مطلوب اجابة البنات فى الموضوع ده

[محمد سمير]

طبعا احنا كلنا عارفين ظروف الحياه الوقتى وغلاء الاسعار اللى شامل كل حاجه تقريبا

بما فيها الارتفاع الفظيع فى اسعار الدهب

واللى اسعاره حاليا كالتالى للى مش متابع

عيار 18 249 جنيه

عيار 21 291 جنيه

عيار 24 333 جنيه

الجنيه الدهب 2347 جنيه

ده سؤال هسأله للبنات عشان يجاوبوا عليه

لو اتقدملك عريس وهو كويس وفيه صفات فتى احلامك

بس مش هيقدم فى الشبكه نظرا للارتفاع الشديد فى اسعار الدهب

غير دبلتين وخاتم او دبلتين ومحبس او دبلتين بس

وان شاء الله بعد ما تتجوزوا ربنا يسهله ويجبلك اللى انتى عاوزاه لما الظروف تتحسن

وطبعا السعاده مش فى الدهب ولا الفلوس ولا البيت الكبير

السعاده ان الزوجين يكونوا فاهمين بعض وبيكملوا بعض ويقفو جمب بعض وقت الازمه

شفنا كتير من الازواج معاهم فلوس كتير بس مش مبسوطين

وشفنا ازواج تانيه حالتهم الماديه عاديه بس عايشين ومبسوطين مع بعض

ياترى هتوافقى ولا لأ ؟؟ مع ذكر سبب الموافقه او الرفض

[Hope1]

الصراحة الصراحة لو كنت اتعرضت للموقف ده مكناش هوافق لان الشبكة بتدي مصداقية أي نعم مش هنفرض شبكة معينة و لا الكلام ده يعني علي حسب امكانياته
انا أبويا اللي طلع من بوء خطيبي مناقشوش فيه اصلا الحمد لله انا بفخر بالموضوع ده
أنا شايفة حل وسط انه ممكن يجيب أسورة و دبلة و توينز
و أصلا أكيد لو جوزي احتاج الشبكة دي بعد الجواز مشروع أو شقة أو حتة ارض مثلا اكيد هديهاله يعني قصدي انها فوس متحوشة يعني مش هتترمي لكن الصح مثلا لو ظروفه المادية نص نص زي كل الشباب أكيد هنختصر في الشبكة (الحفلة أقصد) و الفرح و الفستان و الكوافير و الكلام الفاضي ده
ده صح اللي فلوس مرمية لكن رأيي ده مش مطلق يعني لو اتنين بيحبوا بعض أوي و هو اتقدملها يبقي البنت ساعتها غبية لو مش اتنازلت لان صعب دلوقتي الواحد يلاقي حد بيحبه
أرجو ان الرأي ميكونش صادم خصوصا انه أول كومنت في الموضوع

[أمــ هـنـد ــة الله]

اول مـا شفت العنوان خمنت الموضوع اصل دا حديثنـا احنا كمـان ^^

انـا مش هطول فى الكـلام بس الخلاصـة ان بعض البنات بتكـون مقدرة كل اللى حضرتك بتقولـه دا ومقتنعـة بيه بل مش عايزة غير الدبـلة بس طالمـا الشخص كويس

بس مش هيـا اللى بتقعد وتتفق اهـل العريس والعروسـة الرجـال منهم هما اللى بيقومو بالمهمـة دى ^^

عشـان كده البـنت تفتـح مع اهلهـا موضوع الشبـكة دى وتعرض رغبتهـا ووجهـة نظرهـا

لانـهم ممكن يكونو فـاكرين ان البنت نفسهـا ف شبكـة كبيرة و مش هيبقو عايزنهـا تحس انها اقل من حـد - فى اعتقـادهم يعنـى -

وربنــا يهدى الجميـع ويرزقنـا السعـادة وراحـة البـال دى اهم حـاجة بجـد

[Dr\Emy]

