تقييم قسم الصيدلانيات

[Amira]

بسـم الله الرحمـن الرحيــم
والصلاة و الســلام على أشــرف المرسلــين ... محمد عليه أفضل الصلاة وأتم التسليم

أولا ألـــف مبـــروك على النتيجه

إن شاء الله نعـوض كلنا فى التــرم التانى
ثانيـا الموضوع ده خـاص بتقييمنا لقسم الصيدلانيــات ....تقريبا دى اكتر ماده الدرجات نازله فيها عند معظم الناس

يــاريت لو كـل واحد يقول رأيه فى المـاده والقسم عموما بصــراحه

وان شاء الله كل آراءنا هتتطبع وتــوصل لإداره الكليه

اهم حاجه الالتزام بآداب الحــوار

[N00R EL _SHAMS]

ما بلاش نقول راينا الوقتى يا اميره

عشان منخرجش عن شعورنا

وهنقول كلام نندم عليه تانى

[د.نونا]

بصراحه قسم سىء والمعيدين مش كويسين خالص الا من رحم ربى وبيعاملوا الطلبه بطريقه مش كويسه خالص وع طول مكشرين وخصوصا اتنين كدا مالهمش حل

[أمــ هـنـد ــة الله]

ماينفعش ان اكتر من نص الدفعة شايلهـا إن مكنش أكتر

لاعملى ولا نظرى كانو كويسين

قولنا كل دا هيتظبط فى التصحيح ويرأفو بينـا لكن ماحصلش

حرااااااام بجد عليهم

[dodii]

من اسوأ اقسام الكليه في طريقة معاملة الطلبه
كل دكتور يدرسنا من واحنا ف تانيه يقضيها معانا تحدي وبعدين المعيدين صعبين جدا وطريقتهم نفسي تتغير معانا
ده طبعا غير امتحانات السنه دي العجيبه سواء في العملي او في النظري
القسم ده عايز تعديل جزري وربنا يهدي

[asfourelgana]

ربنا يوفقكم يا جماعه ومعلش

القسم فعلا كان مزودها معاكم شوية السنه دي

بس ان شاء الله تتعوض الترم التاني

لأن الصيدلانيات احلى ان شاء الله

وربنا يوفقكم

[lavandula]

مش هقدر اقول غير حسبى الله ونعم الوكيل

[مهداه]

ربنا يوفقكم يا جماعه ومعلش

القسم فعلا كان مزودها معاكم شوية السنه دي

بس ان شاء الله تتعوض الترم التاني

لأن الصيدلانيات احلى ان شاء الله

وربنا يوفقكم

يتعوض فين بقى؟
مش دى الماده اللى كنتوا بتقولوا متبوصلهاش الا قبل الامتحان
بجد ومن قلبى
حسبى الله ونعم الوكيل
فى كل حد فى القسم ده ظالمنا

[marooo]

الحقيقه اللى الكل لازم يكون عارفاها ان الصيدلانيات المفروض انها كانت تتاجل احنا مذاكرناش صيدلانيات زى بقيت المواد ده اولا
ثانيا : ربنا يخليه دكتور حمدى جاب امتحان غريب من بين السطور اللى هى مكنتش نافعه مع المذاكرة اللى اتذاكرت
ثالثا : دكتوره محاسن ربنا يخليها برضه جابت مسائل عجيبه وماسكه جزء واحد فى المنهج وكمان تعليم بالمينص
رابعا: ده كله كوم وان هموا ماراعوناش فى التصحيح خالص

[Aésmaïl]

قبل م اقول رأى

كان فيه سؤال كنت بحب اسأله لنفسى على طول

لما الاقى دكتور بيرخم علينا .. او معيد حابب انو يفرض سيطرتو علينا

هم ليه بيعملو كده ؟؟!!!

.....

فى البدايه كده .. لو كان فيه تقييم " حقيقى " للأقسام ..

هنلاقى ان قسم الصيدلانيات اردأ قسم عندنا فى الكليه ..

ابتداءا بالتعامل مع الطلبه مرورا بتروع الدفعه بأكملها عشان فعل فردى من احد الطلبه

زمايلو ملهمش دخل فيه ..

أما بالنسبه للكواليس داخل السكاشن بقى ..

الكل يعرفها لأن الكل اكيد " اخدلو من الحب جانب "

*سواء بإقصائو من المعمل عشان اتأخر دقيقه .. او دخل ورا المعيد

*و انو اشتغل كويس فى المعمل .. وراح للدكتور يديلو الدرجات

لقى الدكتور مديلو 5 من 10 ... ليه كده يا دوك دنا شغال كويس ..

فالدكتور بكبرياء : دا يبنى اللى عندى .. تحب تاخد صفر ..

* بسبب الإختراع الجديد اللى اسمو الغياب فى محاضره الشرح ..

" على اساس اننا فى مدرسه ابتدائى .. وبينادو الغياب عشان يدو للطلبه التغذيه "

فى الحاله دى بياخد الصفر .. حتى لو اشتغل كويس جدا فى المعمل ..

ولو اتكلم مع الدكتور ... يقولو تحب ننادى للدكتور (...)

* او بقى ان الدكتور (....) يمر فى السكشن .. ويسأل سؤال لأحد الطلبه

اصلا من بره المنهج .. ولما ميجاوبش يقول للمعيد هاتلى اسمو فى ورقه .. ؟؟

هو الطالب لازم يكون عارف كل المعلومات .. فى ظل النظام المنهجى المرقع بتاع الكليات دا !!

اخيرا بقى

النتيجه وحدث ولا حرج !!!
" زى ما انتم شايفين "

:: الحاجه الوحيده الكويسه اللى شوفتها السنه دى فى القسم دا .. ان الكتب مش بالإكراه زى قسم العقاقير
اللى ان شاء الله هيبقى عليه الدور .

ياريت الإداره تشوف مشاكلنا .. وتبتدى بحلها ..
وياريت مفيش حد يحجر على رأى حد .. او يحاول انو يكمم افواهنا ..
لأن اى مخطىء مهما كان .. لازم ياخد عقابه ..