تأثير الجامعة على كل واحد فينا

[محمد وجدي]

بمعنى هل غيرتك للأحسن ولا للأسوأ؟


في الدين ولا الدنيا

ممكن الصحبه تغيرك للأحسن

والعكس


امبارح كنت قاعده مع واحده صاحبتى(الأنتيم بتاع ثانوى)
لقيتها بتقولى:

بجد أحسن حاجه في الدنيا بعد الزوجه الصالحه
هي الصديق الصالح

ربنا يخليلك صاحبتك



فاكرة أيام ما كنا بنصوم اتنين وخميس؟
فاكرة لما كنا بنفكر بعض بالأيام القمريه ؟
فاكرة لما كان لو حد فينا صام من غير التانى تبقى خناقه؟
فاكرة لما كنا بنتصدق بكل الفلوس اللى معانا حتى لو محتاجينها؟
فاكرة لما كنت اقولك ابعتيلى الفلوس اللى معاكى فى ظرف النهارده ضرورى عشان هنعمل عمل خير؟
فاكرة لما كنا منخلعش الجوانتى حتى فى امتحانات ثانوى؟
فاكرة لما كنا نقول الأذكار واحنا ريحين المدرسة الصبح ومنتكلمش غير لما نخلصها؟
ونقولها واحنا راجعين المغرب من الدروس؟
فاكرة لما كنت اقولك انتى بتقولى ايه فى الأذكار ونقول لبعض ونرتب أذكارنا بحيث نقولها بطريقه معينه مع بعض؟

فاكرة ال 11 ركعة بتوع قبل النوم؟
فاكرة السنن اللى لو كنا بنموت منسيبهاش؟

يااااااااااااااااااااااه!!!
فين الأيام دى؟
كان فيها بركه فى كل حاجة فى حياتنا

مدعيتش دعوة غير وربنا استجابها منى
تخيلوا انى دعيت ربنا أجيب 50 فى الأحياء
أقسملكم بالله انى الوحيده فى المدرسه اللى جبت 50 .

كنت بشوف أحلام ربنا اللى يعلم بيها وحده
ومكنتش بقولها لحد.
كنت بحس ان ربنا معايا فى كل مكان
وانه حاسس بيه فى كل حاجه
وانى ازعل قوى لو حد غضب ربنا

كانت حياتى كلها مع ربنا
أتكلم معاه وأشكيله كل حاجه
عمرى ما اتكلمت مع أمى فى مشاكلى.

تخيلوا مرة كان عند ناس جيرانا فرح
وأغانى بقى ونظام

بكيت بكاء مرير عارفين ليه؟
حسيت ان ربنا زعلان.
كنت عايشه احسن عيشه
وكان قلبى مرتاح حتى لو تعبانه لأنى حسه انى مع ربنا وانه مش هيخيب رجائى فيه أبدا

ايه اللى حصل؟
عاوزة بجد أعرف ده بسسب ايه؟

العيب فينا ولا فى الجامعه نفسها؟

بجد مستنية ردودكم ان شاء الله
عاوزاكم تجاوبونى
اتغيرتوا للأحسن ولا للأسوأ؟


في ناس مش ببتغير خالص
وايه السبب؟
وازاى نرجع زى ما كنا ان شاء الله؟

الرجوع الي الله طبعا

جزاكي الله
خيرا
علي مواضيعك اللي دايما
متميزه بجد

انا عن نفسي الكليه غيرت في

حاجات
كتييييييييير

خلتني اعرف ناس ملتزمه

وناس مش .........


وناس كويسه

وناس برضه مش ................


وكتبت اشعار كويسه

وقصص قصيره في الكليه


وقمصان ياما عندي باظت

من تأثير

conc. H2SO4

[*محبة رسول الله*]

لأ من حيث الهدوم الل باظت عااااااااااادى

انا باظ عندى ملحفتين بسبب الحكاية دى

انا اساسا مش بشتغل فى المعمل خااااااااالص
بس دول باظوا فى امتحان العملى......

انا مرة ..... مرة يعنى مش كالعاده كنت بعمل دراى هيت
فالإزارة فرقعت وطارت فى وشى والنقاب بتاعى بقى شوااااااااارع وفضلت أضحك على نفسى

يعنى المرة اللى أشتغل فيها كل ده يحصلى

يلا خير ان شاء الله
النقاب ده مسمياه نقاب العضوية مخصص ليها وبس وعليه ألوان بقى وحالته صعبة خاالص

ربنا يهدينا يا رب

انا قعدت مرة أتكلم مع أختى فى موضوع التغيير ده وكنت هعيط
بقولها انا حسه انى اتغيرت كتييير قوى عن زمان.....

لو أختى الصغيرة كانت لبست اى كلام او كده يعنى كل الناس تقابلها تقولها فين الحاجة هاله؟؟؟

هو يمكن لأنى كنت بعمل حاجات جامدة حبتين فعشان كده حسيت بالفرق.....

ربنا يهدينا يا رب
بجد ربنا عالم بنيتى
نفسى قوى أرجع لو نص ما كنت عليه زمان

وحسه ان شاء الله انى هرجع لانى صادقه فى نيتى قوى......

اللهم إنى أسألك الهدى والتقى والعفاف والرشاد والغنى

[محمد وجدي]

إن شاء الله يادكتوره ترجعي أحسن من زمان


اللهم ردنا الي دينك ردا جميلا