عشان أقوم بدور الواعظة ..
لا بالعكس قد تكونوا جميعا أفضل مني ..
الملحوظة التانية : الموضوع عااااااااااااام .. كلنا نكتب فيه بنفس الطريقة .. وبجد بتمنى حد يشارك بأي مذكرة من عنده .. اكتبوا بالعربية الفصحى .. بالعامية .. بالانجليزية .. كلها مذكرات .. مش بطلب من حد يقول أسرار مذكراته .. لكن بقول نكتب العبرة أو الموقف اللي حصل معانا ..
صفحات من مذكراتي قابلة للنشر موضوع مستمر و عاااااااااااااااااااااام