الواحد متعرضش لحاجة زي دي
في الغالب اللي بييجي بيبقي جاي وعامل حسابه انه هيجيب شبكة وكدة
بس اعتقد لو ده حصل هتبقي مثلا تلبيس دبلتين لحد ما ربنا يكرمه ويجيب بقيت الشبكة
خاصة لو كان متدين واخلاقه كويسة ومستقبله كويس واهله ناس محترمة
مش هتنفعني الشبكة بعد الجواز لوكان بني ادم مش كويس
وده حصل مع ابن حالتي اشتري دبلتين عشان بس البنت مش تتخطب لحد تاني
وسافر وبعد كدة لما قدر وبقي معاه فلوس اشتري الشبكة واهلها كانو مرحبين
خاصة انه لسة متخرج وعارفين ان مش معاه اي امكانيات
وبعدين الشبكة حاليا بقت مشاركة بين الاهل وده حصل مع اختي
والدي دفع جزء وجوزها دفع جزء
فاعتقد ان ده مش هيبقي معوق ابدا

[jojo_m]

انا شايفه ان مفيش مشكله يا دكتور بس دا فى حالة لو هو فعلا كويس ومتدين وصادق فى كلامه ومش بيمثل انه كويس شويه فى الاول بس
بس اهم حاجه ان الناس اللى قادرين ميقولوش بركه يا جامع ويستخسرو يجيبو شبكه
او بسبب كلامنا دا تلغو الشبكه نهائى واهو الناس توفر
بس من ناحية انه يجيب شبكه بعد الجواز فدى صعبه شويه او مش واقعيه ولو حد قال كده يبقى قد كلمته ولو مش هيقدر يبقى ميقولش من الاول وانا شايفه انه عادى لان السعاده مش بالدهب والمظاهر بس اهم حاجه ان الراجل يكون واقعى وميعشمش خطيبته بحاجات وفى الآخر متحصلش
لان كل دى حاجات هامشيه وعمرها ما بتكون سبب فى السعاده
وربنا يرزق كل البنات بازواج صالحين وكل الشباب بزوجات صالحين

[dr emy.hassan]

لو الشخص ده هو الانسان اللى بحلم بيه واللى هكون سعيده معاه فاكيد هوافق
بس المشكلة يا دكتور نتأكد ازاى ان الشخص اللى متقدم ده كويس فعلا ومش بيمثل انه كويس
الجواز بالذات نصيييييييييييييب وقدر ويارب يجعل نصيبنا كويس وفى ناس كتير بتخدعوا وبيلاقوا كل حاجة بتختلف بعد الجواز
وفى الاول والاخر اهم حاجة السعادة ولو كان كويس وهيسعدنى فاكيد مش هتفرق الفلوس والشبكة
بس المشكلة مش فينا فى الاول والاخر ده رأى الاهل واكيد هم بيشوفوا الاصلح لينا
بس انا مشفتش حد قبل كده مجابش شبكة ممكن بتتأجل مع كتب الكتاب لكن محدش يجيب خالص دى مشفتهاش

[NeScaFE]

والله يا دكتور انا شايفة ان السعادة عمرها ما كانت بالفلوس ولا بالمادة

وطالما الانسان اللى جاى بيحبنى وشارينى واخلاقه كويسة يبقى ايه المشكلة

ولو عيبه وده ممكن كمان منعتبروش عيب ان ظروفه المادية تعبانة شوية فده مش سبب يخلينى ارفض انسان بالمواصفات دى عشان دهب

وممكن نختصر الشبكة فى دبلة وتوينز وخاتم ولو كانت دبلة بس مش مشكلة اهم حاجة الانسان نفسه

وطالما هو كويس هنعدى ظروف الحياة سوا وبكره يجيب لمراته بس اما ظروفه تتحسن واكيد هيجيب طالما مش بيستخسر فيها حاجة

من حيث الاهل فدى حاجة نسبية يعنى ناس شايفة انه لازم بنتهم يجيلها شبكة و نادى وهيصة كدابة بس هما معذورين انهم برده عاوزين مستقبل وحالة مادية كويسة لبناتهم

بس دول بعتبرهم تفكيرهم محدود

وفى ناس تانية اهم حاجة عندها انها بتشترى راجل هيحافظ على بنتها ويصونها وساعتها مش هتفرق لا شبكة ولا غيره ( فى ايه جابلها شبكة وفى ايه باعتها بعد الجواز )

بس هقول حاجة برده بغض النظر عن رأى الاهل ايه ..هو مش فى الاخر برده الراى راى ومفيش حد بيتجوز غصب عنه ؟! طب ايه اللى هيخلينى اوافق على حد مش كويس عشان هيجبلى شبكة !!

من الاخر اهم حاجة يكون الانسان ده شارينى وبيحبنى وهيحافظ عليا ولو ظروفه ملخبطة شوية ربنا ان شاءالله هيكرمه بعدين


اما اذا كان الشخص كويس وهيجيب شبكة فزيادة الخير خيرين مش هنقول لا

ولازم نكون عارفين حاجة ان الفلوس عمرها ما بتصنع سعادة ..وياما ناس وافقت على ناس معاها فلوس وجابوا دهب وغيره بس فى الواقع عايشين فى تعاسة او معاهم فلوس وربنا خد منهم الصحة

فاحنا منطلبش من ربنا غير السعادة والصحة والرضا

[نور الحياة]

لو بيحبنى هشتريه حتى لو ممعهوش حتى غير دبله واحدة
مشكلة انك تلاقى حد يحبك ويبقى عايز يجيبلك نجمة من السما
بس فين الكلام دة (فين الحب وفين السعادة)معتقدش انه بقا موجود خلاص
بس لو حصلت المعجزة فانا موافقة وهقف جمبه كمان

[Amira Said]

أيوة هوافق طالما ظروفه كده، أنا قيمتي مش بالدهب أبدا ولا الزوج قيمته بالفلوس

انا زوجي جابلي شبكة حلوة وكل حاجة والدهب كان غالي برضه، بس انا وأهلي مكنش فارق معانا حجم الشبكة خالص ولو مكنش معاه غير تمن خاتم واحد كنت هوافق بيها عادي ومش هبقى مضايقة ولا هنتظر دهب بعد الزواج

الانسان الكويس سواء ولد أو بنت ميتقدرش بمال

[محمد سمير]

و أصلا أكيد لو جوزي احتاج الشبكة دي بعد الجواز مشروع أو شقة أو حتة ارض مثلا اكيد هديهاله يعني قصدي انها فوس متحوشة يعني مش هتترمي

طب بدل ما يستلف ويجيب الشبكه ويرجع بعد الجواز ياخدها ويبيعها عشان يسد ديونه

يبقى بلاش يجيبها من الاول وهو مديون

ويبقى يجيبها ان شاء الله بعد ما تتجوزوا لما الظروف تتحسن

لو اتنين بيحبوا بعض أوي و هو اتقدملها يبقي البنت ساعتها غبية لو مش اتنازلت لان صعب دلوقتي الواحد يلاقي حد بيحبه

مظبوط

ان بعض البنات بتكـون مقدرة كل اللى حضرتك بتقولـه دا ومقتنعـة بيه بل مش عايزة غير الدبـلة بس طالمـا الشخص كويس


عشـان كده البـنت تفتـح مع اهلهـا موضوع الشبـكة دى وتعرض رغبتهـا ووجهـة نظرهـا

ما هو المشكله فى الاهل

وهو انتى يابنتى اقل من بنت فلان

ده عريسها جايبلها شبكه ب 20 الف
يابت ياعبيطه احنا عارفين مصلحتك

بس الواحد بيكون مقدر موقف الاب والام

عاوزين يكونوا مطمنين على بنتهم

وربنــا يهدى الجميـع ويرزقنـا السعـادة وراحـة البـال دى اهم حـاجة بجـد

اللهم امين